Hori ai tapoe den afersi foe den graniwan
„Aladi joe no e hori ai nomo foe persoonlek belang ede tapoe joe égi afersi, ma ooktoe foe persoonlek belang ede tapoe di foe den trawan.” — FILIPI 3:1.
1, 2. (a) Fa na Tiri Skin na ini a fosi jarhondro ben sori belangstelling gi den fanowdoe foe den graniwan? (b) San e sori dati a prékiwroko no ben poti na baka?
SJATOE baka Pinkster 33 G.T. „den djoe di ben taki Griki [ini na kristen gemeente] ben bigin knoroe tege den djoe di ben taki Hebrew Tongo, foedi den ben loekoe psa ini na aladé prati foe njanjan [a mindri den mofinawan] den weduwe foe den”. Sondro degedege a ben de so dati wan nomroe foe den foe den weduwe disi ben de tapoe jari kaba èn no ben man moro foe ben sorgoe gi den srefi. Awansi fa a no fa den apostel ben go boemoei ini na afersi a ben taki: „Loekoe gi joesrefi, brada na sébi man di abi wan boen nen, di foeroe nanga jeje èn koni, sodati wi kan poti den a wroko tapoe na fanowdoe afersi disi.” — Tori foe den Apostel 6:1-3.
2 Den fosten kristen ben si a sorgoe foe den mofinawan soboen leki wan „fanowdoe afersi”. Jari a baka a discipel Jakobus ben skrifi: „Na vorm foe anbegi di foe na sé foe wi Gado èn Tata de krin èn sondro flaka, na disi: foe sorgoe gi wési nanga weduwe na ini a benawtoe foe den (Jakobus 1:27). Disi wani taki dan dati na moro prenspari sani, na prékiwroko, ben poti a wan sé? Nono, bika a tori na ini Tori foe den Apostel e taki dati baka di na jepi gi den weduwe ben orga tapoe wan joisti fasi, „a wortoe foe Gado ben tan gro, èn a nomroe foe discipel ben kon moro foeroe na ini Jeruzalem.” — Tori foe den Apostel 6:7.
3. Sortoe dek’ati e gi na ini Filipi 2:4 èn foe san-ede a dek’ati dati de spesroetoe ini a ten disi tapoe en presi?
3 Now wi de na ini „moeilek ten di moeilek foe psa” (2 Timotéus 3:1). Kande wi e hori, leki wan bakapisi foe den sani di na osofamiri-libi nanga na grontapoewroko e aksi foe oenoe, pikinso krakti ofoe lostoe abra foe broko wi ede nanga den fanowdoe foe den graniwan. Nanga leti ini Filipi 2:4 wi e kisi tranga foe dat’ede „no wawan foe ori ai foe persoonlek belang ede tapoe wi égi afersi ma ooktoe foe persoonlek belang ede tapoe di foe trawan.” Fa disi kan doe tapoe wan balans nanga praktis fasi?
Gi grani na weduwe
4. (a) Foe san-ede èn fa den fosi jarhondro gemeente ben ’gi grani’ na den weduwe foe den? (b) Den sortoe seti dati ben de alaten fanowdoe?
4 Na ini 1 Timotéus kapitel 5 Paulus e meki wi si fa den fosten kristen ben broko den ede nanga grani weduwe ini na gemeente. A ben gi tranga na Timotéus: „Gi grani na den weduwe di de troetroe weduwe” (Vers 3). Spesroetoe den grani weduwe den ben si leki sma di ben warti foe gi grani ini na vorm foe geregelde moni jepi. Ala jepisani di de foe si èn di de foe ori wan sma na libi no ben de ini den makti moro èn den ben kan poti ’howpoe soso tapoe Gado èn ben kan hori doro ini tranga begi èn begi, dé nanga neti’ (Vers 5). Fa Gado ben jere a begi foe den foe kisi jepi foe tan a libi? Nanga jepi foe a gemeente. Den weduwe di den ben feni boen foe kisi jepi, tapoe wan fasi di ben orga den ben kisi den sani foe pasa a libi tapoe wan redelek fasi. Wan weduwe di ben abi moni, ofoe di ben abi famiri di ben kan sorgoe foe en, dan den sortoe seti disi no ben de fanowdoe. — Vers 4, 16.
5. (a) Fa wantoe weduwe ben sa kan feni satisfaksi na ini a kowroe foe den firi foe den? (b) A gemeente ben ferplekti foe ondersteun den sortoe sma disi?
5 „Ma na [weduwe] di e feni satisfaksi na ini na kowroe foe den lostoe foe en,” Paulus e warskow, dede [na jejefasi] aladi a e libi.” (Vers 6) Paulus no e tjari kon a krin fa sowan ben de, soleki na Kingdom Interlinear e vertaal en letterlek, „ben tjari densrefi na sowan fasi foe prisiri den lostoe”. Sonwan kande ben feti wan feti nanga „den seks lostoe” foe den (Vers 11) Ma leki fa Liddell and Scott’s Greek English Lexicon e taki dan foe „den e tjari densrefi na sowan fasi foe prisiri den lostoe” kan abi ooktoe foe doe nanga „libi ini a lostoe foe makriki-fasi ofoe goedoe ofoe lostoe pasa marki”. Soboen kan de sonwan ben e lostoe dati na gemeente ben sa meki den kon goedoe èn ben sa pai den libi foe den te den ben e libi wan libi foe prisiri èn foe sani pasa marki. San ben de ooktoe na geval, Paulus e sori dati den sortoe weduwe dati no ben moe poti tapoe a lijst foe a gemeente jepi den.
6, 7. Nanga voetnoot (a) San ben de na „lijst”? (b) Foe san-ede den sma di ben de moro mendri leki siksitenti jari no ben kon tapoe na lijst? (c) Fa Paulus ben jepi jongoe weduwe foe no tjari wan kroetoe di no ben boen kon tapoe den?
6 Dan Paulus ben taki: „Wan weduwe ben moe poti tapoe na lijst (foe den wan di ben kisi moni jepi) efoe a no de moro mindri leki siksi-tenti jari.” Ini den dé foe Paulus dan wan oema di ben pasa siksi-tenti jari sma ben e si krin dati a no ben man foe jepi ensrefi en foe dati ede no ben kan trow baka.a „Na a tra sé” Paulus e taki, „joe no moesoe teki den jongoe weduwe [a tapoe a lijst], bika te den seks lostoe foe den kon a mindri den nanga Kristus den wani trow èn e tjari wan kroetoe kon a tapoe den foedi den ben wisiwasi na fosi sori foe bribi foe den.” — Vers 9, 11, 12.
7 Efoe jongoe weduwe ben moe poti a tapoe „a lijst”, dan sonwan kande esesi ben sa ferklari dati den abi na prakseri foe tan sondro foe trow. Baka wan pisten a ben sa de wan moeilek sani gi den foe „dwengi den sekslostoe foe den”, sodati den ben sa wani trow baka, sodati den ben sa tjari wan kroetoe kon tapoe den foe di den ben wiswasi na fosi sori foe bribi foe den [dati wani taki dati den ben sa tan foe trow] (Teki gersi nanga Prékiman 5:2-6.) Paulus no ben wani meki den sortoe problema dati kon foedi ai ferklari moro fara, „mi e winsi dati den jongoe weduwe trow, meki pikin.” — Vers 14.
8. (a) Fa na gemeente ben kisi kibri nanga den richtlijn di Paulus ben gi? (b) Sorgoe ben gi ooktoe na jongoe weduwe ofoe graniwan di ben de mofina?
8 Ooktoe na apostel ben skotoe na poti foe wan sma na tapoe a lijst kon na den sma di ben abi wan langa waka foe dienst tapoe a kontren foe toemsi boen kristenwroko (Vers 10). A gemeente soboen no ben de nowan „kondre di ben moesoe sorgoe” gi lesi ofoe gridi sma (2 Thessalonika 3:10, 11). Ma fa a de nanga den grani man ofoe den jongoe weduwe? Efoe den sortoe sma dati ben de ini mofina omstandigheid dan na gemeente tapoe na fondamenti foe aparti sma ben sa sorgoe foe den. — Teki gersi nanga 1 Johannes 3:17, 18.
9. (a) Foe san-ede tra sani ben moesoe seti gi na sorgoe foe graniwan na ini a ten disi leki na ini a fosi jarhondro? (b) San wi kan kon si ini a ten disi na ini a takmakandra foe Paulus di go foe weduwe na ini 1 Timóteus kapitel 5?
9 A de seker dati den seti disi ben e sorgoe heri boen gi den fanowdoe foe den gemeente ini a fosi jarhondro. Ma soleki e taki na ini The Expositor’s Bible Commentary: „Nanga den disi ten verzekering regeling nanga sociaal uitkering nanga wroko gelegenheid, dan na situwasi de heri tra fasi.” Leki wan bakapisi foe na sociaal nanga ekonomia situwasi di kenki dan a de ini a ten disi wan sani di pikinmoro no de fanowdoe dati gemeente meki wan lijst foe grani sma di e kisi jepi. Ma ete a sani di Paulus ben skrifi gi Timotéus e jepi wi foe si san e kon now: (1) Den problema foe den graniwan na wan tori foe na heri gemeente — spesroetoe foe den owroe-man. (2) Na sorgoe foe den graniwan moe orga boen. (3) A sorgoe dati de soso nomo gi den sma di troetroe de ini mofina omstandigheid.
Hori ai tapoe den belang foe den leki owroeman
10. Fa owroeman kan teki fesi ini a sori foe belangstelling gi den owroewan?
10 Fa opziener na ini a ten disi e teki fesi na ini a sori foe belangstelling gi den owroewan? Ten na ten den kan meki den fanowdoe foe den graniwan leki wan punt tapoe na agenda foe den komakandra di den e hori. Te spesroetoe jepi de fanowdoe, dan den kan seti sani foe sorgoe foe dati. Kande den no e gi a sorgoe dati a den graniwan srefi, foedi nofotron boen foeroe sma di de klarklari — makandra nanga jongoewan — ini a gemeente foe kan gi jepi. Ma den kan poti ai boenboen a tapoe sorgoe foe den graniwan dati, kande foedi den e poti wan brada di e tjari sani konmakandra ini na sorgoe di wan sma e kisi.
11. Fa owroeman kan kon sabi den fanowdoe foe den graniwan?
11 Salomo ben fermane: „Joe moe sabi seker fa den pikinmeti foe oenoe tan” (Odo 27:23). Soboen opziener kan fisiti den graniwan foe si fa moro boen den kan „prati sani akroederi a fanowdoe foe den” (Romeini 12:13). Wan opziener di e waka lontoe loekoe den gemeente ben tjari en kon na a fasi disi ondro wortoe: „Son graniwan de sma di de onafhankelek srefsrefi, èn foe aksi den nomo san moe psa, no abi foeroe waarde. A moro boen foe si srefi san moesoe doe èn dan foe sorgoe dati a psa!” Ini Japan wan toe opziener ben si dati wan sisa foe aiti-tenti jari ben abi foeroe jepi fanowdoe. Den ben taki: „Wi e loekoe a tapoe dati wan sma toetron ini wan dé, manten nanga neti, abi kontact nanga en, efoe a de now nanga wan persoonlek fisiti ofoe a de now nanga wan telefon-takmakandra.” — Teki gersi nanga Mattéus 25:36.
12. (a) Fa owroeman kan loekoe a tapoe dati graniwan njanboen foe den gemeente komakandra? (b) Fa wan boen gebroiki kan meki foe den tape-lolo di a genootschap meki?
12 Owroeman e broko den ede ooktoe dati den graniwan kan njanboen foe den gemeente komakandra (Hebrewsma 10:24, 25). Sonwan abi vervoer fanowdoe? Sonwan kande no man ’foe arki èn froestan san a wani taki’ foedi den dofoe? (Mattéus 15:10). Kande a de mogelek foe installeer ede-telefon gi den. Na so ini a ten disi wantoe gemeente ben meki den sluit den aan gi den komakandra foe den tapoe wan kerki-telefon sodati den sikiwan èn malengriwan kan jere den komakandra na oso. Tra gemeente e teki den komakandra tapoe tape-lolo gi den sma di siki toemsi foe ben sa de drape — ini wan toe geval den e bai den cassette recorder srefi gi den. Èn foe taki foe den tapo-lolo, wan owroeman ini Doisrikondre ben taki: „Mi ben fisiti difrenti graniwan di ben sdon nomo e loekoe den programma foe t.v. di moeilek joe ben kan taki dati den e bow den na jejefasi.” Foe san-ede joe no ben sa gi den dek’ati foe na presi foe arki na den sani dati foe arki na den tapelolo di na genootschap ben meki, soleki den tape-lolo nanga Kownoekondre-melodi èn pe den taki den Bijbelboekoe na tapoe?
13. Fa owroesma kan kisi jepi foe tan de actief leki Kownoekondreprékiman?
13 Son owroe memre foe na gemeente kon tron ongeregelde prékiman ofoe srefi no e préki moro. Ma libimarki no afoe tapoe wan sma foe meki na boen njoensoe foe na Kownoekondre bekenti (Mattéus 24:14). Son sma kande e opo doe wan sani tapoe wan boen fasi tapoe wan eenvoudig kari foe kon nanga joe na ini na velddienst. Kande joe kan wiki na lobi foe den gi na prékiwroko foedi joe e ferteri den ondrofenitori. Efoe a kren trapoe moeilek gi den, sorgoe dan gi den dati den kan wroko na lagi oso ofoe ini kontren pe lagi oso de. Son prékiman kan teki graniwan ouktoe go na bijbelstudi ofoe hori na studi na oso foe wan granisma.
14. nanga kader, (a) San den owroeman kan doe efoe wan grani brada ofoe sisa e kisi en moeilek na moni sé? (b) Fa wantoe gemeente ben sorgoe na ini den fanowdoe foe den grani
14 ’Moni na wan kibri’ (Prékiman 7:12). Ma wantoe grani brada ofoe sisa na moni sé abi en toemsi moeilek èn no abi famiri di de klari foe djompo jepi den. Ma gewoonlek memre foe na gemeente nanga ala prisiri wani jepi efoe den prakseri poti a tapoe pe wan bepaalde fanowdoe de (Jakobus 2:15-17). Ooktoe den owroeman kan ondrosoekoe tapoe sortoe maatschappeleke ofoe lantidienst ofoe verzekeringseti ofoe pensioenregeling nanga den sortoe sani dati den kan go wroko a tapoe. Ini son kondre den sortoe sociaal seti disi de moeilek foe kisi èn a kan de dati nowan tra sani tan abra leki a model foe 1 Timotéus kapitel 5 èn seti sani dati na gemeente helemaal e sorgoe foe na jepi dati. (Loekoe orga foe klari wi diniwroko, bladzijde 124, 125)
15. (a) Na jepi di na gemeente kan sorgoe foe en de wan sani di no abi skotoe? (b) Fa na rai di de ini Lukas 11:34 ben sa kan fiti gi bepaalde sma di e aksi toemsi foeroe?
Prékiman ini Nigeria tapoe wan geregelde basis ben steun wan 82-jari pionier nanga en oema nanga presenti na skinfasi. Di lanti ben sori taki na oso pe den ben libi na ini ben moe broko den na gemeente ben gi den wan kari foe go libi na ini wan kamra di ben de na sé foe na Kownoekondrezaal te leki sani ben sorgoe foe go libi a wan tra pe.
Ini Brazilië wan gemeente ben sorgoe foe wan verpleegster foe sorgoe gi wan grani trowman nanga trowoeman. Na asrefi ten wan sisa ben kisi a wroko foe krin na oso, foe bori den njanjan èn foe sorgoe na ini tra fanowdoe ini skinfasi. Ibri moen na gemeente ben poti wan pisimoni na wan sé gi den.
15 Net so leki na ini a fosi jarhondro dan den sortoe seti disi bedoel gi sma di e ferdini en èn dati den abi en troetroe fanowdoe. Opziener no de ferplekti foe sorgoe gi aparti aksi di sma e aksi sani ofoe tapoe onredelek eis tapoe a kontren foe poti prakseri tapoe sma. Ooktoe graniwan moe hori den „ai foe den soifri.” — Lukas 11:34.
Hori leki aparti sma na ai tapoe den belang foe den
16, 17. (a) Foe san-ede a de prenspari dati boiti den owroeman ooktoe trawan sori belangstelling gi den graniwan? (b) Fa prékiman di abi en kefarlek druk kaba kan ’bai ten fri’ gi den graniwan?
16 Wan pisten psa kaba den ben teki wan sisa ini at’oso. Den datra ben kon si dati a no ben kisi boen njanjan. „Efoe moro memre foe a gemeente ben sori persoonlek belangstelling gi en,” wan owroeman ben skrifi, „dan kande disi no ben psa.” Ija, den owroeman no de den wanenkri wan di moe sori belangstelling gi den graniwan. Paulus ben taki: „Wi na memre di de foe makandra.” — Efese 4:25.
17 Sondro degedege dan wantoe foe wi e tjari kaba wan hebi lai foe persoonlek frantwortoe. Ma ’no ori foe persoonlek belang ede na ai tapoe joe égi afersi’ (Filipi 2:4). Te joe e seti joe égi afersi boen, dan nofotron joe kan ’bai a ten’ (Efese 5:16). Joe ben sa kan fisiti foe eksempre wan graniwan wan dé baka a velddienst? Gi sonwan spesroetoe den mindri wiki dé de ten dati den de den wawan. Ooktoe tini kan fisiti graniwan èn gi jepi foedi den go doe wroko gi den. Wan sisa di ben kisi jepi foe wan jongoewan ben begi: „Grantangi Jehovah, foe brada John. Fa a de wan toemsi boen boi.”
18. (a) Foe san-ede na takmakandra nanga wan graniwan kande sontron moeilek? (b) Fa wi kan sorgoe dati wan fisiti ofoe wan takmakandra nanga owroesma de wan sani di e bow alatoe?
18 Joe abi a gwenti foe taki den owroewan tapoe den komakandra soso esesi odi? A de troe dati kande a no de wan makriki sani foe abi wan takmakandra nanga wan sma di no e jere boen ofoe abi moeiti foe taki baka. Èn foedi wan gesontoe di e go a baka e aksi san de fanowdoe foe wan sma, dan a no ala granisma de nanga wan prisiri fasi. Tokoe na regel de troe di taki „wan sma nanga pasensi moro betre” (Prékiman 7:8). Nanga pikinso moeiti dan wan troetroe „kenki foe dek’ati kan kon a doro” (Romeini 1:12). Proberi wan dé foe ferteri wan velddienst ondrofenitori. Taki foe wan punt di joe ben lési ini Na Wachttoren ofoe Ontwaakt!. Ofoe, moro betre arki (Teki gersi nanga Job 32:7) Owroesma abi foeroe warti sani foe pristeri efoe joe gi den na kans nomo. Wán owroeman ben piki: „Na fisiti dati na a grani brada dati ben doe mi boen.”
19. (a) Wi e broko wi ede ooktoe gi soema ini a broko ede foe wi gi den graniwan? (b) San na wantoe fasi tapoe san foeroe osofamiri di e sorgoe gi grani mama nanga papa, kan de leki jepi?
19 Na broko ede foe joe gi den graniwan no moe go ooktoe na den osofamiri di e sorgoe gi den? Wan trowman nanga oema di ben sorgoe gi grani papa nanga mama ben meki oen kon sabi „na presi foe gi wi dek’ati, dan wan toe sma ini a gemeente ben e kon feni fowtoe srefsrefi. Wan sisa ben taki: ’efoe joe e tan djompo komakandra joe e kon siki na jejefasi.’ Ma a no ben de klari foe jepi sodati wi ben kan go moro foeroe tron na komakandra.” Net so a de wan sani foe lasi ati te joe e kisi afoe pramisi: Efoe joe abi oiti jepi fanowdoe, meki mi sabi dan. Te joe loekoe en boen dan nanga disi nofotron noti wan sma e taki nanga dati leki: „Hori joesrefi waran èn njanboen” (Jakobus 2:16). O moro boen a de foe sori a brok’ede foe joe na ini doe! Wan trowman nanga oema ben taki: „Den brada nanga sisa de wan bigi jepi gi wi! Sonwan e teki wan toe dé baka makandra na sorgoe gi mama tapoe den sodati wawan tron wi kan har’bro pikinso. A de troetroe wan dek’ati gi wi efoe trawan e si fa ai go nanga en.”
20, 21. San owroesma kan doe foe kan jepi den sma di e sorgoe foe den?
20 Te wi loekoe en na alasé dan den owroesma foe wi e kisi boen sorgoe. Ma san grani kotoigi srefi kan doe sodati na wroko disi kan doe nanga prisiri èn no nanga geme? (Teki gersi nanga Hebrewsma 13:17) Wroko makandra efoe den owroeman e seti sani foe sorgoe gi joe. Sori dati joe de grantangi èn abi warderi gi ala na boen fasi di joe e kisi èn tan farawe foe en foe aksi toemsi foeroe ofoe foe feni fowtoe. Èn awinsi den siki nanga den pen di e kon nanga owroe dé de so troetroe, proeberi foe de wan prisiri èn positief fasi. — Odo 15:13.
21 ’Den-brada nangi sisa de kefarlek boen. Mi no sabi san mi ben sa moe doe sondro den’, de wortoe di joe e jere foeroe foe owroesma. Ma ete na frantwortoe foe na sorgoe foe den graniwan de ini a fosi presi na den pikin foe den. Èn san de ini a tori èn fa wan sma kan sorgoe foe na moeilek wroko disi?
[Foetoewortoe]
a Lev. 27:1-7 e handri foe a bai foe sma di (nanga jepi foe wan pramisi) ben ’pristeri’ gi wan tempel foe wroko drape. Na loesoe prijs ben e kenki nanga libimarki. A prijs dati ben saka srefsrefi na siksitenti jari, èn a de krin foedi wan sma ben feni dati wan sma di ben owroe so no ben man wroko so tranga leki wan sma di ben moro jongoe. Moro fara na Encyclopedia Jamaica e taki: „Leki fa na Talmoed e taki dan owroedé e bigin na siksitenti jari.”
San joe kan memre ete?
◻ Sortoe seti ben seti ini na fosi jarhondro gi den grani weduwe?
◻ Fa opziener kan seti sani dati den owroewan ini a gemeente kan kisi sorgoe?
◻ Fa aparti memre foe a gemeente kan sori belangstelling gi grani brada nanga sisa?
◻ San owroewan kan doe foe lekti na wroko di e jepi den?
[Faki na tapoe bladzijde 5]
Jepi den graniwan — San son sma e doe
Wan gemeente ini Brazilië ben feni wan praktis fasi foe jepi den skin fanowdoe foe wan brada di e libi krosbé foe wan Kownoekondrezaal. Na Boekoestudi groepoe di kisi a wroko foe krin a zaal e krin a oso foe en toe.
Wan tra gemeente di drape ben go denki wan sempel fasi foe gi wan brada di soso a oso ai tan na okasi foe teki prati ooktoe na a Theokratis-diniwroko skoro. Efoe a brada dati ben de na a beurt foe ori wan lezing dan wan brada e kisi a wroko èn foe fisiti en nanga toe ofoe dri prékiman. Wan sjatoe komakandra e hori, di e opo nanga begi, èn baka dati na brada e hori en lezing èn e kisi den fanowdoe rai. Fa na fisiti disi e de wan bigi dek’ati gi en!
Opziener di e reis tapoe wan moi fasi ben teki fesi. Ini wan gemeente wan brada di de afhankelek foe wan lolostoeroe ben e kisi atibron esesi èn foe a sani dati ede bijna noiti ben e kisi fisiti. Ma wan reizende opziener ben seti sani foe hori na Dia-lezing foe en na a brada oso. Na grani brada disi nanga watra na en ai a ben de foe san a ben kisi foe si. Na opziener ben taki: „A ben gi mi wan bigi satisfaksi foe si dati wan pikinso belangstelling nanga lobi kan abi someni boen bakapisi.”
Owroeman ini Negeria ben tjari wan herder-fisiti go na wan owroe brada èn ben si dati a ben siki srefsrefi. Den ben tjari en go wantewante na wan at’oso. Drape ben kon a krin dati na owroe brada ben moe kisi wan boen datra behandeling di a no ben kan pai. Di na gemeente ben kon jere foe a toestand foe en dan den prékiman ben tjari nofo moni kon foe pai en kostoe. Toe owroeman ben e rij en beurtelings go na at’oso en teki en foe at’oso aladi den ben moesoe meki densrefi fri foe den wroko. Ma den ben abi na prisiri foe si fa a brada ben kon betre foe en siki, èn baka dati te nanga en dede, wan sani foe fo jari a baka ben de ini na jepipionierdienst.
Tapoe den Fhilippijnen wan grani sisa no ben abi famiri. A gemeente ben seti sani foe sorgoe en ini a pisten foe dri jari foe en libi. Den ben jepi en foe kisi wan bescheiden oso, èn den ben tjari njanjan gi en ibridé èn ben e krin en.
[Prenki na tapoe bladzijde 3]
Alasma kan abi wan prati na ini a gi grani na den granisma foe wi ini a gemeente