Kakafoetoe gi a tjalensi foe na oso-foe-oso wroko
1 A prakseri foe go oso-foe-oso, foe go na vreemde sma oso, sori wan troetroe tjalensi gi foeroe sma di leri a soifri anbegi. Ma opregti lobi gi Jehovah e jepi wan sma foe kakafoetoe gi a tjalensi disi èn srefi den wan di lobi firi sjen srefisrefi go na fesi, foe doro a penti foe tron wan foeroe ten preikiman foe a boen njoensoe.
2 Bijbel e sori krinkrin taki den fosi kresten ben prati a boen njoensoe foe Gado Kownoekondre foe di den ben e go oso-foe-oso (Tori. 5:42; 20:20, 21). Leki krestensma ini a di foe 20 jarihondro disi, wi toe e teki prati ini a wroko disi. A lobi foe wi gi Gado èn gi a sma na wi sei e boeweigi wi foe doe a wroko disi, srefi te wi e kisi foe doe nanga mi-no-ke fasi, mandi, te sma e wisiwasi wi, noso langalanga gens.
3 San a kakafoetoe gi tjalensi e doe: Ibri joeroe te wi e go na wan sma doro, wi e doe moeiti foe sai wan toe siri foe waarheid, foe di wi sabi taki te foe kaba den bakapisi, di e kon moro foeroe, kan de a gi foe Kownoekondre froktoe (Preik. 11:6). Den situwâsi foe sma e kenki. Wan sani kan pasa, di ben kan meki na ososma denki foe san wan foe wi ben taki na a doro, èn kande a tra leisi a sa de klariklari foe arki moro.
4 Wi oso-foe-oso diniwroko e gi sma di lobi waarheid nanga regtfardikifasi, na okasi foe leri foe Jehovah èn en prakseri, poti den tapoe a pasi di e go na a libi foe têgo. Den sma di e feti na baka a prisiri foe grontapoe, so boen e kisi warskow na wan lobifasi, taki den moesoe foe kenki, foe den kan njanboen foe a boen di Jehovah e feni den boen. A diniwroko disi so srefi e meki sma kon sabi a nen foe Jehovah èn e gi en grani, awansi den ososma e arki noso no e arki.—Es. 3:11.
5 A wroko di wi e doe ini a diniwroko, e jepi wi foe kweki den froktoe foe a jeje, so leki lobi di no e soekoe en eigi boen nomo, prisiri, vrede nanga langa pasensi (Gal. 5:22). A e jepi wi foe abi sakafasi èn abi firi gi trawan, foe di a wani taki toe foe doe boen gi trawan. Efoe wi abi foeroe foe doe ini a wroko foe Jehovah, dan dati e jepi foe kibri wi foe a grontapoe.—1 Kor. 15:58.
6 Jepi foe kakafoetoe gi a tjalensi: Den njoen wan moesoe leri fa foe teki prati ini a moro span wroko disi. Nofotron den e mankeri froetrow èn soso a prakseri foe go oso-foe-oso foe dati ede kande e meki den las-ati. Wi kan taki nanga den foe genstaki di den sma gwenti foe taki, èn san wi ben kan piki den. Wi kan oefen foe gebroiki son wan foe den moi prakseri ini a Taki-go-taki-kon-boekoe foe man piki den genstaki. Foe san ede joe no pristeri foe jepi den foe sreka gi a velddienst? Den kan kisi foeroe jepi toe foe di den e fisiti den velddienst konmakandra doronomo èn e wroko baka dati nanga den preikiman di abi moro ondrofeni. Wroko nanga wan groepoe kan gi joe foeroe tranga.
7 Te wi e go oso-foe-oso, dan wi abi a grani foe teki presi gi wi Gado, Jehovah. Foe taki en leti, sortoe moro bigi grani wan sma ben kan abi, leki foe de wan kompe wrokoman foe Gado? (1 Kor. 3:9) Efoe wi e froetrow na en tapoe, dan en jeje sa jepi wi foe kakafoetoe gi a tjalensi foe na oso-foe-oso diniwroko.—2 Kor. 3:5.