Yeremia

28 A ben de a di fu feifi mun fu a di fu fo yari di Sedekia ben e tiri leki kownu fu Yuda. Na ini a yari dati a Profeiti Hananya di ben de fu Gibeon èn di ben de a manpkin fu Asur, taigi mi na ini na oso fu Yehovah na fesi den priester nanga ala sma di ben de drape: 2 „Yehovah di e tiri den legre, a Gado fu Israel, taki: ’Mi o broko a tyatyari fu a kownu fu Babilon. 3 A no o doro tu yari* fosi mi teki ala den wrokosani fu na oso fu Yehovah di Kownu Nebukadnesar ben tyari go na Babilon. Dan mi o tyari den kon na a presi disi baka.’” 4 „Yehovah taki: ’Mi o puru Kownu Yekonya, a manpkin fu Yoyakim di e tiri Yuda, na Babilon, makandra nanga ala den tra sma fu Yuda. Mi o tyari den kon na a presi disi baka. Mi o broko a tyatyari fu a kownu fu Babilon.’”

5 Ne a Profeiti Yeremia taki nanga a Profeiti Hananya na fesi den priester nanga ala sma di ben tnapu drape na ini na oso fu Yehovah. 6 A Profeiti Yeremia taki: „Amen!* Meki Yehovah du dati! Meki Yehovah du ala san yu taki. Meki a puru den wrokosani fu na oso fu Yehovah nanga ala den sma fu wi di den ben tyari go na Babilon èn meki a tyari den kon baka na a presi disi! 7 Ma grantangi, arki san mi o taigi yu nanga ala den sma dyaso. 8 Langa ten kba, fosi mi nanga yu gebore, profeiti ben taki profeititori di ben abi fu du nanga furu kondre èn nanga bigi kownukondre. Den ben taki dati feti, bigi ogri, nanga takru siki* ben o psa na ini den kondre dati. 9 Te wan profeiti e taki dati ala sani o waka bun èn dati psa trutru, dan a o de krin taki na Yehovah seni a profeiti dati.”

10 Ne a Profeiti Hananya puru a tyatyari tapu a skowru fu a Profeiti Yeremia, dan a broko en. 11 Dan Hananya taki na fesi ala sma: „Yehovah taki: ’Na a srefi sani mi o du nanga a tyatyari fu Kownu Nebukadnesar fu Babilon. A no o doro tu yari fosi mi broko a tyatyari fu en puru na a skowru fu ala den pipel.’” Ne Yeremia gwe.

12 Baka di a Profeiti Hananya broko a tyatyari di ben de na a skowru fu a Profeiti Yeremia, Yehovah taigi Yeremia: 13 „Go taigi Hananya: ’Yehovah taki: „Yu broko wan tyatyari fu udu, ma wan tyatyari fu isri o kon na en presi.” 14 Yehovah di e tiri den legre, a Gado fu Israel, taki: „Mi o poti wan isri tyatyari tapu a skowru fu ala den pipel disi, so taki den o dini Kownu Nebukadnesar fu Babilon. Iya, den o abi fu dini en. Mi o meki a tiri den ogri busmeti srefi.”’”

15 Dan a Profeiti Yeremia taigi a Profeiti Hananya: „Grantangi Hananya, arki! A no Yehovah seni yu, ma tòg yu meki a pipel bribi a lei disi. 16 Fu dati ede Yehovah taki: ’Mi o figi yu puru na grontapu. A yari disi ete yu o dede, bika yu gi sma dek’ati fu opo densrefi teige Yehovah.’”

17 Dati meki a Profeiti Hananya dede na ini a di fu seibi mun fu a yari dati.