Yob
42 Dan Yob piki Yehovah:
2 „Now mi kon si taki yu man du ala sani
èn noti no man tapu yu fu du san yu abi na prakseri.
3 Yu ben aksi: ’Suma na a sma di e drai den wortu fu mi drape èn di e taki sondro fu sabi sani?’
A tru, mi taki fu sani di mi no ben sabi.
Mi taki fu sani di muilek tumsi gi mi fu ferstan.
4 Yu ben taki: ’Arki mi te mi e taki.
Mi o poti aksi gi yu, dan yu musu piki mi.’
5 Mi yesi ben yere fu yu,
ma now mi eigi ai e si yu.
6 Dati meki mi e teki ala sani baka di mi taki.*
Luku fa mi sdon na ini doti èn na ini asisi. Mi abi berow trutru.”
7 Baka di Yehovah taki nanga Yob, a taki nanga a Teimansma Elifas. Yehovah taigi en:
„Mi ati e bron srefsrefi nanga yu èn nanga den tu mati fu yu, bika unu no taki sani fu mi di tru, soleki fa mi futuboi Yob du. 8 Fu dati ede, un musu teki seibi mankaw nanga seibi manskapu, dan un go na mi futuboi Yob. Dan un musu tyari den meti disi leki wan bron-ofrandi gi unsrefi èn mi futuboi Yob o begi gi unu. Mi o arki en* te a begi mi fu no strafu unu fu a don sani di unu du, bika unu no taki sani fu mi di tru, soleki fa mi futuboi Yob du.”
9 Dati meki a Teimansma Elifas, a Suwasma Bildad nanga a Namasma Sofar du ala san Yehovah taigi den fu du. Ne Yehovah arki a begi fu Yob.
10 Baka di Yob begi gi den mati fu en, Yehovah puru Yob na ini a pina di a ben e pina. Dan Yehovah gi Yob ala san a ben abi fosi.* Iya, a gi en tu tron so furu leki dati. 11 Ne ala brada nanga sisa fu Yob èn ala sma di ben sabi en fosi, kon na en èn den nyan nanga en na ini en oso. Den ben trowstu en, fu di Yehovah ben gi pasi taki someni problema miti en. Ibriwan fu den ben gi en wan moni nanga wan gowtu linga.
12 Bakaten Yehovah blesi Yob moro leki fosi. A ben abi 14.000 skapu, 6000 kameili, 2000 kaw* nanga 1000 umaburiki. 13 Boiti dati, a kisi ete seibi manpkin nanga dri umapkin. 14 A kari a fosi umapkin Yemima, a di fu tu Kesia èn a di fu dri Keren-Hapuk. 15 Na ini a heri kondre nowan uma ben moi so leki den umapkin fu Yob. A papa fu den ben gi ibriwan fu den wan pisi fu a famirigudu neleki den brada fu den.
16 Baka ala den sani disi Yob libi ete 140 yari. A ben si fa en pkin nanga en granpkin gro kon bigi. A ben kon sabi srefi den granpkin fu en granpkin. 17 Na so Yob ben e libi wan switi libi teleki a kon dede di a ben owru srefsrefi.*