Betheldiniwroko—Moro friwani wrokoman de fanowdoe
1 Wi e prisiri foe si a bigi wroko di Jehovah e doe na ini den lasti dei disi. Psalm 110:3 e sori taki, na ini a ten disi, wan toemoesi moi eigifasi foe Gado pipel ben sa de a wani di den wani foe abi wan fajafaja prati ini Kownoekondre diniwroko. Lontoe heri grontapoe a pipel foe Jehovah e doe moro foe preiki a boen njoensoe foe a Kownoekondre. A Verkondigers-boekoe (Preikiman-boekoe), e taki na bladzijde 295: „Son wan e dini leki memre foe a Bethelfamiri na heri grontapoe. Disi na wan groepoe foe foeroeten dinari di gi densrefi foe doe ala san den e kisi foe doe. Den e sreka èn e tjari bijbel poeblikâsi kon na doro, den e sorgoe gi a wroko di de fanowdoe na den kantoro, èn tra wroko di e horibaka gi den wroko di kari soleki bori, krin sani, wasi krosi nanga foeroe tra sani di de fanowdoe. Disi a no wan wroko pe den e kisi wan bigi nen noso materia goedoe. A winsi foe den de foe gi grani na Jehovah, èn den de tevrede nanga den sani di seti gi den soleki njanjan, tanpresi èn wan pikin toelage gi den persoonlijk kostoe foe den.” Efoe joe fisiti Bethel, dan joe sabi kaba pikinso sortoe wroko e doe drape. Ma wi wani foe gi joe moro bodoi foe meki joe warderi gro gi a spesroetoe grani foe diniwroko disi, èn so srefi foe meki joe kon sabi san a Genootschap abi fanowdoe.
2 Foe si na a joisti fasi o prenspari Betheldiniwroko de èn o bigi a waarde de di a abi, meki wi go loekoe sjatoe pikinso a historia foe Bethel baka—historia foe fositen èn historia foe a ten na ini san wi e libi now—foe na organisâsi foe Jehovah. Foe wan pisiten foe 19 jari, a Waktitoren Genootschap ben abi en edekantoro na ini wan ston-oso foe fo sodro na a Arch strati, nomroe 56 te nanga 60, ini Allegheny, Pennsylvania. Den ben kari en a Bijbel Oso. Ma na ini 1908, a Bijbel Oso famiri noso a groepoe foe sma foe na edekantoro foe a Genootschap ben gro kon moro leki 30 memre. A ten ben doro foe meki sani kon moro bigi. Baka di den aksi a tiri foe Gado, den brada ben bosroiti taki Brooklyn ben sa de a moro betre presi gi a wroko. So boen, den ben bai wan oso na Brooklyn, na Hicks strati nomroe 13 te nanga 17, gi den kantoro foe a Genootschap èn gi wan zaal. Den ben opo den kantoro disi tapoe 31 januari 1909, ma na oso na Hicks strati no ben abi presi pe sma ben kan libi na ini. Fosi den brada ben denki taki den ben kan joeroe oso foe libi na ini. Ma no wan foe den gebow ini den Brooklyn Heights kontren ben de foe joeroe. Soleki fa sani ben waka, dan a ben de wan onfroewakti sani èn wan bigi prisiri gi den, taki den brada ben man bai wan redi ston-oso di ben abi fo sodro na Columbia Heights nomroe 124, „gi wan lagi prijs”. Na oso disi ben de wan oso pe Henry Ward Beecher ben libi fosi. So srefi den ben man bai Columbia Heights nomroe 126 toe, di ben de leti na sei foe Columbia Heights nomroe 124. A Watch Tower foe 1 maart 1909 ben meki bekènti nanga prisiri: „Wi sa kari a njoen oso Bethel.” Disi ben de so foe di den kenki a nen „Bijbel Oso” di den ben gebroiki na ini Pittsburgh. So boen, na ini april 1909 a wroko ben bigin na Bethel, èn a famiri ben kan go libi na ini en njoen oso. Foe 85 jari now Bethel na Brooklyn de na a srefi presi.
3 A nen Bethel ben de a joisti nen gi na edekantoro foe a Genootschap? Loekoe a nen soleki fa bijbel e skrifi foe en èn den sani di abi foe doe nanga dati. Efoe wi e go baka so wan 3700 jari, dan Genesis kapitel 28 e froeteri wan ondrofenitori foe Jakob, di abi 77 jari èn a no trow ete. Jakob ben warderi santa sani, ma en twelengi brada Esau no ben wani si en na ai. Soleki fa en papa Isak ben taki, dan Jakob ben lowe gowe foe Berseba èn a ben go na a noordsei, na a kondre foe den famiriman foe Abraham. Na den famiriman disi Jakob ben wani foe feni wan wefi. Baka di a ben waka so wan 100 kilometer, Jakob ben stòp na wan presi di ben nen Lus na ini den bergi foe Judea, pe a ben kan rostoe na netiten. Na ini Genesis 28:10-19, wi kan leisi a toemoesi moi finifini tori fa Jehovah ben gi Jakob a djaranti taki A ben o horibaka gi en. Ini wan dren, Jakob ben si wan trapoe di ben de na grontapoe go na hemel. Engel ben go èn kon foe grontapoe go na hemel èn Jehovah ben tanapoe na tapoe a trapoe. Dan Jehovah ben taki, dati troetroe a ben o de so, taki a pramisi di a ben gi Abraham di ben abi foe doe nanga wan siri, a ben o gi en na Jakob. A ben taki toe dati a no ben o libi Jakob. Fa dati ben de wan ondrofenitori di ben frede Jakob, di ben de wan sma na jejefasi! A de foe froewondroe dan taki disi ben kon de wan spesroetoe presi na ini den ai foe en? Gi en a presi disi ben de na „oso foe Gado”, noso na ini a Hebrew tongo, Behth-ʼElʹ. Behth wani taki „oso” èn ʼEl wani taki „Gado”.—Gen. 28:19, foetoewortoe.
4 So boen, a nen Bethel abi wan toemoesi moi historia background èn a fiti gi na edekantoro foe Jehovah pipel na heri grontapoe. Na ini a ten disi den dinari foe Gado no e kisi dren di e kon foe Gado. Wi no e si engel go-kon foe wan trapoe foe Bethel go na hemel. Brada no e kisi fisjoen noso e jere a sten foe Gado wantewante. Ma tokoe, efoe joe e loekoe ala den sani di feni presi na ini den 85 jari disi di pasa, foe sensi a ten foe brada Russell te nanga now, dan degedege no de taki na anoe foe Jehovah ben de nanga en salfoe dinari, di de wan pisi foe a jeje siri foe Abraham, na Bethel. Someni toemoesi moi sani di pasa na ini a historia foe Jehovah Kotoigi na ini a ten disi, abi foeroe foe doe nanga Bethel! Loekoe wan toe heimarki:
◼ Di brada Russell ben kon ini a presi pe den ben njan na Bethel, tapoe 2 oktober 1914, a ben meki bekènti: „A Ten foe den heiden kon na wan kaba; den kownoe foe den ben abi den dei.”
◼ Froekoe na ini den jari foe 1920, di den ben abi a mamanten anbegi, wan memre foe a groepoe di e sreka den bodoi di den e poti ini boekoe noso tijdschrift so taki den kan druk den, ben gebroiki den wortoe: „na organisâsi foe Gado”. Disi ben de so wan krakti na ini den fasi foe denki, so taki ini 1925 den brada ben si taki toe difrenti organisâsi de, di de aparti foe makandra èn di e gens makandra, a wan foe Jehovah èn a wan foe Satan.—w85 15/3 bladzijde 1.
◼ Froekoe mamanten wan dei na ini 1931, sjatoe bifo a kongres na Columbus, Ohio, a presidenti foe a Genootschap, brada Rutherford, ben si taki a nen Jehovah Kotoigi troetroe ben taki soema a pipel foe Gado ben de èn san a wroko ben de di den ben doe kaba, èn taki sma ben moesoe kon sabi den leki En kotoigi.—Jaarboek 1976, bladzijde 151.
◼ Froekoe ini 1935, sma ben aksi densrefi soema na a „bigi ipi” (Openb. 7:9). Son wan na mindri den sma di ben taki san den ben denki na a ten dati, ben sori taki den ben de a groepoe di ben o tan na grontapoe. Tapoe 31 mei 1935, na a kongres na Washington D.C., wan heri boen froeklari ben gi.—jv bladzijde 166.
5 Den eksempre disi e sori fa Jehovah, nanga jepi foe en santa jeje, tiri den getrow salfoe foetoeboi foe en na Bethel èn fa a jepi den. Èn fa a de nanga den engel? Te joe e denki foe a gens di den feanti foe wi ben gens wi èn den moeilek jari di wi no ben abi foeroe goedoe nanga moni, dan degedege no de taki, sondro a kibri èn jepi foe den engel, Bethel no ben o man wroko na so wan froewondroe fasi ala den jari disi.
6 Boiti a groepoe di e wroko na a edekantoro na ini den Verenigde Staten foe Amerkankondre, dan ini ala den 100 bijkantoro di de lontoe a heri grontapoe, Bethelfamiri de toe. A boekoe Georganiseerd om onze bediening te volbrengen (Orga foe doe wi diniwroko), bladzijde 118, e taki: „A nen Bethel . . . foe troe na a joisti nen gi centrum foe theokratis aktiviteit disi.” Sortoe wroko den Bethel friwani wrokoman e kisi foe doe?
7 Difrenti sortoe wroko: Den memre foe a Bethelfamiri e kisi e difrenti sortoe wroko foe doe. Na Brooklyn èn ini wan nomroe foe tra bijkantoro, son brada e wroko ini a fabrik nanga masjin di e druk bijbel, boekoe, tijdschrift, brochure nanga traktaat, foe kan prati den na heri grontapoe. Trawan abi wan prati foe di den e tai den bijbel nanga den boekoe, ala di a wroko foe ete trawan abi na ini foe seni den poeblikâsi disi go na den gemeente na heri grontapoe. Wan nomroe foe Bethel wrokoman abi a toewijzing foe sorgoe dati den wrokosani èn den oso e tan ini boen kondisi. Ini a Bethel oso, foeroe wroko de di abi foe doe nanga a sorgoe gi a famiri. Foe eksempre, na Brooklyn Bethel, den e poti a mamanten njanjan gi so wan 3700 sma na ini 12 presi na Bethel pe den e njan, ini wan pisi ten foe 20 miniti. Ini a wasserij, den brada nanga sisa e wasi 16.000 kilo krosi ibri wiki, di abi na ini toe 13.000 empi. Moro fara, den sisa di e krin kamra, e hori den 21 oso pe den wan di e wroko na Bethel e libi, krin srefisrefi, èn den e doe foeroe tra wroko di de fanowdoe.
8 Bekwaamfasi nanga sani di den e aksi foe joe: Efoe wi e loekoe a mentaal nanga emotioneel krakti di de fanowdoe foe doe foeroe foe a wroko disi, dan tapoe a momenti disi gosontoe, jonkoeman di no trow, de fanowdoe. Foe wan jonkoeman kan poti en nen gi Bethel, dan a moesoe de wan sma di gi ensrefi abra na Jehovah èn a moesoe dopoe kaba no moro mendri leki wan jari. A moesoe de wan sma di e gi ensrefi na a dini foe Gado èn a moesoe de wan jeje sma. So srefi, a moesoe wani foe doe tranga wroko. Ini a grontapoe foe tide, foeroe sma e si tranga wroko leki wan sani di den moesoe wai pasi gi dati. So boen, a jonkoeman di wani kon dini na Bethel moesoe weri a njoen persoonlijkheid na so wan fasi taki a wani foe doe tranga wroko, ala di a e doe boen wroko nanga en anoe. (Teki gersi Efeisesma 4:28.) Dati wani taki dati a no moesoe de wan sma di poti en prakseri na tapoe a feti foe kisi persoonlijk wini noso ontspanning, noso tapoe a wani di a wani foe meki prisiri nomo. Te a e denki foe kon dini na Bethel, dan a moesoe poti den fasi disi foe wan jongoe sma na wan sei kaba. Den wortoe foe Paulus na ini 1 Korentesma 13:11 fiti boen na ini a tori disi, foe di a e taki: „Di mi ben de wan njofi pikin, mi ben taki leki wan njofi pikin, mi ben e prakseri leki wan njofi pikin, mi ben e meki plan leki wan njofi pikin; ma now di mi tron wan man, mi poeroe den eigifasi foe wan njofi pikin.”
9 Joe de na mindri 19 te nanga 35 jari? Joe abi wan boen gosontoe na skinsei, ma so toe na emotioneelsei? Joe kan leisi, skrifi, èn joe kan taki Ingrisitongo boen? Joe de wan jeje sma di abi wan dipi lobi gi Jehovah nanga en organisâsi? Efoe den e gi joe wan kari foe kon na Bethel, joe ben sa tan drape getrow ini a diniwroko dati, no moro mendri leki wán jari? Èn joe sa doe ibri wroko di den sa gi joe foe doe? Efoe joe kan piki nanga Ija na tapoe den aksi disi, dan a sa boen gi joe foe denki foe na aparti grani foe Betheldiniwroko. Den blesi de pasa marki.
10 Blesi foe Betheldiniwroko: Na artikel: „Met waardering het ’Huis van God’ bezien” (Loekoe nanga warderi na tapoe na „Oso foe Gado”), na ini De Wachttoren foe 15 juni 1994, ben taki: „Te joe e fisiti wan kongres, dan joe e firi wan dipi tevredefasi, foe di soso kolokoe anbegiman foe Jehovah de lontoe joe? Denki foe en, wan wrokoman na Bethel abi a grani foe dini Jehovah na mindri wan groepoe foe brada ibri dei! (Psalm 26:12) Fa disi na wan toemoesi moi okasi foe gro na jejefasi! Wan brada ben taki dati a ben leri moro foe jepi en foe meki en persoonlijkheid kon moro boen na ini wan jari na Bethel dan leki dri jari na wan tra presi. Foe san ede? Bika na no wan tra presi a ben abi na okasi foe loekoe èn foe waka na baka a bribi foe someni lepi kresten sma” (Odo 13:20). Foe troe, disi na wan foe den aparti blesi foe Betheldiniwroko.
11 Na Brooklyn Bethel, friwani wrokoman e njan boen foe krosibei demakandra nanga memre foe a Tiri Skin èn tra salfoe wan, èn so srefi toe nanga brada di ben tan langa ten getrow èn di de foe a tra skapoe groepoe. A no abi trobi sortoe wroko wan sma abi, a de wan blesi foe wroko na ini wánfasi nanga den getrow, loyaal kompe disi. Djaso wan toe komentaar de foe memre foe a Brooklyn Bethelfamiri di e sori fa den wan e firi di abi wan prati na ini a spesroetoe grani foe diniwroko na Bethel:
◼ Wan brada di de na Bethel 62 jari kaba èn di ben doe difrenti wroko na ini ala den jari di a de drape, ben taki foe a jeje di de na Bethel: „Wi alamala na wán famiri; wi alamala na brada. Wi e wroko nanga makandra. Wi alamala abi wi eigi wroko. A de toemoesi moi foe si fa den brada e wroko tranga; joe kan si omeni moeiti den e doe. Wi abi brada di e wroko leki sma di moesoe hori ala sani krin. Te joe e hori a presi krin, joe e meki taki a famiri e tan gosontoe. Efoe joe e meki taki a famiri e tan gosontoe, a famiri kan doe moro. A de toemoesi prenspari. A de prenspari foe abi sma na ini den kantoro. Ala nanga ala wi e tjari a bakapisi kon—a kotoigi foe a Kownoekondre na heri grontapoe. Disi na a moro boen presi na ondro son pe joe kan meki wan libiwroko foe dini Jehovah. Efoe joe wani de na ini a foeroeten diniwroko, joe kan doe disi moro boen leti djaso. Joe kan kisi ala sani di joe abi fanowdoe. Wi e njan boen foe spesroetoe sani dja di trawan no abi. A e meki joe si na organisâsi, foe di joe e jere njoensoe foe ala oekoe foe grontapoe.”
◼ A fosi wroko di wan salfoe brada di abi 75 jari ben kisi, ben de na ini a boekoe-binderij so wan 48 jari pasa. A ben taki: „A de wan moi ondrofeni foe libi na mindri foetoeboi foe Jehovah di gi densrefi abra na en èn di dopoe. Te mi e si wan jonkoeman e kon na Bethel, dan mi ati e foeroe nanga tangi gi Jehovah, bika mi sabi taki a man disi sa abi wan kolokoe libi dja na Bethel.” Na ini a tori foe sani di a e warderi foe Bethel, a ben taki moro fara: „Mi lobi en pipel. Mi feni taki den moi. Wan sani de na den brada di de na Bethel foeroe jari, di joe no e feni na no wan tra presi na tapoe grontapoe. Den abi waran firi, den e froestan makandra, èn den de ini wánfasi, èn dati na wan sani di joe no man froestan.”
◼ Wan tra brada di de na ini Betheldiniwroko moro leki 62 jari kaba, ben gi komentaar foe den wini di a ben kisi moro fara: „Efoe joe e kon na Bethel, dan dati e meki joe man kisi wan moro boen leri tapoe a kontren foe a tjari di joe moesoe tjari sani kon na doro . . . èn boiti dati, joe sa kisi wan bijbelleri di sa gi joe san joe abi fanowdoe, foe de wan sma di e teki presi gi Jehovah Gado na wan fasi di fiti, awinsi pe den e seni joe na grontapoe.”
◼ Wan memre foe a Tiri Skin, di abi 92 jari now, dini na Bethel 58 jari kaba. San a e denki foe Betheldiniwroko? „A Bethelfamiri dja èn na heri grontapoe na wan toemoesi moi seti foe sma di gi densrefi na ini a dini foe Gado.”
◼ Wan toe moen bifo wan memre foe a Tiri Skin, di ben abi 98 jari, dede wan getrow dede, a ben taki foe sani na a fasi disi: „Mi lobi foe dini na Bethel. A de a moro boen presi na ondro son.”
◼ Fa wan jonkoe man e si Betheldiniwroko? No so langa ete, wan jongoe brada skrifi: „Foe di, neleki fa Jesus ben taki, ’wi sa de moro kolokoe te wi e gi’, dan Bethel na a moro kolokoe presi pe mi ben de oiti.” A sabi san a jeje foe Bethel wani taki—a gi di wi moesoe gi.
◼ Wan brada di de na ini a foeroeten diniwroko 51 jari kaba, ben taki sani sjatoe na wan moi fasi. A ben e taki: „Betheldiniwroko troetroe na wan sani di joe no kan teki gersi tra sani. A de wan prenspari pisi foe a doe di Jehovah sa doe san a abi na ini prakseri, dja na grontapoe. So boen, ibriwan sma di abi a grani foe dini na Bethel moesoe warderi dati srefisrefi. Foe troe, Bethel e meki wi man foe sori dorodoro taki wi e gi wisrefi na a dini foe Gado.”
12 A routine foe ibri dei: A routine foe ibri dei e meki taki wan memre foe a Bethelfamiri abi foe doe dorodoro nanga Kownoekondre aktiviteit. Seibi joeroe mamanten, moende te nanga satra, a mamanten anbegi e bigin ini den presi foe Bethel pe wi e njan. Memre foe a famiri e gi komentaar tapoe a dagtekst èn dan wan brada foe a Tiri Skin noso wan brada di de foeroe jari na ini a foeroeten diniwroko kaba, e gi wan sjatoe komentaar tapoe dati. Baka dati, joe e kisi a mamanten begi. A programa disi e gi a famiri krakti na jejefasi gi den aktiviteit foe a dei dati. Memre foe a Bethelfamiri sa taigi joe, taki a de a heimarki foe a dei. Baka di den njan wan gosontoe mamanten njanjan, den Bethel memre fajafaja e go doe den difrenti sortoe wroko. A wrokodei foe moende te nanga freida e bigin aiti joeroe mamanten te nanga feifi joeroe bakadina, èn wán joeroe poti aparti gi a brekten njanjan. Tapoe satra den e wroko toe foe aiti joeroe mamanten te nanga 11:55 mamanten. Na mofoneti, satra bakadina èn sonde, den sma foe Bethel e go na den gemeente konmakandra foe den, èn den abi wan prati na ini na oso-foe-oso wroko noso den e hori bijbelstudie, noso den e doe sani gi densrefi. Den kan gebroiki a Bethel bibliotheek foe doe den persoonlijk studie noso foe sreka densrefi gi den konmakandra. Ija, ten de foe den kan teki a rostoe di den abi fanowdoe èn so taki den kan loesoe densrefi (Mark. 6:31, 34). Foe a sjatoe loekoe disi, joe kan si taki Betheldiniwroko e gi wan sma na okasi foe gi wan bigi pisi foe en ten ibri dei foe doe santa diniwroko, ala di a de fri foe den sani di e poeroe den prakseri foe sma na ini na owroe sistema foe sani disi.
13 Gemeente aktiviteit: Ini a birti foe New York City 390 gemeente de, èn den memre foe Brooklyn Bethel seni go na 350 foe den gemeente dati. Den sabi o warti a ròl foe a gemeente de foe jepi den foe tan hori a jejefasi foe den. So boen, den de aktief nanga a gemeente foe den, foe di den e go na ala den feifi konmakandra èn den abi wan dorodoro prati na ini a velddienst nanga den brada foe den. Boiti den gemeente konmakandra, a Bethelfamiri abi en eigi Waktitoren studie tapoe moende neti. Foe di a Bethel schema e poti krakti na tapoe jeje afersi, a abi leki bakapisi wan prisiri, kolokoe libi foe diniwroko gi Jehovah.—1 Kor. 15:58.
14 Sreka gi Betheldiniwroko: Jonkoeman foeroetron e aksi san den moesoe doe foe sreka densrefi gi Betheldiniwroko. Wan memre foe a Tiriskin di e dini na ini a Personeelcomité ben taki: „Te joe e kon na Bethel, dan kon dja foe dini, no foe trawan dini joe. O moro joe e leri foe dini, o moro kolokoe joe sa de. Leri foe gi, no foe teki. De bescheiden, abi sakafasi. A froktoe foe a jeje—dati na pe troe krestenfasi e tan.” Ija, a meki di joe e meki joe jejefasi gro èn a abi di joe abi wan boen matifasi nanga Jehovah, de a sroto foe abi boen bakapisi na Bethel. Foe dati ede, te den e soekoe njoen friwani wrokoman gi Bethel, foeroetron den e teki pionier. Te wan sma gi ensrefi tranga leri foe wan pisi ten foe wroko 90 joeroe na ini wan moen, ala di a e preiki èn e gi tra sma leri, so srefi toe te a e doe wroko di de fanowdoe foe sorgoe gi ensrefi, dan a e bow wan boen jeje fondamenti foe Betheldiniwroko èn a fasi foe libi drape di e go na wan ordefasi. Ma grantangi, loekoe taki Bethel no de soso gi den wan di e pionier. Ibriwan sma di e doro den marki di den brada e aksi foe den, kan gi den nen foe kon na Bethel.
15 Moro fara, a boen gi jonkoeman efoe den leri fa foe wroko nanga den anoe. Na ini na owroe seti foe sani disi, sma e si a wroko di trawan e wroko tranga nanga den anoe leki wan sani di no de fanowdoe. Foe di sma lobi densrefi nomo, meki den wani doe wroko di no e aksi foeroe krakti foe den noso di, na dorosei, e meki den kisi wan boen nen. Tokoe, foe sabi fa foe gebroiki difrenti jepisani nanga wrokosani, de praktis èn dati na wan boen sani (Odo 22:29). Foeroetron, jonkoeman kan leri foe doe sani nanga den anoe foe di den papa nanga mama e jepi den. Den kan gi jepi toe na den moro owroe mansma di abi ondrofeni foe di den e doe difrenti wroko lontoe a Kownoekondrezaal noso den kan jepi den wan di grani kaba foe ondrow den oso foe den.
16 Son leisi jongoewan e aksi: „Mi moesoe teki moro grontapoe leri so taki mi sa de bekwaam foe doe Betheldiniwroko?” A kisi di wan sma e kisi moro leri nomo no e meki en bekwaam foe doe Betheldiniwroko. Jeje eigifasi de moro prenspari èn den e aksi dati foe ala sma di e kisi wan kari foe kon na Bethel. Wi e gi papa nanga mama nanga den pikin foe den di de na skoro ete deki-ati, foe prakseri boen foe a balansi fasi foe si a teki foe grontapoe leri di den e gi, ini A Waktitoren foe 1 november 1992, bladzijde 12 te nanga 16, ini a tori foe a teki foe grontapoe leri. A bosroiti foe teki moro grontapoe leri na wan persoonlijk sani. Awinsi san wan sma e bosroiti foe doe, tokoe a moesoe de seiker taki a man foe tan go na fesi na jejefasi foe di a e hori en ai na tapoe a moro prenspari wroko foe Jehovah en pipel, èn dati na foe gi kotoigi foe waarheid.
17 A no abi trobi sortoe grontapoe leri wan sma kisi, ma a de toemoesi warti foe leri fa foe denki. Bijbel e rikomanderi a man di wi man denki èn a kisi foe praktis koni (Odo 1:4; 3:21). Foe leri fa foe denki èn fa foe hori bodoi sa meki taki joe man foe kisi sabi nanga a man di joe man leri foe doe sani. Dati sa boen gi joe èn gi na organisâsi foe Jehovah na heri grontapoe. Te foe kaba, a no abi trobi sortoe sani wan sma kan doe, a de prenspari srefisrefi taki a man foe feni en boen nanga trawan. Bethel friwani wrokoman moesoe wroko krosibei nanga makandra leki wan groepoe, so taki den kan tjari a wroko kon na wan kaba. So boen, wan jeje foe doe sani fa wi wani nomo noso wan jeje foe strei nanga makandra, moesoe meki presi gi wan jeje di e sori taki wi wani wroko makandra èn taki wi abi a srefi lobifasi foe denki èn firi. So srefi wan sma moesoe wani foe saka ensrefi na ondro theokrâsia tiri.—Teki gersi Efeisesma 4:16.
18 Jongoe sma na ini na organisâsi foe Jehovah abi wan toemoesi moi okasi foe kweki den eigifasi di kari na tapoesei. So boen, efoe den e kari den foe kon dini na Bethel, den sa abi wan moi okasi foe kisi leri foe Jehovah en organisâsi, so taki den kan teki moro frantiwortoe. Wi e gi papa nanga mama nanga owroeman tranga foe tan hori disi na fesi foe den jongoe wan. Foeroe papa nanga mama e tjari den pikin foe den doronomo foe go loekoe Bethel, so taki den kan sabi sortoe wroko e doe drape. Disi meki taki foeroe sma kon na Bethel baka di den ben kaba nanga skoro.
19 Den wan nanga ondrofeni: Foe di son leisi Bethel abi a leri nanga a bekwaamfasi foe wan brada noso sisa fanowdoe, meki na okasi de foe kon na Bethel gi son brada nanga sisa di owroe moro leki 35 jari. Gi foeroe foe a wroko di a Genootschap e doe now den abi sma fanowdoe di abi ondrofeni, foe wroko makandra nanga jongoe mansma di abi krakti èn di kan wroko boen, èn di den kan gi leri, „a wan nanga foeroe ondrofeni nanga a wan di e kisi leri”.—1 Kron. 25:8.
20 Gi foeroe wroko tide den abi sma fanowdoe di abi background na ini elektronika noso di man foe programmeer computer. A Genootschap troetroe abi wan lo fotokopieer masjin, laser printer, nanga computer, èn ala den sani disi den moesoe ondrow. Den abi sma fanowdoe toe tapoe a kontren foe a wet nanga a kontren foe dresi: afkati, datra, fysiotherapeut, nanga verpleegster di abi wan diploma. Den wan di man doe difrenti wroko di abi foe doe nanga a bow foe oso, so leki tèknik, loodgieter, elekticiteit, noso verwarming, ventilatie noso air-conditioning, ben sa kan de wan jepi. Foe meki den kostoe moro mendri, dan a Genootschap abi den eigi groepoe foe wagi di den e gebroiki foe tjari poeblikâsi go na difrenti presi. Foe dati ede, den abi sma fanowdoe toe di sabi fa foe rèi wagi boen, èn so srefi sma di kan meki den wagi te den broko.
21 A moro prenspari sani di wi abi fanowdoe na brada di gi densrefi abra na Jehovah èn di no trow. So srefi den wan di abi bekwaamfasi ini spesroetoe wroko, de fanowdoe, son wan foe den kan abi wan wefi kaba. Joe kan kisi Bethel formulier foe joe kringopziener noso na wan distriktkongres na a spesroetoe konmakandra di den o hori, gi den wan di wani go na Bethel. Joe kan skrifi toe go na a Bijkantoro foe Suriname, Watchtower Bible and Tract Society, Garnizoenspad 239, Distrikt Wanica. Efoe joe trow, dan hori na prakseri taki joe trowpatna toe moesoe de boen na jejefasi, na emotioneelsei èn na skinsei, foe man doe Betheldiniwroko. Efoe joe kisi leri èn joe abi ondrofeni tapoe wan foe den kontren di ben kari bifo, dan grantangi skrifi foe disi finifini èn poti en tapoe joe Bethel formulier.
22 Joe kan gi piki tapoe wan sani di de tranga fanowdoe? Bethel friwani wrokoman de tranga fanowdoe. Efoe joe e doro den markitiki di de fanowdoe foe doe Betheldiniwroko, dan wi e gi joe tranga foe seni wan Bethel formulier go foe piki tapoe a sani disi di de tranga fanowdoe. No lasi-ati efoe den no e gi joe wan kari wantewante. Joe kan seni wan njoen formulier ibri jari. Disi e gi wi njoen bodoi foe si efoe joe wani kon na Bethel ete.
23 Ala di a profeet Jesaja ben arki, Jehovah ben aksi en: „Soema mi sa seni, èn soema sa go gi wi?” Sondro draidrai, Jesaja ben piki: „Dja mi de! Seni mi!” So boen, Jesaja ben bigin wan toemoesi moi libiwroko leki wan profeiti foe Gado. Joe kan taki: „Dja mi de! Seni mi”? Foeroe blesi e wakti joe efoe joe e kisi wan kari foe kon dini na ini na „Oso foe Gado”, Bethel.—Jes. 6:8.