Psalm
Wan singi fu David di sma musu memre.
38 Yehovah, mi e begi yu, no strafu mi te yu ati e bron
èn no pir’ai gi mi te yu abi bigi atibron.
2 Bika den peiri fu yu boro go dipi na ini mi skin
èn yu anu de hebi na mi tapu.
3 Mi heri skin siki fu di yu fluku mi.
Mi no man rostu* fu di mi sondu.
4 Den fowtu fu mi furu so te, taki den psa mi ede.
Den de leki wan hebi lai na mi tapu, iya, den hebi tumsi fu tyari.
5 Den soro fu mi e tingi èn den e pori
fu di mi du dondon sani.
6 Mi las’ati èn mi e firi brokosaka.
Heri dei mi e waka lontu e sari.
7 Mi heri inbere e faya.
Mi heri skin siki.
8 Mi no man firi noti moro èn mi e firi brokosaka srefsrefi.
A pen na ini mi ati hebi so te, taki mi wani bari.
9 Tye Yehovah, yu sabi san mi wani.
Mi no ben man kibri den geme fu mi gi yu.
10 Ala mi ati e naki. Mi krakti gwe libi mi
èn mi ai kon dungru.
11 Den mati fu mi no wani moksi nanga mi fu di mi e siki
èn den sma di sabi mi bun e tan farawe fu mi.
12 Den sma di wani kiri mi e seti val gi mi
èn den wan di e suku fu du mi ogri e taki lei fu mi.
Heri dei den e sdon prakseri fa den kan bedrigi mi.
13 Ma neleki wan dofu sma, mi ben e gi den dofusei.
Neleki wan babaw sma, mi no ben e opo mi mofo fu taki.
14 Mi ben e du leki mi no ben e yere den
èn mi no ben opo mi mofo fu piki den.
15 Bika na yu mi ben e wakti, Yehovah
èn yu piki mi, Yehovah mi Gado.
16 Mi taki: „No meki den lafu mi.
No meki den wiswasi mi efu mi futu grati.”
17 Fu di bijna mi ben fadon
èn soso pen mi ben abi.
18 Ne mi ferteri yu sortu fowtu mi meki.
Mi ben e broko mi ede fu di mi ben sondu.
19 Ma den feanti fu mi tranga* èn den abi furu makti.*
Mi no ben du den noti, ma tòg moro nanga moro sma e teige mi.
20 Den ben e pai mi ogri fu bun.
Mi ben e du bun, ma den ben e gens mi.
21 Mi e begi yu, Yehovah, no gwe libi mi.
Tye mi Gado, no tan farawe fu mi.
22 Tye Yehovah, kon yepi mi es’esi
fu di na yu e ferlusu mi.