Prisiri Jehovah ati foe di joe e kibri joe soifri-retifasi
’Efoe wi e libi, efoe wi e dede, wi de foe Jehovah.’ — ROMEINI 14:8.
1, 2. (a) Foe san-ede Jehovah Kotoigi ben teki na faste bosroiti foe kibri den soifri-retifasi na fesi foe Gado? (b) Ma sortoe aksi e kon na fesi?
FA DEN wortoe foe na apostel Paulus e tjari boen kon a firi foe den wan enkri sma di e kibri troetroe den soifri-retifasi na ini na di foe twenti jarhondro disi! Fa wi sa prisiri efoe wi sa abi na grani foe tan a libi èn foe si nanga wi égi ai dati na disiten goddelowsoe seti fadon broko! Ma efoe wi moe dede na ini a dienst foe Gado dan meki a de so. Ini ala toe geval wi abi na faste bosroiti foe de loyaal kotoigi foe wi Gado, Jehovah. Wi sa tan kibri wi soifri-retifasi na en fesi. Foe san-ede? Foe di efoe wi e libi, efoe wi e dede, wi de troetroe foe Jehovah!
2 Ma san wani taki soifri-retifasi? San a e aksi foe wi? Èn a e meki wan difrenti troetroe na Gado ofoe wi kibri wi soifri-retifasi ofoe no?
Soifri-retifasi èn san a e aksi foe wi
3. San a wani taki foe kibri wi soifri-retifasi akroederi na bijbel?
3 Na ini a Wortoe foe Gado dan soifri-retifasi e sori na tapoe moreel soifrifasi èn wan sani di boen dorodoro, èn di de sondro fowtoe. Soifri-retifasi wani taki sondro foe seki èn foe tan hori na regtvaardikifasi èn a e aksi foe troe wan gi di wan sma e gi ensrefi na a dini foe wan tra sma — a dini foe Jehovah Gado — sondro foe broko disi. Ija, na kibri foe soifri-retifasi wani taki foe tan doe na soeverein wani foe Jehovah.
4. Soema ben de na fosiwan di ben broko en soifri-retifasi, èn a ben tjari na fosi libismapaar go foe doe san?
4 Na fosiwan di ben broko en soifri-retifasi ben de na jeje mekisani di ben tjari na fosi libisma paar go so fara foe opo densrefi tége Gado. Adam nanga Eva ben de ini na okasi foe sori den soifri-retifasi na Gado foe di den ben o respeki den skotoe di Gado ben poti gi den ini a tori foe na bon foe sabi. Ma di na gensman ben poti den na ondro druk foe di a wroko a tapoe na gridifasi foe den, den ben broko kindi èn ben tranga jesi. Na ati foe den ben sori taki a no ben ori tranga sondro fowtoe na den wet foe Jehovah èn den no ben hori den soifri-retifasi na fesi foe en. — Psalm 119:1, 80.
5. Sortoe stré aksi ben kon a fesi nanga na opo di Satan ben opo ensrefi tége Gado, èn fa disi e kon na krin na ini den ondrofeni foe na opregti man Job?
5 Nanga na oproeroe foe Satan meki na stré-aksi ben tjari kon na fesi di abi foe doe nanga na retifasi foe na soevereiniteit foe Gado tapoe ala èn mekisani èn a reti foe Jehovah foe aksi foe gi en jesi dorodoro èn na ini ala sani. Na afersi foe na soifri retifasi foe libisma na a soeverein wani foe Gado ben tron na a fasi disi wan prenspari pisi foe na stré-aksi di abi foe doe nanga a universele soevereiniteit. Na bewijsi foe dati wi e si na ini a geval foe na dienstknegti foe Jehovah Job, wan man di ben de sondro fowtoe, opregti èn ben e frede Gado (Job 1:1). Job no ben drifi komoto foe a joisti pasi foe Gado. Seks hoeroedoe no ben abi krakti na tapoe en. A no ben de noiti onregtvaardiki na ini a hori foe kroetoe ofoe no ben lobi foe gi sani na weduwe, pikin di no ben abi papa ofoe pôti sma. Na presi dati Job ben poti en fertrow na ini goedoe na skinfasi, a ben poti en fertrow sondro wan kondisi na tapoe na moro Héwan (Job 31:7-40). Tokoe Didibri ben taki dati Job ben e dini Gado foe gridifasi ede. Aladi Jehovah ben gi Satan pasi foe poeroe na Job anoe en goedoe èn srefi en pikin, tokoe na basi bedrigiman no ben man foe broko na soifri-retifasi foe na opregti man dati. Srefi wan takroe siki èn a feni foe fowtoe di e broko wan sma saka foe na sé foe falsi trowstoeman no ben abi winimarki, bika Job ben sori taki a ben de wan sma di kibri en soifri retifasi. — Job 1:6-2:13; 27:5, 6; 31:6; 42:8, 9.
6. San den e aksi foe sma di ’de foe Jehovah’?
6 Soboen, sma abi na bigi grani foe abi wan prati na a santa foe a nen foe Gado? Foe di den e kibri den soifri-retifasi èn sori dati den e hori baka loyaal gi Jehovah universele soevereiniteit. San den e aksi foe dat’ede foe den sma di ’de foe Jehovah’? Wi moe gi wisrefi krinkrin na ini a dini foe Gado èn noiti fergiti dati Jehovah ’de wan Gado di e aksi foe wi gi wisrefi ini a dini foe en wawan’. — Exodus 20:5.
Wi kan prisiri Jehovah ati
7, 8. (a) Fa wi kan hori wi soifri retifasi na fesi foe Gado, aladi wi de onvolmaakti? (b) Efoe wi de sma di e kibri den soifri-retifasi fa wi kan poti Odo 27:9 na ini wi libi?
7 Foe di wi alamala de onvolmaakti, meki wi no kan hori na wan volmaaktifasi na den regtvaardiki markitiki foe Gado. Na kibri foe wi soifri-retifasi no wani taki ooktoe dati wi de volmaakti na ini wi waka nanga wi libi ofoe wi taki. A wani taki moro foeroe foe gi wisrefi krinkrin na ini a dini foe Gado komoto foe wi heri ati. Foe dat’ede meki David, aladi a ben doe bigi sondoe, tokoe ’ben waka nanga soifri-retifasi foe ati’ (1 Kownoe 9:4). Foe di a ben teki pir’ai, meki a ben tjari wan kenki kon ini en fasi èn ben bewijsi nanga dati taki en ati ben foeroe nanga troetroe lobi gi Jehovah (Psalm 26:1-12). Ooktoe wi kan sori sowan lobi èn ’waka akroederi na soifri-retifasi foe wi ati’. — Psalm 78:72.
8 Wi kan kibri wi soifri-retifasi foe di wi abi wan krakti bribi na ini Jehovah Gado èn sondro kondisi e fortrow tapoe en nanga tapoe en Manpikin foe ferloesoe wi (Psalm 25:21; 41:12). A no de wan sani foe kibri wi soifri retifasi, bika Satan na Didibri — a moro bigi féanti foe Jehovah nanga foe wi — e breni na jeje foe den sma di no e bribi èn ’e kori a heri grontapoe pe libisma e libi’ (Openbaring 12:9; 2 Korinte 4:4). Ma netleki Job na so wi kan de sma di e kibri wi soifri-retifasi. Awinsi wi de onvolmaakti, tapoe a fasi dati wi kan prisiri na ati foe wi Gado di foeroe nanga lobi. Odo 27:1 e tjari en kon na a fasi disi ondro wortoe: „Sori taki joe koni, mi manpikin, èn prisiri mi ati, sodati mi kan gi wan piki na a sma di e spotoe mi.” Kolokoe dati wi, leki loyaal dienstknegti foe Jehovah kan gi en wan boen piki foe gi na gensman di e spotoe en. Soboen a abi trobi ofoe wi e kibri wi soifri-retifasi ofoe no. Leki sma di e kibri den soifri-retifasi wi kan prisiri Jehovah ati. Èn fa disi e gi wi bigi prisiri!
Wan langa lin foe sma di ben kibri den soifri-retifasi
9. Soema de a mindri na bigi „wolkoe” foe Jehovah di ben kibri den soifri-retifasi, èn sortoe tesi den ben ferdrage tapoe den soifri-retifasi foe den?
9 Te joe loekoe en boen dan Jehovah Kotoigi ini a ten disi de wan pisi foe wan langa lin foe sma di ben kibri den soifri-retifasi. Na langa lin disi e go baka te na a getrow Abel, èn a abi na ini en den sortoe man nanga oema leki Abel, Henoch, Noach, Abraham, Sara, Isaäk, Jakob, Jozef, Mozes, Rachab, Gideon Barak Simson, Jefta, David, èn Samuël. A de krin dati a den sma di ben hori den soifri-retifasi leki Sadrach, Mesach, nanga Abednego, di ben wégri foe anbegi na popki di a kownoe foe Babylon, Nebukadnezar, ben opo èn di den ben trowe go na ini wan boen hati onfoe, den bedoel nanga den sma di „ben tapoe na krakti foe na faja”. Tra kotoigi foe Jehovah bifo a ten foe Kristus, ’den ben spotoe den, den ben naki den, den ben trowe den go ini doengroe-oso, den ben iti ston a den tapoe, den ben tesi den, den ben sa den na ini pispisi, èn den ben srakti den nanga fet’owroe; den ben waka lontoe na ini skapoe boeba; na ini krabitaskin, aladi den ben ondrofeni benawtoe èn den ben behandel den takroe’. Wi e agri séker nanga Paulus di ben taki: „Grontapoe no ben warti gi den.” Fa a de wan span sani foe so wan bigi „wolkoe” foe kotoigi lontoe wi èn di e kibri den soifri-retifasi! — Hebrewsma 11:1-12:1; loekoe ooktoe Daniël, kapitel 3.
10. Fa na apostel Paulus ben prisiri Jehovah ati?
10 Nanga wan dek’ati nanga krakti di ben komoto foe Gado na apostel Paulus ben ferdrage doengroe-oso, fonfon, a broko foe wan sipi, foeroe gevaar, neti sondro sribi, angri, dréwatra, kowroe, nanga soso skin; èn „nofotron a ben de krosbé foe dede” (2 Korinte 11:23-27). A ben ondrofeni ala na pina dati foe na boen foe na diniwroko, èn na ini ala disi a ben prisiri Jehovah ati leki wan dek’ati man di ben kibri fesi Jehovah en soifri-retifasi. Wi kan doe dati ooktoe.
11. Sortoe eksempre a ini a tori foe soifri-retifasi Jezus ben gi?
11 A mindri den sma di ben kibri den soifri-retifasi „na moro Prenspari Wrokoman èn Meki kon Volmaakti man foe wi bribi”, Jezus Kristus, e teki wan aparti presi. Di Didibri ben go tesi Jezus na ini na sabana, a ben hori sondro sekseki na en soifri-retifasi èn ben taki te foe kaba: „Komoto gwe Satan! Bika boekoe taki: ’Jehovah joe Gado, joe moe anbegi èn gi en wawan joe moe doe santa dienst.’” A de krin dati Didibri ben gwe libi Jezus di a kon tanapoe na fesi sowan faste bosroiti di ben komoto foe Gado. Dati no ben de na laste aanval foe Satan na tapoe Jezus, ma Didibri no ben abi na makti foe broko na soifri-retifasi foe a Manpikin foe Gado. ’Foe na prisiri di ben de na en fesi meki Jezus ben ferdrage wan pina-oedoe’; noiti a ben broko en soifri-retifasi. Meki alaten wi waka baka na toemsi moi eksempre foe en, leki sma di e kibri den soifri-retifasi prisiri Jehovah ati. — Hebrewsma 12:2, 3; Mattéus 4:1-11.
12, 13. Sortoe tesi na tapoe a soifri-retifasi foe den, den fosten kristen ben kan tanapoe a fesi den nanga boen winimarki?
12 Jezus ben taigi en discipel: „Foe mi nen ede oenoe sa de sani foe ogri-ati gi ala libisma” (Mattéus 10:22). Fa disi de alaten troe na ini a tori foe troetroe kristensma! Na ini en boekoe Christianity and the Roman Goverment (Na kristendom èn a Romeini Tiri) E.G. Hardy ben skrifi: „Na ini a brifi foe Paulus èn na ini a bosroiti foe Trajanus e kon boen krin a fesi dati den kristensma soso kaba foe den nomen (nen) ofoe soso foe a taki nanga taki sma foe na kristendom ben kan kisi strafoe, sondro wan enkri spesroetoe sani di taki ofoe wan enkri bewljsi foe bepaalde ogri di den doe.”
13 Fa den fosten kristensma dati ben kan tanapoe na fesi tesi tapoe den soifri-retifasi na ini a krakti foe Gado nanga boen winimarki! Den ben taki foe den foe eksempre: „Sontron den ben martel den èn iti den gi boesmeti na ini na arena foe prisiri na pipel.” Ma awinsi ala na pina disi ben de tokoe den ben taki: „Ma den bribi foe den ben kon soso moro tranga nanga a ferfolgoe aladi nanga disi den ben wini gi na afersi foe den foeroe sma di drai kon na a sé foe den” (From the Old to the New, nanga jepi foe Eugene A. Colligan èn Maxwell F. Littwin, 1932, blz. 90, 91). Na so a de ooktoe nanga Jehovah Kotoigi di e kibri den soifri-retifasi na ini na di foe twenti jarhondro disi. Den wroko sani foe Didibri sori taki den no man nanga den.
14, 15. Soema na den „toe kotoigi”, èn san den ben ondrofeni na ini 1918 èn 1919?
14 Loekoe pikinso san Jehovah salfoe dienstknegti, den agersi „toe kotoigi”, ben ondrofeni na ini 1918 nanga ini 1919, di den feanti foe den ’ben kon meki mofo foe tjari moeilekheid kon tapoe bosroiti di meki’ (Openbaring 11:3, 7-10; Psalm 94:20). J. F. Rutherford, (na presidenti foe na Wachttorengenootschap foe a ten dati) èn sébi kompe wrokoman den ben poti na ini doengroe-oso tapoe wan onregtvaardikifasi. Tapoe a momenti dati den ben kiri „den toe kotoigi” ini a tori foe a taki foe profétitori foe den, èn den féanti foe den ben e prisiri. Na ini en boekoe Preachers Present Arms (Prékiman e presenteri a gon) W. H. Abrams ben taki: „Te wi go ondrosoekoe a heri geval finifini [pe Rutherford nanga den sébi kompe wrokoman foe en ben de na ini] dan wi e kon na a bosroiti dati biginbigin den kerki leriman ben tanapoe na baka a sani disi [foe wai den bijbel ondrosoekoeman poeroe]. . . . Di a njoensoe foe na twenti jari strafoe ben miti a jesi foe den redacteur foe den kerkikoranti, dan pikinmoro na ini ala den boekoe disi, bigiwan ofoe pikinwan den ben sori taki den ben prisiri troetroe foe a sani disi di psa. Mi no ben man feni na ini no wan foe den orthodox-kerki koranti wortoe dati joe firi gi wan tra sma.”
15 Baka wan pisten den aiti bijbel ondrosoekoeman di den ben poti ini straf’oso ben kon fri èn na boen nen foe den ben kon poti na a reti presi baka èn disi ben de wan bigi tergi sani gi Didibri nanga den patna foe en di a kori. Na jeje foe Gado ben tjari den kon baka na libi èn den „toe kotoigi”, na pikin legre foe salfoewan dati, bon kon tanapoe baka tapoe den foetoe leki kownoekondre barwrokoman (Openbaring 11:11). Èn foe sensi a ten dati, dan den féanti foe Jehovah ben lasi a stré tege den sortoe sma disi di e hori den soifri retifasi.
16. Fa wán jongoeman ben taki di ben hori en soifri-retifasi?
16 Foe gi wan eksempre foe disi: go prakseri pikinso den dek’ati wortoe di wan jongoeman, aladi a ben e wakti dati den nazi-ferfolgoeman ben kiri en, ben skrifi gi en famiri: „A de mindrineti kaba. Mi abi te now ete ten foe kenki mi prakseri. Ma mi ben sa kon kolokoe baka oiti na ini a grontapoe disi, baka di mi ben taki dati mi no sabi mi masra? Kwetkweti! Ma now oenoe abi na djaranti dati mi e gwe libi na grontapoe disi na ini kolokoe nanga vréde.” Djaso joe abi wan swaki, frede man di las’ati èn di broko en soifri-retifasi? Kwetkweti!
17. Sortoe krakti na kisi di skowtoe kisi Jehovah Kotoigi na ini na Sowjet-Unie abi tapoe na Kownoekondreprèki foe den?
17 Sma e tan proeberi foe broko na soifri-retifasi foe Jehovah dienstknegti. Na ini en boekoe A dini foe Gado na ini Sowjet-Unie na koranti skrifiman Walter Kolarz e ferteri foe eksempre dati na ini a bigin foe 1951 a kisi foe hipihipi foe Jehovah Kotoigi ben feni presi èn e taki : „Den Kotoigi srefi e prakseri dati ala nanga ala 7000 sma ben tjari foe a wan presi go na a trawan — go na Oeral, Siberië, na Hé Noordsé (Vorkoeta èn Kazachstan.” Ai taki moro fara: „Disi no ben de a kaba foe Jehovah Kotoigi na ini Rusland, ma soso a bigin foe wan njoen ten na ini a wroko foe den foe bekeer sma. Den ben proeberi srefi foe meki propaganda gi a bribi foe den efoe a trein ben de a pasi e go na a presi pe den ben sa poti den na ini strafoe. Na Sowjet-rigeri no ben kan prakseri wan moro boen wrokosani foe meki na panja go mora fara foe na sekte disi go moro fesi leki foe poeroe en memre foe en tjari go na wan tra presi. Foe di den fri den poeroe na ini a pikin kontren foe den dan den kotoigi ben tjari go na ini wan moro bigi grontapoe, awinsi a ben de na kefarlek grontapoe foe koncentratiekampoe nanga na wroko na ondro dwengi.” Drape Jehovah dienstknegti ben feni foeroe sma di ben teki nanga foeroe prisiri na dek’ati kownoekondreboskopoe. — Teki gersi nangd Tori foe den Apostel 11:19-21.
Leki wan legre di e wini
18, 19. Fa wi kan wini leki sma di e kibri den soifri-retifasi?
18 Na ferfolgoe foe a pipel foe Gado e go doro te nanga a dé foe tide. Fa Jehovah Kotoigi kan wini foe dat’ede leki sma di e hori den soif retifasi? Wi man foe doe disi, foe di wi e gi jesi na a Wortoe foe Gado èn ’wi ben oefen na koni foe wi foe si sani foe si boen èn ogri’. Leki loyaal kotoigi foe Jehovah ’wi no e gersi na seti foe sani disi, ma wi e kenki foe di wi e kenki wi jeje’. Wi e doe nanga foeroe prisiri san e prisi Jehovah, èn a gi oenoe den wini tapoe den féanti foe wi, den ogrijeje èn den libisma gensman. — Hebrewsma 5:12-14; Romeini 12:1, 2.
19 Wi ’di de foe Jehovah’, ben kan teki gersi nanga wan legre di e wini. Na feti foe wi, a no de foe taki, de wan jeje wan, èn wi e tan „kisi krakti na ini Masra èn na ini krakti foe en tranga”. Wi abi na heri jeje fetisani foe Gado, èn en santa jeje e hori baka gi wi. Foe dat’ede meki wi kan ’tanapoe faste tegen den bidrigi sani foe Didibri’ (Efese 6:10-20; 2 Korinte 10:3, 4). Ija, èn foe dat’ede wi sa tan wini leki sma di e hori den soifri-retifasi.
20. Sortoe jepi nanga djaranti wi abi efoe wi e wroko na en foe kibri wi soifri-retifasi?
20 Wi de séker wan ongewoon fetimakti. Ija, a mindri wi joe abi srefi „den oema di e ferteri na boen njoensoe”! (Psalm 68:11) Aladi wi tanapoe na fesi kefarlek gensman, tokoe „moro de nanga wi leki de nanga den” (2 Kownoe 6:16). Den engel de nanga wi efoe wi e meki na boen njoensoe bekènti gi sma na grontapoe (Openbaring 14:6). Èn leki sma di e kibri den soifriretifasi wi abi na fertrow dati ’nowan enkri fetisani di smeti tege wi, sa abi winimarki’. — Jesaja 54:17.
21. San e tan go doro ala di wi e ondrofeni ferfolgoe?
21 Degedege no de na ini dati a feti-gron de kaba. Den feti krakti foe Satan teki a faste bosroiti foe stop a kotoigi wroko foe wi. Foe dat’ede meki a de na wi ’foe go doro foe feti na toemsi boen feti’ (1 Timotéus 1:18). Meki ibriwan foe wi, nanga na glori Jezus Kristus leki wi Koemanderiman èn Tiriman, doe dienst leki „wan toemsi boen sroedati foe Jezus” (2 Timotéus 2:3, 4). Awinsi na alasé sani e kon a tapoe wi, tokoe nanga Gado no-ferdini-boenati wi moesoe èn wi sa tan tanapoe faste leki sma di e kibri den soifri-retifasi. Oen fesi e brenki now di wi e si moro gro. Moro bigi nomroe foe sma foe den ’sani foe den naatsi di sma ben sa wani sote’ e kon na inisé èn e foeroe Jehovah oso nanga glori (Haggaï 2:7). Aladi ferfolgoe, straf’oso, naki, a tapoe foe a wroko na ini difrenti kondre èn den krakti moeiti foe tapoe wi mofo de, tokoe na moro bigi wroko di de na ini a meki foe discipel e go doro èn e kisi moro krakti. — Mattéus 24:14; 28:19, 20.
22. San wi moesoe doe leki sma di de foe Jehovah?
22 Aladi na prijse singi gi Jehovah e tan kon moro bigi, a de now gi ibri wan sma na grontapoe ten foe teki wan bosroiti. Fa wi abi boen-ede foe panja na boen njoensoe èn foe leri den sma di e teki na troe anbegi! Foe dat’ede meki wi go doro leki dek’ati dienstknegti foe na Moro Hé Gado, aladi na „bigi ipi” e gro (Openbaring 7:9). ’Efoe wi e libi efoe wi e dede, wi de foe Jehovah.’ Soboen meki wi tan feti a baka foe doro a marki — libi na ini hemel ofoe libi na grontapoe — foe de alaten nanga tangi gi na moro bigi grani dati wi kan prisiri Jehovah ati foe di wi e kibri wi soifri-retifasi!
Joe kan piki den aksi disi?
◻ San na soifri-retifasi?
◻ San na kibri foe soifri-retifasi e aksi foe Jehovah pipel?
◻ Fa wi kan sori dati a e meki troetroe wan difrenti gi Gado efoe wi e kibri wi soifri-retifasi gi Gado ofoe no?
◻ Na tapoe sortoe fasi son sma na ini a ten di psa ben sori dati den de sma di e kibri den soifri-retifasi?
◻ Fa Jehovah Kotoigi na ini a ten disi kan kibri den soifri-retifasi?
[Prenki na tapoe bladzijde 4]
Jehovah dienstknegti na ini a ten disi de wan pisi foe wan langa lin foe kotoigi di ben kibri den soifri-retifasi. Joe de a mindri foe den toe?
Henoch
Sara
Jefta
Paulus