Jehovah e skraki en legre foe foeroe-ten-bedinari
’Joe lobi boenfasi, o Jehovah, tan skraki mi.’ — Ps. 94:18.
1. San ben hari kownoe David krosbé kon na Jehovah?
„NA HERI dé mi wani blesi joe, èn mi wani prijse joe nen te ten di no abi marki, ja, foe tego” (Ps. 145:2). Joe kan prakseri pikinso o krosbé kownoe David ben moe firi ensrefi na Gado, di a ben skrifi den wortoe disi? Joe kan si krinkrin èn warderi en dipi dini foe Gado wawan. Moro leki dati, a ben taki foe na respeki èn na frede di a ben abi gi en Mekiman, na Soema di ben doe someni gi en.
2. Fa David ben sori en warderi gi a boenfasi foe Gado?
2 Soleki e kon na krin ini Psalm 145:2, dan David warderi gi Gado boenfasi ben de so bigi, dati en mofo sontron ben foeroe nanga wortoe èn singi foe prijse. Ma sosrefi toe ben kon na krin ini en waka nanga libi dati a ben handri akroederi nanga san a ben taki ini den wortoe èn singi disi. Loekoe pikinso wan toe bewijsi. A ben wani bow wan tempel gi Jehovah, ma di a no ben kisi na grani disi, David ben gi boen foeroe moni nanga materiaal gi den sreka di ben moe meki foe na bow. A no ben rostoe bifosi a ben drifi poeroe ala Gado feanti komoto foe na Pramisi Kondre. Wan heri ten a ben verdrage moeilijkheid nanga pina, ja srefi vervolgoe, leki no plisi Gado foe di a ben sa teki refrensi tapoe Gado salfoe Kownoe Saul. David ben kan memre boenboen ete fa a ben stré nanga Goliath èn fa a ben wini wan lew nanga wan beer. Ja, Gado ben skraki David.
3. Fa joe e prakseri foe na boenfasi foe Gado?
3 Joe ben firi joesrefi leki David, foeroe nanga warderi foe Gado boenfasi gi joe? Joe ben firi joesrefi kande ferferi, foedi joe ben wani sori joe warderi moro bigi leki joe ben sori kaba na a momenti dati. Ini den sortoe ten dati a de wan trowstoe sani foe hori ini prakseri, dati Jehovah e prisiri nanga dienst di ben doe nanga joe heri ati, wansi o pikinso na dienst dati de kande foe di joe moe doe tra verprekti foe na bijbel. (Teki gersi Kolosse 3:23.) Ma foeroe kristen ondro begi ben go ondrosoekoe na libi foe den foe si pe den ben kan feni ten foe doe moro, leki wan bewijsi foe a lobi èn dini foe den gi Gado. Doesoen-doesoen sma ben kan seti en so dati den ben kan gi ala den ten na a préki èn leri foe soema foe na bijbel foe di den go ini na pionierwroko.
Jonkoesma e kon krosibé na Jehovah
4. (a) San foeroe jonkoesma ben si, èn san disi meki den go doe? (b) Sortoe rai na Organisaatsi-boekoe e gi ini a tori disi?
4 Ini den jari di pasa foeroe jonkoesma ben kon krosibé na Jehovah. Den ben si na falsi fasi foe na falsi bribi èn fa den ben misi foe drai na watra foe ogridoe di e wasi psa abra na grontapoe. Den ben si fa na libisma ben misi krinkrin foe tiri ensrefi nanga winimarki èn den ben froewondroe foe na fasi di na gridi bisnis seti e roewineer wi diri grontapoe. Baka di den ben kon sabi foe den bijbel loesoe foe den problema disi di e gi joe satisfaksi, den ben teki na rai na ati foe na koni skrifiman di ben taki: „Prakseri now joe toemsi Bigi Mekiman ini joe jonkoemandé” (Prékiman 12:1). Nofotron disi ben waka so dati den ben go doe dienst leki wan pionier-bedinari. Foe san ede? Na boekoe Organisaatsi foe na Kownoekondre-préki èn na meki foe discipel e gi na commentari disi a tapoe: „Ibri jonkoe sma moesoe go prakseri tranga foe na dienst disi (na pionier-dienst). San a de go doe nanga en libi te a abi den jari foe verprekti skoro-leri na en baka? A lobi Jehovah troetroe èn a de firi sari-ati gi den sma di sondro den wani de ini katibo na a owroe seti foe sani? Efoe a de wan prijseman foe Jehovah di gi ensrefi abra èn teki dopoe, dan degedege no moe de ini en froestan. En ati sa bewégi en foe dini Jehovah nanga en heri sili.” — Bladzijde 153.
5. Fa toe jonkoe sma ben loekoe na situwasi foe den?
5 Wan tini ini Japan ben kon so ini bewégi foe den bijbel waarheid di a ben leri, dati baka en dopoe ini 1978 a ben de 19 tron ini na jepi-pionierwroko. Dan ini december 1980 ini en 18 jari, dri moen bifo a ben kaba nanga skoro, a ben kisi a brifi dati a de pionier. Di en mama, di de sosrefi toe wan pionier, ben aksi en san a de go doe ini a ten di e kon, a ben piki wantronso nanga den wortoe, dati na a momenti no wan moro prenspari sani de leki foe doe na prékiwroko èn foe pasa libilibi na „bigi benawtoe” (Matt. 24:21). So wan sortoe warderi wan pionier ini Nederlanti ben sori toe, di 9 jari pasa kaba, di a ben abi 19 jari, ben bigin nanga na pionierdienst. Di den ben aksi en foe sanede a ben teki na foeroe-ten-dienst na en tapoe, a ben piki: „Mi konsensi ben bigin trobi mi, foe di mi grontapoe wroko ben teki mi krinkrin abra èn nanga dati mi ben kan gi Jehovah soso na ten di ben tan abra.”
Fa Jehovah e skraki den
6. Foe san ede joe kan de seker foe Gado krakti di e skraki joe?
6 Te wi kon na so wan fasi krosibé foe Jehovah nanga wi heri konsensi, dan disi e meki a doe wan sani foe en sé. Na discipel Jakobus e taki: „Kon krosibé na Gado èn en sa kon krosibé foe joe” (Jak. 4:8). Prakseri disi pikinso Na Almakti Soeverein foe na universum sa kon troetroe krosibé foe wan sma di e proberi opregti foe kisi en boen-ati, nanga jepi foe doe foe dipi dini foe Gado wawan. Fa Gado e doe dati? Ini wan pisi a de doe disi foe di a de skraki na sma ini jeje fasi, èn efoe a de fanowdoe srefi na skin fasi (Ps. 34:10; 146:7). Wan 71-jari pionier-sisa tapoe den Filippijnen, di 31 jari kaba de wan toemsi boen pioniersisa di e meki froktoe, ben skrifi: „Nanga pikinso moni di wi e kisi wi kan psa a libi èn doe mi pionierwroko. Noiti mi ben firi misrefi swaki ini jeje fasi.”
7. (a) Fa prisiri nanga jeje krakti abi foe doe nanga makandra? (b) Na sortoe fasi disi ben de troe ini na tori foe 2 sisa?
7 Jehovah e skraki en legre foe foeroe-ten-dienstknekti sosrefi toe foedi a de gi den PRISIRI, wan froktoe foe en jeje (Gal. 5:22, 23.) Te Paulus e kari den froktoe foe na jeje, a de kari prisiri wantronwantron baka lobi, èn dati na wan sani di fiti. Prisiri e gi krakti, èn sondro a fasi disi no wan enkri sroedati ben kan horidoro. Ini Nehemia 8:10 tanapoe: „Na prisiri foe Jehovah de joe fortresi (ofoe „sa meki joe kon tranga”, Today’s English Version).” O troe disi de, wi e si ini den wortoe foe wan kristen sisa ini Los Angeles (California, Amerkankondre):
„Mi ben wani oenoe sabi wawan o kolokoe mi de. Mi ben kisi mi formulier foe aksi foe de wan pionier foe na kringopziener . . . èn mi seti sani foe bigin tapoe 1 januari 1981. Di januari ben doro, mi no ben firi misrefi seker, ma mi ben begi Jehovah ofoe a ben wani blesi mi moeiti èn a ben wani meki mi feni tog wan sma di ben wani studeri troetroe èn di ben sa wani leri sabi na waarheid. We now, „mi beker ben foeroe pasa marki”. Boiti den foeroe sma di abi belangstelling di mi ben feni, na bericht foe mi foe januari 1981 ben de: 102 joeroe ini na préki-wroko, 135 tijdschrift, 23 boekoe, 47 gobaka, 2 brochure, 3 abonnement èn 9 bijbelstudi. Den sroisi foe hemel ben opo densrefi gewoon èn na prisiri foe Jehovah ben foeroe mi so te, dati mi abi na firi leki mi ati sa djompo komoto foe mi skin.”
Na prisiri disi di e gi krakti e kon sosrefi toe na fesi foe wan 14 jari sisa ini Brasjonkondre, di ben gebroiki en skorofakansi foe tanapoe makandra nanga en mama ini na jepipionierwroko. A de bedoi:
„Alaten baka te wi e go ini na velddienst, mi e kisi dek-ati, èn efoe mi e go doro nanga préki, mi e si dati moro makriki mi e kisi kontakti nanga sma. Na dienst disi e gi mi foeroe prisiri, bikasi mi sabi dati mi e plisi Jehovah èn dati disi de na moro boen fasi di mi kan gebroiki mi jongoe jari.”
8. Sortoe krakti pionierwroko kan abi tapoe joe publiki préki?
8 Joe ben si san na jongoe sisa ben taki foe na kisi moro makriki kontakti nanga sma te „a ben go doro nanga préki”? Joe ben ondrofeni dati? Foeroe pionier ben taki dati disi de so èn ben taki dati troetroe den ben bigin kisi moro prisiri foe na velddienst, di den ben kan doe disi dé foe dé. Fa disi doe kon? We now, foeroe kristen di wawan tron kan teki prati na en, e si dati alaten te den e bigin nanga na préki oso-na-oso, moe wini wan seker sjen-sjen fasi. Te den fosi fisiti de na den baka, dan den e bigin foe kisi troetroe prisiri. Ma pionier e teki ala dé prati na a publiki prékiwroko èn a gi foe leri na sma, èn den kon koni troetroe, sodati na dienst disi kon de moro makriki èn moro switi.
9. Sortoe rai wan opziener di e waka lontoe ben gi tapoe a tori foe pionierwroko?
9 Wan opziener ini Amerkankondre di e waka lontoe ben froestan, dati foeroe sma sondro degedege ben sa kan tron toemsi boen pionier efoe den ben sa ondrofeni soso na prisiri nanga na krakti di pionierwroko e gi èn ben sa abi na froetrow dati den ben sa kan tan ini na pionierdienst. A de tjari kon na krin sortoe rai a de gi na den prékiman foe na „boen njoensoe”:
„A gersi dati boen foeroe sma di abi na pionier-prakseri, e tan na baka, foe di den e frede dati den no kan go doro nanga na dienst dati. Mi ben gi na rai, dati den poti leki marki foe pionier wán jari langa; dan den kan si fa a de nanga den gosontoe, schema, nanga so moro fara. Efoe na a kaba foe na jari kon na krin, dati den no man horidoro ini na dienst, dan ete den sa abi wan switi pionierjari na den baka, wan jari di noiti den sa frigiti. Ma foeroe foe den kan horidoro ini na dienst disi, te wan tron den ben tesi den prisiri foe na pionierdienst.”
Na seti foe na jepipionierwroko pe wan kristen kan doe dienst moro pikinso wán moen, ofoe someni moen, de nofotron na fosi stap foe go ini na gewoon pionierwroko.
10. Fa pionier nanga reti e denki foe stonki na skinfasi?
10 Pionier wrokoman de ini a fesi lin ini na jeje feti èn den e doe wan boen wroko. Tokoe den no e prakseri dati foe disi ede sma moe handri na wan spesroetoe fasi nanga den. Den e froestan dati den de eenvoudig „mede-sroedati”, makandra nanga den miljoen-miljoen sma di e dini Gado getrow, ma di no de ini na positsi, dati den kan doe dienst leki pionier. Foe den omstandigheden foe den ede na pionierdienst e jepi den foe doe dienst nanga den heri ati, wan marki gi ala sma di wani abi na boen-ati foe Gado. Den no e froewakti dati trawan sa gi den njanjan nanga krosi ofoe na a tra sé na skin fasi sa skraki den. Den e denki, te joe loekoe en boen, a srefi fasi leki Paulus, di ben taki: „Nanga moeiti èn pina wi e wroko dé nanga neti foe no poti wan diri lai na nowan foe oen tapoe.” — 2 Thess. 3:8.
11. Foe san ede foeroe kristen e feni en wan switi sani foe jepi den sma di de ini na foeroe-ten-dienst?
11 Winsi Paulus no ben wani poti wan lai na nowan sma tapoe, tokoe son wan foe den fosi kristen ben sori den warderi gi en diniwroko foe di den jepi en na skinfasi nanga sani. Na so fasi den ben jepi en foe go doro nanga san densrefi no ben man foe doe na a ten dati (Fil. 4:14-15; 2 Kor. 11:8). Na a srefi fasi ini disi ten, foeroe kristen de di e feti troetroe baka na marki foe na pionierdienst, na di den omstandigheden foe den de na so wan fasi, dati na a momenti disi den no kan doe en. Nofotron den kristen disi e prati nanga den friwani sani na skinfasi nanga den sma di kan pionier now, èn na fasi disi foe gi sani, den pionier e warderi toemsi, aladi den no froewakti en.
12. Sortoe froetrow pionier moe abi ete, soleki a eksempre foe wan sisa e sori?
12 Srefi nanga na fasi foe gi sani foe na sé foe foeroe kristen kompe, pionier tog moe poti froetrow ete ini Gado makti foe jepi. Wan pionier-sisa ben skrifi no so langa pasa kaba:
„Mi ben abi na prisiri foe tanapoe dri jari langa ini na gewoon pionierwroko. Den ben de den moro boen jari foe mi libi. Mi de Jehovah grantangi toemsi, dati a ben gi mi pasi foe dini en ini na fasi disi. Na dienst disi ben de na pisi foe mi libi ini na waarheid di ben tranga mi bribi moro, foedi mi ben si foeroe tron fa Jehovah ben seti sani foe na boen foe mi. Na foeroe-ten-dienst ben jepi mi foe warderi krinkrin Jezus wortoe ini Mattéus 6:25-33. Mi moe piki dati wawan tron mi ben abi wan toe broko-ede, ma den disi foeroe tron ben de foe wan sjatoe ten, foe di mi ben abi foe denki nomo foe na fasi fa Jehovah ini ten di pasa ben hori en na en pramisi. Foe san ede mi ben sa degedege now na en? Ala dé mi e proberi foe loekoe na situwasi foe mi èn dan mi e kon na a besroiti, dati mi abi njanjan, krosi nanga dak tapoe mi ede, joisti leki fa Jezus ben taki. Te soso toe neti ini wan wiki joe e doe grontapoe wroko, dan joe sabi dati Jehovah de na soema, di e sorgoe gi joe. Fa disi de wan seker firi!”
Pionierwroko — Wan sori foe bribi
13. Sortoe leri foe bribi ini praktijk wi e feni ini a bijbel?
13 Na bijbel foeroe nanga tori foe sma di ben sori bribi. Na bow foe na ark ben de wan spesroetoe bewijsi foe na bribi foe Noach nanga en oso-famiri. Sosrefi toe wi no kan frigiti na bribi di Abraham, Sara, Jozef, Mozes nanga Rachab ben sori. Ja, nanga reti Paulus ben taki: „Ten sa mankeri mi efoe mi ferteri moro fara foe Gideon, Barak, Simson nanga den tra proféti” (Hebr. 11:32). Den wroko foe bribi foe den ben de toemsi bigi, sodati son sma sa firi taki dati den sma disi „ben doe moro leki den ben de verprekti”. A no soso wan seker prekti-firi ben troesoe den. A lobi foe den gi Gado èn a bribi foe den ini en, makandra nanga na „moro betre presi” di Gado ben abi gi den ini prakseri, ben bewégi den foe meki ’a publiki (na bribi foe den) bekenti’. Fa Jehovah ben prakseri foe den doe foe bribi foe den? En Wortoe e piki: „Foe datede meki Gado no e sjen gi den foe den kari en den Gado, bikasi a ben sreka wan foto gi den.” — Hebr. 11:13-16.
14. Fa pionierwroko ben sa kan de now wan wroko foe bribi gi joe?
14 Sortoe toemsi bigi wroko foe bribi kan doe now? Gi foeroe sma na piki de sosrefi toe na foeroe-ten-dienst, na pionier-diniwroko. Na wan sani di wi kan froestan, dati a no ala sma di de wan pisi foe na „gemeenschap foe brada” ini na grontapoe, kan pionier ofoe srefi kan tanapoe geregeld ini na jepipionierwroko (1 Petr. 2:17). Ma den sma toe di den omstandigheden e gi den pasi, abi bribi fanowdoe. Wan brada ini Europa e skrifi: „Foeroe sma e gi mi na rai foe no go pionier, foe di na dienst dati de gi tranga sma. Mi no tranga èn boiti dati mi abi wan bokroe. Tokoe mi go pionier, èn nanga jepi foe Jehovah mi de now 30 jari kaba ini na pionierdienst.” A de taki moro fara dati a ’ben gi en foeroe satisfaksi foe abi wan heri dé foe wroko di e jepi en foe kon moro krosibé foe Jehovah’. Jehovah seker ben skraki na brada disi ini na pionierdienst.
15. Fa wan brada ini Japan ben sori en bribi?
15 Sosrefi toe na sori foe bribi ini na pionier-diniwroko no de soso foe sma foe wan groepoe nanga wan spesroetoe libiten. Wan brada ini Japan di ben de fosten méstri, ben leri sabi na kristen waarheid, baka di a ben kisi en pensioen. A no teki langa ofoe den ben dopoe en na a libiten foe 60 jari èn a ben go wantronso ini na jepipionieriwroko. Di a ben tron wan gewone pionier na a libiten foe 61 jari, a ben prakseri na bergi-dorpoe pe a ben gro èn pe Kotoigi foe Jehovah no ben de. En oema, di ben de wan pionier toe, nanga en ben seri na oso foe den ini na foto èn den ben go ini na dorpoe. Nanga na moni foe na oso di den ben seri, na man nanga oema ben bow wan Kownoekondre-konmakandra-presi drape, èn den abi na blesi foe si fa wan gemeente kon drape.
16, 17. Foe san ede a de now na ten gi joe foe go prakseri tranga foe go pionier?
16 Na ten foe na disten ogri seti foe sani e lon go esi na a kaba. Neleki fa den Israëlsma ben hé a tempo foe a waka foe den lontoe na ogri foto Jericho, leti bifo na pori foe en, na so Jehovah e leri sma ini disi ten, leti bifo na pori foe na disiten seti, foe opo bari ’wan tranga stré-babari’ (Joz. 6:20). Joe de ini na positsi, dati moro bigi joe kan teki prati na a babari disi foe wini, foe tron wan pionier? Efoe joe kan seti joe omstandigheden so, dati disi kan, dan joe abi na bribi di de fanowdoe foe disi? De seker dati Jehovah sa doe na pisi foe en foe skraki joe èn foe meki joe prisiri kon moro bigi. A sa blesi joe moeiti. Joe sa de dan leki na sisa ini Nederlanti di e pionier now 10 jari kaba èn di ben taki: „Mi konsensi ben go taki, foe di mi ben abi wel na ten. Mi ben bigin foe pionier foe dodoi mi konsensi èn foe sori misrefi dati mi takroe gosontoe no ben sa tapoe mi foe go doro leki wan pionier. Mi e pionier te now ete.”
17 Ja, Jehovah e doe toemsi bigi sani ini den „laatste dé” foe na disiten ogri seti foe sani. Now a de na ten foe kon krosbé na en èn foe blesi en nen na heri dé, soleki David ben doe disi. Poti bribi ini a pramisi foe Gado, dati a sa skraki joe. David ben skrifi: „Te mi ben taki: ’Mi foetoe seker sa degedege’, ma joe égi lobi boenfasi, o Jehovah, ben tan skraki mi.” — Ps. 94:18.
JOE SA KAN BEDOI . . .
□ Foe san ede a de wan sani di fiti gi jongoe kristen foe go prakseri na pionierdienst?
□ Fa Jehovah e skraki en foeroe-ten-dienstknekti?
□ Foe san ede pionierwroko de wan spesroetoe sori foe bribi?
[Prenki na tapoe bladzijde 201]
Pionier e feni na publiki prékiwroko switi èn nofotron den e doro na marki di den abi na prakseri
[Prenki na tapoe bladzijde 202]
Foeroe foe den sma di no kan pionier now, kan prati sani na skin fasi nanga den sma di de ini na foeroe-ten-dienst