A fosi brifi fu Petrus
4 Krestes pina di a ben de wan libisma. Dati meki unu srefi musu du muiti fu abi a srefi denki leki en. Bika a sma di pina leki libisma no e sondu moro. 2 Na so a no o libi moro fu du san a sondu skin wani, ma a o libi fu du a wani fu Gado na ini a pisi ten di a de na libi ete. 3 Na ini a ten di psa unu ben libi leki den sma fu a grontapu disi. Unu ben e du ogri sondro fu syen,* unu ben abi takru lostu, unu ben e dringi tumsi furu sopi, unu ben e hori bradyari fesa, unu ben e hori fesa fu dringi sopi te unu drungu èn unu ben e du ala sortu ogri* fu anbegi falsi gado. 4 Ma now den no man ferstan taki unu no e waka nanga den moro èn taki unu no e libi a srefi fisti yayolibi fu den. Dati meki den e taki ogri fu unu. 5 Ma den sma disi o gi frantwortu na a sma di de srekasreka fu krutu den libiwan nanga den dedewan. 6 Dati meki sma ben preiki a bun nyunsu gi den dedewan* tu. Libisma e krutu den soleki fa libisma e si sani, ma tòg den kan libi te den e meki Gado yeye tiri den.
7 Ma a kba fu ala sani kon krosbei. Fu dati ede un musu de nanga krin ferstan èn ala ten un musu de srekasreka fu begi.* 8 Ma san moro prenspari, na taki un musu lobi makandra nanga un heri ati, bika lobi e tapu bun furu sondu. 9 Du bun gi makandra sondro fu krutukrutu. 10 Ibriwan fu unu kisi a koni fu man du wan spesrutu sani. Gebroiki a koni dati fu yepi makandra leki bun futuboi di Gado sori bun-ati na difrenti fasi. 11 Efu wan sma e taki wan sani, dan meki a taki fu den boskopu fu Gado. Efu wan sma e yepi trawan, dan meki a fertrow tapu a krakti di Gado e gi. Na so Gado o kisi glori na ala fasi nanga yepi fu Yesus Krestes. Meki Gado abi glori nanga makti fu ala ten, iya, fu têgo. Amen.
12 Mi lobi brada nanga sisa, no skreki te hebi tesi* e miti unu. No denki taki den sani disi no o psa nanga unu. 13 Na presi fu bruya, un musu prisiri fu di unu e pina neleki Krestes. Dan te a glori fu en o de fu si, unu o breiti srefsrefi èn unu o prisiri psa marki. 14 Efu sma e kosi* unu fu di unu na bakaman fu Krestes, dan unu o de koloku fu di disi e sori taki unu abi a yeye fu glori, dati na a yeye fu Gado.
15 No meki nowan fu unu pina fu di unu tron wan kiriman, wan fufurman, wan ogriman, noso wan sma di e bemui na ini tra sma tori. 16 Ma efu wan sma e pina fu di a de wan Kresten, dan a no musu firi syen. Bika efu a e libi leki wan Kresten, dan a o tan gi Gado glori. 17 A ten doro taki Gado o koti krutu èn a o bigin na a oso fu en fosi. Efu a e bigin na wi fosi, dan san o psa nanga den sma di no wani arki a bun nyunsu fu Gado? 18 „Efu wan ret’ati sma musu meki furu muiti fu Gado ferlusu en, dan san o psa nanga wan ogrisma èn nanga wan sondari?” 19 Fu dati ede meki den sma di e pina fu di den e du san Gado wani, tan du bun èn meki den tan poti den libi* na ini na anu fu wi Mekiman di wi kan fertrow.