Studeri a buku San Bijbel e leri wi trutru? nanga prisiri
1 Wan span pisi fu a „Gi yesi na Gado” Distrikt Kongres ben de di wi kisi a buku San Bijbel e leri wi trutru? Heri esi wi sa gebroiki a buku disi furu na ini a diniwroko fu wi, spesrutu te wi e hori oso-bijbelstudie. Fu dati ede, a de fanowdu taki wi kon sabi heri bun san skrifi na ini a nyun publikâsi disi. Wi o kisi na okasi fu du dati, bika na ini a wiki fu 17 april 2006, wi o bigin studeri a buku disi na a Gemeente Bukustudie.
2 A Gemeente Bukustudie-opziener sa poti prakseri na den aksi di de na a bigin fu ibri kapitel. Baka dati, a o gebroiki den aksi na ondrosei fu den bladzijde fu hori a studie moro fara. A sa leisi den prenspari bijbeltekst èn a sa taki fu den. A faki „San Bijbel e leri wi”, di de na a kaba fu ibri kapitel, sa yepi wi fu luku baka san wi leri, bika a abi den Bijbel piki tapu den aksi di de na a bigin fu a kapitel. Yu sa prisiri fu gi piki, fu di a buku disi e taki sani na wan krin èn makriki fasi, èn sosrefi na wan fasi di e hari sma prakseri.
3 A pisi di nen „Tra prenspari sani”, di de na bakasei fu a buku disi, e taki finifini fu difrenti tori. Wi sa man gebroiki den tori disi te a bijbelstudenti wani sabi moro fu wan spesrutu tori. Son leisi na a Gemeente Bukustudie, wi sa taki fu son pisi fu den tra prenspari sani disi. A sma di e leisi na a bukustudie, musu leisi a heri pisi di e taki fu wan prenspari sani, ma den langa artikel a sa musu leisi na ini difrenti pisi. A pisi „Tra prenspari sani” no abi aksi fu gi leri. Ma na owruman kan poti aksi gi den arkiman fu tyari den moro prenspari penti kon na krin.
4 Wi sa studeri a Bijbel leri-buku gawgaw na a Gemeente Bukustudie. Ma disi no wani taki dati wi abi fu studeri en gawgaw nanga tra sma, spesrutu te den sma no sabi furu fu Bijbel (Tori. 26:28, 29). Te wi e hori oso-bijbelstudie, dan wi o abi fu taki finifini fu den bijbeltekst, wi o abi fu tyari kon na krin san den prenki, den agersitori, nanga tra sani wani taki. Sobun, poti en leki wan marki fu go ala wiki na a studie fu a buku San Bijbel e leri wi trutru? èn meki muiti fu abi wan prati na a studie dati.