Esekièl
19 „Yu musu singi wan sari singi gi den edeman fu Israel. 2 Taigi den:
’San un m’ma ben de? A ben de wan umalew na mindri den tra lew.
A ben e d’don na mindri tranga yongu lew.* Drape a ben e kweki den pkin lew fu en.
3 A kweki wan fu den pkin fu en èn a pkin tron wan tranga yongu lew.
A leri fa fu kiri tra meti.
A ben e nyan libisma srefi.
4 Den tra kondre ben yere san a ben e du.
Dati meki den fanga en na ini wan olo. Den fasi aka na en noso, dan den tyari en go na Egepte.
5 Na umalew ben e wakti, ma te fu kba a si taki a pkin fu en no ben o drai kon baka.
Dati meki a teki wan tra pkin fu en, dan a kweki en kon tron wan tranga yongu lew.
6 A yongu lew ben e waka tu nanga den tra lew èn a tron wan tranga yongu lew.
A leri fa fu kiri tra meti èn a ben e nyan libisma srefi.
7 A ben e onti na den tranga toren pe sma ben e tan èn a pori den foto fu den.
Na so a kondre fu den tron wan brokopresi èn a b’bari fu a lew ben de fu yere na ala sei.
8 Ma den pipel na en lontu bigin feti nanga en. Den fringi wan net na en tapu
èn den fanga en na ini a peti fu den.
9 Den poti aka na en noso, dan den poti en na ini wan koi fu tyari en go na a kownu fu Babilon.
Drape den sroto en, so taki a b’bari fu en no ben o de fu yere moro na den bergi fu Israel.
10 Yu m’ma ben de leki wan droifibon di ben prani na wan presi pe furu watra de.*
A ben e gi froktu èn a ben lai taki, fu di a ben kisi furu watra.
11 Den taki* fu en ben kon tranga nofo fu tron kownutiki.
A bon ben e gro teleki a kon hei moro den tra bon.
Ala sma ben man si en fu di a ben hei èn fu di a ben abi furu w’wiri.
12 Ma fu di Gado ati bron, meki a hari en puru èn a trowe en na gron.
Dan wan faya winti fu owstusei drei den froktu fu en.
Gado hari den tranga taki fu en puru èn den kon drei. Dan faya bron den.
13 Now a droifibon prani na ini wan sabana,
na wan presi pe watra no de.
14 A faya panya go na ala den taki* fu en, dan a bron den pransun nanga den froktu fu en.
A no ben abi nowan tranga taki moro. Nowan kownutiki no ben de moro.
Disi na wan sari singi èn a o tan wan sari singi.’”