Go moksi wisrefi na den sma foe Jehovah di e kibri den soifri-retifasi
„Foe mi sé, mi sa waka na ini mi soifri-retifasi . . . A mindri den ipi sma di kon makandra mi sa blesi Jehovah.” — PSALM 26:11, 12.
1, 2. (a) Fa wantoe fasi foe bribi foe na kristenheid ben kisi sma? (b) Sortoe fasi foe leri sma Jezus ben gebroiki? (Matt. 11:28-30)
189.800 SMA ben teki dopoe na ini 1985 leki wan symbool dati den ben gi den libi abra na Jehovah leki en kristen kotoigi. Disi na wan gemiddelde foe 520 ini wan dé. Fa ala den sma disi ben kon na a bosroiti foe den foe den meki den dopoe den? Den ben go na komakandra foe boen bigi ipi sma arki na wan prékiman di e wroko tapoe joe firi èn dan ben teki wan bosroiti tapoe a gron foe den firi foe teki a sé foe Kristus? A so a e go na wan toe anitri èn evangelise kerki. Ma disi de a fasi fa Kristus e kisi moro sma?
2 Te wi go ondrosoekoe na publiki prékiwroko foe Jezus moro boen, dan, wi no e si dati a ben e pré nanga den firi foe sma. A ben hari den arkiman foe en kon foe eksempre nanga koor èn singi? Ofoe a ben gebroiki oiti triki foe psychologie foe meki den arkiman kisi wan firi foe fowtoe èn dan tjari den go moro fara foe firi dipi ini a saka foe den? Kontrari foe dati, na fasi foe en foe leri sma ben tjari den sma go so fara foe denki èn foe go tak-go-tak-kon tapoe wan logisfasi. Foedi a moro bigi pisi foe den arkiman foe en ben de djoe, meki den ben sabi kaba den Hebrew Boekoe. A ben kan tjari den go so fara foe tak-go-tak-kon logis tapoe sabi di den ben abi kaba, sodati den ben sa herkèn en leki na Messias. — Mattéus kapitel 5-7; Lukas 13:10-21.
3. Fa wi sabi dati Paulus nanga en leri no ben pré nomo nanga den firi?
3 Na so toe Paulus, aladi wan toe sma ben si en leki wan onbekwaam takiman ben wroko tapoe a denki krakti foe wan sma (Tori foe den Apostel 20:7-9; 2 Korinte 10:10; 11:6). A ben skrifi: „Mi e begi moro tranga, oen brada, na den sar’ati foe Gado, foe pristeri oen skin leki wan srakti-ofrandi di de a libi, di de santa èn di de switi na Gado, wan santa dienst nanga oenoe denki-krakti . . . Kon kenki foe di oenoe e kenki oen jeje [„sodati oen heri jeje-fasi e kenki”, Phillips], sodati joe kan ondrosoekoe san de a boen èn switi èn volmaakti wani foe Gado. — Romeini 12:1, 2.
4. Sortoe stap wan sma moe doe bifo a kan kisi dopoe leki wan foe Jehovah Kotoigi?
4 Ooktoe na ini a ten disi a de so dati den sma di e kisi dopoe de sma di studeri na bijbel èn den go tak-go-tak-kon soifri foe en bifo den ben teki na serjoesoe stap meki den dopoe den, dati wani taki foe den saka den go krinkrin ondro watra (Tori foe den Apostel 17:11, 12). Den no ben teki wan hasti bosroiti tapoe a firi foe den. Kontrari foe dati, bifo den ben teki den foe sa dopoe den, den ben go geregeld na kristen komakandra foe kisi soifri sabi foe Jehovah èn en prakseri nanga jepi foe Kristus Jezus (Hebrewsma 10:25). Den ben abi ooktoe geregeld wan prati na a kristen diniwroko foedi den ben prati na boen njoensoe foe na Kownoekondre nanga trawan (Tori foe den Apostel 5:42; 1 Korinte 9:16). Moro fara den ben loekoe moro leki 120 aksi ini den laatste wiki bifo den dopoe nanga difrenti gemeente-owroeman, aksi di e go foe na kristen leri èn kristen waka nanga libi, èn ooktoe hondrohondro bijbeltekst di de hori bika gi dati — èn ala disi foe tron bifo a dopoe foe den sma di e kibri den soifri-retifasi èn di Gado e feni boen. — Tori foe den Apostel 8:34-36.a
Kisi dopoe e meki wan difrenti
5. Sortoe libifasi den e ferwakti foe wan sma di kisi dopoe?
5 San wan sma e doro te a teki dopoe? Na ini a fosi presi a e meki ensrefi kon tron wan nanga na moro bigiman di kibri en soifri retifasi èn di oiti ben de na grontapoe, Kristus Jezus. Ensrefi ben poti na eksempre foedi tapoe na libi marki foe dritenti jari a ben meki den dopoe en (Lukas 3:21-23). Bakaten a ben gi en bakaman na komando foe lerl sma èn dopoe den na ini a heri grontapoe (Mattéus 28:19, 20). Ma a ben wani taki dati en discipel ben moesoe dopoe sma somaar, èn sondro foe loekoe na a disten waka nanga libi foe den?
6, 7. (a) San den e aksi foe wan troe bakaman foe Kristus? (b) San santafasi wani taki?
6 Na apostel Petrus e ferteri foe na joisti fasi foe loekoe na tori te a e skrifi: „Kon de . . . santa na ini joe heri waka nanga libi, bika boekoe skrifi: ’Joe moe de santa, bika mi de santa’” (1 Petrus 1:15, 16). San a wani taki now gi wan kristen di gi ensrefi abra foe de „santa”?
7 Akroederi na Expository Dictionary of New Testament Words, foe na anoe foe W. E. Vine, dan na Griki wortoe ha-gi-os (di vertaal nanga „santa”) wani taki „ini gron foe a tori aparti. . . èn ini na bijbel foe dat’ede ini na moreel èn jeje betekenis foe en, aparti foe sondoe èn foe dat’ede de krinkrin gi Gado”. Wan tra sabiman tapoe a kontren foe Grikitongo e taki dati „a de aparti gi a gi di wan sma e gi ensrefi na a dini foe Gado”. A ferstan disi foe sani e ferplekti den sma di wani teki dopoe leki troe kristen foe libi akroederi wan hé markitiki. A de a markitiki foe soifri-retifasi, èn soifri-retifasi wan taki ’hori tranga na wan seti foe moreel waarde’. Gi wan kristen disi wani taki foe hori tranga a den waarde foe Kristus. — Johannes 17:17-19; 18:36, 37.
8. (a) Na sortoe markitiki foe wan sma waka nanga libi na fosten kristen gemeente ben hori ensrefi? (b) Na kristenheid ben hori ensrefi na den markitiki dati? Tjari disi kon a krin nanga eksempre foe a presi pe joe e libi.
8 Na troe kristen gemeente alaten ben tanapoe tapoe soifri-retifasi, na hori foe wan krin organisaatsi. Foe dat’ede meki Paulus ben komanderi foe „no de moro langa na ini kompani foe wan sma di den e kari wan brada, di de wan hoeroeman, ofoe wan gridiman ofoe wan afkodréman ofoe wan skempiman ofoe wan droengoeman ofoe wan bedrigiman, èn no njan srefi nanga sowan sma . . . poeroe na godelowsoeman na oen mindri” (1 Korinte 5:9-13; 2 Johannes 10, 11). Den kerki fesiman foe na kristenheid ben tanapoe a tapoe dati den ipi sma foe den hori na a hé markitiki dati foe soifri-retifasi? Ini na kristenheid a de so dati sma di geregeld e doe ala sortoe bigi sondoe nanga ogridoe, den e teki leki actief ofoe passief memre. Den bijbel gronprakseri no e gi pasi foe sowan fasi foe loekoe pasa sani. — Teki gersi nanga Jeremia 8:5, 6, 10.
9. San e tjari sma go sofara foe gi densrefi abra èn foe meki den dopoe den?
9 Joisti na hé markitiki disi di Jehovah e hori densrefi na en, tjari den sma di lobi waarheid nanga soifri-retifisi so fara foe gi den libi abra na a Soeverein Masra foe na universum, Jehovah Gado (Habakuk 3:18, 19). Den e si wan krin kontrari na mindri na waka nanga libi foe grontapoe kerki èn di foe Jehovah Kotoigi. A de troe dati a moro bigi pisi foe den sma e wiswasi na soifri anbegi (1 Petrus 4:3, 4). Tokoe doesoendoesoen sma di lobi soifri retifasi e drai go na a waarheid. Den e sori a lobi foe den gi Gado èn gi en marki-tiki foedi den e saka densrefi na ondro na dopoe na ini watra. — Teki gersi nanga Markus 1:10; Johannes 3:23; Tori foe den Apostel 8:36.
Soifri-retifasi abi en fundamenti tapoe lobi di horidoro
10. San ben aksi foe wan kristen di wani kibri en soifri retifasi?
10 Soifri-retifasi e kostoe wan sani. Jezus ben tjari dati kon na krin di a ben kari den sma foe tron en bakaman. „Efoe wan sma wani waka na mi baka dan a no moe ke foe ensrefi [„fergiti ensrefi”, Bigi Njoensoe Bijbel] èn teki en pina-oedoe èn waka alaten na mi baka” (Markus 8:34). Na libipasi foe kristen soifri-retifasi wani taki feti èn offer, èn dati de foe na srefi réde foe san-ede disi ben de so gi Kristus — wi abi wan gemeenschappelek féantiman, Satan (Efese 6:11, 12). Efoe wan sma wani waka baka Jezus „alaten”, dan horidoro de foe dat’ede fanowdoe. Foe na réde dati meki a gi di wan sma e gi ensrefi abra na Gado no kan de wan afersi foe wan lekti bosroiti; a no moe de wan modo di e psa gwe. Tokoe wantoe sma wantoe moen psa kaba ofoe jari ben gwe libi na waarheid baka den dopoe. Fa wi kan gi wan ferklari foe disi?
11. San kande sonte na réde dati son sma no tan go doro tapoe na pasi foe soifri-retifasi?
11 Kande wantoe ben meki den tjari den go so fara foe dopoe tapoe a gron foe den firi èn no tapoe a gron foe wegi sani go-kon nanga den ferstan. Trawan kande ben ferwakti dati heri esi sani ben sa go psa èn nanga gridi marki a den fesi den ben gi densrefi abra soso foe wan sjatoe pisten. San ben mag de ooktoe a réde, den ben lasi na tranga banti foe den nanga Jehovah èn no „poti ai boen” tapoe na eksempre foe den Jezus Kristus (Hebrewsma 12:1, 2). Foe dat’ede meki a lobi foe den gi Gado ben go na baka èn a soifri-retifasi foe den ben de foe sjatoe ten. Èn foe san-ede lobi de sowan prenspari sani? Foedi lobi de na wan enkri boen fundamenti foe wan gi di wi e gi wisrefi abra na Jehovah di e tan. — Markus 12:30, 31; 1 Johannes 4:7, 8, 16; 5:3.
Bereken den kostoe foe soifri-retifasi
12. San na a koni fasi foe doe bifo wan sma teki dopoe?
12 Jezus no ben gi tranga na en discipel foe waka na en baka nanga tap’ai sondro foe bereken den kostoe. A ben gi na rai: „Soema foe oenoe . . . di wani bow wan toren no e go sidon fosi foe bereken den kostoe foe si efoe a abi nofo foe klari en?” Ija, wan sma di e gebroiki en ferstan e wegi go kon-boen sortoe fasi foe libi a sa teki. A moe go loekoe boen dati en bewégi foe ati de joisti bifo a teki na heri frantwortoe na tapoe en di a gi di wan kristen e gi ensrefi èn e teki dopoe e tjari. Èn Jezus ben meki den si san dati ben kan wani taki di a ben bosroiti nanga den wortoe: „Foe dat’ede joe kan de séker dati nowan sma foe oenoe kan de mi discipel, efoe a no tak-odi gi ala en goedoe.”
13. Efoe lobi de a mama foe na leri foe Jezus, san a ben e méne dan di a ben taki dati sma ’no moe wani si den égi oso famir’man na ai’ (Matt. 22:37-40)
13 A gi di wan sma e gi ensrefi abra na Jehovah e aksi soifri-retifasi dorodoro na ini a doe foe a wani foe Gado. Nowan sma ofoe goedoe mag troesoe a lobi foe Gado poeroe. Foe dat’ede Jezus ben taki: „Efoe wan sma e kon na mi èn no wani si en papa èn mama èn oema èn pikin èn brada èn sisa, ija, èn srefi en égi sili no na ai, a no kan de mi discipel” (Lukas 14:26). San Jezus ben wani taki now di a ben taki dati wan sma no ben moesoe wani si en égi famiriman èn srefi ensrefi na ai? Na ini sortoe fasi a ben gebroiki na wortoe no wani si wan sma na ai dja, foedi a ben leri tog en bakaman srefi foe lobi srefi den féanti foe den? (Lukas 6:27, 35). No wani si wan sma na ai wani taki dja foe lobi moro mendri. — Teki gersi Mattéus 12:46-50.
14. Fa wantoe mati nanga famirman e doe te wan sma tron wan kotoigi foe Jehovah? (Johannes 15:18, 19)
14 Te wan sma e tron wan kristen kotoigi foe Jehovah, dan séker wantewante a e kon si soema de en troetroe mati. Wantoe foe den kande sa wai komoto na pasi gi en ofoe gens, èn foedi a drai baka gi en fosten fasi foe bribi, aladi densrefi no e beoefen nowan enkri fasi foe bribi soleki a moe de. Ma Jezus ben pramisi dati den sortoe lasi disi ben sa kon boen baka. A ben taki: „Nowan sma di foe a boen foe’ mi èn foe na boen foe na boen njoensoe ben libi oso ofoe brada ofoe sisa ofoe mama ofoe papa ofoe pikin ofoe gron, di no now, na ini na pisiten disi, sa kisi hondro tron moro . . .. èn ini a seti foe sani di e kon tégo libi.” — Markus 10:29, 30.
15. Foe san-ede wantoe sma e loekoe nanga ferakti tapoe Jehovah Kotoigi?
15 Ini son geval wan sma di gi ensrefi abra na Gado, èn e tan waka soifri-reti kan, lasi na respeki foe trawan (1 Korinte 4:12, 13). Foe san-ede dati ben sa de so? Foedi a e beoefen wan fasi foe libi now di den no e si leki „warti” (Teki gersi nanga Markus 2:15, 16.) Te joe loekoe en boen dan a no de warti ’foe lastig tra sma oso-foe-oso nanga joe fasi foe bribi’. A no de warti efoe wan sma go betre na ini sraf’oso leki foe broko en neutraliteit ini afersi pe nationalisme nanga patriotisme de a tori (Johannes 18:36). A no de warti foe wégri broedoetransfusie tapoe a gron foe wan konsensi di bijbel oefen, aladi na disiten AIDS-plaag ben poti wantoe sma foe go denki tapoe a pisi tori disi. — Teki gersi nanga Tori foe den Apostel 15:28, 29; 17:6, 7; 24:5.
16. Fa wi e kisi jepi foe kibri wi soifri-retifasi?
16 Aladi na pasi foe kristen soifri-retifasi de smara èn foeroe nanga tesi, tokoe alaten baka jepi de gi wi (Mattéus 7:13, 14). Foe dat’ede Paulus ben kan taki: „Gi ala sani mi abi na tranga foe en di e gi mi krakti” (Filippi 4:13). Èn wi kan kisi na krakti dati te wi e begi èn e studeri a Wortoe foe Gado èn te wi e abi demakandra nanga na kristen gemeente. Leki dopoe-sma di e kibri den soifri-retifasi wi kan tan getrow èn loyaal, tangi foe na krakti di Gado e gi. — Efese 4:11-13; 6:10; Psalm 119:105.
Den winimarki foe wan soifri-reti libifasi
17. Na dopoe tjari sortoe blesi kon?
17 Na stap foe gi wisrefi abra na Gado èn teki dopoe e tjari foeroe blesi kon. A stap dati sa wani taki foe eksempre dati a diniwroko foe wi e kon moro bigi èn e gi oenoe moro satisfaksi. Dienst leki jepipionier ini a ten di de a wi fesi de now ini na makti foe wi èn na ini wan toe goval tjari wi go na ini na wroko foe gewone èn speciale pionier, ofoe na zendingsdienst, na kring- nanga districtwroko èn na Betheldienst. (Loekoe fokanti tapoe blz. 10.) Gi dopoe brada nanga sisa na pasi e opo ensrefi foe dini ini a gemeente trawan leki dinari ini a diniwroko èn te na ten doro sofara leki owroean. Ma gi ala den blesi disi asrefi fundamenti marki de, soifri-retifasi. — 1 Timotéus 3:1-10.
18. Fa a libi foe wi leki wan kristen di e gi ensrefi abra moe abi krakti tapoe trawan nanga soema wi e kon ini kontakti?
18 Den winimarki di e kon foe a libi leki wan kristen di gi ensrefi abra èn di e kibri en soifri-retifasi e bradi ensrefi go ooktoe na tra sma. Te wi e waka soifri baka na eksempre foe Kristus, dan wan sma e tron wan moro betre trow-patna, wan moro betre papa ofoe mama (1 Petrus 2:21; Efese 5:21-33; 6:4). Jongoesma e kweki wan boen banti nanga den papa nanga den mama, onderwijzer nanga owroeman na ini a gemeente (Titus 2:6, 7). Ibri dopoe kristen e tron wan moro boen buurman ofoe buurvrouw, wan sma di e gi wroko a tra sma ofoe wan sma die wroko na wan tra sma (Mattéus 22:39; Efese 6:5-9; Titus 2:9, 10). Èn netleki Kristus na so ibri kristen moe de wan demakandra gi trawan di e gi den kowroe ati, soleki ooktoe Jezus ben taki: „Teki mi tjatjari tapoe joe èn tron mi discipel bika mi abi safri-ati èn abi sakafasi foe ati èn oen sa feni kowroe ati gi oen sili.” — Mattéus 11:29.
19. Sortoe tra bigi winimarki e kon foe na stap foe gi joesrefi abra na Gado?
19 Wan boen bigi wini di e kon foe a stap foe gi joesrefi abra èn teki dopoe de taki wi e kon na ini wan matifasi foe vréde nanga a Mekiman. Disi e tjari vréde foe joe ferstan kon. Paulus ben gi na rai di e kon now foe disi: „No broko joe ede foe noti, ma meki na ini ala sani nanga begi èn nanga tranga begi makandra nanga taki tangi den tranga begi foe joe kon bekènti na Gado, èn na vréde foe Gado, di pasa ala prakseri, sa kibri wi ati èn wi jeje krakti nanga jepi foe Kristus Jezus.” — Filippi 4:6, 7.
20. (a) Tapoe san na „vréde foe Gado” abi en fundamenti? (b) Sortoe okasi opo gi libisma di e teki dopoe?
20 „Na vréde foe Gado” abi leki gron wan dipi ferstan foe na eksempre èn srakti-ofrandi foe Kristus Jezus. Na sabi disi foe Kristus e tjari foeroe sma kon sofara foe abi opregti beraw foe tjari wan troetroe kenki kon ini waka nanga libi ofoe ’wan drai baka’ gi sondoe (Tori foe den Apostel 3:19, 20). Leki wan bakapisi foe disi dan sma di gi densrefi abra e taki asrefi leki na Psalmsingiman: „Foe mi sé, mi sa wika na ini mi soifri retifasi. . . . A mindri den bigi ipi sma di komakandra mi sa blesi Jehovah” (Psalm 26:11, 12). Wan sma di den e dopoe ini watra leki wan symbool foe a gi di a gi ensrefi abra na Gado e moksi ensrefi na den sma foe Jehovah di e kibri den soifri-retifasi èn di de na a heri grontapoe (1 Petrus 2:17). A e ’graboe ooktoe stéfi na troetroe libi’, tégo libi, di Jehovah ben pramisi nanga jepi foe Kristus Jezus. — 1 Timóteus 6:19; Titus 1:2.
[Foetoewortoe]
a Na Wachttoren foe 1 juni 1985 e tjari kon a krin tapoe blz. 29-31 na joisti procedure ini a tori foe a dopoe èn e ferteri foe den toe aksi di na a kaba foe na dopoe lezing e poti gi den dopoe kandidaat.
Fa joe ben sa piki?
◻ San ben hari fosten kristensma kon na a waarheid di Kristus nanga den apostel ben leri?
◻ Fa santafasi abi foe doe nanga aparti kristen na ini a gemeente?
◻ San moe de na fundamenti foe soifri-retifasi?
◻ San de na ini a tori foe a bereken foe den kostoe foe soifri-retifasi?
◻ Sortoe winimarki e kon foe na kibri foe soifri-reti-fasi?
[Faki na tapoe bladzijde 10]
GRANI INI NA FOEROETEN DINIWROKO
Jepipionier: Wan dopoe bedinari di e gi moro pikinso 60 joeroe ini wan moen na a prékiwroko.
Gewonepionier: Wan dopoe bedinari di e gi gemiddeld 90 joeroe ini wan moen na a prékiwroko.
Speciale pionier: Wan dopoe bedinari di moro pikinso e gi 140 joeroe ini wan moen èn di e kisi wan pikin moni ala moen di kan sorgoe gi den fanowdoe sani foe en foe tan a libi. Den pionier disi den e seni go na geïsoleerde groepoe èn pikin gemeente.
Gileadzendeling: Wan dopoe bedinari di na Wachttoren-Bijbelskoro Gilead gi leri foe doe dienst na ini dorosé kondre èn di e gi moro pikinso 140 joeroe ini wan moen ini a diniwroko.
Kring-districtsopziener: Owroeman di e reis èn di e fisiti gemeente nanga kring foe bow den brada nanga sisa ini na diniwroko èn na a ten foe komakandra. Den e gi foeroe joeroe na a veiddienst.
Betheldienst: Dati na wan dienst di foeroeten dinari e doe ini wan foe den bijkantoro èn drukkerij foe na Watch Tower Society.
[Prenki na tapoe bladzijde 7]
A dopoe a opo na pasi . . .
[Prenki na tapoe bladzijde 7]
. . . gi dienst foe Gado ini soifri-retifasi