Vrede te foe kaba! — Te Gado e taki
„Na a kownoe tiri makti di de psa marki èn na vrede wan kaba no sa kon.” — JESAJA 9:7.
1. San ben psa na ini a heri historia foe na libisma-famiri awinsi den tiriman foe grontapoe ben taki alaten nomo foe vrede?
DEN tiriman foe a grontapoe taki alaten nomo foe vrede, èn libisma ini algemeen e taki dati den e angri foe en. Tokoe na situwasi na ini a ten disi e meki wi denki na den wortoe foe na proféti Jeremia: „Sma ben howpoe tapoe vrede, ma nowan boen sani ben kon; tapoe wan ten foe kon betre, ma loekoe! skreki sani” (Jeremia 8:15) Te joe loekoe en boen dan a grontapoe foe sensi a ten di Kaïn ben kiri Abel no ben sabi troetroe vrede ma na a tra sé den ben kisi foe doe nanga tranga ogridoe. Èn na di foe twenti jarihondro foe wi de a moro hogri pisten foe alamala, wan pisten na ini san feti ben aksi a libi foe sowan wán hondro miljoen libisma. Èn na ini den dé foe wi, 97 procent foe den sma di e libi tapoe grontapoe abi foe doe nanga wán feti. Soboen aladi den tiriman foe a grontapoe e taki foe vrede, dan den ben tjari den sma di de a den ondro go foe na wan rampoe na a rampoe.
2. Omeni sma e lasi libi ini ala natie foe tra ogridoe ete?
2 Ma na ala na tranga ogridoe disi wi moe teri ete a nomroe foe sma di ala dé e fidon ini a anoe foe hogridoe di e doe nanga tranga. Na ini den Verenigde Staten foe eksempre den e kiri ibri jari sowan 20.000 sma. Moro leki 80.000 oemasma den e go didon na den nanga tranga, èn na nomroe foe oemasma di den go didon na den nanga tranga di den no go gi na skowtoe, de moro bigi ete. Pikinmoro toe miljoen oemasma e kisi hebi mishandel foe na man nanga soema den e libi èn sowan wan kwart foe ala osofamiri nawan ofoe tra vorm foe hogridoe e kisi den. wan rapport e bosroiti: „Wi tron wan kefarlek hogri libimakandra.” Na ini a moro bigi pisi foe den tra kondre wan srefi sortoe situwasi de.
3. Sortoe moro bigi ogridoe ete ben sa kan loesoe kon tege na libisma-famiri?
3 Ma ala disi no de noti ete te joe teki en gersi nanga a hogridoe di ben kan kon nanga den disi ten kernwapens. Nofo kernwapen de foe kiri ibrisma di e libi a grontapoe twarfoe tron! Wan datra ben taki: „Na modern datra wroko no sa man pristeri notnoti na den sma di fadon ini wan nucleair stré.” Foe san-ede? Wan tra datra ben piki: „A moro bigi pisi foe den datra, zuster nanga technici ben sa lasi libi . . . Ati-oso ben sa pori. Soboen pikinso sma ben sa tan abra di abi nofo sabi nanga sani foe jepi oema ooktoe.”
4, 5. (a) Sortoe kommentaar foe a mankeri foe vrede ini wi ten den gi ini wan bepaalde boekoe? (b) Sortoe kommentaar foe a srefi sortoe wan fosten lantiman ben gi?
4 Na ede artikel ini wan Jariboekoe no so langa sma kba foe na Enclopedia Britannica ben sori na ondro a titel „A grontapoe foe wi di e panja — na kefar foe wan grontapoe anarchie”, tapoe na mankeri foe vrede ini wi ten. Na ini den ben taki: „Baka 1945 sma ben teki dati go a fesi foe wan ofoe tra rede ben de wan sani di joe no kan komoto na a pasi foe en èn dati na tamara foe wi ben sa tjari wan grontapoe kon di hanga na makandra na wan stéfi fasi.” Ma, soleki na artikel ben taki, den prakseri dati ben sori taki en ben kori wi krinkrin, èn na artikel ben go moro fara foe taki „na presi foe dati . . . na grontapoe sondro foe joe e si, ma sondro foe joe kan drai en, de e lasi safsafri ma seker ala san di e hori en makandra. Foeroe kondre foe soema den structoeroe nanga jeje sani di e hori den makandra ben de wan sani foe ensrefi, panja . . .. ini lo, clan, kerki (sekte) foto-bende, kirikomando, terrorist bewegi, guerrillabewegi èn fanatiek belanggroepoe di e loekoe sani smara.”
5 Na a srefi fasi wan fosten hé lantiman ben taki ini den Verenigde Staten: „Den sani di e meki internationaal instabiliteit e kon, e kisi ini a historia moro makti tapoe den krakti di e proeberi foe meki moro georganiseerde wroko-makandra go na fesi. Na bosroiti joe no kan komoto a pasi foe en. Gi sortoe ondrosoekoe toe di de sondro foe kroetoe sani a fesi foe den grontapoe marki fa sani e waka, den sma moesoe foe bosroiti, dati sociale beroering, politiek onrust, ekonomia moeilek ten èn internationaal njoengoenjoengoe sa panja densrefi moro na ini a tra pisi foe na jarhondro disi.” A ben tapoe nanga den wortoe disi: „Na kefar foe san a libisma-famiri e si densrefi tapoe a fesi, de foe taki en sjatoe . . . grontapoe anarchie . . .”
’Fisitiman foe na ruimte’
6. Fa wan redacteur foe wan koranti ben skrifi foe san fisitiman di no de foe a grontapoe disi ben sa si foe na disiten grontapoe?
6 Nanga ala disi na ini prakseri meki wan skrifiman foe wan koranti di e kon a doro na ini Cleveland (VS) ben skrifi: „Efoe tra wiki fisitiman foe wan boen fara starisistema ben sa doro dja, dan wi ben sa kan ferteri den dati wi ben sa moe kiri wisrefi foe kan sori na hé fasi foe na communisme ofoe na kapitalisme? Wi ben kan tjari kon a krin gi den dati wi ben de wan sortoe di ben prati wisrefi ini natie, èn dati den natie dati na ondro sweri ben de ferplekti ini pisten foe fesa foe angri foe broedoe èn kiri makandra? Fa wi ben sa ferklari dati wi ben meki sowan foe wi sortoe dede foe angri èn trawan wi ben meki go doro na ini toestand di no fiti wan libisma èn pe den e hori den don, foedi wi ben feni methode foe kiri sma na bigi ipi moro prenspari? Den fisitiman foe na boen fara starisistema dati seker ben sa kari wi barbaar (hogri ati èn grofoe sma) . . . Na a tra sé wi ben sa kan taki dati wi abi ooktoe moi kunstwroko èn e bribi na ini geregtigheid. Nanga sari den ben sa lafoe èn sorgoe dati den ben hari gwe bifo den explotie ben loesoe kon.”
7, 8. (a) Sortoe makti fisitiman e ondrosoekoe now na libisma-famiri? (b) Foe san-ede den de dja?
7 Son sma e taki kande: „A no de foe taki dati den sortoe ’fisitiman di no de foe a grontapoe disi’ no de na fisiti foe ondrosoekoe sani.” Nono, nowan fisitiman foe na ruimte dorosé foe grontapoe di de foe stof de dja. Ma kefarlek makti, èn kefarlek koni fisitiman e hori densrefi nownow kaba jari langa bezig foe ondrosoekoe finifini san na libisma famiri e tjari kon tapoe ensrefi èn tapoe na grontapoe. Boiti dati den e loekoe a tapoe dati ’bifo den explotie loesoe kon’ wan krin boskopoe meki bekenti.
8 Soema na den makti fisitiman disi di e ondrosoekoe na libisma famiri? A Wortoe foe Gado e ferteri wi dati den de sma di e teki a presi foe Gado ini a jeje kondre, getrow engel, di Gado ben seni go na grontapoe foe ondrosoekoe dati. Foe den jeje mekisani disi Psalm 103:20 e taki: „Blesi Jehovah. o oenoe en engel, makti ini krakti, di e doe en wortoe, foe arki na a sten foe en wortoe.” Den makti engel disi nofotron a bijbel e taki foe den. Na ini Mattéus kapitel 25 na profétitori foe a ten na ini san wi e libi e taki ini vers 31 nanga 32 foe eksempre: „Te na Manpikin foe libisma ben sa kon ini en glori, èn ala en engel nanga en, dan a sa teki presi tapoe en glori troon. Èn ala natie sa tjari konmakandra na fesi en, èn a sa prati den sma foe makandra, soleki wan herder e prati den skapoe foe den bokoboko.”
9. San na a rol foe Kristus Jezus ini a ten disi ini san den e ondrosoekoe na libisma-famiri?
9 Na „Manpikin foe libisma” disi na a moro prenspari wan di e teki presi foe Gado, Jezus Kristus. Bakadi Gado ben opo en baka go kisi hemel libi, a ben wakti te leki Jehovah ben sa gi en na spesroetoe wroko disi. Ini den wortoe foe Psalm 110:1 Jehovah ben taigi en: „Sidon na mi reti anoe sé te leki mi poti joe feanti leki wan foetoebangi gi joe foetoe.” Na kontroe foe den bijbelprofétitori disi e meki wi si dati na pisten tapoe san Gado ben seni na makti jeje mekisani disi go foe bigin foe handri, ben doro ini na jari 1914.
10. Omeni engel ben sa kan abi makandra nanga Kristus wan prati na a pratiwroko?.
10 Ma a no ben sa kon en wawan, bika na ini Mattéus 25:31 ben tanapoe: „Ala engel” ben sa de na en. Omeni dati ben sa kan de? Openbaring 5:1 e taki: „Mi ben si, èn ben jere wan sten foe foeroe engel lontoe na troon [foe Gado] . . . èn a nomroe foe den ben de myriade tron myriade.” Wan myriade na tin-doesoen. Wan myriarde tron wan myriarde na 10.000 tron 10.000, ofoe wan totaal foe 100 miljoen engel! Na Openbaring e taki na ini meervoud, dati wani taki foe „den myriarde tron myriarde” engel di e dini Gado. Dati wani taki, hondrohondro miljoen engel kande srefi miljarmiljard ofoe moro srefi. Ondro a tiri foe Kristus den jeje mekisani disi e gi jepi na den sma na grontapoe di e teki presi gi Gado ini na prati foe na libisma-famiri na ini toe groepoe: na wan di de fo na „tego koti poeroe” èn na trawan „na tego libi”. — Mattéus 25:46; loekoe ooktoe Mattéus 13:41, 42.
„Tego boen njoensoe”
11. San na a ’tego boen njoensoe’ di engel e hori baka gi en na ini a ten disi?
11 Sortoe prenspari boskopoe den fisitiman disi foe a jejekondre e hori baka gi en na ini a ten disi na grontapoe? Openbaring 14:6 e tjari disi kon na krin gi wi: „Mi ben si wan tra engel e fré na a mindri foe na hemel, èn a ben abi tego boen njoensoe, foe meki dati bekenti leki bréti ten gi den di e libi na grontapoe, èn na ibri natie nanga lo nanga tongo èn ibri pipel.” San na a ’tego boen njoensoe’ disi? A abi foe doe nanga san leki fa Jezus taki ben sa de wan foe den foeroe marki dati wi e libi na ini den laste dé. Na ini Mattéus 24:14 a ben ferklari: „Èn na boen njoensoe disi foe na kownoekondre sa préki na ini a heri grontapoe pe libisma e libi leki wan kotoigi gi ala natie, dan na kaba sa kon”.
12, 13. (a) San Kownoekondretirimakti wani taki? (b) Foe san-ede na Kownoekondreboskopoe de a moro boen njoensoe?
12 Gado kownoekondre na a hemel tiri di o tiri abra na grontapoe baka te na disi ten libisma tirimakti poeroe na pasi (Daniël 2:44; Mattéus 6:9, 10). Na kownoe foe en na Kristus Jezus, èn a abi kompe timan (Openbaring 14:1-4; 20:4). Foe na Kownoekondre dati Daniël 7:14 e taki san e kon now: „A ben kisi tirimakti nanga wartifasi èn wan kownoekondre, sodati den pipel, nationaal groepoe èn tongo ben sa dini alamala en. En tirimakti na wan tirimakti te ten di no abi marki, di no sa pasa, èn en kownoekondre wan di no sa broko.”
13 Foe san-ede a boskopoe di e go foe a Kownoekondre tirimakti de sowan been njoensoe, ija, a moro boen njoensoe? Foedi na tirimakti disi tjari wan njoen grontapoe kon, wan njoen seti foe na libisma libimakandra. Ondro Gado kownoekondre na libisma-famiri sa kisi so moi blesi dati Psalm 37:11 e taki foe den sma di e libi na a ten dati: „Den safri-atiwan sa kisi a grontapoe, èn den sa feni foe troe den switi prisiri na ini vrede pasa marki.” (Psalm 29:11). Na ini a ten disi, bifo na Kownoekondre teki na ini anoe na heri loekoe foe grontapoe afersi, dan a boen njoensoe foe wan vrede tiri di sa tan ini na anoe foe na „kownoe foe vrede” sa préki ini ala natie. A sani disi den grontapoe dienstknegti foe Gado e doe ondro a tiri foe Kristus èn den engel. — Jesaja 9:6, 7.
14. San na wan fasi tapoe san wi kan sabi seker soema na den grontapoe dienstknegti foe Gado? (b) San e sori krin dati Gado blesi de a tapoe den?
14 Soema na den grontapoe dienstknegti disi foe Gado? We, soema na den wánenkri wan di e fisiti libisma geregeld nanga a boen njoensoe foe na Kownoekondre? Srefi gensman e piki dati disi na Jehovah Kotoigi. Na groepoe foe den Kewnoekondreprékiman disi, di de now moro leki dri miljoen ini nomroe, e gro esesi. Ini a jari di psa 225.868 njoen bedinari foe na evangelie ben kisi dopoe. Èn na ini a wan jari dati na ini a heri grontapoe 2461 njoen gemeente foe Jehovah Kotoigi ben opo wan gemiddeld foe moro leki siksi ini wan dé, sodati na totale nomroe foe gemeente na ini 208 kondre ben kon tapoe 52.177. Na profétitori di skrifi na ini Jesaja 60:22 foe troe e kontroe: Jehovah e meki a prekiwroko — nanga a tjari konmakandrawroko gro esesi „na en reti ten”. Èn a ten dati de now!
15. Tapoe a gron foe san sma e kisi kroetoe na ini a ten disi?
15 Fa den sma e doe tapoe a boen njoensoe foe na Kownoekondretirimakti, de a fondamenti tapoe san e bepaal ofoe den sa poti aparti gi a „tego koti poeroe” ofoe gi a „tego libi” ini na njoen grontapoe. Foeroe sma e doe soleki den sma di ini 2 Kronieken 36:15, 16 den ben skrifi foe den: „Jehovah . . . ben tan seni warskow gi den doronomo nanga jepi foe en boskopoeman, foedi a ben abi sar’ati . . . ma den ben hori alaten baka den boskopoeman foe na troe Gado na spotoe èn ben feraragti en wortoe èn ben spotoe nanga en proféti, te leki na atibron foe Jehovah ben opo kon a tapoe.” Ma tra sma e teki tapoe wan boen fasi a boskopoe, èn e kon ondro na kibri foe Jehovah. „Foe taki foe en di e arki na mi [na troe koni] a sa libi ini sekerfasi èn no sa broeja foe frede gi rampoe.” — Odo 1:20, 33; Mattéus 25:34-46.
Den hemellegre o opo doe wan sani
16. Fa Gado sa taki djonsro nanga a libisma-famiri di no e gi jesi?
16 Djonsro na prékiwroko di Jehovah dienstknegti ben doe sa klari ini na marki di en e bepaal. A pasensi foe Gado nanga na libismafamiri di no o gi jesi sa kon a wan kaba. Na vrede boskopoe di a ben meki kon te na a geslagti disi foe sma di de a libi sa kenki. Na presi foe dati „[na a ten dati] a sa taki nanga den ini en atibron, èn na ini en faja atibron a sa naki den te den broeja” (Psalm 2:5). Soleki Jehovah srefi e meki bekenti: „Na ini mi faja, ini a faja foe mi ati bron mi sa moe taki” (Ezechiël 38:19). Dan a sa gi Jezus Kristus a marki foe meki en hemel-legre opo doe sani tege na oproeroe èn kroektoedoe grontapoe disi.
17. Fa na krakti foe soso wán engel ben demonstreer?
17 San den legre dati sa doe, wi sa si foe san ben psa nanga Assyria di Gado ten ben doro foe opo doe wan sani nanga en. 2 Kownoe 19:35 e taki: „A ben psa now dati na neti dati na engel foe Jehovah ben hari go moro fara èn na ini a legre presi foe den Assyriasma a ben naki 185.000 man, . . . alamala ben dede, ben de dedesma.” Èn ala disi soso wan engel doe! San djonsrode myriarde èn myriarde foe den sa doe, sa de wan kefarlek sani.
18. O finifini na pori sa de na a kaba foe a seti disi?
18 Jeremia 25:31-33 e ferteri nanga den wortoe di e kon san sa psa: „Wan trobi Jehovah abi nanga den natie. Ensrefi sa go ini kroetoe nanga ala skin. Foe na sé foe den goddelowsoesma a moe gi den abra na a feti owroe’, na so den wortoe foe Jehovah de. Disi Jehovah foe den legre ben taki: ’Loekoe! Wan rampoe e go foe a wan natie na a tra natie èn wan hebi bigi winti srefi sa loesoe kon foe na moro farawe kontron foe na grontapoe. Èn den di Jehovah naki trowe, seker sa kon didon na a dé dati foe a wan oekoe foe na grontapoe te go te na a tra oekoe foe na grontapoe. Sma no sa kré foe den, èn ooktoe den no sa tjari den kon makandra ofoe beri den. Leki fatoe tapoe a fesi foe na grontapoe den sa tron.’”
19. Sortoe fini pisi Openbaring 19 e poti a tapoe ete?
19 Openbaring kapitel 19 e ferteri fa Jehovah sa doe ala disi. A e doe disi foedi ai meki en kownoe Jezus Kristus, go abra foe doe sani aladi, soleki na ini vers 14 e taki, „den legre di ben de ini hemel e waka na en baka”. Dan tanapoe na ini vers 17 èn 18. „Mi si wan engel tanapoe ini na son, èn a ben bari nanga wan tranga sten èn a ben taigi ala den fowroe di e fré na ini a mindri foe na hemel: ’Kon dja, oen kon makandra na a bigi neti njanjan foe Gado, foe njan den meti pisi foe kownoe èn den meti pisi foe sroedati edeman èn den meti pisi foe trangaman èn den meti pisi foe asi èn foe den di e sidon a den tapoe, èn den moti pisi foe ala sma foe den friwan èn foe den srafoe èn foe den pikinwan èn foe den bigiwan.’” Èn ini vers 19 te go miti 21 e ferteri foe na pori foe ala libisma instelling foedi den ben wegri foe arki di Gado ben taki nanga jepi foe en grontapoe boskopoeman.
20. Foe san-ede na kaba foe a grontapoe disi no ben sa kan tjari kon nanga jepi foe wan nucleaire rampoe?
20 Djonsro soboen a joeroe e doro dati Gado sa meki wan kaba kon na a ogri systema di e panja. Ma na kaba dati no sa kon foedi den natie e pori densrefi nanga jepi foe wan kernoorlog. Efoe disi ben sa de so, dan den regtvaardikiwan ben sa kisi pori makandra nanga den goddelowsoewan. Den „explosie” di Gado sa meki kon na a grontapoe disi na a tra sé sa de joisti foe poeroe sani poti aparti. Sma sa tan a libi di sa go na ini a njoen grontapoe. Soleki na ini Odo Kapitel 2:21, 22 tanapoe: „A de den opregtiwan, di sa tan libi a tapoe grontapoe, èn a de den sondro fowtoewan di sa tan abra a tapoe. Foe taki foe den goddelowsoewan, den sa koti poeroe foe a grontapoe; èn foe a sé foe den feradelekwan den sa hari poeroe foe en.”
21. Sortoe tra aksi wi sa go loekoe ini a tra artikel?
21 Foe san-ede na grontapoe disi kon na ini a toestand na ini san sowan grontapoe pori moe kon? A no de wan sani di mogelek dati na disi ten moeiti foe vrede di den grontapoe tiriman e meki sa tjari froktoe kon sodati na seti foe sani disi kan tan? Èn fa wi moesoe tjari wisrefi na ini na moro prenspari ten foe na heri libisma historian efoe wi wani de a mindri „den opregtiwan” èn den „sondro fowtoewan” di sa go libilibi na ini na njoen grontapoe èn baka dati sa libi moro fara? Na ini na tra artikel wi sa go loekoe den aksi disi.
Sortoe piki joe ben sa gi?
◻ Fa na mankeri foe vrede spesroetoe ben kon krin na ini a ten foe wi?
◻ Fa engel de ini a tori foe a prati foe den libisma na ini a ten disi?
◻ Foe san-ede a Kownoekondreboskopoe de „tego boen njoensoe”?
◻ Tapoe a gron foe san sa bepaal ofoe libisma sa boen foe kisi a libi ofoe foe ferdini a dede?
[Prenki na tapoe bladzijde 4]
A wroko foe Jehovah Kotoigi e kisi jepi foe engel