Esekièl

7 Yehovah taki baka nanga mi. A taigi mi: 2 „Manpkin fu libisma, a Moro Hei Masra Yehovah taigi a kondre Israel: ’A kba doro! A heri kondre o kisi pori. 3 Now unu o kisi pori. Mi o puru atibron na un tapu. Mi o krutu unu gi a fasi fa unu tyari unsrefi èn mi o strafu unu gi ala den ogri di unu du. 4 Mi no o firi gi unu èn mi no o abi sar’ati nanga unu. Mi o pai unu fu ala den sani di unu du. Unu o firi den takru bakapisi fu den ogri di unu du. Unu sa musu fu sabi taki mi na Yehovah.’

5 A Moro Hei Masra Yehovah taki: ’Luku! Mi o tyari wan rampu kon na un tapu. A o de wan rampu di no psa noiti ete. 6 A kba o kon. Iya, a kba o kon. A o kon na unu tapu* sondro taki unu ferwakti en. Luku, a e kon! 7 Un sma di e tan na ini a kondre, a ten doro taki rampu o miti unu. Iya, a ten doro, a dei de krosbei. Ala sma e bruya èn nowan prisiri b’bari de fu yere moro na den bergi.

8 Heri esi mi o puru atibron na un tapu teleki mi ati kon kowru. Mi o krutu unu gi a fasi fa unu tyari unsrefi èn mi o strafu unu gi ala den ogri di unu du. 9 Mi no o firi gi unu èn mi no o abi sar’ati nanga unu. Mi o pai unu fu ala den sani di unu du. Unu o firi den takru bakapisi fu den ogri di unu du. Unu sa musu fu sabi taki mi Yehovah, na a sma di e strafu unu.

10 Luku! A dei e doro! A rampu de na pasi e kon. Now unu o kisi unu strafu. A tiki di mi o gebroiki fu strafu unu de dyaso kba. A feanti kisi moro bigifasi. 11 Ogri kon furu so te taki a tron wan tiki di e strafu den sma di e du ogri. Awinsi san unu ben o du, awinsi omeni gudu unu abi, noso awinsi sortu posisi un abi, unu no o man wai pasi gi a strafu. 12 A ten o kon èn a dei o doro. A sma di e bai sani no musu prisiri èn a sma di e seri sani no musu sari, bika Gado en ati e bron nanga a heri pipel.* 13 A sma di seri wan gron no o drai go baka na a gron fu en, awinsi a de na libi ete, bika a fisyun sori taki rampu o kon tapu a heri pipel. Nowan sma o man wai pasi gi a rampu. Nowan sma di e du ogri o tan na libi.

14 Den bro a trompet. Ala sma sreka densrefi fu go feti, ma nowan sma e go, bika mi ati e bron nanga a heri pipel. 15 A fet’owru de na dorosei fu a foto èn takru siki nanga angri de na insei. Fet’owru o kiri den sma di de na den gron èn angri nanga takru siki o kiri den sma di de na ini a foto. 16 Den sma di o man lowe kmoto na ini a foto o go na den bergi. Leki doifi na den lagipresi, ibriwan fu den o geme fu den ogri di den du. 17 Den alamala o las’ati. Den o frede so te, taki den o pisi na den skin. 18 Den o weri rowkrosi* èn den heri skin o beifi. Den alamala o kisi syen èn den ede o piri.*

19 Den o trowe a solfru fu den na strati èn a gowtu fu den o kon de leki wan fisti sani gi den. A solfru nanga a gowtu fu den no o man ferlusu den na a dei fu Yehovah en atibron. Den no o man tapu na angri fu den èn den no o man furu den bere. A solfru nanga a gowtu fu den meki taki den sondu. 20 Den solfru sani nanga den gowtu sani fu den meki taki den kisi bigifasi. Nanga den sani disi den meki den fisti gado fu den. Fu dati ede mi o meki den fisti gi a solfru nanga a gowtu fu den. 21 Mi o meki sma fu tra kondre teki a solfru nanga a gowtu fu den èn den ogrisma fu grontapu o fufuru den sani disi tyari gwe. Den o doti den gudu disi.

22 Mi o drai baka gi den èn den o doti a presi fu mi di mi lobi so te.* Fufurman o kon drape tu èn den o doti en.

23 Meki a keti,* bika na ini a heri kondre sma e koti krutu na wan kruka fasi. Den e meki taki trawan e dede fu soso. A heri foto kon furu nanga ogridu. 24 Mi o tyari a moro ogri pipel kon fu teki den oso fu den. Mi o puru a bigifasi fu den tranga man èn den feanti o doti den santapresi fu den. 25 Den o frede te fu dede. Den o suku freide, ma den no o feni en. 26 A wan rampu o kon baka a trawan èn ibri leisi baka den o yere wan takru nyunsu. Na fu soso den o aksi wan profeiti fu ferteri den san a si na ini wan fisyun. A leri* fu den priester nanga a rai fu den fesiman* no o man yepi den srefsrefi. 27 A kownu o row èn den edeman o bruya srefsrefi. Fu di den sma fu a kondre o frede, meki den anu o beifi. Mi o strafu den gi den ogri di den du. Mi o krutu den soleki fa den krutu trawan. Den sa musu fu sabi taki mi na Yehovah.’”