Gebroiki a Bijbel leri-buku moro bun

Te wan Bijbelstudenti e kon sabi san Bijbel e leri trutru èn te a e du den sani di a leri, dan a o go na fesi èn a o kisi wan tranga bribi (Ps. 1:1-3). Wi kan yepi wi studenti fu go na fesi te wi e gebroiki den difrenti sani fu a Bijbel leri-buku na wan moro bun fasi.

Den aksi na a bigin fu ibri kapitel: Ibri kapitel abi aksi na a bigin di e kisi piki na ini a kapitel. Te yu poti den aksi disi sondro fu piki den wantewante, dan a studenti o wani kon sabi moro. Wan tra sani di yu kan du, na fu aksi en fu gi wan syatu piki tapu ibriwan fu den aksi disi. Efu a gi wan fowtu piki yu no abi fu sori en wantewante taki a no piki bun. Den sani di a taki o yepi yu fu sabi sortu tori yu musu fruklari moro bun gi en èn na sortu tori yu musu poti moro prakseri.​—Odo 16:23; 18:13.

Tra prenspari sani: Efu a studenti e frustan den tori na ini den paragraaf èn a e bribi den tu, dan yu kan gi en deki-ati taki ensrefi kan leisi moro fu den tori dati na a pisi „Tra prenspari sani”. A tra leisi te yu o studeri nanga en, yu kan teki wan tu miniti fu taki fu den sani dati so taki yu kan kon si efu a e frustan a tori. Ma son leisi a moro bun gi en te yu e teki ten na a studie fu taki fu den tori di skrifi na a pisi „Tra prenspari sani”. Te yu e du dati, dan yu kan leisi den paragraaf èn poti aksi di yu ben sreka kaba.

A faki fu luku baka san wi leri: Na a kaba fu ibri kapitel wan faki de fu luku baka san wi leri. Den sani di skrifi na ini a faki disi na den piki tapu den aksi di de na a bigin fu a kapitel. Yu kan gebroiki a faki disi fu si efu yu studenti e frustan den moro prenspari penti bun èn fu si efu a man fruklari den tori dati. Leisi ibriwan fu den penti makandra nanga en èn sosrefi den Bijbeltekst di skrifi drape. Baka dati, aksi yu studenti fu gebroiki den Bijbeltekst fu sori fu san ede a sani di skrifi drape tru.​—Tori 17:2, 3.