Hosea
10 „Israel na wan siki droifibon di e meki froktu.
O moro froktu a e meki, o moro altari a e bow.
O moro n’nyan a gron e gi, o moro a e meki ala sortu kfalek santa pilari.*
Wan sma o broko den altari fu den èn a o pori den santa postu fu den.
3 Now den o taki: ’Wi no abi wan kownu fu di wi no ben lespeki Yehovah.
Ma awinsi wi ben abi wan kownu, dan san a ben o man du gi wi?’
4 Den e meki pramisi, sweri nanga ferbontu, ma den no e du san den taki.
Dati meki a fasi fa den e koti krutu de leki takru w’wiri di abi vergif èn di e gro na ini wan gron di plugu kba.
5 Fosi, den priester fu a pkin kaw fu Bet-Afen ben e prisiri
èn den ben e gi grani na a falsi gado dati.
Ma now a pipel nanga den priester o sari fu di sma o tyari en gwe.
Iya, den Samariasma o broko den ede nanga a gado fu den.
6 Sma o tyari en go na Asiria leki wan kado gi wan bigi kownu.
Dan Efrayim o kisi syen.
Israel o syen fu di a ben teki rai di no bun.
8 Den hei presi na Bet-Afen pe den Israelsma ben sondu, o kisi pori.
Makabon nanga takru w’wiri o gro na tapu den altari fu den.
Sma o taigi den bergi: ’Un tapu wi!’
Den o taigi den pkin bergi: ’Un fadon kon na wi tapu!’
9 Ai Israel, sensi a bigi ogri psa na Gibeya yu e sondu.
Drape den no tapu fu du sondu.
A no ala den ogriman fu Gibeya ben lasi libi na ini a feti.
10 Mi o strafu den te mi wani.
Den o abi fu tyari den tu sondu di den du leki wan hebi na den tapu.*
Dati meki tra pipel o kon feti nanga den.
11 Efrayim ben leri fu de wan bun umakaw di lobi masi aleisi.
Dati meki mi no ben poti wan tyatyari na a moi neki fu en.
Ma now mi o meki wan sma rèi na tapu* Efrayim.
Yuda o plugu èn Yakob o lusu a doti gi en.
12 Sai siri fu retidu, dan unu o koti bun-ati.*
Plugu bun gron,
solanga ten de ete fu suku Yehovah.
A o kon èn a o leri unu fu du san reti.
13 Ma unu ben sai ogri
èn unu koti soso sondu.
Unu nyan den froktu fu den lei fu unu
fu di unu fertrow tapu unsrefi
nanga den furu srudati fu unu.
14 A pipel o yere a b’bari fu sma di o kon feti nanga den.
Den o pori ala den foto fu unu di abi bigi skotu.
Na dati Salman ben du nanga den sma fu Arbel.
A dei di a go feti nanga den, a kiri den m’ma nanga den pkin fu den na wan ogr’ati fasi.
15 Na den sani disi o psa nanga yu, Betel, fu di yu du sani di ogri srefsrefi.
Na musdei sma o kiri a kownu fu Israel.”*