Na takru barinen huru — Na pori fu en

„Prijse Yah! Na frulusu èn na glori èn na krakti de fu en, bika den krutu fu en de tru èn regtvaardiki. Bika a ben tyari na krutu kon tapu na bigi huru, di ben pori na grontapu nanga en hurudu, èn a ben teki refensi gi na brudu fu den srafu fu en fu na anu fu en.” — OPENBARING 19:1, 2.

1. Fa na bigi huru ben du hurudu nanga den „kownu fu grontapu”, èn san disi ben abi leki bakapisi?

ALA sani di wi ben taki te now fu en, de seryusu nofo. Ma wi musu teki ini prakseri taki Openbaring 17:2 e taki so srefi tu fu na hurudu di na bigi huru ben du nanga den kownu fu grontapu. Ala di a ben ondrofeni wan fadon, toku a e ondrow den tumusi bun matifasi nanga na grontapu, èn a e pruberi fu dray tiriman fu grontapu na so wan fasi fu meki den sani di a abi na prakseri kon tru (Yakobus 4:4). Na yeye hurudu disi, di de na ini matifasi di no mag a mindri Babylon na Biniwan èn den politiki man, ben tyari biten dede kon fu tintin milyun sma di no du noti! A ben de wan ogri sani kba-taki a bigi huru ben abi fu du na ini na Fosi Grontapu Feti nanga ala den tu Grupu di ben e feti. Ma den sondu fu en na ini a di Fu Tu Grontapu Feti seyker „ben hey den srefi go te na hemel (Openbaring 18:5). Fu san-ede wi e taki dati?

2. (a) Fa Franz von Papen ben yepi Hitler fu tron tiriman fu Doysrikondre, èn fa wan fositen Doysri tiriman ben taki fu na grani di a sma disi ben kisi fu na ridderorde fu pawsu? (b) Sortu pisi tori fu na frubontu a mindri a nazi-kondre nanga na Vaticaan ben hori kibri? (Luku a voetnoot)

² We, fu kari wan eksempre, fa na ogri-ati man Adolf Hitler ben tron tiriman — nanga dictator — fu Doysrikondre? Nanga na politiki triki fu wan sma di ben kisi na ridderorde fu pawsu ma di na fositen tiriman fu Doysrikondre, Kurt von Schleicher, ben skrifi fu en leki „na sortu fu toriman . . . di Yudas Iskariot ben de wan santa sma na en sey. A ben taki fu Franz von Papen, di ben tyari na katholiek actie nanga den industrieman di e teki fesi konmakandra fu kakafutu gi na communisme èn tyari Doysrikondre kon ondro Hitler. Leki wan pisi fu wan feradelek kruderi Von Papen ben kisi a wroko fu a di fu tu tiriman. Hitier ben seni wan grupu fu sma ondro a tiri fu Von Papen go na Rome fu negosi fu wan kruderi a mindri na nazi-kondre èn na Vaticaan. Pawsu Pius XI ben taki gi den Doysri boskopuman fa a ben prisiri taki „na a ede fu na Doysri tiri now wan man de di de sondro fu boygi kontrari na communisme”, èn tapu 20 yuli 1933 na ini a ten fu wan bigi ceremonie na ini na Vaticaan, kardinaal Pacelli (di heri esi baka dati ben sa tron pawsu Pius XII) ben poti en nen na ondro na frubontu.a

3. (a) San wan historiya skrifiman ben skrifi fu na frubontu a mindri na nazi-kondre èn na Vaticaan? (b) Sortu grani Franz von Papen ben kisi ini a ten fu den plechtigheid ini na Vaticaan? (c) Sortu rol Franz von Papen ben prey na ini Oostenrijk di den nazi ben teki abra?

³ Wan historiya skrifiman e skrifi: Na frubontu a mindri Hitler [nanga na Vaticaan] ben de wan bigi wini gi Hitler. A ben gi en na fosi moreel yepi di a ben kisi fu dorosey kondre, èn a ben de fu na moro hey fonten.” Na a ten fu den plechtigheid na ini a Vaticaan Pacelli ben gi Von Papen na hey grani fu na Bigi kroysi fu a Piusorde fu pawsu.b Na ini en buku The Gathering Storm, di ben kon a doro na ini 1948 Winston Churchill e fruteri fa Von Papen „ben gebroyki en nen fu bun katholiek” moro fara fu kisi yepi fu kerki fu den nazi teki Oostenrijk abra. Na ini 1938 kardinaal Innitzer ben gi na komando taki ala kerki fu Oostenrijk fu na grani fu na friyaridey fu Hitler ben sa anga na aka-kroysi fraga a doro, ben sa loy den gengen fu den èn ben sa begi gi na nazi dictator.

4, 5. (a) Fu san-ede wan hebi brudu payman ben de tapu na Vaticaan? (b) den Doysri katholiki gran leriman na publiki ben gi yepi na Hitler?

⁴ Fu dati-ede wan hebi brudu payman de na tapu na Vaticaan! Leki wan prenspari pisi fu Babylon na Bigiwan na wan prenspari fasi a ben meki taki Hitler ben kon na makti èn ben kisi moreel yepi. Na Vaticaan ben go wan stap moro fara fu di a ben hori en bun èn ben agri nanga den ogri-ati kiri di Hitler ben kiri sma. Na ini den langa pisi ten fu tin yari fu a skreki tiri fu den nazi na lomsu pawsu ben hori en mofo, ala di hondro dusundusun katholiek srudati ben e feti èn ben e dede gi a grani fu na nazi tiri èn milyunmilyun tra sma di no ben abi en bun ben lasi libi na ini den gaskamra fu Hitler.

⁵ Den Doysri katholiek granleriman ben gi srefi yepi na Hitler na fesi ala sma. Tapu na srefi dey di Yapan na a ten dati ben de patna fu Doysrikondre di ben e feti, sondro sma ben fruwakti ben fadon go feti tapu Pearl Harbour, dan nyunsu di e kon now ben tanapu na ini The New York Times: „Na Conferentie fu Doysrikathollek granleriman, ben kon makandra na ini Fulda, ben rikomanderi fu poti wan ’spesrutu begi gi na feti’ di musu taki na a bigin en na a kba fu ala kerki komakandra. Na ini na begi den e aksi na voorzienigheid (dati na Gado) fu blesi den Doysri legre nanga na wini èn kibri na libi èn na gosontu fu ala srudati. Den granleriman ben gi den katholiek kerki leriman moro fara komando fu no moro mendri leki wan tron ini wan mun ini wan spesrutu sonde dienst fu memre den Doysri srudati ’na tapu doti, na se èn ini loktu’”

6. Sortu takru trowe fu brudu èn sortu takru ogridu no ben sa kon kande tapu na grontapu efu no wan yeye hurudu ben feni presi a mindri na Vaticaan nanga den nazi?

⁶ Efu no wan lobi matifasi ben de a mindri na Vaticaan nanga den nazi, dan kande grontapu no ben sa si na tegu sani di psa èn di ben meki sma si fa tintin milyunmilyun srudati nanga borgru dede na ini na feti èn siksi milyun dyu di den ben kiri fu di den no ben de „Aris” en — san ben de na ini na ay fu Yehovah na moro diri sani — dusundusun fu en Kotoygi, fu den salfuwan so bun leki den tra skapu, ben tron sani di den ben du ogri na wan takru-atifasi, ala di furu Kotoygi ben dede ini deni nazi concentratiekanpu. — Yohannes 10:10, 16.

Wan luku moro krosbey tapu na huru

7. Fa na apostel Yohannes ben fruteri soyfri fu na bigi huru?

⁷ Fa na fisiyun de fiti di moro fara e tyari kon na krin na ini na profeyti tori fu Openbaring! Te wi e opo kapitri 17:3-5, wi e leysi taki Yohannes e taki fu na èngel: „Èn a ben tyari mi na ini na krakti fu na yeye gwe na ini na sabana. Èn mi ben si wan uma di ben sdon tapu wan redi kloru ogri meti, di ben furu nanga ley nen èn di ben abi seybi ede nanga tin tutu. Èn na uma ben weri purper nanga scharlaken èn ben moy en srefi nanga gowtu èn diri ston èn peri, èn ini en anu a ben abi wan gowtu kan, di ben furu nanga den tegu sani èn doti sani fu en hurudu. Èn tapu en fesi-ede wan nen ben skrifi, wan kibritori: ’Babylon na Bigiwan, na mma fu den huru èn fu den tegu sani fu na grontapu.’”

8. (a) Fa na dringi di de na ini na gowtu kan di a huru abi na ini en anu e meki sma kon sabi en? (b) Fa Babylon na Bigiwan na agersifasi weri moy ’nanga purper èn scharlaken’ èn nanga „gowtu ncnnga diri ston nanga parel”?

⁸ Dyaso Yohannes e si Babylon na Bigiwan moro krosbey. A musu de drape trutru na ini na sabana dati, a mindri den ogri meti di abi den tanpresi drape. Na bigi huru disi sma e kon sabi bun nanga san a abi na ini a kan fu en, ala di a dorosey a sori leki a kefarlek diri. A e dringi fu wan dringi di fu na sey fu Gado de wan tegu sani. A matifasi fu en nanga na grontapu, na falsi leri fu en, na gi di a e gi pasi taki sani psa tapu moreel kontren, na fri libi fu en nanga politiki makti — no wan fu den sani disi Yehovah, „a krutuman fu a heri grontapu”, e frudrage (Genesis 18:22-26; Openbaring 18:21, 24). Fa a e weri kefarlek moy! A abi barinen fu den tumusi bigi kathedraal fu en nanga architektuur di e meki indruk èn den grasi ini loto fensre fu en, den begi oso fu en di meki moy nanga gowtu sani èn en boedhaklooster, en traditioneel tempel nanga santa presi. Ini akruderi nanga den sortu krosi di na bigi huru poti meki en pristri nanga monnik musu weri diri scharlaken purper nanga safraan kloru krosi. — Openbaring 17:1.

9. Sortu bericht fu omeni yarihondro fu brudu payman Babylon na Bigiwan abi na tapu en nen, èn nanga sortu wortu di fiti Yohannes e tapu san a ben skrifi?

⁹ Ma pe a abi moro fowtu na ini na a lobi di a lobi brudu. Tapu a penti disi Yehovah abi wan owru payman fu seti nanga en! A ben gi yepi na a disiten dictator di lobi fu trowe brudu, èn na tegu historiya fu en fu trowe brudu e go psa den yarihondro te na den kerki feti, den inquisitie, den kruistocht, iya, te na a dede di wantu fu den apostel ben dede fu den bribi ede èn na kiri fu na eygi Manpikin fu Gado, Yeyses Krestes, èn go moro fara srefi ete (Tori fu den Apostel 3:15; Hebrewsma 11:36, 37). Poti na ala disi ete a sani disi taki Yehovah Kotoygi ini den yari di no psa so langa ete ben kisi dede nanga gon, na anga di den anga den, na anbeyri, na koti fu den ede, na feti-owru èn, nanga wan ogri-ati behandeling na ini strafu-oso nanga concentratie kanpu. A no wan fruwondru sani taki Yohannes e tapu san a ben skrifi nanga den wortu: „Èn mi ben kon si taki na uma ben kon drungu fu na brudu fu den santawan èn fu den Kotoygi fu Yeyses.” — Openbaring 17:6.

’NA KIBRI TORI FU NA UMA ÈN FU NA METI’

10. (a) Fa na bigi huru te nanga a dey fu tide ben frufolgu Yehovah Kotoygi? (b) Sortu tiriman den kerki leriman fu Babylon na Bigiwan de?

¹⁰ Yohannes „ben fruwondru nanga bigi fruwondru” fu san a ben si. Now wi e fruwondru so srefi tu! Ini den yari ’30 nanga ’40 na bigi huru ben gebroyki na katholiek actie èn politiki triki fu frufolgu Yehovah Kotoygi èn fu poti wet fu tapu den wroko. Te nanga a dey disi Babylon na Bigiwan e tan na a presi pe a kan abi nofo makti, èn e go doro fu gens, fu skotu èn fu poti na ini wan takru leti na wroko fu Yehovah Kotoygi, di e meki na glori howpu fu Gado Kownukondre bekenti. Den kerki leriman fu en ben kon a fesi leki ’breni tyariman fu den breniwan’. di e tyari den go na a swanpu fu pori fu di den e hori milyunmilyun sma ini katibo ini den kerki orga fu na bigi huru. Noyti, nono noyti, na takru barinen huru disi ben kan taki nanga na apostel Paulus: „Mi e kari unu leki kotoygi taki mi de krin fu a brudu fu ala sma.” — Mattéus 15:7-9, 14; 23:13; Tori fu den Apostel 20:26.

11, 12. San na a kibritori fu na ’redi kloru ogri meti’ pe na takru barinen huru e sdon, èn fa na kibritori disi ben kon a krin na ini 1942 gi Yehovah Kotoygi?

¹¹ Di na èngel ben si na fruwondru fu Yohannes, a ben taygi en: „Fu san-ede yu ben fruwondru? Mi sa taygi yu na kibritori fu na uma èn fu na ogri meti di e tyari en èn di abi den seybi ede èn den tin tutu” (Openbaring 17:7). San na a „meti” disi? Moro leki 600 yari a fesi na profeyti Daniël ben si meti na ini wan fisiyun, èn den ben fruteri en taki den meti disi „ben de leki kownu” ofu politiki tirimakti dya na grontapu (Daniël 7:2-8, 17; 8:2-8, 19-22). Yohannes e si dya na ini wan fisiyun wan kombinatie fu den sortu tirimakti disi — wan redi kloru ogri meti”. Disi na a Folkubontu di libisma opo èn na ini 1921 ben sori en srefi na grontapu, ma wantronso ben kon na ini wan peti fu inactiviteit di na ini 1939 na di fu Tu Grontapufeti ben kon. Ma san na a „kibritori fu na uma èn na ogri meti”?

¹² Nanga na si fu sani di Gado e si sani a fesi meki na kibritori dati ben tyari kon a krin gi Yehovah Kotoygi ini 1942. A di fu Tu Grontapu feti ben de na a ten dati na a moro hebi pisi fu en, èn furu sma ben prakseri taki disi ben sa go abra na ini Armageddon. Ma Yehovah ben abi wan tra sani na ini prakseri! Furu wroko ben de fu du ete gi en Kotoygi! Na ini na ten fu na Theokrasiya Nyun Grontapu konmakandra fu den di ben hori ini 1942 fu 18-20 september, nanga Cleveland (Ohio) leki srotofoto fu den 51 tra foto fu Amerkankondre di ben miti nanga en, Nathan Knorr, na presidenti fu na Wachttorengenootschap ben hori na publiki taki di ben go fu a tori „Freyde — a de fu wan langa ten?” Drape a ben taki fu Openbaring 17:8, pe ben taki fu na ’redi kloru ogri meti’: „Na ogri meti . . . ben de, ma a no de, èn toku a de so fara fu opo komoto fu na peti, èn a musu go na pori.” A ben meki kon na krin fa na Folkubontu ben de fu 1920 te 1939. Ne di a bontu ben broko dan toestand ben kon taki wan sma ben sa kan taki: ’Na ogri meti a no de.’ Ma na baka na di fu Tu Grontapufeti na vereniging disi fu nâsi ben sa opo komoto baka fu na peti. Na sani di a beybri ben taki a fesi ben kon tru? Seyker! Na ini 1945 na Internationaal „ogri meti” opo komoto fu en peti fu inactiviteit kon a doro leki den Verenigde Nâsi.

13. Fa Babylon na Bigiwan ben go doro fu du hurudu nanga na V.N.-„meti”?

¹³ Ala di Babylon na Bigiwan kon swaki fu fadon ede di a fadon, toku a go doro fu du hurudu nanga na V.N.-meti. Na ini yuni 1965 fu eksenpre hey man fu den seybi prenspari sokari kresten èn no kresten relisi fu grontapu di leki fa den taki makandra e teki presi fu afu fu den sma di e libi na grontapu, ben kon makandra na ini San Francisco fu nyan na di fu twenti friyari-oso fu den V.N.c Na ini a srefi yari dati pawsu Paulus VI ben taki fu den V.N. leki „na kriboy howpu tapu freyde nanga wanfasi”, èn bakaten pawsu Yohannes Paulus II ben taki fu a howpu taki „den Verenigde Nâsi alaten sa de a moro hey presi fu takimakandra fu freyde nanga geregtigheid”. Na ini 1986 na grontapu makti fu falsi relisi ben teki fesi ini na gi fu yepi na a internationaal yari fu freyde di den Verenigde Nâsi ben poti. Ma trutru freyde nanga seykerfasi ben kon leki wan sani taki Gado ben yere den kerki begi fu den? Fara fu dati, moro nanga moro kontren fu den V.N. ben sori taki den no abi trutru lobi gi na bigi huru.

Puru na huru na den tapu

14. Sortu spesrutu wroko na V.N.-„meti” abi fu du èn fa na èngel fu Gado e taki fu disi?

¹⁴ Te na ten doro dan na ’redi kloru ogri meti’ musu go en srefi na ini na pori. Ma bifo a de so fara, èn srefi bifo en kriboy fadon go feti nanga Gado pipri, dan na V.N.-meti musu du wan spesrutu wroko. Yehovah e poti ’en prakseri na ini na ati fu na ogri meti èn fu en tutu di e tiri nanga srudati makti.’ Nanga sortu bakapisi? Gado èngel e piki: „Èn den tin tutu di yu ben si èn na ogri meti, den dati no sa wani si na huru na ay èn den sa meki a kon leygi èn nanga soso skin, èn den sa nyan den pisi fu en skin èn sa bron en krinkrin nanga faya.” „A [ben] gi en srefi grani èn ben libi na ini gudu sondro fu abi syen”. Ma now sani de tra fasi. Den kefarlek bigi kerki oso fu en eǹ den bigi gudu fu sani leki oso nanga tra sani di no e drifi no sa frulusu en. So leki na èngel e fruteri: „Fu dati-ede tapu wán dey den plaag sa kon, dede nanga row, nanga angriten, èn a sa bron krinkrin nanga faya, bika Yehovah Gado di ben krutu en, de tranga.” — Openbaring 17:16, 17; 18:7, 8.

15. Fa den politiki freyri fu na huru, èn ooktu den bigi bisnis guduman, sa du tapu a pori fu en?

¹⁵ Den politiki freyri fu en sa de nanga sari fu a pori fu en èn o taki: „A sari, a sari; yu bigi foto, Babylon, yu tranga foto, bika ini wán yuru a krutu fu yu ben kon!” N a srefi fasi den bigi bisnis guduman, di den teki prati na ini e bidrigi wini, „e krey èn e row èn e taki: ’A sari, a sari, bika na ini wán yuru so wan bigi gudu pori’”. — Openbaring 18:9-17.

16. Fa pipri fu Gado sa du tapu na pori fu Babylon na Bigiwan, èn fa Openbaring e taki taki disi de so?

¹⁶ Ma fa den memre fu Gado eygi pipri sa du? Den alamala de na ini san na èngel e taki now: „Unu prisiri fu en, o heymel, so srefi unu santawan èn unu apostel èn unu profeyti, bika Gado ben aksi gi unu fu en na strafu fu krutu!” Nanga wan esi-esi fringi, Babylon na Bigiwan sa slengri gwe, so taki noyti moro a sa tan poti syen tapu Yehovah nen. Na pori fu na bigi huru de wan reyde fu nyan prey èn fu singi singi fu wini tu gi Yehovah grani. Leki na fosiwan fu wan lo halleluyah refreyn na prisiri pisi sa de fu yere: „Prijse Yah! Na frulusu èn na glori èn na krakti de fu wi Gado bika den krutu fu en de tru èn regtvaardiki. Bika a ben tyari na krutu kon tapu na bigi huru, di ben pori na grontapu nanga na hurudu fu en, èn a ben teki refensi fu na brudu fu en srafu fu na anu fu en.” — Openbaring 18:20—19:3.

17. Fa den krutu fu Gado sa tyari kon moro fara na wan kba baka te na bigi huru puru na pasi?

¹⁷ Den krutu fu Gado sa kon esi-esi tapu en te na „Kownu fu den kownu èn Masra fu den masra”, Krestes Yeyses na Armageddon sa masi „na win persbaki fu na atibron fu na faya ati fu Gado na Almaktiwan”. Drape a sa puru ogri tiriman a pasi nanga ala tra sma fu Satan organisâsi di tan abra na grontapu. Tingi fowru sa nyan den dede skin fu den (Openbaring 16:14, 16; 19:11-21). Fa wi sa prisiri taki na faste ten fu Gado de krosibey fu fri na moy grontapu fu wi fu ala sani san no de santa, san doti èn pori!

18. San na a moro bigi heymarki fu na buku Openbaring?

¹⁸ Na dati de na heymarki fu na buku Openbaring? Nôno, no ete! Bika te ala memre fu den 144.000 teki go poti na ini a libi na heymel, dan na trow fu na Lam e feni presi. En „bruid” di weri moy gi en man, den e poti na ini „wan nyun heymel”, èn komoto fu drape na agersifasi a e saka go na ondro leki na yepiman fu en bruidegom ini a kon tru fu Yehovah prakseri fu ’meki ala sani kon nyun’. Na yeye moyfasi fu na bruid de a moyfasi fu na santai foto, na Nyun Yerusalem, di Yehovah Gado, na Almaktiwan, e gi leti nanga en glori, èn a lanpu fu en de a Lam (Openbaring 21:1-5, 9-11, 23). Dyaso na Openbaring so bun e doro en moro bigi heymarki, te Yehovah nen e kon santa, èn na Lam, Krestes Yeyses, makandra nanga en bruid, na Nyun Yerusalem e go abra fu biesi na libisma famiri di e gi yesi nanga têgo libi na ini na grontapu paradijs.

19. (a) Boyti na gwe libi fu Babylon na Bigiwan san de ete wan sani fu kisi frulusu? (b) Sortu kari e du ete, èn fa wi musu teki disi?

¹⁹ Yu kon frustan now na dobru-atifasi fu na falsi relisi n yu ben gwe libi Babylon na Bigiwan? Èn yu ben du na tra stap, dati wani taki yu ben go na Yehovah Gado nanga yepi fu Krestes Yeyses èn yu ben gi yusrefi abra na en nanga yu heri ati, èn dan meki den dopu yu? Disi na wan sani fu kisi frulusu! Ala di na faste ten pe Yehovah sa tyari na krutu kon te fu kba e kon krosibey, dan na tranga fanowdu kari e de fu yere: „Na yeye èn na bruid e tan taki: „Kon!” Iya, . . . ibriwan sma di abi dreywatra, musu kon; ibri wan sma di wani, teki a watra fu libi fu soso” (Openbarig 22:17). Na kari e du te now ete. Yu sa de seyker koloku efu yu teki yu posisi leki wan memre fu Yehovah dopu pipri di gi den srefi abra èn e bori na posisi dati. Na faste ten kon moro krosibey leki kande yu e denki! Iya na moro bigi heymarki fu na Openbaring de krosibey!

Leki bosroyti fu na Wachttorenstuka fu na wiki disi na studieleider musu meki den leysi na resolutie di e kon now èn behandel disi nanga yepi fu aksi di poti. Disi na a resolutie di ini 1988 na a heri grontapu ben poti gi wi fu krutu tapu na „Gado geregtigheid”-distriktkongres fu Yehovah Kotoygi, na a kba fu na lezing „Na takru barinen ’huru’ — na fadon èn pori fu en”.

[Futuwortu]

[Faki na tapu bladzijde 21]

NA PAWSU BEN TAN HORI EN MOFO

Na ini en buku Franz von Papen — His life and Times di ben kon a doro na ini 1939, A.W. Blood-Ryan e fruteri finifini den triki di a man disi di ben kisi na ridder orde fu na pawsu ben gebroyki fu tyari Hitler kon na makti èn di ben go negosi fu na frubont a mindri na Vaticaan nanga den nazi. Fu na tegu frufolgu, di ben de teyge den dyu, Yehovah Kotoygi nanga tra sma, na skrifiman e taki: „Fu san-ede Pacelli [pawsu Pius XI] ben tan hori en mofo? Fu di a ben si ini na plan fu Von Papen fu wan santa lomsu kownukondre fu West Doysriman wan moro tranga katholiek kerki ini a ten di ben o kon, nanga na Vaticaan baka na ini a sturu fu grontapu makti . . . Na srefi Pacelli dati abi now wan yeye dictatuur tapu milyunmlyun sili, èn toku ete no wan opo taki wan sani srefi kontrari na kon feti fu Hitler èn na frufolgu di a ben poti . . . Ala di mi e skrifi den lin disi, dan dri dey fu srakti sma psa kba sondro taki na Vaticaan ben seni wan begi srefi go gi den sili fu den fetiman, di pikinmoro afu fu den na katholiek. Na gi fu frantiwortu sa de wan skreki sani, te den man disi, te den lasi ala den grontapu makti sa tanapu na fesi na Gado fu den di sa aksi frantiwortu. San den sa kan tyari kon a fesi leki pardon? Noti!”

[Faki na tapu bladzijde 28]

NA DE DI NA VATICAAN BEN DE INI SANI

The New York Times fu 6 maart 1998 ben fruteri taki gi 1988 na Vaticaan e hori rekening nanga wan begrotingstekort di sa doro heymarki fu $ 61,8 milyun. Na koranti ben fruteri: „Wan bun bigi uitgave kande abi fu du nanga wan pramisi di ben gi na ini 1984 fu pay pikinmoro $ 250 milyun na den sma di den mu pay fu na Banco Ambrosiano. Na Vaticaan abi krosbey sani fu du nanga na Milanese bank bifo a dati ben fadon na ini 1982.” Iya, na Vaticaan ben abi fu du so tranga nanga na skandâl dati taki a ben weygri srefisrefi fu puru dri hey Vaticaan tiriman na wroko, di a mindri den yu ben abi wan Amerkan aartsgranleriman, fu gi en abra na den lanti fu kon tanapu na fesi den krutubangi fu Italiya!

[Prenki na tapu bladzijde 22]

Na Vaticaan abi makandra nanga Von Papen nanga Hitler wan hebi brudu-payman

[Sma di abi a reti fu den prenki]

UPI/Bettmann Newsphotos

UPI/Bettmann Newsphotos

[Prenki na tapu bladzijde 28]

Na presi fu de fesiman fu Gado Kownukondre, den pawsu ben kari den V.N. „na kriboy howpu fu freyde”