Bethel — Wan foto foe boen nanga ogri

WAN toe foto e tron pôpi foto — noso e tron foto nanga takroe nen — foe den sani di e pasa na ini den. Ma Bethel de tra fasi bika a ben kon de bekènti leki wan foto foe boen nanga ogri. A famiri-edeman Jakob ben kari a foto Bethel, san wani taki „Oso foe Gado”. Ma doesoen jari baka dati, a profeiti Hosea ben kari a foto na „Oso foe Ogridoe”. Fa a foto disi kenki foe boen go na ogri? Èn san wi kan leri foe a historia foe a foto?

Bethel ben bigin abi foe doe nanga a pipel foe Gado na ini 1943 b.G.T. di Abraham ben de na libi ete. Na a ten dati, sma ben sabi a foto leki Lus, a fosi nen di a ben abi foe Kanan. A foto ben didon na ini a bergibergi kontren, so wan 17 kilometer noordsei foe Jerusalem. Prakseri fa Abraham nanga en neef Lot e loekoe go na ondrosei na a Lagipresi foe a Jordan pe sani e gro moi, èn fa den e tanapoe hei na tapoe wan foe den bergi lontoe Bethel, pe den e si sani moro boen. Nanga takt Abraham e taigi Lot a moeilekhèit di den abi foe tjari den ipi foe den go na kontren di abi grasi: „Grantangi, no meki trobi de moro na mindri mi nanga joe èn na mindri den herder foe mi nanga den herder foe joe, bika wi mansma na brada. A no de so, taki joe kan go na a heri kondre? Grantangi, prati foe mi. Efoe joe e go na a kroektoe-anoesei, dan mi sa go na a reti-anoesei; ma efoe joe e go na a reti-anoesei, dan mi sa go na a kroektoe-anoesei.” — Genesis 13:3-11.

Abraham no ben froeklari taki a ben abi reti foe teki san a wani leki fosiwan. Na presi foe dati, a ben meki a moro jongoe man teki a moro boen pisi. Wi kan waka na baka a moi fasi disi foe Abraham. Wi kan kowroe den afersi di e tjari problema kon foe di wi na a fosiwan di e taki na wan safrifasi èn no e denki wisrefi wawan. — Romesma 12:18.

Jari baka dati di Jakob, a granpikin foe Abraham, ben meki en kampoe na Lus, a ben abi wan kefalek sortoe dren. A ben si „wan trapoe ben tanapoe na grontapoe èn a tapoesei foe en ben doro te na hemel; èn loekoe! den engel foe Gado ben kren go na loktoe èn ben saka kon na gron. Èn loekoe! Jehovah ben tanapoe tapoesei”. (Genesis 28:11-19; teki gersi Johanes 1:51.) A dren ben wani taki wan prenspari sani. Den engel di Jakob ben si ben sa dini en so taki a pramisi foe Gado di abi foe doe nanga a siri foe Jakob, ben kan kon troe. A hei posisi di Jehovah ben abi tapoesei foe a trapoe ben sori taki A ben sa tiri den engel na ini a wroko disi.

A djaranti disi foe a jepi di Jakob ben o kisi foe Gado ben naki en ati srefisrefi. Di a ben wiki baka foe a dren, a ben kari a presi drape Bethel, san wani taki „Oso foe Gado” èn a ben pramisi Jehovah na wan serjoesoe fasi: „Foe ibri sani di joe sa gi mi, sondro misi mi sa gi joe a di foe tin pisi”a (Genesis 28:20-22). Foe di Jakob ben froestan taki ala sani di a ben abi ben kon foe Gado, meki a ben wani gi wan moi pisi baka foe sori taki a de nanga tangi.

Na ini a ten disi kresten abi engel toe di e dini gi a boen foe den (Psalm 91:11; Hebrewsma 1:14). Den kresten disi toe kan sori a warderi foe den gi ala den blesi di den feni, foe di den „kon goedoe nanga foeroe wortoe foe taki Gado tangi”. — 2 Korentesma 9:11, 12.

Baka ten, den bakapikin foe Jakob ben tron wan nâsi. Josua, a fesiman foe den, ben wini a heiden kownoe foe Bethel na ini a bigin foe a feti teige Kanan (Josua 12:16). Na ini a pisi ten foe den Kroetoeman, a profeiti-oema Debora ben libi krosibei foe Bethel èn a ben froeteri den sma den wortoe foe Jehovah. Samuèl ben fisiti Bethel ala ten baka toe leki wan kroetoeman foe a nâsi Israèl. — Kroetoebakra 4:4, 5; 1 Samuèl 7:15, 16.

Bethel e tron wan presi foe sma di fadon komoto na bribi

Ma a abi di Bethel ben abi foe doe nanga a soifri anbegi ben kon tapoe, baka di a Kownoekondre ben prati na ini 997 b.G.T. Kownoe Jerobeam ben meki Bethel tron wan presi foe anbegi foe pikin kaw, a pikin kaw ben moesoe teki presi gi Jehovah (1 Kownoe 12:25-29). Dati meki, di Hosea ben taki profeititori foe a pori foe Bethel, a ben taki foe en leki „Beth-Aven”, san wani taki „Oso foe Ogridoe”. — Hosea 10:5, 8.

Ala di Bethel ben tron wan presi foe ogridoe na jejefasi, tokoe sani di ben pasa drape ben tan gi prenspari lès foe leri (Romesma 15:4). Wán foe den lès abi foe doe nanga wan profeiti di no kari na nen, di ben seni foe Juda go na Bethel foe taki profeititori foe a pori di den altari nanga den priester ben o kisi pori. Jehovah ben taigi a profeiti toe foe drai kon baka na Juda — soso wan toe kilometer go na zuidsei — sondro foe njan èn sondro foe dringi. A profeiti disi ben taki profeititori na wan deki-ati fasi bifo Jerobeam, a kownoe foe Israèl, pe a profeiti ben e kari ogri na tapoe na altari foe Bethel. Ma baka dati a no ben gi jesi na Gado foe di a ben go njan na a oso foe wan moro owroe profeiti na ini Bethel. Foe san ede? Na owroe profeiti ben bedrigi en di a ben taki dati wan engel ben komanderi en foe ontfanga en boen leki wan kompe profeiti. Foe di a profeiti foe Juda no ben gi jesi, meki a ben dede fosi en ten doro. — 1 Kownoe 13:1-25.

Efoe wan kompe bribiman e aksi wi foe doe wan sani di wi e aksi wisrefi efoe a boen, dan san wi moesoe doe? Memre taki srefi rai di sma e gi wan tra sma nanga boen na prakseri, kan doe trawan ogri efoe a rai boen. (Teki gersi Mateus 16:21-23.) Te wi e soekoe tiri foe Jehovah nanga jepi foe begi èn nanga jepi foe a studeri di wi e studeri en Wortoe, dan wi sa wai pasi gi a fowtoe di sa meki wi sari soleki fa dati ben pasa nanga a profeiti di no kari na nen. — Odo 19:21; 1 Johanes 4:1.

So wan 150 jari baka dati, a profeiti Amos ben go na noordsei toe foe taki profeititori teige Bethel. Na wan serjoesoe fasi, Amos ben kroetoe den feanti arkiman foe en, so srefi a priester Amasia di na wan heimemre fasi ben taigi Amos foe ’gowe foe drape go na a kondre Juda’. Ma sondro frede, Amos ben taigi Amasia foe den rampoe di ben sa kon na tapoe na osofamiri foe a priester srefi (Amos 5:4-6; 7:10-17). Na eksempre foe en e memre wi taki Jehovah kan gi deki-ati na den dinari foe En di abi sakafasi. — 1 Korentesma 1:26, 27.

Te foe kaba, a getrow Kownoe Josia foe Juda ben broko ’na altari dati di ben de na Bethel, a ben bron a hei presi, a ben broko na pisipisi tron doti, èn a ben bron a santa postoe’ (2 Kownoe 23:15, 16). Na ini a ten disi, owroeman kan waka na baka a moi eksempre foe Josia foe di fajafaja den e tan hori densrefi na a tiri foe Gado èn foe di den e teki fesi foe hori a gemeente krin.

Den sani disi di ben pasa na ini a historia foe Bethel, e sori krinkrin san kan de a bakapisi foe regtfardikifasi èn so srefi foe ogridoe. A e sori krinkrin san kan de a bakapisi efoe wan sma e gi jesi na Jehovah èn efoe wan sma no e gi jesi na En. Jari na fesi, Moses ben poti a sani disi na fesi foe a nâsi Israèl di den ben abi foe froekisi san den ben wani: „Tide mi e poti na joe fesi troetroe libi nanga boen, èn dede nanga ogri” (Deuteronomium 30:15, 16). Te wi e prakseri dipi foe a historia foe Bethel, dan dati sa gi wi deki-ati foe feni wisrefi na a „Oso foe Gado”, na presi foe na „Oso foe Ogridoe”.

[Foetoewortoe]

[Prenki na tapoe bladzijde 23]

Den broko pranasi na a presi Bethel, pe Jerobeam ben seti sani foe anbegi pikin kaw