Tai hori na Gado!

1. Fa den dri Yehovah Kotoigi di kari na ini a paragraaf gi yesi na Yehovah?

MEKI wi luku dri situwâsi di kan miti Yehovah Kotoigi: (1) Wan yongu sisa de na skoro. A jufrow e taigi den pikin fu a klas taki den o hori wan fesa èn a wani taki ala den pikin musu de na a fesa. Ma a sisa sabi taki Gado no feni a fesa disi bun fu di a abi fu du nanga falsi bribi. Dati meki a e taigi a jufrow na wan lespeki fasi taki a no o man de na a fesa. (2) Wan yongu brada di e syensyen e preiki oso fu oso. A sabi taki wan boi fu en klas e tan na a oso pe den o go now. A boi disi lobi spotu Yehovah Kotoigi. Ma toku a yongu brada e go na a oso èn a e naki na tapu a doro. (3) Wan brada e wroko tranga fu sorgu en osofamiri. Ma wan dei en basi e aksi en fu du wan kruka sani. A brada sabi taki a kan lasi en wroko efu a no du san en basi taki. Toku a e fruteri en basi taki a wani de eerlijk èn taki a wani gi yesi na den wet fu a kondre fu di na dati Gado e aksi fu den anbegiman fu en.​—Rom. 13:1-4; Hebr. 13:18.

2. Sortu aksi wi o luku èn fu san ede?

² San ala den dri Kotoigi disi du? Kande yu si taki den ben abi deki-ati èn taki den ben de eerlijk. Ma den du wan tra sani di prenspari srefisrefi. Den tai hori na Yehovah. Nowan fu den ben wani trangayesi Gado. A no de fu taki dati Yehovah breiti te anbegiman fu en e tai hori na en na a fasi disi. Wi wani taki wi Papa na hemel breiti nanga wi tu. Dati meki wi o poti prakseri na den aksi disi: San a wani taki fu tai hori na Yehovah? Fu san ede wi musu du disi? San o yepi wi fu tai hori na Yehovah na ini den muilek ten disi?

SAN A WANI TAKI FU TAI HORI NA YEHOVAH?

3. (a) San a wani taki fu tai hori na Yehovah? (b) Sortu eksempre kan yepi wi fu frustan san a wani taki fu tai hori na Yehovah?

³ Fa wan anbegiman fu Yehovah kan tai hori na en? A kan du dati te a lobi Yehovah nanga en heri ati. A lobi disi e meki taki ala ten a wani du sani di Yehovah feni bun. Meki wi go luku wan eksempre di e sori taki a prenspari gi Yehovah taki wi lobi en nanga wi heri ati. Den Israelsma ben e tyari meti leki ofrandi gi Yehovah èn a wet ben taki dati den meti disi ben musu de gosontu, èn taki den no ben musu abi nowan mankeri. A heri meti ben musu bun (Lef. 22:21, 22). A pipel no ben mag tyari wan meti leki ofrandi efu a ben mankeri wan futu, wan yesi, noso wan ai. A meti disi no ben musu siki tu. Yehovah ben feni en prenspari taki a meti no ben musu mankeri noti (Mal. 1:6-9). Wi kan frustan fu san ede Yehovah feni a sani disi prenspari. Te wi e bai wan froktu, wan buku, noso wan tra sani, dan wi no wani taki a abi olo noso taki a e mankeri wan sani. Wi wani taki a heri sani musu bun. Na so a de tu taki Yehovah wani taki wi musu lobi en nanga wi heri ati.

4. (a) Fu san ede sondusma man tai hori na Yehovah? (b) Soleki fa Psalm 103:12-14 e sori, dan san Yehovah e fruwakti fu wi?

⁴ A de so taki sondusma man tai hori na Yehovah? Kande wi feni taki wi e meki furu fowtu. Luku tu reide fu san ede wi no musu denki taki wi leki sondusma no man tai hori na Yehovah. A fosi sani na taki Yehovah no e luku soso den fowtu fu wi. Bijbel e taki: „Ke Yah, Yehovah, efu na fowtu yu ben e luku, dan suma ben o man tanapu na yu fesi?” (Ps. 130:3) A sabi taki wi abi sondu èn a de klariklari fu gi wi pardon (Ps. 86:5). A di fu tu sani na taki Yehovah sabi san wi man du èn san wi no man du. A no e fruwakti taki wi e du sani di wi no man du. (Leisi Psalm 103:12-14.) Ma fa wi kan tai hori na Yehovah aladi wi na sondusma?

5. Fa lobi kan yepi futuboi fu Yehovah fu tai hori na en?

⁵ Efu futuboi fu Yehovah wani tai hori na en, dan a prenspari taki den musu lobi en. Wi musu lobi Yehovah nanga wi heri ati èn wi musu gi yesi na wi hemel Papa ala ten. Efu wi e tan lobi Yehovah awinsi wi e kisi tesi, dan wi o tai hori na en (1 Kron. 28:9; Mat. 22:37). Luku na eksempre baka fu den dri Kotoigi di kari na a bigin. Fu san ede den du san den du? Na lobi a yongu sisa no lobi fesa? Na wani a yongu brada wani sma gi en syen? Na lasi a brada wani lasi en wroko? Nôno. Den sabi taki Yehovah abi wet èn den wani du san den hemel Papa feni bun. Fu di den lobi en meki den e prakseri fosi san a wani, fosi den teki wan bosroiti. Na so den e tai hori na Yehovah.

FU SAN EDE WI MUSU TAI HORI NA YEHOVAH?

6. (a) Fu san ede wi musu tai hori na Yehovah? (b) Fu san ede Adam nanga Eva no tai hori na Yehovah?

⁶ Fu san ede a prenspari taki wi alamala tai hori na Yehovah? Fu di Satan lei gi Yehovah èn a lei gi yu tu. Na engel dati di opo ensrefi teige Gado meki ensrefi tron Satan noso „Gensman” na ini a dyari fu Eden. A pori Yehovah nen fu di a taki dati Gado na wan ogri-ati Tiriman, taki a e denki ensrefi nomo èn taki a no eerlijk. A sari taki Adam nanga Eva teki a sei fu Satan èn den opo densrefi teige Yehovah tu (Gen. 3:1-6). Furu sani di den ben abi na ini Eden, ben kan meki taki den kon kisi moro lobi gi Yehovah. Ma di Satan tesi den, den no ben lobi Yehovah nanga den heri ati. Bakaten na aksi disi ben musu kisi piki: Libisma ben o gi yesi na Yehovah Gado fu di den lobi en? Sobun, libisma man tai hori na Yehovah? Na aksi dati ben opo kon na ini a ten fu Yob.

7. Te yu luku Yob 1:8-11, dan fa Yehovah ben feni en taki Yob ben e tai hori na en? Fa Satan ben denki fu a tori?

⁷ Yob ben e libi na a ten di den Israelsma ben de na ini Egepte. Di a ben de na libi, nowan tra libisma ben e gi yesi na Yehovah neleki en. Neleki wi, Yob ben abi sondu. A ben meki fowtu. Ma Yehovah ben lobi Yob fu di a ben e tai hori na en. Soleki fa a sori, dan Satan ben spotu Yehovah kaba taki libisma no o tai hori na en. Dati meki Yehovah taigi Satan fu poti prakseri na Yob. A fasi fa Yob ben e libi, ben sori taki Satan na wan leiman! Satan ben de nomonomo taki Yehovah ben musu tesi Yob fu luku efu a ben o tai hori na en trutru te a ben o kisi problema. Yehovah ben frutrow en mati Yob èn dati meki a gi pasi taki Satan tesi en.​—Leisi Yob 1:8-11.

8. San Satan du nanga Yob?

⁸ Satan ogri èn en na wan kiriman. A meki Yob lasi ala den gudu fu en, a kiri den futuboi fu en èn a meki sma lasi lespeki gi en. A kiri den tin pikin fu Yob. Baka dati a meki Yob kisi wan takru siki di ben gi en furu skin-ati. Fu en ede te na en ondrofutu Yob ben lai butsweri. Fu di a wefi fu Yob ben bruya èn lasi-ati, meki a taigi en masra fu gi abra, fu fluku Gado èn fu dede. Yob ben winsi taki a ben kan dede, ma toku a tai hori na Yehovah. Dan Satan pruberi wan tra sani. A gebroiki dri mati fu Yob. Den man disi go luku Yob èn den tan nanga en wan tu dei langa. Ma den no trowstu en. Na presi fu dati, den krutu en èn den taigi en wan lo hati sani. Den taigi en taki na Gado tyari ala den problema disi kon na en tapu èn taki Gado no e span efu Yob e gi yesi na en noso efu a no e du dati. Den taki dati na fu di Yob ben du ogri, meki ala den sani disi miti en!​—Yob 1:13-22; 2:7-11; 15:4, 5; 22:3-6; 25:4-6.

9. Aladi Yob kisi so furu tesi, toku san a no du?

⁹ San Yob du di ala den sani disi miti en? A ben de wan sondusma. Dati meki en ati ben bron nanga den dri mati fu en di no ben trowstu en. En srefi taki dati a ben e taki wan tu dondon sani. A ben e feti fu sori taki en na wan reti-ati sma, na presi fu poti prakseri na a retidu fu Yehovah (Yob 6:3; 13:4, 5; 32:2; 34:5). Ma awinsi fa a situwâsi fu Yob ben hebi, noiti a drai baka gi Yehovah Gado. A no ben wani bribi den lei fu den dri mati fu en. A taki: „Mi no man taki noiti dati unu na reti-ati sma! Mi o tai hori na Gado teleki mi hari mi lasti bro!” (Yob 27:5) Den wortu disi e sori taki awinsi san ben miti Yob, noiti a prakseri fu drai baka gi Yehovah. Yob horidoro èn wi kan du dati tu.

10. San a sani di Satan taki fu Yob, abi fu du nanga yu?

¹⁰ A srefi sani di Satan taki fu Yob, a taki fu wi tu. A feni taki wi no lobi Yehovah Gado trutru. A taki dati yu o tapu fu dini Gado soso fu no lasi yu libi èn taki yu no o tai hori na Yehovah! (Yob 2:4, 5; Openb. 12:10) Fa disi e meki yu firi? A e hati yu, a no so? Ma denki a tori disi: Yehovah abi so furu frutrow na yu tapu, taki a e gi yu na okasi fu sori taki Satan na wan leiman. Yehovah gi Satan pasi fu tesi yu. Yehovah sabi taki yu man tai hori na en èn taki yu kan sori tu taki Satan na wan leiman. A pramisi tu taki a o yepi yu (Hebr. 13:6). A de wan bigi grani taki a Moro Hei Tiriman fu hemel nanga grontapu e frutrow yu! Yu e si now fu san ede a prenspari fu tai hori na en? Disi e gi wi na okasi fu sori taki Satan e lei, fu krin Yehovah nen èn fu horibaka gi a tiri fu en. San o yepi wi fu tai hori na Gado?

FA WI KAN TAI HORI NA YEHOVAH NA INI A TEN DISI?

11. San wi kan leri fu Yob?

¹¹ Na ini den „lasti dei” disi Satan e meki moro muiti fu tesi Gado pipel (2 Tim. 3:1). San o yepi wi fu tai hori na Yehovah na ini a muilek ten disi? Wi kan leri furu fu Yob. Langa ten fosi a kisi den hebi tesi, a ben e gi yesi na Yehovah kaba. Meki wi luku dri sani di yepi Yob fu tai hori na Yehovah.

12. (a) San yepi Yob fu kon abi bigi lespeki gi Yehovah soleki fa skrifi na Yob 26:7, 8, 14? (b) San o yepi wi fu kon abi bigi lespeki gi Gado?

¹² A bigi lespeki di Yob ben abi gi Yehovah, meki taki a kisi moro lobi gi en. Yob ben e meki ten fu prakseri den moi sani di Yehovah meki. (Leisi Yob 26:7, 8, 14.) A naki en ati di a ben prakseri fa Gado meki grontapu, hemel, den wolku nanga dondru. Toku a ben frustan taki a no ben sabi furu fu den sani di Yehovah meki. Yob ben lobi den wet fu Yehovah tu. A ben taki: „Mi du moro leki san a aksi fu mi” (Yob 23:12). Yob ben lobi den sani di Yehovah du èn a ben abi bigi lespeki gi en. A ben lobi en Papa èn a ben wani plisi en. A sani disi meki taki Yob du ala san a man fu tai hori na Yehovah. Wi musu de leki Yob. Na ini a ten disi wi sabi moro fu den moi sani di Yehovah meki, leki den sma na ini a ten fu Yob. Wi abi a heri Bijbel tu di kan yepi wi fu kon sabi Yehovah moro bun. Ala den sani di wi e leri kan meki wi kisi bigi lespeki gi Gado. Te wi abi lespeki gi Yehovah, dan wi o lobi en, wi o gi yesi na en èn wi o du ala san wi man fu tai hori na en.​—Yob 28:28.

13-14. (a) Te wi luku Yob 31:1, dan fa Yob gi yesi na Gado? (b) Fa wi kan teki na eksempre fu Yob?

¹³ Fu di Yob ben pruberi fu gi yesi na Yehovah na ini ala sani, meki a ben man tai hori na Yehovah. Yob ben sabi taki efu a ben wani tai hori na Yehovah, a ben musu gi yesi na en. Fu taki en leti, ibri leisi te wi e gi yesi na Yehovah, wi o kisi moro krakti fu tai hori na en. Yob ben e meki tranga muiti fu gi yesi na Gado ala dei. Fu eksempre, a ben luku bun fa a ben e tyari ensrefi te a ben de nanga umasma. (Leisi Yob 31:1.) Leki wan man di trow, a ben sabi taki a no ben fiti fu sori lobifiri gi wan tra umasma. Na ini a grontapu disi, na ala sei yu kan si sani di e wiki seksfiri. Wi o de leki Yob? Wi o weigri fu sori lobifiri gi wan sma di no de wi trowpatna? Wi o weigri fu luku porno? (Mat. 5:28) Efu wi e meki muiti ala dei fu dwengi wisrefi, dan dati o yepi wi fu tai hori na Yehovah.

¹⁴ Yob ben e si gudu neleki fa Yehovah ben e si dati. Yob ben sabi taki efu a ben o frutrow na tapu den gudu fu en, dan dati ben o de so wan bigi ogri, taki a ben o abi fu kisi strafu (Yob 31:24, 25, 28). Na ini a ten disi sma e feti baka gudu. Te wi e gi yesi na den rai fu Bijbel, dan wi o abi a yoisti denki fu moni nanga gudu. Dati o yepi wi fu tai hori na Yehovah.​—Odo 30:8, 9; Mat. 6:19-21.

15. (a) San yepi Yob fu horidoro? (b) Fu san ede a bun fu prakseri den blesi di Yehovah o gi wi?

¹⁵ Yob ben man tai hori na Yehovah fu di a ben poti prakseri na den blesi di Gado ben o gi en. Yob ben sabi taki Gado ben o breiti efu a ben o tan gi yesi na en (Yob 31:6). Awinsi sortu tesi Yob ben e kisi, a ben sabi taki Yehovah ben o blesi en efu a ben o horidoro. Disi yepi en fu no drai baka gi Yehovah. Yehovah ben breiti so te nanga Yob, taki a gi en furu blesi aladi a ben de wan sondusma ete! (Yob 42:12-17; Yak. 5:11) Èn Yob o kisi moro blesi na ini a ten di e kon. Yu abi a tranga bribi taki Yehovah o blesi yu efu yu tai hori na en? Wi Gado no kenki (Mal. 3:6). Efu wi e hori na prakseri taki Yehovah breiti nanga den wan di e tai hori na en, dan wi o meki muiti fu gi yesi na en èn wi o de seiker taki a o blesi wi na ini a ten di e kon.​—1 Tes. 5:8, 9.

16. Sortu bosroiti wi musu teki?

¹⁶ Sobun, tai hori na Yehovah awinsi san e pasa! Kande son leisi yu o firi leki na yu wawan e du disi, ma dati no de so. Yu na wan fu den milyunmilyun sma na heri grontapu di abi bribi èn di e tai hori na Yehovah. Yu o de leki den man nanga uma fu owruten di ben abi bribi èn di tai hori na Yehovah awinsi den ben kan lasi den libi (Hebr. 11:36-38; 12:1). Meki wi alamala teki a bosroiti fu du san Yob taki: „Mi o tai hori na Gado.” Te wi e du disi, dan Yehovah o kisi glori fu têgo!