Mateyus e fruteri

2 Yesus gebore na Betlehem na ini Yudea na a ten di Herodes ben de kownu. Bakaten wan tu lukuman kon na Yerusalem. Den ben de fu Owstusei èn den ben e ondrosuku den stari fu sabi san o pasa. 2 Den taki: „Pe a sma de di gebore fu tron kownu fu den Dyu? Bika wi si en stari di wi ben de na Owstusei èn wi kon fu gi en grani.” 3 Di Kownu Herodes yere disi, a bruya srefisrefi èn heri Yerusalem bruya tu. 4 Ne a kari ala den edeman fu den priester kon nanga ala den leriman di e leri a pipel a Wèt èn a aksi den pe a Krestes ben o gebore. 5 Den taigi en: „Na Betlehem na ini Yudea, bika a profeiti skrifi: 6 ’Ai, Betlehem na ini a kontren fu Yuda, den granman fu Yuda no e si yu leki a moro pikin foto kwetikweti, bika wan tiriman o komopo na ini yu èn en o tiri mi pipel Israel.’”

7 Dan sondro fu tra sma sabi, Herodes kari den lukuman kon èn a aksi den fu taigi en finifini o ten den si a stari. 8 Di a seni den go na Betlehem, a taki: „Go ondrosuku finifini pe a yongu pikin de èn te unu feni en, dan un kon fruteri mi, so taki mi tu kan go na a pikin fu gi en grani.” 9 Di den yere san a kownu taki, den gowe. We, a stari di den si di den ben de na Owstusei, ben waka na den fesi teleki a tan tanapu na tapusei fu a presi pe a yongu pikin ben de. 10 Di den si a stari, den breiti srefisrefi. 11 Den go na ini na oso èn den si a yongu pikin nanga en mama Maria. Ne den boigi fu gi a pikin grani. Den puru den gudu fu den kon na doro tu èn den gi a pikin kado, soleki gowtu, nanga switismeri sani soleki wierook nanga mirre. 12 Ma fu di Gado ben warskow den na ini wan dren fu no go moro na Herodes, meki den teki wan tra pasi fu drai go baka na a kondre fu den.

13 Baka di den gowe, na engel fu Yehovah kon na Yosef na ini wan dren èn a taki: „Opo, teki a yongu pikin nanga en mama èn lowe go na Egepte. Tan drape teleki mi piki yu baka. Bika Herodes o suku fu kiri a yongu pikin.” 14 Dati meki Yosef opo na netiyuru èn a teki a yongu pikin nanga en mama, dan a hari go na Egepte. 15 A tan drape teleki Herodes dede, so taki den sani di Yehovah taigi en profeiti fu taki, ben kan kon tru. A ben taki: „Mi kari mi manpikin komopo na Egepte.”

16 Di Herodes si taki den lukuman kori en, a kisi bigi atibron. Dati meki a seni sma go na Betlehem èn na a heri kontren drape fu kiri ala den boi di no ben pasa tu yari ete. A ben du disi fu di den lukuman ben taigi en finifini taki a pikin ben o abi a yari dati. 17 Na so fasi den sani kon tru di a profeiti Yeremia taki. A ben taki: 18 „Na Rama den yere wan sma e krei èn a e sari fu tru. Na Rakel di e krei fu den pikin fu en ede. A no wani meki sma trowstu en, bika den pikin fu en no de moro.”

19 Di Herodes dede, na engel fu Yehovah kon na Yosef na ini wan dren di a ben de na Egepte. 20 Na engel taki: „Opo, teki a yongu pikin nanga en mama èn go na a kondre Israel, bika den sma di ben suku fu kiri a yongu pikin, dede.” 21 Dati meki a opo, a teki a yongu pikin nanga en mama èn a go na a kondre Israel. 22 Ma di Yosef yere taki Arkelayus tron kownu fu Yudea na presi fu en papa Herodes, a ben frede fu go drape. Fu di Gado ben warskow en na ini wan dren, meki a go na a kontren fu Galilea. 23 Drape a go libi na ini wan foto di nen Nasaret, so taki a sani di den profeiti taki ben sa kon tru. Den ben taki: „Den o kari en wan Nasaretsma.”