Joe kan doe moro foe gi Jehovah grani?
1 Dati na wan toemoesi prenspari aksi di wi alamala moesoe go prakseri pikinso. Leki getrow bakaman foe wi Masra, Jesus Krestes, wi e gi grani na wi Gado ini a ten disi foe di wi e meki en nen bekènti na poebliki. Disi na wan frantiwortoe di wi moesoe teki efoe wi wani taki Gado feni wi boen (Mark. 13:10; Luk. 4:18; Tori. 4:20; Hebr. 13:15). Fa disi na wan toemoesi moi wroko—ija, wan grani—foe tjari a boen njoensoe disi go na den „skapoe” di tan abra ete èn di panja na ala sei, ma di kan tron wan pisi ete foe na universeel ipi foe Jehovah!—Johanes 10:16.
2 Joe nanga den pikin foe joe kan doe moro foe gi Jehovah grani foe di joe e go doe moro ini a diniwroko? Moro nanga moro brada nanga sisa na heri grontapoe e teki a pionierwroko na den tapoe. Ini a moen april 1992, wan heimarki foe 661 ini Sranan, ben de ini a spesroetoe, gewoon nanga jepipionier dienst. Joesrefi ben prakseri serjoesoe foe go pionier? Joe e gi den pikin foe joe deki-ati foe feti na baka wan libiwroko ini a foeroeten diniwroko?
3 Foe san ede joe no e go denki fa joesrefi e firi gi a pionier dienst? So esi leki den taki foe na tori dati, joe de esi-esi foe kon na a bosroiti taki den situwâsi foe joe no e gi joe pasi foe dini leki wan pionier? A troe taki a no ala sma kan pionier. Frantiwortoe di gron tapoe bijbel èn tra sani, e skotoe foeroe sma foe wroko foeroeten (1 Tim. 5:8). Ma joe ben denki foe na afersi disi na ondro begi ini ten di pasa no so langa ete? Joe ben taki foe a tori disi leki famiri foe si efoe awansi wán memre nomo foe a famiri kan pionier? A Waktitoren foe 15 februari 1983, ben taki a sani disi di e meki joe go denki, tapoe bladzijde 7 ini paragraaf 7: „Ija, ibri kristen dinari foe Gado moe loekoe ondro begi ofoe en kan pionier ofoe no kan pionier. Wan man nanga oema ini Zuid-Afrika di e pionier kaba tinaféfi jari, ben taki: „Foe san-ede wi e pionier? Wi ben sa kan frantwortoe en gi Jehovah te wi no ben doe disi?” Foeroe sma di no de pionier, nanga leti ben kan aksi na aksi disi: ’Mi kan frantwortoe en troetroe gi Jehovah taki mi no de wan pionier?’”
4 Wan tra Waktitoren artikel di ben taki foe a tori ben taki a troe sani disi: „Ibriwan foe wi moesoe de eerlijk nanga ensrefi. Joe e taki: ’A jeje wani ma a skin swaki?’ Ma a jeje troetroe wani? Meki wi no gebroiki na swaki foe a skin leki wan pardon foe a wani di a jeje no wani.”—w78 15/8, bladzijde 23.
5 Papa nanga mama di wani taki den pikin moesoe abi boen bakapisi: Odo 15:20 e gi wi a djaranti: „Wan koni manpikin na en di e meki en papa prisiri.” Papa nanga mama di lobi Gado, e prisiri srefisrefi te den manpikin nanga oemapikin foe den e feti na baka wan libi foe dini Jehovah nanga den heri ati. Ma, foe densrefi, den pikin foe joe no sa teki a koni pasi disi. A hari di a grontapoe disi e hari den, tranga srefisrefi. Papa nanga mama, a fasi fa den pikin foe joe e denki foe sani, e anga foeroetron foe a fasi fa joesrefi de. Efoe alaten joe e taki boen foe den winimarki foe a foeroeten dienst, efoe joe e gi den jongoe pikin foe joe deki-ati foe soekoe demakandra nanga pionier di tan getrow someni jari, efoe joe sabi seiker taki a foeroeten diniwroko na a libiwroko di abi moro grani leki iniwan tra wroko di den pikin foe joe ben kan doe wan ten, dan sondro tweifri a positief fasi disi sa abi bigi krakti tapoe den pikin foe joe. Jepi den foe kon froestan o warti a de foe meki wan boen nen na Jehovah, na presi na libisma.
6 Jongoe sma, Odo 22:1 e taki krin foe na sei di joe moesoe teki: „Wan nen de moro boen foe teki leki goedoe pasa marki; a feni di sma feni joe boen moro betre leki solfroe nanga gowtoe srefi.” Sortoe nen joe sa meki gi joesrefi? Denki foe den man nanga oema foe soema wi e leisi na ini bijbel, di ben kon sabi Jehovah boenboen foe di den ben dini en nanga den heri ati. Joe ben abi Lukas, a datra di foeroe sma ben lobi, èn Heinok, di ben waka nanga a troe Gado. Samuèl ben kisi a moro boen skoro di wan sma ben sa kan kisi, foe di a ben bigin nanga en diniwroko gi Jehovah di a ben njofi ete. Joe denki taki den getrow foetoeboi disi oiti ben sari foe a sei di den ben teki? Foe san ede den ben sa doe dati? Den alamala ben libi wan kolokoe libi di ben lai nanga wroko di ben abi boen bakapisi èn di ben span srefisrefi. Èn Jehovah ben tan feni den boen!—Ps. 110:3; 148:12, 13; Odo 20:29a; 1 Tim. 4:8b.
7 Te pikin e meki den libi abi boen froktoe, dan den papa nanga mama ede e bigi srefisrefi. A poti di den poti ten foe oefen den pikin foe den, foe gi den tranga leri èn foe gi leri na a „famiri goedoe” disi „foe Jehovah”, e kisi pai foeroe tron baka (Ps. 127:3). San kan meki papa nanga mama ede kon moro bigi, leki wan man- noso oemapikin di e doe ala sani foe gi Jehovah grani? Foeroe jongoe sma ini a ten disi e waka baka Lukas, Heinok nanga Samuèl, so leki fa wan brifi e sori: „Mi abi 16 jari. Mi bigin nanga a gewoon pionierdienst . . . neigi moen baka di mi teki dopoe, èn Jehovah ben blesi mi foe sensi a ten dati . . . Te joe e pionier, dan dati e jepi joe na skoro toe. Fosi den skorokompe foe mi ben meki spotoe nanga mi foe di mi ben de wan Kotoigi. Now, sensi mi moesoe doe moro persoonlijk studie, mi man ’gi den wan di e spotoe mi wan piki.’”
8 Grontapoe leri di o jepi joe ini a diniwroko: Na a penti disi a boen foe wi go loekoe a penti foe grontapoe leri. Disi na wan kontren pe wan lepi fasi de fanowdoe foe loekoe a tori. Ini A Waktitoren foe 1 november 1992, den ben taki foe na artikel „Leri di gi nanga wan marki.” Ondro „Teki nofo leri” den ben tjari disi kon na fesi: „Kresten moesoe man sorgoe densrefi, srefi te den de foeroeten pionier bedinari (2 Tesalonikasma 3:10-12). . . . Omeni skoro wan jongoe kresten abi fanowdoe, so taki a man poti prakseri tapoe den bijbel gronprakseri disi èn doe en kresten froeplekti? San „fatsoendroekoe moni”, [nofo moni], wani taki . . . gi den wan di e winsi foe de pionier bedinari foe a boen njoensoe? Den wan dati moro foeroe abi pisi ten wroko fanowdoe foe tan farawe foe poti „wan lai di diri”, na den brada noso den famiri foe den tapoe.—1 Tesalonikasma 2:9.”
9 Efoe a pionier feni taki a abi ekstra skoro fanowdoe foe jepi en foe kan go ini a foeroeten diniwroko, A Waktitoren foe 1 november 1992 e gi na deki-ati: „Wan jongoe Kotoigi ben sa doe boen, efoe dati kan, foe teki disi, ala di a e libi na oso ete, so taki a man tan abi den normaal kresten studie gwenti, go na den konmakandra èn doe a preikiwroko.”
10 Wi abi a ondrofenitori foe Zuid-Afrika foe wan jongoe sma foe 22 jari di ben moesoe go na wan teknis skoro, ala di en ati ben de gi a pionier wroko. Ala di a ben de na a teknis skoro, a ben aksi foe dini leki jepipionier. Den speri foe en ben lafoe en, foe di den ben taki dati seiker a ben o saka gi den eksamen foe en. Ala ten a ben piki den: „Soekoe fosi Gado Kownoekondre èn en regtfardikifasi.” Foe di a ben kan dwengi ensrefi, dan ala mamanten a ben opo froekoefroekoe èn ben teki toe joeroe foe sreka en skorowroko èn ben teki prati na velddienst na bakadina te skoro ben komoto. A heri skoro ben froewondroe, di a jonkoeman disi ben kon tapoe a di foe dri presi ini wan spesroetoe eksamen foe teki den dri moro boen studenti foe gi den wan spesroetoe studiebeurs. A studenti di ben tron a di foe toe, ben de wan sma di ben abi belangstelling nanga soema wi pionier brada ben studeri bijbel na skoro. A studenti di ben tron a di foe wan, ben de wan tra fajafaja jongoe Kotoigi na a skoro.
11 Owroeman e doe den pisi: Gemeente owroeman, di e breiti nanga a wroko di den pionier e doe, e gi foeroe deki-ati na den fajafaja preikiman disi. Den owroeman e doe disi nanga prisiri, bikasi den sabi taki pionier di e wroko tranga èn di abi boen bakapisi na wan blesi gi ibri gemeente. Baka te den de wan jari ini a gewoon pionierwroko, dan a fiti foe den kisi ekstra training na a Pionier Diniwroko Skoro. A skoro disi ben sori taki a de wan toemoesi prenspari wroko jepisani foe meki den pionier kon abi moro boen bakapisi. Ala di den pionier e teki fesi ini a wroko, den toe abi deki-ati fanowdoe, di gi na wan lobi fasi, èn den owroeman moesoe de na ai foe sorgoe gi a fanowdoe disi.—1 Petr. 5:1-3.
12 Fa den owroeman kan horibaka gi a pionierwroko? Wan boen bigin sa de foe loekoe ten na ten, soema kande man feti na baka a grani disi. Owroeman kan go na aparti sma di sori taki den de ini wan boen posisi foe go pionier, so srefi foeroe di de ini a jepi pionierwroko doronomo, sma di de nanga pensioen, osowefi, nanga studenti. Ala di joe no moesoe meki no wan sma kisi a firi taki den froeplekti foe go pionier, dan tokoe den wan di abi na winsi ma di e draidrai kan kon si nanga pikinso praktis deki-ati, taki den man pionier.
13 Te owroeman e gi deki-ati na den wan di wani gi den nen foe pionier, den moesoe hori na prakseri dati a no de froeplekti taki a sma di e aksi foe de wan pionier moesoe de difrenti moen ini a jepipionier wroko bifo den rikomanderi en leki gewoon pionier (km 8/86 inlegvel, par. 24-26). A no de foe taki, dati den owroeman sa wani de seiker taki a preikiman de ini wan posisi foe miti den fanowdoe joeroe.
14 Baka te a Dienstkomte loekoe na aanvraagformulier èn a sekretarsi loekoe en finifini foe de seiker taki ala aksi kisi piki, den moesoe seni en wantewante na a Genootschap.
15 A sekretarsi moesoe meki den owroeman sabi ibri problema di den pionier e ondrofeni. Disi de spesroetoe prenspari ini gemeente pe foeroe pionier de. Boiti a loekoe foe den aktiviteit foe den pionier na a kaba foe a dienstjari, so leki fa a Analyse Raport (S-10) e aksi dati, a sekretarsi moesoe kari a dienstopziener foe miti nanga en biginbigin foe maart foe si soema de na baka foe doro den joeroe èn soema abi persoonlijk belangstelling fanowdoe (Loekoe Wi Kownoekondre Dienst foe februari 1993, Wan Toe Sani). Efoe den e gi jepi sondro foe draidrai, kande a pionier sa man tapoe a dienstjari nanga boen bakapisi.
16 Wan bigi nomroe foe den njoen pionier, jongoe ini jari èn no de so langa ini waarheid. A jeje foe den di wani e meki wi prisiri srefisrefi! Ma den njoen wan disi abi leri fanowdoe ete so taki den kan kisi koni ini a oso-foe-oso wroko, foe tjari gobaka di abi boen bakapisi èn foe gi leri na bijbelstudies. Efoe den no e kisi a leri disi, dan baka wan jari ofoe so a njoen pionier kan lasi deki-ati èn kan tapoe nanga a pionier wroko foe di a no abi boen bakapisi ini a diniwroko. Owroeman di de na ai kan si den pikin problema noso efoe a pionier e go doe en safrisafri. Efoe den e poti prakseri wantewante na a pionier èn e jepi en nanga en problema, a kan prisiri ini foeroe jari foe diniwroko nanga boen bakapisi.
17 Joe kan go fisi ini farawe watra?: Sonwan foe Jesus disipel ben de fisiman. Son tron, baka wan heri neti foe fisi, den net foe den ben leigi ete (Joh. 21:3). Ini son pisi foe a kondre disi pe a, fisiwroko foe libisma, ben go doro someni jari kaba, son pionier kan bosroiti dati pikinso „fisi” tan abra ini den „watra” foe a gemeente foe den (Mat. 4:19). Na a tra sei, wi no e feni en wan span tori foe leisi den raport foe tra kondre pe preikiman nanga pionier abi foeroe bijbelstudie? A prisiri di den pionier nanga zendeling e ondrofeni ini den kondre disi, de krin foe si srefisrefi (w92 1/9 blz. 16, par. 15). Dati meki, efoe son pionier di e wroko tranga ben kan de ini a posisi foe go na wan tra kondre pe a nowtoe de moro bigi, den moesoe loekoe na okasi disi nanga den bijkantoro bifo den teki so wan bosroiti.
18 Biginbigin, son sma ben bigin pionier foe di den ben sabi taki a ben de a joisti sani foe doe, ma den ben aksi densrefi efoe den ben kan meki a abi boen bakapisi. Kande den ben seni den aanvraagformulier ala di den e tweifri pikinso èn no nanga den heri ati. Ini a bigin den bakapisi foe den ini velddienst, ben de pikinso nomo. Ma, baka wan pisi ten, den ben kon moro boen ini den wroko èn den ben abi boeweisi taki Jehovah ben blesi a wroko foe den. Leki bakapisi foe dati, a prisiri nanga a froetow foe den ben gro. Gi son sma, a pionierwroko ben de wan broki foe go na ini a Bethel diniwroko, foe go na Gilead Skoro èn baka dati zendeling wroko, a Bedinari Skoro èn srefi foe doe a wroko foe rèis lontoe.
19 Kande joe no man go na wan tra kondre noso njanboen foe wan okasi foe go na Gilead, ma okasi de ete foe fisi ini tra watra ini a kondre disi efoe a kontren pe joe e wroko nownow no e gi froktoe spesroetoe. So wan froisi kan aksi kande foe joe foe tjari kenki kon ini a fasi fa joe e libi, ma den pai di joe sa kisi na jeje fasi, foe troe sa bigi srefisrefi.—Mat. 6:19-21.
20 Noso efoe den situwâsi foe joe e gi pasi foe dati, joe ben sa kan jepi wan krosibei gemeente ini joe eigi kring. Efoe den feni joe boen, dan joe kringopziener sa prisiri foe gi joe rai foe gemeente ini a kring di ben sa abi winimarki efoe den kisi ete wan pionier.
21 Son pionier nanga preikiman ben man foe dini a fanowdoe ini den eigi kontren ala di den ben tan leti na oso. Kande den man taki wan tra tongo. Joe e feni taki wan bigi nomroe foe den sma na ini joe gebied e taki wan tra tongo? Sma de di moesoe kisi a Kownoekondre boskopoe foe wan sma di sabi taki nanga anoe? Den wan di sabi wan tra tongo, kan de wan bigi jepi foe doro ala sortoe foe sma nanga a Kownoekondre boskopoe. Ala di disi kan de wan troetroe tjalensi, tokoe a kan sori toe taki a e pai srefisrefi.—1 Tim. 2:4; Tit. 2:11.
22 Efoe na a momenti disi joe e doe ala san joe man foe gi grani na Jehovah, dan prisiri ini den disiten grani foe wroko di joe abi. Efoe joe firi taki joe kan doe moro, poti na afersi disi na fesi Jehovah ini begi. Sondro foe kori joesrefi, go loekoe finifini sortoe kenki joe man meki ini den situwâsi foe joe. Taki nanga wan owroeman, di abi a pionier jeje, foe den plan foe joe noso nanga a kringopziener. Te joe teki wan praktis bosroiti ondro begi, go doro nanga en wantewante, nanga froetrow na ini a pramisi foe Jehovah foe e gi grani na den wan di e gi en grani.—Hebr. 13:5, 6; 1 Sam. 2:30.