Yesaya
17 Disi na wan krutuboskopu gi Damaskus:
„Luku! Damaskus no o de wan foto moro.
A o tron wan brokopresi èn wan ipi broko ston.
2 Sma no o tan moro na den foto fu Arower.
Den o tron presi pe meti e nyan grasi.
Nowan sma o meki den frede.
3 Nowan foto di abi bigi skotu o de moro na ini Efrayim
èn a kownukondre no o de moro na Damaskus.
A glori fu den sma di ben tan abra na Siria o lasi gwe
neleki a glori fu den Israelsma”,* na so Yehovah di e tiri den legre taki.
5 A o de neleki a pkinso n’nyan
di tan abra baka te sma kba koti a n’nyan
na den gron fu Refayim-lagipresi.
6 A o de neleki den olèif di tan abra baka te sma seki den bon.
Na soso tu noso dri lepi olèif o tan abra na a moro hei taki fu a bon.
Na fo noso feifi nomo o de na den taki di ben abi furu froktu”,
na so Yehovah, a Gado fu Israel, taki.
7 Na a ten dati sma o luku go na loktu na a Mekiman fu den. Iya, den o luku go na a Santawan fu Israel. 8 Den no o luku go na den altari di den ben meki. Den no o luku go na den tra sani di den meki, awinsi na santa postu* noso altari fu bron switismeri gi tra gado.
9 Na a ten dati den tranga foto fu den o de leki wan brokopresi na ini busi.
Na fu den Israelsma ede den o de leki wan taki di sma libi fu gro fa a wani.
Nowan sma o tan drape moro.
Fu dati ede unu prani moi bigi gron
èn unu prani pransun fu freimdesma* na tapu.
11 Na deiten unu e poti wan skotu lontu den gron fu unu.
Na m’manten unu e wroko a gron, so taki den sani di unu prani bigin gro.
Ma na a dei te unu siki hebi èn unu abi pen, unu no o koti n’nyan na den gron.
12 Arki! Furu pipel e meki dyugudyugu
èn den e rigeri leki wan krasi se!
Den pipel e meki b’bari
neleki a watra fu wan bigi sula!
13 Iya, den pipel o meki b’bari neleki a watra fu wan bigi sula.
Gado o bari den, dan den o lowe gwe bun fara.
A o yagi den gwe neleki fa winti e wai aleisibuba na den bergi.
Den o de leki makabusi na ini wan draiwinti.
14 Na mofoneti ala sortu ogri e miti den.
Fosi m’manten doro, nowan fu den o de moro.
Na disi o psa nanga den sma di e kon teki den sani fu wi na wan ogr’ati fasi.
Iya, dati na a pai fu den ogr’ati sma di kon fufuru den sani fu wi.