Wan Openbaring gi Yohanes

14 Baka dati mi si a Pkin Skapu e tnapu tapu Sion-bergi makandra nanga 144.000 sma. A nen fu en nanga a nen fu en P’pa ben skrifi tapu a fes’ede fu den. 2 Ne mi yere wan b’bari e kmoto fu hemel. A ben de leki a b’bari fu bigi sula èn leki a b’bari fu bigi dondru. A b’bari di mi yere ben de leki a sten fu singiman di e prei a harpu fu den. 3 Den ben e singi wan singi di gersi wan nyun singi na fesi a kownusturu, den fo kerub-engel* nanga den owruman.* Nowan sma ben man leri a singi dati, boiti den 144.000 sma di bai puru fu grontapu. 4 Den sma disi no doti densrefi nanga uma. Fu taki en leti, noiti den sribi nanga uma. Den e tan waka na baka a Pkin Skapu, awinsi pe a e go. Den bai puru na mindri libisma èn den na den foswan* di gi na Gado nanga a Pkin Skapu. 5 Nowan lei e kmoto na ini den mofo. Den no abi nowan fowtu.

6 Dan mi si wan tra engel e frei na loktu. A ben abi têgo bun nyunsu di a ben musu ferteri den sma di e libi na grontapu, iya, sma fu ala kondre, lo, tongo nanga pipel. 7 Nanga wan tranga sten a ben e taki: „Frede* Gado èn gi en glori, bika a yuru doro taki a o krutu sma. Fu dati ede, anbegi a sma di meki hemel, grontapu, a se nanga ala den presi pe watra e kmopo.”*

8 Baka dati a di fu tu engel kon. A taki: „A fadon! Babilon a Bigiwan fadon! Na en ben meki ala den pipel dringi a win fu en di e gi sma a firi fu huru!”*

9 Dan a di fu dri engel kon. Nanga wan tranga sten a taki: „Efu wan sma e anbegi na ogri meti nanga a popki di den meki fu en èn a sma e kisi wan marki tapu en fes’ede noso tapu en anu, 10 dan a sma dati o dringi a win fu na atibron fu Gado tu. A win disi kanti go na ini a kan fu en bigi atibron èn a no moksi nanga tra sani. Na fesi den santa engel nanga a Pkin Skapu den o pina a sma dati nanga faya èn nanga swarfu.* 11 A smoko fu a faya di e pina den* o opo go na loktu fu ala ten, iya, fu têgo. Den sma di e anbegi na ogri meti nanga a popki di den meki fu en èn den sma di e kisi a marki fu en nen no o man feni rostu na deiten noso na neti. 12 Fu dati ede a de fanowdu taki den santawan hordoro. Dati na den sma di e hori densrefi na den wet fu Gado èn di e tan bribi na ini Yesus.”

13 Ne mi yere wan sten kmoto fu hemel. A taki: „Skrifi a sani disi: Vanaf now, den bakaman fu Masra* di dede o de koloku. A santa yeye taki: ’Iya, meki den rostu fu a tranga wroko di den du, bika Gado no o fergiti den sani di den du.’”*

14 Baka dati mi si wan weti wolku. Wan sma di gersi wan manpkin fu libisma ben e sdon na tapu a wolku. A ben abi wan gowtu kroon na tapu en ede èn a ben hori wan srapu grasinefi na ini en anu.

15 Dan wan tra engel kmoto na ini a santa presi fu a tempel. Nanga wan tranga sten a taigi a sma di ben e sdon na tapu a wolku: „A n’nyan fu grontapu lepi kba. Teki yu grasinefi èn go du a kotiwroko, bika a ten fu a kotiwroko doro kba.” 16 Ne a sma di ben e sdon na tapu a wolku teki en grasinefi, dan a wai en na grontapu èn a koti a n’nyan fu grontapu.

17 Baka dati ete wan engel kmoto na ini a santa presi fu a tempel di de na hemel. En srefi ben abi wan srapu grasinefi.

18 Dan ete wan tra engel kmoto fu na altari èn a ben kan du san a wani nanga a faya. Nanga wan tranga sten a bari gi a wan di ben abi a srapu grasinefi: „Teki yu srapu grasinefi, koti den bosu droifi puru na a droifibon fu grontapu, bika den droifi kon lepi kba.” 19 Ne na engel teki en grasinefi èn a wai en na grontapu. Dan a koti den droifi puru na a droifibon fu grontapu èn a fringi den droifi nanga a droifibon go na ini a bigi baki pe den e masi droifi fu meki win. A baki disi na a atibron fu Gado. 20 Dan den masi den droifi na ini a baki dorosei fu a foto. Someni brudu kmoto na ini a baki, taki a ben gersi wan liba di ben e doro te na den t’tei di tai na den asimofo. A liba ben langa sowan 300 kilometer.*