Yu Kan Seti Sani fu Man Dini?

¹ Wan tumusi aparti sani e pasa ini a yari 778 b.G.T. A profeiti Yesaya e si ’Yehovah e sidon na tapu wan hei èn gran kownusturu’. Baka dati, Yesaya e yere taki den seraf e poti prakseri na a glori fu Yehovah, ala di den e taki: „Santa, santa, santa Yehovah fu den legre de.” Dati ben de trutru wan sani di ben meki sma lespeki Yehovah srefisrefi! Na ini a situwâsi dati Yehovah e poti wan muilek aksi: „Suma mi sa seni, èn suma sa go gi wi?” A no e fruteri sortu wroko de fu du noso efu a sma di wani du en, o kisi wini fu a wroko dati srefi. Ma toku Yesaya e taki sondro draidrai: „Dya mi de! Seni mi.”​—Yes. 6:1, 3, 8.

² Wan fu den marki fu a pipel fu Yehovah na taki den de klariklari fu gi densrefi, awinsi san a e aksi den fu du (Ps. 110:3). Now den wan di man gi densrefi e kisi wan spesrutu kari. Yu de klariklari fu gi yusrefi nanga yu heri ati, neleki fa Yesaya ben du dati?

³ Brada de fanowdu ala ten fu dini na Bethel. Disi wani taki dati den musu abi a trutru winsi fu poti Kownukondre afersi na a fosi presi. So srefi den musu wani du awinsi sortu sani fu horibaka gi a preikiwroko na heri grontapu (Mat. 6:33). Fu taki en leti, te wan sma e dini leki wan memre fu a Bethelfamiri, dan dati e gi en wan spesrutu okasi fu dini Yehovah nanga en heri sili. Fa so?

⁴ A Wroko Di E Du na Bethel: Prakseri fu ala wroko di e du ala ten baka na den dri Bethel-oso fu Amerkankondre na ini New York na Brooklyn, Patterson, nanga Wallkill. A Bethelfamiri na ini den dri presi drape abi 5730 brada nanga sisa. Den alamala abi a grani fu wroko skinskin makandra nanga a getrow èn koni srafu nanga a Tiri Skin. Den brada nanga sisa disi e yepi a Tiri Skin fu meki Bijbel nanga Bijbel publikâsi di sma kan gebroiki fu du a preikiwroko na heri grontapu èn fu studeri nanga densrefi (Mat. 24:45). Fu eksempre, fu di a Bethelfamiri na Amerkankondre ben meki muiti ini a dienstyari di pasa, meki 24.364.670 buku, 39.813.464 pikin buku nanga brochure, 270.528.000 tijdschrift, nanga 1.271.041 cassette, ben druk èn seni gowe. Kefalek furu muiti e du fu suku èn feni „switi wortu èn fu skrifi den yoisti wortu fu waarheid” na ini den publikâsi disi (Preik. 12:9, 10). A Tiri Skin e gi bodoi na den moro leki 1900 sma di e vertaal na heri grontapu. Den sma disi e yepi fu meki buku na ini moro leki 300 tongo. Furu e du fu orga a wroko di na den 111 bijkantoro na heri grontapu, èn so srefi fu orga den moro leki 11.500 gemeente na ini Amerkankondre. Yepi e gi so srefi na den bijkantoro di e bow moro Bethel-oso nanga kongres hal èn so srefi den 15.248 Kownukondre zaal di de fanowdu nownow na ini den pôti kondre. Hondrohondro friwani-wrokoman de fanowdu fu yepi druk èn fu seni buku gowe. Den de fanowdu so srefi fu krin, fu ondrow a presi, fu sreka nyanyan, fu bai sani, fu gi trawan datra yepi, èn fu yepi du den furu tra wroko di e du na Bethel. A no de fu taki dati a bijkantoro fu Sranan moro pikin leki Bethel fu Amerkankondre. Toku moro furu fu a wroko di e du dyaso na den srefi sortu wroko di e du na Amerkankondre.

⁵ Na wan kefalek bigi sani fu du ala wroko disi, ma toku a e gi sma prisiri na yeye fasi. Wi e prisiri srefisrefi te wi sabi taki wi e gebroiki ala wi krakti fu horibaka gi a preikiwroko èn fu gi sma leri. Bethel diniwroko e yepi wi fu kon sabi Yehovah en organisâsi moro bun. Bethel diniwroko e memre wi tu na a deki-ati di a psalm skrifiman ben gi den Israèlsma. A ben gi den deki-ati fu kon sabi a moro prenspari presi fu theokrasia tiri ini den dei fu den, moro bun.​—Ps. 48:12, 13.

⁶ Blesi fu a Bethel Diniwroko: Fa den wan di e dini na Bethel e feni a grani di den abi fu du a diniwroko disi? Luku san moro yongu èn so srefi moro owru memre fu a Bethelfamiri e taki. Wan memre fu a Bethelfamiri di du a Bethel diniwroko dri yari kaba e taki: „Fu di mi de na Bethel, a matifasi fu mi nanga Yehovah kon moro tranga. O moro langa mi e wroko dyaso èn o moro mi e leri fu a fasi fa Bethel e wroko, o moro dati e leri mi sortu sma Yehovah de. Bethel diniwroko ben opo mi ai tu, so taki mi kon si taki Yehovah e gebroiki sma — ala sortu sma. Yu no abi fu de volmaakti fosi Yehovah feni yu bun.”

⁷ Wan yongu brada e taki: „Mi e memre ete fa mi e denki: ’O moi a o de fu go ini a nyun grontapu èn fruteri den getrow man fu owruten taki mi ben wroko furu yari na Bethel, èn mi no go meki moni na ini grontapu.’”

⁸ Wan yongu brada e prakseri a leri di a ben kisi: „A de wan bigi blesi taki mi ben leri sabi misrefi, taki mi ben kon si den sani di mi musu wroko na den, èn taki mi kweki den eigifasi dati. Mi firi taki now mi man dini Yehovah moro betre. Mi feni taki mi abi pikin moro pasensi, taki mi man dwengi misrefi pikin moro bun, èn taki mi man sori moro lobi.”

⁹ Wan sisa e denki fu den blesi di a ben kisi te nanga now: „A programa dyaso di e gi leri na yeye fasi, leri mi moro fu Yehovah èn fa mi kan denki, firi èn du moro leki en. We, fu di a leri disi e gi doronomo, a blesi disi e kon doronomo tu.”

¹⁰ Wan brada di du a furuten diniwroko ala nanga ala 59 yari, wroko moro leki 43 fu den yari disi na Bethel. A ben taki: „Bethel no de leki wan klooster soleki fa son sma e denki kande. Wi man du furu fu di wi e du sani na fasti ten. . . . No wan dei no ben de, di mi go na wroko èn mi no prisiri nanga a sani di mi ben du. Fu san ede? Bika te wi e gi wisrefi nanga wi heri sili na Yehovah, dan wi e prisiri fu sabi taki ’wi du san wi ben musu du’.”​—Luk. 17:10.

¹¹ Wan tra brada di wroko 62 yari langa na Bethel, ben taki: „Mi e bribi trutru taki Bethel na a moro betre presi di de fu feni na grontapu te leki a paradijs na grontapu e kon. No wan momenti mi sari taki mi ben meki a furuten diniwroko kon tron mi libiwroko. A de trutru wan prisiri fu si èn fu yepi taki na organisâsi fu Yehovah na grontapu e gro! Nanga Yehovah en yepi, mi abi a fasti bosroiti fu tan meki Bethel kon de mi oso èn fu tan wroko nanga mi heri sili so taki Kownukondre afersi kan go na fesi.”

¹² Den memre disi fu a Bethelfamiri ben kari wan tu fu den furu blesi nomo di yu kan kisi efu yu gi yusrefi fu du a Bethel diniwroko. Ma soleki fa a de nanga iniwan tra grani fu dini, dan yu musu doro den markitiki fosi. San na wan tu sani di den e aksi fu yu fu kan dini leki wan memre fu a Bethelfamiri?

¹³ Markitiki gi a Bethel Diniwroko: Den moro prenspari markitiki gi den wan di e aksi fu du Bethel diniwroko, de fu si ini a faki fu na artikel disi. Boiti dati, a prenspari taki den musu wani wroko tranga, den no musu de sma di ’lobi prisiri nomo’ (2 Tim. 3:4; 1 Kor. 13:11). Memre fu a Bethelfamiri musu de man nanga uma di lepi na yeye fasi. Den musu abi bun gwenti fu studeri nanga densrefi. Den gebroiki a koni di den abi fu si sani krin, fu „man si krin san bun èn san ogri” (Hebr. 5:14). Den musu sori kaba taki den na lepi Kresten ini difrenti pisi fu a libi, so srefi den krosi di den e weri, a fasi fa den e sorgu densrefi, den poku di den e arki èn a sortu prisiri di den e meki. Memre fu a Bethelfamiri di wani dini nanga den heri ati, e yepi awinsi pe dati de fanowdu. Den moro yongu memre moro furu e kisi wroko pe den musu gebroiki den krakti, soleki a wroko fu druk buku, poti den na ini dosu èn tyari den buku gowe. Den e ondrow den gebow nanga masyin so srefi, den e krin den kamra nanga tra presi, èn den e wasi krosi èn den e sreka nyanyan (Odo 20:29). Ma tra fasi leki grontapu wroko, ibri wroko di yu e kisi fu du e gi yu bigi prisiri, bika a wroko dati na santa diniwroko di e gi Yehovah glori.​—Kol. 3:23.

¹⁴ Den wan di e kisi wan kari fu kon na Bethel musu tan no moro mendri leki wan yari. Disi kan yepi den fu leri fu de sma di man du bun wroko. Wi e howpu taki den o man si Bethel leki den oso. Na lobi gi Yehovah e meki taki memre fu a Bethelfamiri e poti a Kownukondre wroko bifo den eigi afersi. Disi e plisi Yehovah.

¹⁵ Sma Di De Fanowdu Nownow: Te wi e luku a sortu wroko di e du na Bethel, dan moro furu brada di no trow ete de fanowdu. Ala di a no de wan markitiki, toku den e teki gewoon pionier fosi, bika den e du a furuten wroko kaba. Ten na ten wan tu presi kan de gi sisa di no trow èn gi trowpaar mindri 19 te go miti 35 yari, di kande abi wan tu koni di de fanowdu na Bethel. Boiti dati, son brada nanga sisa di owru pikinso moro leki 35 yari èn di abi spesrutu koni di den kan gebroiki na Bethel, e kisi a deki-ati fu gi den nen. Fu kari wan tu eksempre nomo, kande den na tifidatra, gewoon datra, accountant (sma di abi bun frustan fu boekhouding), architekt (wan sma di e meki bowtekening fu oso), insyinoru, ati-oso zuster, monteur, noso elektricien. Ma wi no e gi sma deki-ati fu go na wan spesrutu skoro noso fu teki wan spesrutu leri soso fu kan abi wan moro bigi tyans fu kan kon na Bethel. Ma a kan taki den wan di kisi spesrutu leri kaba, kande bifo den teki a waarheid, wani skrifi dati syatu èn finifini na tapu wan papira èn fasi dati na a aanvraagformulier fu kon na Bethel.

¹⁶ Efu yu poti yu nen, ma den no gi yu wan kari fu dini na Bethel, no lasi ati. Kande yu wani hori na prakseri fu poti yu nen ala yari baka tapu wan nyun formulier. Son brada di kisi spesrutu leri èn di abi spesrutu koni di de fanowdu na Bethel kande, sreka sani fu du a friwani wroko wan syatu pisi ten. Den kan aksi fu wroko wan pisi ten na Bethel; kande wan, tu, dri noso fo wiki te go miti dri mun srefi. A sekretarsi fu a gemeente abi den formulier disi fu wroko wan pisi ten, gi den wan di wani yepi na so wan fasi. Den brada kan aksi fu kisi moro fu den formulier disi na tapu na Aanvraagformulier voor lectuur.

¹⁷ Na wan aparti grani gi den wan di e wroko na Bethel fu dini Yehovah, ala di den e wroko skinskin makandra nanga den brada fu Krestes. Ala den sma di de klariklari fu yepi a bradafasi na heri grontapu nanga san den abi fanowdu, trutru e sori taki den wani gi densrefi. A Tiri Skin e warderi a fasi fa den sma dati e tyari densrefi.​—Fil. 2:20-22; 2 Tim. 4:11.

¹⁸ Yonguwan—Sreka Yusrefi Now gi a Bethel Diniwroko: A sreka di yu e sreka yusrefi fu du a Bethel diniwroko e bigin langa ten bifo yu e doro 19 yari — a yari di wan sma musu abi fu man bigin du Bethel diniwroko. San yonguwan kan du fu sreka densrefi gi Bethel diniwroko? Yesus ben taki: „Suma fu unu di wani bow wan toren no e go sidon fosi fu teri den kostu?” (Luk. 14:28) Fu di a de tumusi prenspari fu sreka èn seti sani fu kan abi bun bakapisi nanga iniwan bow programa, dan a no de fu taki dati a prenspari trutru taki yonguwan e poti prakseri heri bun na a fasi fa den e seti a tamara fu den na ini Yehovah en diniwroko. Frukufruku na ini a libi fu den wan fondamenti musu seti kaba, so taki den kan doro den marki na yeye fasi. O bun yu e seti yu fondamenti leki wan yonguwan? Efu yu wani dini na Bethel, dan a o yepi yu te yu e luku den sani di e kon now.

¹⁹ „Meki Presi” gi a Spesrutu Grani Disi fu Diniwroko: Soleki fa skrifi na ini Mateus 19:12, Yesus ben gi den disipel fu en deki-ati fu „meki presi” gi wan libi sondro fu trow. Fu san ede? No fu den eigi prakseri ede, „ma fu a bun fu a kownukondre fu hemel”. Na a srefi fasi Paulus ben gi deki-ati fu libi na so wan fasi pe yu e ’dini Masra doronomo sondro fu sani puru yu prakseri’ (1 Kor. 7:32-35). A sari taki, furu sma lasi a grani disi fu dini leki man di no trow na Bethel bika den ben feti fu trow frukufruku. Wi wani gi den yongu brada fu wi deki-ati fu gebroiki a krakti fu den fu meki muiti fu du a furuten diniwroko ala di den no abi a frantwortu ete fu sorgu den eigi osofamiri. Dan efu den e teki a bosroiti fu trow baka wan pisi ten, den o de moro betre masra bika den kisi moro ondrofeni ini a libi èn ini a Kresten diniwroko. Baka di son sma dini furu yari na Bethel, den trow èn den ben man tan dini drape leki trowpaar. Efu den abi a grani bakaten fu dini leki opziener di e reis noso leki zendeling, dan den no e sari srefisrefi taki den ben gebroiki a ten fu den fu du a Bethel diniwroko.

²⁰ No Meki Materia Sani Hari Yu Prakseri Puru: A ben o bun taki ibri yongu sma aksi ensrefi taki: ’San mi wani du baka di mi kaba nanga hei skoro? Mi o feti fu kisi wan furuten grontapu libiwroko noso mi o go dini Yehovah furuten?’ A no de fu taki, dati efu yu o go dini Yehovah furuten, dan yu o abi fu libi wan tu sani di yu ben sa wani du. Ma na so a de tu, efu yu o feti fu abi wan libiwroko ini grontapu! Ma te fu kaba, sortu fasi fu libi sa gi sma bun winimarki di sa tan wan langa ten? Yesus ben gi wan krin piki. Soleki fa skrifi na ini Mateus 6:19-21, dan a ben taki: „Unu no musu tyari gudu kon na wan gi unsrefi na grontapu moro, pe motu nanga frustu e pori sani, pe fufuruman e broko kon na inisei fu fufuru sani. Na presi fu dati, tyari gudu kon na wan gi unsrefi na hemel, pe motu nanga frustu no e pori sani, èn pe fufuruman no e broko kon na inisei fu fufuru sani. Bika pe yu gudu de, na drape yu ati sa de tu.” Noiti wi musu meki taki wi ati e pusu wi fu feti fu abi wan libiwroko ini grontapu noso fu suku gudu, na presi taki wi e du a diniwroko gi Yehovah nanga wi heri sili. Wi alamala musu erken taki a wan-enkri sani di warti èn di wi musu meki muiti fu kisi, na wan bun matifasi nanga Yehovah, so taki wi kan meki en ati prisiri (Odo 27:11). Te wi e poti Yehovah na a fosi presi ini wi libi ala di wi yongu ete, dan wi e sori pe den gudu fu wi de èn so srefi o prenspari a Kownukondre de gi wi. Memre taki „a blesi fu Yehovah — dati na san e meki sma kon gudu, èn a no e poti pen na tapu” (Odo 10:22). Yonguwan abi wan tumusi moi okasi fu sori pe den ati de fu di den e gi Yehovah wan bun sani baka fu ala sani di a gi den. Bethel diniwroko e gi den wan di e doro den markitiki, wan moi okasi fu du dati.

²¹ Den Wan Di E Dini na Bethel Musu Tyari Densrefi Bun: A psalm skrifiman ben aksi: „Fa wan yonkuman sa krin en pasi?” A ben piki: „Fu di a de na ai akruderi a wortu fu [Yehovah]” (Ps. 119:9). Dati wani taki tu, dati yu o wai pasi gi iniwan sani di abi fu du nanga a takru fasi fa sma fu a sistema fu Satan e tyari ensrefi. Satan e gebroiki trapu fu sorgu taki den yonguwan fu wi no man doro marki na yeye fasi. Wan tu fu den trapu na doti seks tori tapu na Internet, den fowtu fasi fa mansma e handri nanga umasma noso fa umasma e handri nanga mansma, doti poku, wan lagi fasi fu meki prisiri, èn a dringi di den e dringi sopi ala di den yongu tumusi ete. Wan tranga bosroiti de fanowdu fu kan kakafutu gi den triki disi. Efu yu e si taki yu leki wan yongu sma e du wan fu den sani disi, taki dan nanga den owruman ini yu gemeente èn lusu den problema disi bifo yu e gi yu nen fu du Bethel diniwroko. A prenspari fu abi wan krin konsensi efu yu wani dini Yehovah dorodoro.​—1 Tim. 1:5.

²² Leri fa fu Libi Nanga Trawan: Wan prenspari markitiki fu man du a Bethel diniwroko bun, na fu leri fa fu libi nanga trawan. A Bethelfamiri na Sranan abi moro leki 30 brada nanga sisa. Ma a Bethelfamiri fu Amerkankondre abi dusundusun brada nanga sisa di alamala e difrenti fu makandra. Ala di den furu difrenti sma disi e meki taki Bethel e kon moi na yeye fasi, toku a kan de wan tyalensi son leisi. Efu yu e prakseri fu du a Bethel diniwroko, a ben o bun fu aksi yusrefi: ’Te trawan no e si sani leki fa mi e du dati, dan wantewante mi e firi taki den afrontu mi? Trawan feni taki a makriki fu de wan mati fu mi?’ Efu yu musu wroko na den sortu kontren disi, bigin du dati now. Te yu e du dati dan dati o yepi yu fu fiti yusrefi moro makriki fu libi èn wroko nanga den memre fu a Bethelfamiri.

²³ Wroko tranga fu de wan sma di abi yeyefasi fu di yu e kweki wan moro bun matifasi nanga Yehovah. Sorgu taki yu e kon abi wan bun programa fu studeri nanga yusrefi, san wani taki tu dati yu e leisi Bijbel ibri dei. Wroko fayafaya fu fruteri trawan a bun nyunsu. Te yu e du den sani disi, dan yu o meki sma si taki yu e go na fesi (1 Tim. 4:15). Den wan di e sreka densrefi now fu teki a furuten diniwroko leki wan libiwroko kan fruwakti moi sani ini a ten di e kon!

²⁴ Papa Nanga Mama, Gi den Pikin fu Yu Leri: San papa nanga mama kan du fu gi yonguwan deki-ati fu du muiti fu teki a furuten diniwroko? Yesus ben taki: „Ala sma di kisi volmaakti leri, sa de leki a leriman fu en” (Luk. 6:40). Wan studenti di kisi bun leri musu sori den moi eigifasi fu en fayafaya leriman. Kresten papa nanga mama musu hori a gronprakseri disi na prakseri ala di den e wroko tranga fu gi den pikin fu den leri „nanga a marki fu dini Gado fayafaya” (1 Tim. 4:7). Pikin-nengre abi a gwenti fu si yeye sani na a srefi fasi fa a papa nanga mama fu den e si yeye sani. Dati meki a ben o bun taki papa nanga mama e aksi densrefi: ’Wisrefi e warderi a wroko di e du na Bethel fu horibaka gi den sani di abi fu du nanga a tru anbegi fu Yehovah? Wi e si trutru taki Yehovah e blesi a Bethel seti? Wi e bribi taki wan libi pe wi e du a diniwroko fu Yehovah, na a moro betre libiwroko di den pikin fu wi kan go du?’ Te wi e warderi a Bethel diniwroko nanga wi heri ati èn a wroko di e du drape, dan dati o yepi wi fu leri den pikin fu wi fu abi a srefi sortu warderi.

²⁵ Elkana nanga Hana ben warderi a tru anbegi trutru. Den tu sma disi ben gi Kresten papa nanga mama fu a ten disi wan moi eksempre. Ini na owruten Israèl, soso den Israèl man ben musu „kon na fesi a tru Masra, Yehovah” dri leisi wan yari na a tabernakel. Ma toku Elkana ben reis so wan 30 kilometer, kande nanga futu, makandra nanga en heri osofamiri „yari baka yari”, fu tyari ofrandi na a prenspari presi disi pe den ben anbegi Yehovah (Ex. 23:17; 1 Sam. 1:3, 4, 9, 19; 2:19). A krin taki a famiri edeman disi ben wani taki en heri osofamiri ben musu abi a srefi lobi di en ben abi gi yeye sani.

²⁶ Neleki en masra, Hana ben lobi a tru anbegi tu. A ben abi a tranga winsi fu horibaka gi a tru anbegi na a tabernakel. Hana ben pramisi taki efu Yehovah ben o gi en wan manpikin, dan a ben o sorgu taki en manpikin ben kan du diniwroko na a tabernakel (1 Sam. 1:11). A Wet fu Moses ben gi wan masra a reti fu broko wan pramisi di na uma fu en ben meki, efu a pramisi dati no ben fiti (Num. 30:6-8). Ma soleki fa a sori, dan Elkana ben feni a pramisi disi fu Hana bun. Na so wan fasi ensrefi ben sori taki a ben horibaka gi a tru anbegi!​—1 Sam. 1:22, 23.

²⁷ A papa nanga mama fu Samuèl ben sori taki den ben abi warderi èn taki den ben si sani na wan bun fasi. Disi ben gi Samuèl, a manpikin fu den, deki-ati fu du bun sani? Iya, fu tru. Leki wan yongu boi, Samuèl ben wani trutru fu du den wroko di a ben kisi èn a ben du dati na wan getrow fasi. A ben kisi leri so srefi so taki a ben kan kisi moro bigi grani ini Gado en diniwroko. Elkana nanga Hana no ben tapu fu poti na Samuèl en diniwroko na a tabernakel, di a ben bigin du a wroko fu en drape. Den ben tan go na en fu gi en deki-ati èn fu horibaka gi en, ala di a ben meki muiti fu du a furuten diniwroko.​—1 Sam. 2:18, 19.

²⁸ Dati na wan moi eksempre di Elkana nanga Hana ben gi Kresten papa nanga mama ini a ten disi! Te den pikin fu wi e yere den wortu di wi e taki fu di wi ati furu nanga warderi gi a grani fu a Bethel diniwroko èn te den e si fa wi e gi wisrefi fu horibaka gi Kownukondre afersi, dan den tu o kweki a firi na ini den ati fu dini trawan. Furu papa nanga mama man poti a bun winsi disi ini den pikin fu den. Wan pikin fu seibi yari ben skrifi: „Te mi kon bigi, dan mi wani go na Bethel èn wan tu sani de di mi wani du drape. Mi wani (1) skrifi den Waktitoren nanga Ontwaakt! tijdschrift nanga skrifi masyin, (2) mi wani wroko na a studio pe unu e teken nyun sani, èn (3) fow den krosi di wasi. Awinsi sortu wroko de fu feni, a no abi trobi.” A e gi wi trutru prisiri fu si taki den pikin fu wi e bigin kweki na angri na ini den ati fu wani gi densrefi.

²⁹ Yonguwan, hori na prakseri taki „grontapu e pasa gowe èn so srefi a lostu fu en, ma a sma di e du a wani fu Gado, e tan fu têgo” (1 Yoh. 2:17). Tan du muiti fu doro marki na yeye fasi, so srefi fu kisi a spesrutu grani fu du Bethel diniwroko. Papa nanga mama, teki na eksempre fu den getrow wan fu fositen di ben gi den pikin fu den deki-ati fu kon kisi a winsi fu dini Gado fayafaya (2 Petr. 3:11). Meki wi alamala du san wi musu du fu yepi wi yongu brada nanga sisa fu dini wi Gran Mekiman so furu leki den man. Wi musu du disi, fu di a „abi wan pramisi gi a disiten libi èn a libi di musu kon ete”.​—1 Tim. 4:8; Preik. 12:1.

[Faki na tapu bladzijde 4]

Prenspari Markitiki gi Bethel Diniwroko

● Yu musu dopu wan yari noso moro langa

● Yu musu de wan sma di tranga na yeye fasi èn yu musu abi furu lobi gi Yehovah nanga en organisâsi

● Yu musu de bun na yeye fasi, na frustan sei, na emotioneel sei, èn yu musu de gosontu

● Yu musu de wan borgu fu Sranan noso lanti musu gi yu primisi fu tan libi na Sranan

● Yu musu man leisi, skrifi èn taki Bakratongo bun

● Yu musu abi 19 te go miti 35 yari