A di fu tu brifi gi den Korentesma

3 A de fanowdu taki wi musu sori unu baka suma na wi? Noso wi musu gi unu brifi pe sma e prèise wi? Noso na unu musu gi wi den sortu brifi dati? 2 Unu srefi na a brifi fu wi di skrifi na tapu wi ati. Ala sma sabi en èn ala sma man leisi en. 3 Bika unu e sori taki unu na wan brifi fu Krestes di wi leki dinari skrifi. A no skrifi nanga enki, ma nanga a yeye fu wan libilibi Gado. A no skrifi na tapu plata ston, ma na tapu libisma ati.

4 Na Krestes meki taki wi abi a fertrow taki Gado feni wi bun leki dinari. 5 Wi no man taki dati wi e du a wroko disi nanga wi eigi krakti. Ma na Gado e meki taki wi man du san wi e du. 6 Na en meki taki wi fiti fu de dinari fu wan nyun ferbontu. Wi a no dinari fu wan wet di skrifi, ma dinari fu a yeye. Bika a Wet di skrifi e tyari dede kon, ma a yeye e gi libi.

7 Boiti dati, a Wet di e tyari dede kon ben skrifi na tapu ston. Gado ben gi den Israelsma a Wet disi nanga so wan bigi glori, taki den no ben man luku a fesi fu Moses fu di a ben skèin a glori fu Gado. Ma a glori dati no ben o tan. 8 We, dan wan moro bigi glori o de fu si te a yeye e du en wroko. 9 Bika efu a Wet di e krutu sma ben abi so furu glori kba, dan wan moro bigi glori o de fu si te retidu e du en wroko! 10 Fu taki en leti, srefi a Wet di ben abi so furu glori fosi, no abi a glori dati moro, fu di now wan moro bigi glori de. 11 Bika efu a Wet di no ben o tan, kon nanga glori, dan a ferbontu di e tan, o abi moro bigi glori!

12 Fu di wi abi so wan howpu, meki wi no e frede srefsrefi fu taki. 13 Wi no e du leki Moses di ben e tapu en fesi nanga wan duku, so taki den Israelsma no ben o si san ben o psa te fu kba nanga a Wet di no ben o de moro. 14 Ma den no ben man ferstan sani krin, bika te na a dei fu tide a srefi duku e tapu den ferstan te den e leisi na owru ferbontu. A duku e kmoto soso efu den e bribi na ini Krestes. 15 Fu taki en leti, te na a dei fu tide wan duku e tapu na ati fu den te den e leisi den buku fu Moses. 16 Ma te den e drai go na Yehovah,* dan a duku e kmoto. 17 Yehovah* na a Yeye èn pe a yeye fu Yehovah* de, drape sma fri. 18 Neleki wan spikri wi e skèin a glori fu Yehovah* di de fu si na tapu wi fesi di no tapu nanga wan duku. Wi alamala e kenki kon gersi en, so taki wi e skèin moro nanga moro glori. Disi e psa soifri soleki fa Yehovah,* a Yeye, wani.*