Markus skrifi en

13 Di a waka kmoto na ini a tempel, wan disipel fu en taigi en: „Leriman, luku fa den ston disi bigi èn luku fa den oso moi!” 2 Ma Yesus taigi en: „Yu e si den bigi oso disi? Nowan ston o tan na tapu a trawan, ma den o broko den puru.”

3 Di a ben e sdon na tapu Olèif-bergi pe a ben kan si a tempel, dan Petrus, Yakobus, Yohanes nanga Andreas w’wan ben de nanga en. Den aksi en: 4 „Taigi wi: O ten den sani disi o psa èn san o sori taki ala den sani disi o kon na wan kba?” 5 Ne Yesus taigi den: „Luku bun taki nowan sma no kori unu. 6 Furu sma o gebroiki mi nen èn den o taki: ’Mi na a sma’, èn den o kori furu sma. 7 Boiti dati, no skreki te unu e yere taki feti e feti èn te unu e yere nyunsu taki feti de, bika den sani disi musu psa. Ma a kba no doro ete.

8 Bika a wan pipel o go feti nanga a tra pipel èn a wan kownukondre o go feti nanga a tra kownukondre. Na difrenti presi angriten nanga gronseki o de. Den sani disi na a bigin fu wan ten fu banawtu di de leki a hebi pen fu wan uma di de fu meki en pkin.

9 Ma un musu luku bun, bika sma o tyari unu go na krutu, den o fon unu na ini den snoga èn den o tyari unu go na fesi granman nanga kownu fu di unu na mi bakaman. Ma dati o de wan okasi gi unu fu preiki gi den. 10 Boiti dati, a bun nyunsu musu preiki fosi na ala kondre. 11 Ma te den e tyari unu go na krutu, un no musu broko un ede nanga san unu o taki. Na a ten dati unu o sabi san un musu taki, bika a no unu srefi o taki, ma na a santa yeye o yepi unu fu taki. 12 Boiti dati, wan brada o tyari en eigi brada go kiri èn wan p’pa o du a srefi nanga en pkin. Pkin o opo densrefi teige den p’pa nanga m’ma èn den o meki sma kiri den. 13 Ala sma o teige unu fu di unu na mi bakaman. Ma a sma di hordoro* te na a kba o kisi ferlusu.

14 Ma te unu e si a sani di no krin èn di e tyari pori kon, e tnapu pe a no musu tnapu (meki a sma di e leisi disi du muiti fu ferstan san taki dya), dan den sma di de na Yudea musu bigin lowe go na den bergi. 15 A man di de na tapu a dak fu en oso no musu saka kon na gron èn a no musu go na insei fu teki wan sani na ini en oso. 16 A man di de na ini en gron no musu drai go na oso baka fu teki en dyakti. 17 A ten dati o hebi srefsrefi gi den uma di de nanga bere èn gi den wan di abi pkin di de na bobi ete! 18 Tan begi taki disi no psa na ini a kowru ten fu a yari, 19 bika a ten dati o de wan ten fu banawtu. Noiti ete so wan ten ben de sensi di Gado bigin meki sani teleki now èn noiti moro so wan ten o kon baka. 20 Fu taki en leti, efu Yehovah* no syatu a ten dati, nowan sma o kisi ferlusu. Ma Gado o syatu a ten dati gi den sma di a kari.

21 Te wan sma e taigi unu: ’Luku! Krestes de dyaso’ noso: ’Luku! A de drape!’, dan unu no musu bribi en. 22 Bika falsi Krestes nanga falsi profeiti o opo kon. Den o du wondru nanga tra bigi sani fu kori srefi den sma di Gado kari. 23 Fu dati ede, luku bun. Mi taigi unu ala den sani disi na fesi.

24 Ma na a ten dati, baka a ten fu banawtu, a son o kon dungru, a mun no o gi leti, 25 den stari o fadon kmoto fu hemel èn den sani na hemel o seki. 26 Dan den o si a Manpkin fu libisma e kon na ini den wolku nanga krakti èn nanga bigi glori. 27 A o seni den engel go èn a o tyari den sma kon na wán di Gado kari kmoto fu noordsei, zuidsei, owstusei, nanga west-sei, iya, fu a wan sei fu grontapu te na a tra sei èn fu a wan sei fu hemel te na a tra sei.

28 Luku a figabon èn leri a sani disi fu en: Te unu e si taki wan nyun taki e bigin gro na a bon èn a e bigin sproiti, dan unu sabi taki a waran ten fu a yari e doro. 29 Na so a de tu taki te unu e si den sani disi e psa, dan un musu sabi taki a Manpkin fu libisma de krosbei èn taki a e tnapu leti na mofodoro. 30 Unu kan bribi mi taki den sma fu a ten disi o de na libi ete te ala den sani disi o psa. 31 Hemel nanga grontapu o psa gwe, ma den sani di mi taki o tan fu ala ten.

32 Nowan sma sabi a dei noso a yuru dati. Ja, srefi den engel na hemel nanga a Manpkin no sabi. Na a P’pa w’wan sabi. 33 Tan luku, tan na ai, bika unu no sabi o ten den sani disi o psa. 34 A de leki wan man di ben go na wan tra kondre. A gwe èn a meki den srafu fu en luku na oso fu en. Ibriwan fu den ben musu du en eigi wroko èn a taigi a waktiman fu tan na ai. 35 Fu dati ede, tan na ai, bika unu no sabi o ten a basi fu na oso o kon. Unu no sabi efu a o kon na mofoneti, mindrineti, musdei* noso fruku m’manten. 36 A o kon na wan ten san unu no ferwakti. Sorgu taki a no kon si unu e sribi. 37 San mi e taigi unu, mi e taigi ala sma: Tan na ai.”