Yesaya

18 Bigi ogri o miti a kondre di de na ini a birti fu den liba fu Etiopia

pe meti soleki sprenka de!

 2 A kondre e seni boskopuman go na se

na tapu papirus-boto. A e taki:

„Un boskopuman, go es’esi na wan pipel di e tan na wan kondre di liba wasi gwe.

Den sma fu a kondre dati langa, den abi brenki skin

èn na ala sei sma e frede den.

Den tranga

èn den e teki furu tra kondre abra.”

 3 Ala un sma di e libi na ini a kondre èn ala un sma di e libi na grontapu,

unu o si wan fraga* na tapu den bergi

èn unu o yere wan b’bari leki a b’bari fu wan tutu.

„Mi o tan pî èn mi o luku mi tanpresi.

A o de leki a son di e skèin faya na deiten

èn leki dow di e saka kon na a faya ten fu a yari te sma e koti n’nyan na den gron.

 5 Te den bon e kisi bromki èn te den bromki e tron lepi droifi,

sobun fosi a kotiten doro,

wan sma musu teki wan nefi èn a musu koti den taki puru na den bon.

A musu koti ala sani di de na den taki tu.

 6 Den alamala o tron n’nyan gi den tingifowru na den bergi

èn gi den busmeti na ini a kondre.

Na dati den fowru disi o nyan na a waran ten fu a yari

èn na dati den busmeti na ini a kondre o nyan na a kotiten.

 7 Na a ten dati wan pipel o tyari wan kado gi Yehovah di e tiri den legre.

Den o tyari en go na Sion-bergi, a presi pe sma e kari a nen fu Yehovah di e tiri den legre.

A pipel dati e tan na wan kondre di liba wasi gwe.

Den langa, den abi brenki skin

èn na ala sei sma e frede den.

Den tranga èn den e teki furu tra kondre abra.”