Yu sa tan du san reti?
„Teleki mi dede, mi no sa tapu fu du san reti!”—YOB 27:5.
1, 2. San wi leki Kresten musu pruberi fu du? Na sortu aksi wi sa poti prakseri?
KON meki wi taki dati yu e luku na tapu papira fa yu wani bow na oso fu yu. Yu lobi a fasi fa na oso seti. A e gi yu prisiri te yu e prakseri fa na oso disi o bun gi yu nanga yu osofamiri. Ma yu sabi taki ala den sani disi sa de fu soso efu yu no e bow na oso, efu yu no e go tan na ini, èn efu yu no e ondrow en.
2 Kande wi feni tu taki a bun fu de wan sma di lobi fu du san reti, fu di dati sa tyari furu wini kon gi wi èn gi den sma di wi lobi. Ma aladi a bun fu denki so, toku dati no nofo. A de fanowdu tu taki wi leki Kresten e meki muiti fu du san reti, èn taki wi e tan du san reti. Na ini a ten disi, a diri fu bow wan oso (Luk. 14:28, 29). Na so a de tu taki a e teki ten nanga muiti fu tron wan sma di lobi fu du san reti. Ma a sani disi e tyari wini kon. Sobun, meki wi poti prakseri na dri aksi: Fa wi kan tron sma di lobi fu du san reti? Fa wi leki Kresten kan tan du san reti? San wan sma kan du efu fu wan pisi ten a no ben e du san reti?
Fa wi kan tron sma di lobi fu du san reti?
3, 4. (a) Na sortu fasi Yehovah e yepi wi fu de sma di lobi fu du san reti? (b) Fa wi kan tron sma di e du san reti, soleki fa na eksempre fu Yesus e sori dati?
3 Na ini a fosi artikel wi si taki Yehovah gi wi a grani fu bosroiti gi wisrefi efu wi sa de sma di e du san reti. Ma koloku taki a e yepi wi fu du dati. A e leri wi fa fu kon abi a moi fasi disi, èn a e gi wi bogobogo fu a santa yeye fu en, so taki wi kan du den sani di a e leri wi (Luk. 11:13). Boiti dati, te sma e meki muiti fu du san reti, dan Yehovah e kibri den so taki den no e lasi bribi.—Odo 2:7.
4 Fa Yehovah leri wi fu de sma di lobi fu du san reti? A moro prenspari fasi fa a du dati, na taki a seni en Manpikin, Yesus, kon na grontapu. Yesus ben gi yesi na Gado na ini ala sani. A „gi yesi te na dede” (Fil. 2:8). Yesus ben e gi yesi na en Tata ala ten, srefi te a ben muilek srefisrefi gi en fu du dati. A ben taigi Yehovah: „A no mi wani musu pasa, ma yu wani” (Luk. 22:42). A ben o bun te ibriwan fu wi ben o aksi ensrefi a sani disi: ’Mi na wan sma tu di lobi fu gi yesi na Gado?’ Te wi e du muiti fu gi yesi na Gado nanga wan krin ati, dan wi sa de sma di e du san reti. Luku wan tu situwâsi pe a de tumusi prenspari fu gi yesi na Gado.
5, 6. (a) Fa David ben sori taki a de prenspari fu du san reti srefi te wi de wi wawan? (b) Sortu tesi kan miti Kresten te den de den wawan?
5 Wi musu gi yesi tu na Yehovah te wi de wi wawan. A psalm skrifiman David ben sabi taki a ben de prenspari fu du san reti, na ten te a ben de en wawan. (Leisi Psalm 101:2.) Di David ben de kownu, dan a ben de makandra nanga tra sma doronomo. A no de fu taki dati furu leisi, hondrohondro, srefi dusundusun sma ben de na en lontu. (Luku Psalm 26:12.) Na den okasi dati, a ben de prenspari taki a ben e du san reti, fu di leki kownu, a ben musu de wan bun eksempre gi a pipel fu en (Deut. 17:18, 19). Ma David ben leri taki te a ben de en wawan, noso te a ben de ’na ini en oso’, dan a ben musu du tu san reti. Fa a de nanga wi?
6 Na Psalm 101:3, wi e leisi a sani disi di David ben taki: „Mi no sa luku nowan enkri soso sani.” Na ini a ten disi, furu okasi de fu luku soso sani, spesrutu te wi de wi wawan. Furu sma di man go tapu Internet, feni en muilek fu du san reti te den de den wawan. A kan pasa makriki taki den sma disi e bigin luku sani di no fiti, srefi fisti sekstori. Ma te wi e luku den sani dati, dan wi no e gi yesi na a Gado di ben meki David skrifi den wortu na ini Psalm 101:3. Te wi e luku fisti sekstori, dan a no de fu taki dati a sani dati sa tyari problema kon gi wi. Iya, a sani dati kan wiki den sekslostu fu wi, a kan pori wi konsensi, èn a kan pori wi trowlibi. Boiti dati, sma sa lasi lespeki gi wi.—Odo 4:23; 2 Kor. 7:1; 1 Tes. 4:3-5.
7. Sortu gronprakseri kan yepi yu fu tan du san reti te yu de yu wawan?
7 Te yu e luku en bun, dan noiti wan futuboi fu Gado de en wawan. Wi Tata e luku wi na wan lobi-ati fasi. (Leisi Psalm 11:4.) A no de fu taki dati Yehovah musu fu breiti te a e si taki yu e weigri fu du sani di no fiti! Na so yu e gi yesi na a warskow di Yesus ben gi na ini Mateyus 5:28. Awansi fa a no fa, abi a fasti bosroiti fu no luku sani di sa tesi yu fu du wan sani di no bun. No luku èn no leisi fisti sekstori, fu di a sani dati no fiti, èn a kan meki tu taki Gado no feni yu bun moro!
8, 9. (a) Sortu tesi ben miti Danièl nanga den mati fu en? (b) Fa yongu Kresten na ini a ten disi e meki Yehovah nanga den Kresten brada nanga sisa fu den prisiri?
8 Wan tra fasi fa wi kan du san reti, na te wi e gi yesi na Yehovah te wi de na mindri sma di no de na bribi. Prakseri Danièl nanga den dri mati fu en. Sma ben tyari den fo yonguwan disi go na ini katibo na Babilon. Drape den ben de na mindri sma di no ben sabi Yehovah srefisrefi. Den sma disi dwengi den fu nyan sani di den no ben mag nyan fu di a Wet fu Gado ben e taki dati. Den boi disi makriki ben kan denki taki a no ben o de wan ogri fu nyan den sani dati. Fu taki en leti, den papa nanga mama fu den, den owru man, nanga den priester, no ben man si san den ben e du. Ma suma ben o sabi dati? Yehovah srefi ben o sabi dati. Dati meki den teki a bosroiti fu no nyan den sani dati. Den gi yesi na Yehovah aladi sma ben e dwengi den, èn aladi sma ben kan kiri den.—Dan. 1:3-9.
9 Na heri grontapu, den yongu Kotoigi fu Yehovah e du a srefi. Iya, den e tan hori densrefi na den markitiki di Gado poti gi Kresten, èn den e kakafutu gi speri di e dwengi den fu du sani di no bun. Te unu leki yonguwan e weigri fu gebroiki drugs, fu du ogri nanga tranga, fu taki doti taki, fu du hurudu, noso tra sani di no fiti, dan unu e gi yesi na Yehovah. Na so unu e du san reti. A sani dati sa tyari blesi kon gi unu, èn Yehovah nanga den Kresten brada nanga sisa fu unu sa prisiri!—Ps. 110:3.
10. (a) Sortu fowtu denki meki taki son yonguwan tapu fu du san reti? (b) Te wi na sma di lobi fu du san reti, dan fa dati sa yepi wi fu wai pasi gi hurudu?
10 Efu yu na wan mansma, dan yu musu gi yesi tu na Yehovah te yu e handri nanga umasma. Wan umasma musu du a srefi te a e handri nanga wan mansma. Wi sabi taki Gado Wortu e krutu hurudu. Ma a kan pasa makriki taki wan sma di ben gwenti fu gi yesi na Gado e bigin du sani di no fiti. Fu eksempre, son yonguwan gebroiki den mofo fu prei nanga a syenpresi fu trawan. Trawan fu den e prei nanga a syenpresi fu makandra fu plisi den sekslostu fu den. Fu taki en leti, den yonguwan disi no e si den sani dati leki seryusu sondu, fu di den feni taki den no abi seks trutru. Den yonguwan disi e frigiti, noso kande den no wani sabi, taki a wortu di Bijbel e gebroiki gi hurudu, abi fu du nanga ala den tori disi. Èn te sma e du den sortu sani disi, dan den brada kan puru den na ini a gemeente.a Ma san moro ogri, na taki den yonguwan disi no feni en prenspari fu du san reti. Fu di wi e meki muiti fu du san reti, meki wi no e suku reide fu tyari wisrefi na wan fasi di no fiti. Wi no e luku o fara wi man go sondro fu kisi strafu. Wi no e luku nomo sortu trangaleri wi ben kan kisi te wi du wan sani di no bun. Na presi fu dati, wi e meki muiti fu du san Yehovah feni bun, iya, wi e wai pasi gi sani di sa hati den firi fu en. Wi no e luku o fara wi kan go sondro fu kisi strafu gi den sondu fu wi, ma na presi fu dati, wi e wai pasi gi sondu, èn wi e „lowe gi hurudu” (1 Kor. 6:18). Na so wi e sori taki wi na sma di lobi fu du san reti.
Fa wi kan tan du san reti?
11. Fu san ede a de prenspari fu gi yesi na Gado ibri leisi? Gi wan eksempre.
11 Wan sani di e yepi wi fu tan du san reti, na te wi abi a gwenti fu gi yesi na Gado. Te wi e gi yesi wán leisi, dan wi ben kan si dati leki wan pikin sani. Ma te a e kon tron wan gwenti gi wi fu gi yesi na Gado, dan wi e tron sma di lobi fu du san reti. Luku na eksempre disi: Wán ston nomo no prenspari, ma efu wi e teki ten fu mesre furu ston kon na wán, dan wi kan bow wan moi oso. Sobun, te wi e tan gi yesi na Gado, dan na so wi e tan du san reti.—Luk. 16:10.
12. Fa David tan du san reti di sma no ben e handri bun nanga en?
12 Wan prenspari okasi fu sori taki wi na sma di lobi fu du san reti, na te wi e horidoro te wi abi problema, te sma e du ogri nanga wi, noso te sma no e handri bun nanga wi. Luku san Bijbel e taki fu na eksempre fu David. Di David ben de wan yonkuman, dan wan kownu di ben e teki presi gi Yehovah, ben e frufolgu en. Ma Kownu Saul ben lasi a bun-ati fu Yehovah, èn a ben dyarusu srefisrefi tapu David, a man di Gado ben feni bun. Toku Saul tan kownu fu wan pisi ten, èn a meki a legre fu Israel onti David. Yehovah meki a situwâsi disi tan wan tu yari langa. David ben atibron nanga Gado? A ben feni taki na fu soso a ben e horidoro? Nôno. Na presi fu dati, a tan sori bigi lespeki gi Saul di ben de a salfuwan fu Gado. Èn di wan okasi ben de fu kiri Saul, dan a weigri fu pai ogri nanga ogri.—1 Sam. 24:2-7.
13. Fa wi kan tan du san reti te wan sma hati den firi fu wi?
13 Wi kan leri furu fu na eksempre fu David! Wi na memre fu a Kresten gemeente na heri grontapu, èn wi alamala abi swakifasi. A ben kan pasa taki wan fu den Kresten brada noso sisa fu wi e du wan ogri nanga wi. Kande wan fu den e gowe libi a tru anbegi srefi. A no de fu taki dati wi abi a grani fu libi na ini wan ten pe noti kan pori na organisâsi fu Yehovah (Yes. 54:17). Ma san wi o du te wan sma du wan fruferi sani nanga wi, noso te a hati den firi fu wi? Efu wi e kisi bita-ati gi wi Kresten brada noso sisa, dan dati kan meki taki wi du wan sani di Gado no feni bun. Noiti wi musu kisi bita-ati gi Gado, soso fu di trawan e du sani di no fiti, èn noiti den sani dati musu meki wi tapu fu du san reti (Ps. 119:165). Te wi e horidoro awinsi wi e kisi tesi, dan dati sa yepi wi fu tan du san reti.
14. San sma di lobi fu du san reti e du te kenki kon na ini na organisâsi, noso na ini den sani di den e leri?
14 Wan tra fasi fa wi kan tan du san reti, na te wi no e suku fowtu na trawan, noso te wi no e krutu trawan. Dati wani taki dati wi musu tan gi yesi na Yehovah. Na ini a ten disi, Gado e blesi a pipel fu en moro leki iniwan ten bifo. Noiti ete sani ben e waka so bun nanga a tru anbegi, leki fa a de now (Yes. 2:2-4). Te na organisâsi e tyari wan tu kenki kon na ini a fasi fa den e fruklari son bijbeltekst, noso na ini a fasi fa den e du sani, dan a bun te wi e agri nanga den kenki dati. Wi breiti fu si taki a leti e skèin krin moro nanga moro (Odo 4:18). Efu a muilek gi wi fu agri nanga wan kenki di kon, dan a bun fu aksi Yehovah fu yepi wi fu frustan a tori dati. Na a srefi ten, wi e tan gi yesi na Gado, èn na so, wi e tan du san reti.
Fa a de te wan sma e tapu fu du san reti?
15. Suma na a wan-enkri sma di kan tapu yu fu du san reti?
15 Dati na wan moi aksi, a no so? Soleki fa wi si na ini a fosi artikel, dan a de prenspari trutru taki wi e tan du san reti. Te wi no e du san reti, dan wi no o man de mati fu Yehovah, èn wi sa de sondro howpu. Hori a sani disi na prakseri: Wán sma nomo de di kan tapu yu fu du san reti. A sma dati na yu. Yob ben frustan dati heri bun. A ben taki: „Teleki mi dede, mi no sa tapu fu du san reti!” (Yob 27:5) Efu yu bosroiti fu du a srefi, èn efu yu e tan krosibei na Yehovah, dan dati sa yepi yu fu tan du san reti.—Yak. 4:8.
16, 17. (a) Efu wan sma du seryusu sondu, dan san a no musu du? (b) San na a yoisti sani fu du?
16 Toku son sma no e tan du san reti. Neleki fa a ben de di den apostel ben de na libi ete, na so son sma e du seryusu sondu na ini a ten disi. Efu dati pasa nanga yu, dan dati wani taki dati howpu no de gi yu? A no abi fu de so. San yu kan du? Meki wi luku fosi sortu sani yu no musu du. Nofo tron te sma e du wan sondu, dan den e prakseri fu kibri dati gi a papa nanga mama fu den, gi tra Kresten, noso gi den owruman. Ma Bijbel e gi wi a rai disi: „Sani no sa waka bun gi a sma di e kibri den sondu fu en, ma a sma di e taki fu den èn e libi den, Gado sa abi sari-ati gi en” (Odo 28:13). Den sma di e pruberi fu kibri den sondu fu den e meki wan bigi fowtu, fu di wi no kan kibri sani gi Gado. (Leisi Hebrewsma 4:13.) Son sma e pruberi srefi fu libi wan dobru libi, èn den e du neleki den e dini Yehovah, aladi den e du sondu. Den sma disi no abi a gwenti fu du san reti. Te den anbegiman fu Yehovah e kibri seryusu sondu gi en, dan A no sa feni na anbegi fu den bun. Fu taki en leti, Yehovah e atibron nanga sma di e hoigri so.—Odo 21:27; Yes. 1:11-16.
17 Te wan Kresten e du wan seryusu sondu, dan Bijbel e sori krin san na a yoisti sani fu du. A musu suku yepi na den Kresten owruman. Yehovah poti den owruman fu yepi den wan di kon swaki srefisrefi. (Leisi Yakobus 5:14.) Tan meki muiti fu kon krosibei baka na Gado. No weigri fu du dati, soso fu di yu frede taki yu o kisi trangaleri noso piri-ai. Kon meki wi taki dati wan sma abi wan takru siki. Efu a sma disi koni, dan yu denki taki a ben o weigri fu suku datrayepi, soso fu di a frede fu kisi spoiti, noso fu du wan oparâsi? Kwetikweti!—Hebr. 12:11.
18, 19. (a) Fa na eksempre fu David e sori taki wi kan kisi a gwenti baka fu du san reti? (b) Sortu bosroiti yu sa teki?
18 Wan sma di du wan seryusu sondu kan kon krosibei baka na Gado? Meki wi luku na eksempre fu David ete wan leisi. David ben du wan seryusu sondu. Fu di a ben e tan luku a wefi fu wan tra man, meki a kisi sekslostu gi na uma disi, èn te fu kaba a du sutadu nanga en. Bakaten, a seti sani na so wan fasi taki sma kiri a masra fu na uma disi. Te wi e luku fa David tyari ensrefi na a ten dati, dan a muilek fu bribi taki a ben de wan sma di ben lobi fu du san reti. Ma dati ben wani taki dati howpu no ben de gi David? David ben musu kisi trangaleri, èn na dati a kisi tu. Èn fu di a ben sori trutru berow, meki Yehovah gi en pardon. David ben teki a trangaleri dati, èn a bigin gi yesi baka na Gado na ini ala sani. Na so a tron wan sma baka di ben lobi fu du san reti. A libi fu David e kruderi nanga a sani disi di wi e leisi na Odo 24:16: „A regtfardikiwan kan fadon seibi tron srefi, èn seiker a sa opo tanapu; ma rampu sa meki den ogrisma naki futu fadon.” San ben de a bakapisi? Luku san Yehovah taigi Salomo baka di David dede. (Leisi 1 Kownu 9:4.) Te wan sma di du wan seryusu sondu e sori berow, dan Yehovah trutru kan wasi den sondu dati puru.—Yes. 1:18.
19 Iya, te yu e gi yesi na Gado fu di yu lobi en, dan dati sa yepi yu fu tan du san reti. Tan horidoro nanga yu heri ati, èn te yu du wan seryusu sondu, dan sori taki yu abi trutru berow. A de prenspari trutru fu du san reti! Meki ibriwan fu wi abi a srefi bosroiti leki David di ben taki: „Mi fu mi sei, sa tan du san reti.”—Ps. 26:11.
[Futuwortu]
a A sani disi abi fu du tu nanga seks di sma abi nanga den bakasei. Fu kon sabi san a Griki wortu gi hurudu wani taki, dan luku A Waktitoren fu 15 februari 2004, bladzijde 13, paragraaf 15.
San yu ben sa piki?
• Fa yu kan tron wan sma di lobi fu du san reti?
• Na sortu fasi yu kan tan du san reti?
• Fa wan sma kan kisi a gwenti baka fu du san reti?
[Faki na tapu bladzijde 8]
’A DU MI WAN BIGI BUN’
Na dati wan uma di ben de nanga bere feifi mun, ben taki fu wan sma di a no ben sabi. A sma dati ben sori switifasi gi en, èn a ben du san reti. Na uma disi ben de na ini wan pikin nyanyan-wenkri, èn wan tu yuru baka di a komoto na ini a wenkri, a kisi ensrefi taki a ben frigiti en portmoni drape. A ben abi 2000 Amerkan dala na ini a portmoni fu en, èn a no ben gwenti waka nanga so furu moni. „Mi ben e sari srefisrefi”, na so na uma disi ben taigi wan koranti bakaten. Ma wan yongu uma feni a portmoni, èn wantewante a bigin suku a sma di abi a portmoni. Di a no ben man feni a sma, dan a tyari a portmoni go gi den skowtu, èn den skowtu kon feni na uma di ben de nanga bere. Na uma disi ben de nanga tangi, èn a taki: „A du mi wan bigi bun trutru.” Fu san ede a yongu uma du so furu muiti fu feni a sma di ben abi a moni? Soleki fa a koranti sori, dan na uma disi taki dati en na wan Yehovah Kotoigi, „èn na fu di a kweki na ini a bribi dati, meki a handri na wan reti fasi”.
[Prenki na tapu bladzijde 9]
Yonguwan kan tan du san reti te tesi e miti den
[Prenki na tapu bladzijde 10]
Fu wan pisi ten, David no ben e du san reti, ma a kisi ensrefi baka