Lukas skrifi en
16 Baka dati a taigi den disipel tu: „Wan gudu man ben abi wan futuboi di a ben poti fu sorgu gi en oso. Ma di a yere taki a futuboi fermorsu den gudu fu en, 2 a kari en kon, dan a taigi en: ’San na den sani di mi yere fu yu? Skrifi gi mi san yu du nanga a moni fu mi, bika mi no o meki yu sorgu moro gi na oso.’ 3 Ne a futuboi prakseri: ’San mi o du? Mi si taki a basi fu mi wani puru a wroko na mi anu. Mi no tranga nofo fu diki olo èn mi e syen fu go begi sma sani. 4 Ai, mi sabi san mi o du fu meki sma teki mi na ini den oso te mi lasi mi wroko.’ 5 Ne a kari ala den sma kon di ben abi wan paiman na en basi. A taigi a foswan: ’Omeni yu musu pai mi basi?’ 6 A man taki: ’Wán hondro bigi emre* olèif-oli.’ A futuboi taigi en: ’Teki a kontrakt fu yu baka, go sdon, dan yu skrifi 50 es’esi.’ 7 Baka dati a taigi wan trawan: ’Èn yu, omeni yu musu pai?’ A man taki: ’Wán hondro bari* tarwe.’* A futuboi taigi en: ’Teki a kontrakt fu yu baka, dan yu skrifi 80.’ 8 Aladi a futuboi no ben du wan bun sani, tòg a basi fu en prèise en, fu di a sori taki a koni. Den sma fu a grontapu disi koni moro den sma fu a leti, fu di den sabi fa fu seti den tori.
9 Mi e taigi unu tu: „Un musu gebroiki den gudu fu na ogri grontapu disi na wan koni fasi, so taki un tron mati fu den sma di man teki unu na ini den têgo tanpresi. Bika den gudu fu grontapu o lasi gwe. 10 Te yu man fertrow wan sma nanga pkin sani, yu o man fertrow en nanga bigi sani tu. Te yu no man fertrow wan sma nanga pkin sani, dan yu no o man fertrow en nanga bigi sani tu. 11 Fu dati ede, efu sma no man fertrow unu nanga a fasi fa unu e gebroiki den gudu fu a grontapu disi, dan suma o fertrow unu nanga trutru gudu? 12 Efu den no man fertrow unu nanga den sani fu tra sma, dan suma o gi unu a gudu di unu musu kisi? 13 Nowan sma kan de wan srafu fu tu basi. Bika a o teige a wan èn a o lobi a trawan, noso a o horbaka gi a wan èn a o wiswasi a trawan. Unu no kan dini Gado nanga Gudu na a srefi ten.”
14 Ma den Fariseiman di ben lobi moni yere ala den sani disi èn den bigin spotu en. 15 Dati meki a taigi den: „Unu e du sani fu meki trawan denki taki unu na ret’ati sma, ma Gado sabi un ati. Bika san prenspari gi libisma, no abi waarde gi Gado.
16 A Wet nanga den buku fu den Profeiti ben de teleki Yohanes kon. Sensi a ten dati, sma e ferteri a bun nyunsu fu a Kownukondre fu Gado na ala sma èn ala sortu sma e du muiti fu feni en. 17 A tru taki hemel nanga grontapu kan lasi gwe, ma srefi a Wet noso wán pkin letter fu a Wet no o lasi gwe. Ala sani o kon tru.
18 Efu wan sma broko trow nanga en frow èn a trow nanga wan trawan, dan a sondu fu di na waka a waka gi en frow.* Èn efu wan man trow nanga wan frow di broko trow,* dan a man dati sondu* tu.
19 Yu ben abi wan guduman di ben lobi weri soso diri paars krosi nanga linnen krosi. Ibri dei a ben e meki prisiri èn a ben e libi bigi. 20 Ma na a portu fu a guduman yu ben abi wan man di ben nen Lasarus. Sma ben gwenti poti en na a portu fu begi sma sani. En heri skin ben de nanga soro. 21 A ben winsi taki a ben kan furu en bere nanga den sani di ben fadon kmoto fu a tafra fu a guduman. Srefi den dagu ben kon fu leki den soro fu en. 22 Ma wan dei, Lasarus dede èn den engel tyari en go na Abraham.*
A guduman dede tu èn den beri en. 23 Di a ben de na ini Grebi,* a luku go na loktu, dan a si Abraham bun fara èn Lasarus ben de na Abraham sei. Fu di a ben e pina, 24 meki a bari: ’Mi p’pa Abraham, abi sar’ati nanga mi. Seni Lasarus meki a dopu a topi fu en finga na ini watra, so taki a kan kon kowru mi tongo. Bika mi e pina kfalek na ini a bigi faya disi.’ 25 Ma Abraham taki: ’Mi pkin, prakseri di yu ben de na libi. Yu ben kisi ala den bun sani, ma Lasarus ben kisi soso den takru sani. Now a e kisi trowstu dya, ma yu e pina srefsrefi. 26 Wan bigi olo de na mindri wi nanga unu tu. Awinsi den sma dyaso ben o wani abra go na unu, den no ben o man go èn den sma drape di wani abra kon na wi, no o man kon.’ 27 Ne a guduman taki: ’Mi p’pa Abraham, efu dati de so, dan mi wani aksi yu fu seni Lasarus go na a oso fu mi p’pa, 28 bika mi abi ete feifi brada. Meki a warskow den, so taki den no kon na a presi disi pe sma e pina.’ 29 Ma Abraham taki: ’Den abi den buku fu Moses èn den buku fu den Profeiti. Meki den du san den buku e taki.’ 30 Ne a guduman taki: ’No, mi p’pa Abraham. Efu wan dedesma opo baka fu go na den, dan den o abi berow.’ 31 Ma a taigi a guduman: ’Efu den no e du san den buku fu Moses èn den buku fu den Profeiti e taki, dan awinsi wan dedesma opo baka, tòg dati no o meki den kenki prakseri.’”