Markus skrifi en

8 Na a ten dati, wan bigi grupu sma ben de baka nanga Yesus èn den no ben abi noti moro fu nyan. Dati meki a kari den disipel èn a taigi den: 2 „Mi e sari den sma, bika na dri dei kba den de nanga mi èn den no abi noti fu nyan. 3 Efu mi seni den go na den oso sondro taki den nyan wan sani, den o flaw te den de na pasi. Sonwan fu den kmoto fu farawe.” 4 Ma den disipel fu en piki en: „Pe wi o feni nofo brede dya na so wan farawe presi fu gi den sma meki den nyan?” 5 Ne a aksi den: „Omeni brede unu abi?” Den taki: „Seibi.” 6 Dan a taigi den sma fu go sdon na gron. A teki den seibi brede, a taki Gado tangi, dan a broko den brede èn a gi den disipel fu en meki den gi den sma. Ne den disipel prati den gi den sma. 7 Den ben abi wan tu pkin fisi tu èn baka di a taki Gado tangi gi den fisi, a taigi den disipel fu prati den gi den sma tu. 8 Na so den sma nyan den bere furu. Dan den disipel piki den pisi brede di ben tan abra èn den furu seibi bigi baskita nanga dati. 9 Sowan 4000 man ben de drape. Baka dati a seni den sma gwe.

10 Direk baka dati a go na ini a boto nanga den disipel fu en èn den go na a kontren fu Dalmanuta. 11 Dyaso den Fariseiman kon na en èn den bigin hartaki nanga en. Fu di den ben wani tesi en, meki den aksi en fu du wan wondru di e sori taki na Gado seni en kon. 12 Dati meki a ben sari srefsrefi èn a taki: „Fu san ede unu* wani si wan wondru? Unu kan bribi mi: Mi no o sori den sma disi wan wondru.” 13 Ne a gwe libi den èn a go baka na ini a boto fu abra go na a tra syoro.

14 Ma den disipel ben fergiti fu tyari brede. Wán brede nomo den ben abi ini a boto. 15 Ne Yesus warskow den: „Un musu tan na ai. Luku bun nanga a gist* fu den Fariseiman èn nanga a gist fu Herodes.” 16 Ne den bigin meki trobi fu di den no ben abi brede. 17 Di a si disi, a taigi den: „Na fu di unu no abi brede, meki unu e meki trobi? Unu no e ferstan ete san mi wani taigi unu? Na so a tranga gi unu fu ferstan? 18 ’Unu abi ai, ma tòg unu no e si. Unu abi yesi, ma tòg unu no e yere.’ Unu fergiti taki 19 mi ben prati den feifi brede gi den 5000 man? Omeni baskita unu ben furu nanga den pisi brede di ben tan abra?” Den taigi en: „Twarfu.” 20 „Di mi ben prati den seibi brede gi den 4000 man, dan omeni bigi baskita unu ben furu nanga den pisi brede di ben tan abra?” Den taigi en: „Seibi.” 21 Dan a taigi den: „Unu no e ferstan ete?”

22 Baka dati den doro na Betsaida. Drape den sma tyari wan breniman kon na Yesus èn den begi en fu fasi a man. 23 Ne a hori a breniman na en anu èn a tyari en go na dorosei fu a dorpu. Baka di a spiti na tapu den ai fu a man, a poti en anu na en tapu èn a aksi en: „Yu e si wan sani?” 24 A man opo en ai luku èn a taki: „Mi e si sma e waka, ma den gersi bon.” 25 A poti en anu ete wan leisi na tapu den ai fu a man. Ne a man ben man si krin. A kon betre èn a ben man si ala sani bun. 26 Baka dati a seni a man go na oso èn a taigi en: „No go na ini a dorpu.”

27 Yesus nanga den disipel fu en go na den dorpu di ben de na Sesareya Filipi èn di den ben de na pasi, a aksi den disipel fu en: „San den sma e taki fu mi? Suma den e denki taki na mi?” 28 Den taigi en: „Son sma e taki dati yu na Yohanes a Dopuman, ma trawan e taki Elia. Trawan baka e taki dati yu na wan fu den profeiti.” 29 Dan a aksi den: „Ma san unu e taki?” Petrus piki en: „Yu na a Krestes.” 30 Ne a taigi den krin taki den no musu taigi nowan sma suma na en. 31 A bigin leri den tu taki a Manpkin fu libisma musu nyan furu pina èn taki den fesiman* nanga den edeman fu den priester nanga den leriman fu a Wet o wiswasi en. Sma o kiri en, ma baka dri dei a o kon na libi baka. 32 Iya, a sani disi a ben taigi den krin. Ma Petrus tyari en go na wan sei èn a pir’ai gi en. 33 Ne Yesus drai luku den disipel fu en èn a pir’ai gi Petrus. A taki: „Kmoto na mi tapu, Satan! Bika yu no e denki leki fa Gado e denki, ma yu e denki leki fa libisma e denki.”

34 Dan a kari den sma nanga den disipel fu en kon na en èn a taigi den: „Efu wan sma wani waka na mi baka, dan a no musu teri ensrefi moro, ma a musu teki en pinapostu* èn a musu tan waka na mi baka. 35 Bika a sma di wani kibri en libi, o lasi en. Ma a sma di lasi en libi fu mi ede èn fu a bun nyunsu ede, o libi baka. 36 Sortu wini wan sma o feni efu a abi heri grontapu, ma a lasi en libi? 37 Iya, san wan sma ben o gi fu kan kisi en libi baka? 38 Den sma disi e du sondu èn den drai baka gi Gado. Efu wan fu den e syen gi mi èn gi den sani di mi e taigi den, dan a Manpkin fu libisma o syen gi a sma dati tu te a doro nanga a glori fu en P’pa makandra nanga den santa engel.”