A fosi brifi gi Timoteyus

5 No taki grofu nanga wan man di owru kba. Ma gi en rai na wan lespeki fasi neleki na yu eigi p’pa. Gi den yongu man rai neleki den na yu eigi brada. 2 Gi den owru uma rai na wan lespeki fasi neleki den na yu eigi m’ma èn yongu uma neleki na yu eigi sisa. Du dati nanga wan krin ati.

3 Sorgu* den uma di masra dede kba èn di de na nowtu trutru.* 4 Ma efu so wan uma abi pkin noso granpkin, dan meki den pkin disi leri fosi fu sori na ini den eigi osofamiri taki den e dini Gado fayafaya. Meki den leri fu gi den p’pa nanga m’ma èn den granp’pa nanga granm’ma san den abi reti na tapu, bika na dati Gado feni bun. 5 Na uma di masra dede kba, di no abi nowan sma fu yepi en èn di kon pôti, e fertrow tapu Gado èn a e tan begi fayafaya dei nanga neti. 6 Ma efu a e libi soso fu meki prisiri,* dan a dede aladi a de na libi. 7 Fu dati ede, tan gi sma den rai disi, so taki trawan no man feni fowtu na den tapu. 8 Fu tru, efu wan sma no e sorgu gi den sma fu en, spesrutu den sma fu en osofamiri, dan a drai baka gi a bribi èn a ogri moro wan sma di no abi bribi.

9 Efu wan uma en masra dede kba, dan den kan skrifi en nen, so taki a kan kisi yepi. Skrifi en nen efu a psa 60 yari, efu a ben de a wefi fu wán masra, 10 efu sma sabi en leki wan uma di gwenti du bun, efu a kweki pkin na wan bun fasi, efu a ben gwenti teki sma na ini oso,* efu a ben gwenti wasi den futu* fu den santawan, efu a ben e yepi sma di ben de na nowtu noso efu a ben e du furu muiti fu du ala sortu bun sani.

11 Na a tra sei, no skrifi a nen fu yongu uma di masra dede kba èn di wani trow. Te den seksfiri fu den e tapu den fu du a wroko fu Krestes, 12 den o kisi krutu fu di den no e du moro san den ben pramisi. 13 Fu di den kon abi a gwenti fu no du noti nanga den ten, meki den e wakawaka e go na sma oso nomo. Boiti dati, den e taki sma sani tu, den e bemui na ini sma tori èn den e taki fu sani di den no musu taki fu den. 14 Dati meki mi wani taki den yongu uma di masra dede kba, musu trow, den musu kisi pkin èn den musu sorgu gi wan osofamiri. Den no musu gi feanti na okasi fu taki ogri fu wi. 15 Fu taki en leti, wan tu fu den uma disi kmoto na a bun pasi fu go waka baka Satan. 16 Efu wan uma di de na bribi abi umasma na ini en famiri di masra dede kba, dan meki a yepi den, so taki den no tron wan hebi gi a gemeente. Dan a gemeente kan yepi den wan di de na nowtu trutru.*

17 Meki sma sori moro lespeki gi den owruman di e teki fesi na wan bun fasi, spesrutu den wan di e wroko tranga fu taki fu a wortu fu Gado èn fu leri sma a wortu dati, 18 bika Gado Buku e taki: „Yu no musu tai a mofo fu wan mankaw te a e masi aleisi.” A e taki tu: „A fiti taki a wrokoman kisi en pai.” 19 No bribi den ogri di wan sma taki fu wan owruman, boiti te tu noso dri kotoigi e taki dati den sani dati tru. 20 Leti na fesi ala sma yu musu pir’ai gi den wan di abi a gwenti fu du sondu, so taki a kan de wan warskow gi den trawan.* 21 Na wan seryusu fasi mi e taigi yu na fesi Gado èn na fesi Krestes Yesus nanga den santa engel, taki yu musu hori yusrefi na den rai disi. No teki besroiti fosi yu kon sabi a fini fu wan tori èn no teki sma sei.

22 Noiti yu musu de gaw fu poti wan sma fu teki fesi na ini a gemeente.* No abi noti fu du nanga den sondu fu tra sma. Tan libi wan krin libi.

23 No dringi watra nomo, ma dringi pkinso win gi yu bere èn gi a siki di yu e siki ala yuru.

24 Den sondu fu son sma de krin fu si èn direk den e kisi a strafu, ma den sondu fu tra sma e kon na krin bakaten. 25 Na so a de tu taki den bun sani di sma e du de krin fu si, ma awinsi den no de krin fu si, tòg sma no o man tan kibri den.