Pionierwroko — Na wan sani gi joe?
1 „Mi no man prakseri taki mi e doe wan tra sani. Foe troe, mi no man prakseri no wan tra sani di ben sa kan tjari a srefi prisiri.” Soema ben taki disi? Wan foe den hondrohondro doesoen Jehovah Kotoigi di meki a foeroeten diniwroko tron a prisiri libiwroko na ini a libi foe den. Joe prakseri na ondro begi efoe a pionierwroko na wan sani gi joe? Foe di wi gi wisrefi abra na Jehovah sondro foe poti kondisi, dan seiker wi moesoe loekoe efoe wi no sa man abi wan moro bigi prati foe panja a boen njoensoe foe a Kownoekondre. Nanga a marki dati na prakseri, dan grantangi loekoe wan toe aksi di foeroe sma e poti foe a pionierwroko.
AKSI 1: „Son sma e taki dati pionierwroko a no gi ibri sma. Fa mi sabi efoe a de wan sani gi mi?”
2 A piki didon na den situwâsi èn den bijbel froeplekti foe joe. Foeroe sma de di a gosontoe noso den aladei situwâsi foe a libi foe den no e gi den pasi foe gi 90 joeroe wan moen na a diniwroko. Teki foe eksempre den foeroe getrow sisa di de kresten wefi nanga mama. Den e teki prati na a diniwroko someni tron leki den kan, te so fara leki den situwâsi foe den e gi pasi gi dati. Te den e kisi na okasi, dan den e doe jepi-pionierwroko wan moen noso moro ibri jari, ala di den e koti den prisiri di e kon foe di den e bradi a prati di den abi na a wroko (Gal. 6:9). Ala di den situwâsi foe den no e gi den pasi foe den dini leki foeroeten pionier nownow, tokoe den e meki a pionier jeje go na fesi èn den de wan blesi gi a gemeente leki fajafaja preikiman foe a boen njoensoe.
3 Na a tra sei, foeroe brada nanga sisa di de moro fri foe froeplekti meki presi gi a pionierwroko foe di den kenki san de moro prenspari èn den poti dati na a fosi presi. Fa a de nanga joe? Joe na wan jongoewan di kaba nanga joe grontapoe skoro? Joe na wan wefi di en masra man sorgoe na wan boen fasi gi na osofamiri? Joe trow èn joe no abi pikin di joe moesoe sorgoe gi den? Joe de nanga pensioen foe joe grontapoe wroko? Foe doe pionierwroko noso foe no doe pionierwroko na wan bosroiti di ibri sma aparti moesoe teki gi ensrefi. Na aksi de, joe kan meki presi ini joe libi foe go doe a pionierwroko?
4 Satan e gebroiki en grontapoe seti foe sani foe meki wi libi kon foeroe nanga sani di e poeroe wi prakseri èn foe meki wan fasi foe libi pe wi e denki wisrefi nomo, teki wi abra. Efoe wi abi a fasti bosroiti foe no tan wan pisi foe grontapoe, dan Jehovah sa jepi wi foe tan poti Kownoekondre afersi na a fosi presi èn foe meki moeiti èn teki ala den grani foe a theokrasia wroko di de foe kisi. Efoe joe kan seti den situwâsi foe joe na so wan fasi taki joe kan dini leki wan pionier, foe san ede joe no e doe so?
AKSI 2: „Fa mi kan de seiker taki mi sa man sorgoe misrefi na moni sei na ini a foeroeten diniwroko?”
5 A de troe taki na ini foeroe kondre den joeroe foe grontapoe wroko, di de fanowdoe foe kan kisi den fondamenti sani di sma abi fanowdoe ini a libi, kon moro foeroe na ini den jari di pasa. Tokoe foeroe doe pionierwroko someni tenti jari kaba èn Jehovah e go doro foe horibaka gi den. Foe abi boen bakapisi leki pionier, dan joe moesoe abi bribi èn a jeje foe òfer joesrefi (Mat. 17:20). Wi abi a djaranti na ini Psalm 34:10 taki ’denwan di e soekoe Jehovah no wan boen sani no sa mankeri den’. Ibriwan sma di e go doe a pionierwroko moesoe doe dati nanga ala froetrow taki Jehovah sa sorgoe taki a kisi sani. Dati na soifri san a e doe gi getrow pionier na ala sei! (Ps. 37:25) A no de foe taki, dati akroederi den gronprakseri di skrifi na ini 2 Tesalonikasma 3:8, 10, nanga 1 Timoteus 5:8, dan pionier no e froewakti taki tra sma o sorgoe gi den na moni sei.
6 Ibriwan sma di e prakseri foe doe pionierwroko moesoe doe fosi san Jesus ben taki: „Sidon fosi foe teri den kostoe” (Luk. 14:28). Te joe e doe disi dan joe e sori praktis koni. Taki nanga den wan di doe a pionierwroko foeroe jari kaba nanga boen bakapisi. Aksi fa Jehovah horibaka gi den. Joe kringopziener na wan pionier nanga foeroe ondrofeni di sa prisiri foe gi joe rai foe a fasi fa joe kan doe foeroeten diniwroko nanga boen bakapisi.
7 Wan sma noiti no sa ondrofeni krinkrin o troe a pramisi foe Jesus de na Mateus 6:33 te leki a poti ensrefi na ini den anoe foe Jehovah. Wan getrow pionier sisa ben froeteri: „Di mi patna nanga mi ben doro ini wan njoen toewijzing leki pionier, wi ben abi pikinso groentoe nomo, pikinso botro èn wi no ben abi moni. Wi njan ala a njanjan foe a mofoneti èn wi ben taki: ’Now wi no abi noti gi tamara.’ Wi ben begi Gado foe a tori dati èn wi ben go na bedi. A tra mamanten froekoe wan Kotoigi foe a presi drape kon na wi èn a kari en nen gi wi èn ben taki: ’Mi ben begi taki Jehovah ben sa seni pionier kon. Now mi kan wroko nanga oenoe a moro bigi pisi foe a dei, ma bika mi e libi na boiti, mi wani njan brekten njanjan nanga oenoe, foe dati ede mi tjari a njanjan disi kon nanga mi gi wi alamala.’ A ben de foeroe meti nanga groentoe.” A no de foe froewondroe taki Jesus ben gi wi a djaranti taki wi ben kan ’tapoe foe broko wi ede nanga wi sili’! Baka ten a taki toe: „Soema foe oenoe kan poti wan èl na en libiten, foe di a e broko en ede?” — Mat. 6:25, 27.
8 A grontapoe di de lontoe wi e kon lobi materia goedoe moro nanga moro. A e tjari druk di e kon moro nanga moro kon na wi tapoe foe meki wi kon de so toe. Ma efoe na wan saka fasi wi e warderi a foeroeten diniwroko, dan dati e meki wi de tevrede nanga moro mendri na materia sei (1 Tim. 6:8). Pionier di e hori a libi foe den eenvoudig èn nanga orde abi moro ten gi a diniwroko èn den e kisi moro foeroe prisiri nanga jeje krakti foe di den e leri trawan a waarheid. Ala di den no e proeberi foe libi wan libi leki wan asceetsma, tokoe a balansi fasi fa den e doe sani na a sei foe den ekonomia situwâsi ben meki taki den kan njanboen foe den blesi foe doe a pionierwroko.
9 Efoe joe e froestan krin taki wi e libi na ini den lasti dei èn taki ten e lon gowe libi na owroe seti foe sani disi, dan na jejefasi sani sa boeweigi joe foe tjari den òfer di de fanowdoe foe preiki a boen njoensoe na ibri okasi. Te joe sa loekoe joe ekonomia situwâsi agen èn e poti na afersi na ini na anoe foe Jehovah, dan joe kan kon si taki joe kan dini en foeroeten. Srefi efoe joe sa abi foe libi wan toe materia sani di joe e winsi, so taki joe kan doe a pionierwroko, dan joe sa njanboen foe den bigi blesi foe Jehovah. — Ps. 145:16.
AKSI 3: „Foe san ede mi leki wan tini moesoe go loekoe a pionierwroko leki wan sani di mi kan teki leki mi libiwroko?
10 Ala di joe e kaba den lasti jari foe joe skoroten, a no de tra fasi taki joe e denki foe a tamara. Joe wani taki a moesoe de seiker, kolokoe èn a moesoe de leki fa joe wani en. Den skoro raiman kande sa proeberi foe tiri joe go foe teki wan libiwroko di no de seiker èn di e aksi foe joe foe go teki someni jari ete foe heiskoro leri. Joe kresten konsensi di oefen boen e taigi joe taki joe moesoe sreka foe dini Jehovah so foeroe leki a kan (Preik. 12:1). Kande joe e prakseri toe foe trow te foe kaba èn foe abi wan osofamiri. San joe o doe?
11 Den bosroiti di joe e teki na a ten disi foe joe libi kan seti joe heri tamara. Efoe joe de wan Kotoigi foe Jehovah kaba di gi ensrefi abra èn teki dopoe, dan joe gi joesrefi nanga joe heri sili na Jehovah (Hebr. 10:7). Proeberi foe go ini a jepi-pionierwroko foe wán noso moro moen so esi leki joe kisi na okasi. Disi sa meki joe tesi den prisiri nanga frantiwortoe di e kon nanga a gewoon pionierwroko, èn sondro tweifri a fasi fa joe e prakseri foe san joe moesoe doe nanga joe libi sa kon moro krin gi joe. Foe san ede joe no e bigin nanga a gewoon pionierwroko, na presi foe go doe grontapoe wroko foeroeten, baka te joe kaba skoro? Son sma di wakti foe bigin baka ten nanga a pionierwroko e sari taki den no ben bigin moro esi.
12 Meki gebroiki leki wan jongoe sma foe na grani di joe abi foe kan feti baka a de di joe de joe wawan, èn njanboen foe den winimarki di a foeroeten preikiwroko e gi. Efoe joe abi a firi foe trow wan dei, dan joe no ben sa kan poti wan moro boen fondamenti gi a trowlibi leki te joe e dini fosi ini a gewoon pionierwroko. Ala di joe e gro ini bekwaamfasi nanga jejefasi, joe kan froekisi foe meki a pionierwroko tron joe libiwroko nanga wan trowpatna di abi a srefi fasi foe denki. Son trowpaar di pionier makandra go na ini a kringdienst noso zendingwroko. Wan troetroe fasi foe libi di e gi satisfaksi!
13 A no abi trobi o langa joe e go doro foe doe a pionierwroko, joe sa kisi skoro na ala sei èn joe sa kisi troetroe warti leri di no wan tra sortoe wroko na grontapoe kan gi joe. A pionierwroko e gi tranga leri, e leri joe foe orga joesrefi, fa foe handri nanga sma, foe froetrow tapoe Jehovah èn fa foe kweki pasensi nanga switifasi — eigifasi di sa meki joe kon de boen foe kisi moro bigi frantiwortoe.
14 Noiti bifo libi ben de so sondro seikerfasi gi a libisma famiri. Wan toe sani nomo e tan troetroe, na sei den sani di Jehovah pramisi. Foe di a tamara foe joe tanapoe so na joe fesi, dan sortoe moro boen ten de leki now foe meki joe prakseri go serjoesoe na san joe o doe nanga joe libi ini den jari di de na joe fesi? Prakseri a grani foe doe pionierwroko boen. Noiti joe no sa sari taki joe teki a pionierwroko leki joe libiwroko.
AKSI 4: „A no de wan doronomo kwinsi foe doro den joeroe di joe moesoe doro? Fa dan efoe mi e tan na baka nanga mi joeroe?
15 Te joe e poti joe nen tapoe wan formulier foe de gewoon pionier, dan joe moesoe piki na aksi: Joe orga joe eigi afersi so taki joe kan froewakti na wan reidelek fasi foe doro den 1000 joeroe wan jari di den e aksi foe joe doro? Foe kan doro den dan joe moesoe kan wroko so wan 3 joeroe ibri dei ini a velddienst. A de krin taki, disi e aksi taki joe moesoe abi wan boen schema èn foe hori joesrefi na en. Moro foeroe foe den pionier e bow wan praktis schema di den kan wroko nanga en na ini wan toe moen.
16 Ma Preikiman 9:11 e taki nanga waarheid: ’Ten nanga sani di e pasa èn di sma no sabi na fesi, e miti wi alamala’. Tranga siki noso tra situwâsi di joe no sabi na fesi kan meki wan pionier tan na baka nanga den joeroe di a moesoe doro. Efoe a problema no e tan foe langa ten èn a e feni presi froekoe ini a dienstjari, dan wan schema pe joe e wroko moro joeroe kan de ala san de fanowdoe foe joe kan wroko a ten baka, di joe lasi. Ma fa dan efoe serjoesoe problema kon nanga soso wan toe moen ete ini a dienstjari èn a pionier no man wroko a ten baka di a lasi?
17 Efoe joe siki nomo foe wan pisi ten foe wan toe moen nomo noso foe wan toe serjoesoe reide ede joe no man doro den joeroe di joe moesoe doro, dan joe kan go na wan memre foe a dienstkomte foe a gemeente èn froeklari a problema. Efoe den owroeman disi e prakseri taki a ben sa de wan koni sani foe gi joe pasi foe tan ini a pionierwroko sondro taki joe e broko joe ede foe wroko foe doro a ten di joe lasi, den kan teki a bosroiti dati. A sekretarsi sa poti wan marki na tapoe a Bericht foe gemeente preikiman foe sori taki joe no abi foe wroko foe doro a ten di joe lasi. Disi a no verlof di joe abi, ma moro foeroe wan spesroetoe hori di den hori joe situwâsi na prakseri. — Loekoe na inlegvel foe Wi Kownoekondre Dienst foe september 1986, paragraaf 18.
18 Pionier di abi ondrofeni e meki moro foeroe joeroe froekoe-froekoe na a bigin foe a dienstjari. A pionierwroko foe den e kon na a fosi presi, so taki son ten den e feni en fanowdoe foe koti ten poeroe foe aktiviteit di no de prenspari. Efoe wan pionier e tan na baka nanga en joeroe foe di a schema foe en no de so boen noso a no e hori ensrefi serjoesoe na en, dan a moesoe firi taki na en frantiwortoe foe a doro den joeroe di a lasi èn taki a no kan froewakti dati den e hori en situwâsi spesroetoe na prakseri.
19 Ten de te wan pionier e ondrofeni kenki ini den situwâsi foe en èn a no kan doe noti na dati. A kan feni taki wan langa pisi ten a no sa man doro den joeroe di a moesoe doro foe di a abi wan problema na a sei foe en gosontoe di no e stòp, noso famiri frantiwortoe di e kon moro bigi èn so moro fara. Ini a kefal disi, dan a ben sa de wan koni sani foe drai tron wan preikiman baka èn teki prati awansi o ten a kan na a jepi-pionierwroko. No wan fasti seti de di e gi pasi foe meki wan sma tan tapoe a pionier lijst efoe den situwâsi foe en no e gi en pasi moro langa foe a doro den joeroe di a moesoe doro.
20 Wi e howpoe taki a seti foe hori spesroetoe den sma na prakseri di e doro den markitiki, sa gi moro sma deki-ati foe gi den nen gi a pionierwroko sondro foe den abi foe broko den ede foe soso. A sa gi den sma di de na ini a foeroeten wroko kaba, deki-ati foe go doro nanga a pionierwroko. Wi wani taki sani waka boen nanga den pionier ini a foeroeten wroko foe den.
AKSI 5: „Mi wani doe wan sani èn mi wani abi prisiri foe doe en. A pionierwroko sa gi mi satisfaksi?”
21 Troetroe kolokoe e anga foeroe foe wan krosibei matifasi di wisrefi abi nanga Jehovah èn na overtoigi taki wi e dini en na wan getrow fasi. Jesus ben hori doro na wan pina-oedoe „foe a prisiri ede di ben poti na en fesi” (Hebr. 12:2). A kolokoe foe en ben kon foe di a ben doe a wani foe Gado (Ps. 40:8). Na ini a seti foe sani foe a ten disi, wi kan njanboen foe troetroe kolokoe efoe a moro bigi pisi foe den wroko ini wi libiten abi foe doe nanga wi anbegi foe Jehovah. A feti na baka jeje sani e gi wi wan firi taki wi sabi san na a marki ini wi libi bika dipi na ini wi ati wi sabi taki san wi e doe, boen. Kolokoe e kon foe di wi e gi, èn wi no sabi no wan moro boen fasi foe gi wisrefi leki foe leri tra sma fa foe kisi têgo libi ini Gado en njoen grontapoe. — Tori. 20:35.
22 A pionier di wi ben taki foe en na ini a fosi paragraaf, ben froeklari en so: „Wan moro bigi prisiri kan de dan, leki foe si wan sma di joe studeri nanga en e tron wan aktief prèiseman foe Jehovah? A de wan bigi prisiri èn wan sani di e tranga a bribi foe joe te joe e si omeni krakti a Wortoe foe Gado abi foe meki sma tjari kenki kon na ini den libi, so taki den kan plisi Jehovah.” (Loekoe A Waktitoren foe 15 oktober 1997, bladzijde 18-23.) So boen, san e tjari kolokoe gi joe? Efoe na presi foe a sjatoe prisiri di a grontapoe e pristeri joe, joe e si a waarde foe den sani di o tan ala ten, èn di warti foe joe feti na den baka, dan a pionierwroko sa gi joe wan heri boen firi taki joe doe wan sani èn dati sa meki joe de kolokoe troetroe.
AKSI 6: „Efoe a no de wan sani di moesoe meki joe kisi têgo libi, dan a no wan sani di misrefi kan teki a bosroiti efoe mi e pionier noso no e pionier?”
23 A de troe, taki a bosroiti foe pionier de na joe. Jehovah wawan kan kroetoe joe eigi situwâsi foe libi (Rom. 14:4). Nanga reti a e froewakti taki joe e dini en nanga joe heri ati, sili, prakseri nanga krakti (Mark. 12:30; Gal. 6:4, 5). A lobi wan sma di e breiti foe gi sani, di e dini en nanga prisiri, no nanga knoroe noso nanga dwengi (2 Kor. 9:7; Kol. 3:23). A reide foe san ede joe moesoe dini Jehovah foeroeten moesoe de taki joe lobi Jehovah nanga den sma na ini a gebied (Mat. 9:36-38; Mark. 12:30, 31). Efoe disi na a fasi fa joe e firi, dan a pionierwroko e froedini taki joe go prakseri dipi foe en.
24 Wi e howpoe taki san taki djaso sa jepi joe foe go wegi efoe joe man go doe a pionierwroko. Joe kan fiti joe situwâsi na a gewoon pionierwroko? Na ondrosei wan kalender druk di nen „Mi alawiki schema gi pionierwroko”. Loekoe efoe joe kan meki wan praktis schema gi joesrefi di sa gi joe pasi foe abi so wan 23 joeroe ala wiki ini a diniwroko. Dan, poti ala joe bribi nanga froetrow tapoe Jehovah. Nanga a jepi foe en joe kan abi boen bakapisi! A pramisi: „Mi sa . . . kanti troetroe wan blesi kon na oenoe tapoe te leki no wan sani e mankeri moro.” — Mal. 3:10.
25 So boen wi e aksi: „Pionierwroko — na wan sani gi joe?” Efoe joe kan taki „Ija”, dan poti wan datum foe bigin heri esi leki wan gewoon pionier èn de seiker taki Jehovah sa blesi joe nanga wan libi di foeroe nanga prisiri!
[Schema na tapoe bladzijde 6 di e tyari sani kon na krin]
(Efoe joe wani si pe den sani disi skrifi, loekoe a Kownoekondre Dienst)
Mi alawiki schema gi pionierwroko
MOENDE: Mamanten velddienst
TOEDEWROKO: Mamanten velddienst
DRIDEWROKO: Mamanten velddienst
FODEWROKO: Mamanten velddienst
FREIDA: Mamanten velddienst
SATRA: Mamanten velddienst
SONDE: Mamanten velddienst
MOENDE: Bakadina velddienst
TOEDEWROKO: Bakadina velddienst
DRIDEWROKO: Bakadina velddienst
FODEWROKO: Bakadina velddienst
FREIDA: Bakadina velddienst
SATRA: Bakadina velddienst
SONDE: Bakadina velddienst
MOENDE: Mofoneti velddienst
TOEDEWROKO: Mofoneti velddienst
DRIDEWROKO: Mofoneti velddienst
FODEWROKO: Mofoneti velddienst
FREIDA: Mofoneti velddienst
SATRA: Mofoneti velddienst
SONDE: Mofoneti velddienst
Gebroiki potlood foe meki joe schema foe ala den dei foe a wiki
Meki schema foe wan totaal foe so wan 23 joeroe ibri wiki ini a velddienst.
Totaal joeroe foe ala wiki di de tapoe schema ․․․․․․․․․․․․․․․․․․․․