Wan Openbaring gi Yohanes

17 Wan fu den seibi engel di ben abi den seibi komki kon taigi mi: „Kon, dan mi o sori yu sortu strafu a bigi huru-uma di e sdon na tapu furu liba o kisi. 2 Den kownu fu grontapu huru* nanga en èn den sma di e libi na grontapu kon drungu fu di den dringi a win fu a hurulibi* fu en.”

3 Nanga a krakti fu a santa yeye na engel tyari mi go na ini wan sabana. Ne mi si wan uma e sdon na tapu wan redi ogri meti di ben lai nanga nen di no e sori nowan lespeki gi Gado. A meti ben abi seibi ede nanga tin tutu. 4 Na uma ben weri diri paars krosi nanga redi krosi. A ben moi ensrefi nanga gowtu, diriston nanga parel.* A ben abi wan gowtu kan na ini en anu di ben furu nanga den morsu sani nanga den fisti sani fu a hurulibi* fu en. 5 Tapu en fes’ede wan nen ben skrifi. A nen ben de wan kibritori: „Babilon a Bigiwan, a m’ma fu den huru-uma èn fu den morsu sani fu grontapu.” 6 Ne mi si taki na uma ben drungu fu di a dringi a brudu fu den santawan nanga a brudu fu den kotoigi fu Yesus.

Mi ben ferwondru srefsrefi di mi si en. 7 Dati meki na engel aksi mi: „Fu san ede yu e ferwondru so? Mi o taigi yu san na a kibritori fu na uma èn fu na ogri meti di e tyari na uma, iya, a meti di abi seibi ede nanga tin tutu. 8 Na ogri meti di yu si ben de kba, ma a no de moro èn tòg a de fu opo kmoto na ini a dipi peti di no abi gron. A meti disi o kisi pori. Den sma di e libi na grontapu o ferwondru trutru te den si taki na ogri meti ben de kba èn taki a no de moro, ma taki a o kon baka. Sensi a ten di grontapu seti, a nen fu nowan fu den sma disi skrifi na ini a buku fu libi.

9 Wan sma musu abi koni fu ferstan a sani disi: Den seibi ede na seibi bergi pe na uma e sdon na tapu. 10 Seibi kownu de: Feifi fadon kba, wán de nownow, a trawan no kon ete. Ma te a kon, dan a musu tan wan syatu pisi ten nomo. 11 Na ogri meti di ben de kba, ma di no de moro, en srefi na wan kownu tu. En na a di fu aiti kownu, ma a kmopo fu den seibi kownu èn a o kisi pori.

12 Den tin tutu di yu si, na tin kownu di no kisi wan kownukondre ete, ma den o kisi makti fu tiri leki kownu makandra nanga na ogri meti gi wán yuru nomo. 13 Den abi wán prakseri èn dati meki den gi na ogri meti a krakti nanga a makti fu den. 14 Den o feti nanga a Pkin Skapu, ma fu di a Pkin Skapu na Masra fu den masra èn Kownu fu den kownu, meki a o wini den. Den sma di de nanga en, iya, den sma di Gado kari, den wan di a teki èn di e tai hori na en, o wini a strei tu.”

15 Dan na engel taigi mi: „Den liba di yu si, den wan pe a huru-uma e sdon na tapu, na den pipel, den ip’ipi sma èn den sma fu ala kondre nanga tongo. 16 Den tin tutu di yu si nanga na ogri meti o abi bita-ati gi a huru-uma. Den o teki ala san a abi èn den o libi en sososkin. Dan den o nyan a meti fu en skin èn den o bron en nanga faya. Noti no o tan abra fu en, 17 bika na Gado meki den du san a abi na prakseri. Iya, den abi wán sani nomo na prakseri èn dati na fu gi na ogri meti a kownukondre fu den teleki den sani di Gado taki psa trutru. 18 Na uma di yu si, na a bigi foto di e tiri den kownu fu grontapu.”