Esekièl

14 Ne wan tu fesiman fu Israel kon na mi èn den kon sdon na mi fesi. 2 Dan Yehovah taigi mi: 3 „Manpkin fu libisma, den man disi de nomonomo fu dini den fisti gado* fu den èn den e du sani di e meki sma sondu. Fu san ede mi musu piki den te den e kon suku rai na mi? 4 Dati meki yu musu taigi den: ’Disi na san a Moro Hei Masra Yehovah taki: „Mi o strafu ala den Israelsma di de nomonomo fu dini den fisti gado fu den. Mi o strafu den sma di e kon suku rai na a profeiti aladi den poti wan sani leti na den fesi di e meki sma sondu. Iya, mi, Yehovah, o gi den wan hebi strafu, fu di den abi furu fisti gado. 5 Mi o meki den Israelsma kon frede srefsrefi* fu di den alamala drai baka gi mi èn fu di den go dini den fisti gado fu den.”’

6 Dati meki yu musu taigi den Israelsma: ’Disi na san a Moro Hei Masra Yehovah taki: „Un drai kon baka èn gwe libi den fisti gado fu unu. No du nowan fu den fisti sani fu unu moro. 7 Efu iniwan Israelsma noso wan trakondre sma na ini Israel drai baka gi mi, efu a de nomonomo fu dini den fisti gado fu en, efu den e du sani di e meki trawan sondu èn baka dati a e kon na a profeiti fu suku rai, dan mi, Yehovah, misrefi o piki en. 8 Mi o drai baka gi a sma dati èn mi o meki a de leki wan warskow gi trawan. Mi o meki sma spotu en èn mi o kiri en puru na mindri mi pipel. Unu sa musu fu sabi taki mi na Yehovah.”’

9 ’Ma efu a profeiti meki sma kori en èn a e piki den, dan na mi, Yehovah, kori a profeiti dati. Mi o langa mi anu fu naki en èn mi o kiri en puru na mindri mi pipel Israel. 10 Den o abi fu tyari den takru bakapisi fu den sondu fu den. A sondu fu a sma di ben go suku rai, o de a srefi leki a sondu fu a profeiti. 11 Dan den Israelsma no o drai baka moro gi mi èn den no o go doti densrefi moro nanga ala den ogri di den e du. Den o tron mi pipel èn mi o tron den Gado’, na so a Moro Hei Masra Yehovah taki.”

12 Ne Yehovah taki baka nanga mi. A taigi mi: 13 „Manpkin fu libisma, efu den sma fu wan kondre sondu teige mi fu di den drai baka gi mi, dan mi o langa mi anu fu naki den èn mi o meki taki den no abi n’nyan.* Mi o meki angriten de na ini a kondre èn mi o kiri den libisma nanga den meti na ini a kondre.” 14 „’Efu den dri man disi, Noa, Danièl nanga Yob ben de na ini a kondre, dan den w’wan ben o kisi ferlusu fu di den na ret’ati sma’, na so a Moro Hei Masra Yehovah taki.”

15 „’Kow taki dati mi ben o meki ogri meti kon na ini a kondre fu nyan den sma* di e libi drape èn a kondre kon tron wan presi pe nowan sma e tan èn pe nowan sma e psa na ini, fu di ogri meti de drape. 16 Dan neleki fa a de seiker taki mi de na libi, na so a de seiker taki den dri man disi no ben o man ferlusu nowan fu den manpkin noso den umapkin fu den, awinsi den ben de na ini a kondre’, na so a Moro Hei Masra Yehovah taki. ’Den w’wan ben o kisi ferlusu, ma a kondre ben o tron wan brokopresi.’”

17 „’Kow taki dati mi ben o meki sma kon fu kiri a pipel disi nanga fet’owru èn mi ben o taki: „Meki wan fet’owru hari psa na ini a kondre.” Kow taki dati mi ben o kiri libisma nanga meti. 18 Dan neleki fa a de seiker taki mi de na libi, na so a de seiker taki den dri man disi no ben o man ferlusu nowan fu den manpkin noso umapkin fu den, awinsi den ben de na ini a kondre’, na so a Moro Hei Masra Yehovah taki. ’Den w’wan ben o kisi ferlusu.’”

19 „’Kow taki dati mi ben o meki takru siki kon na ini a kondre èn taki mi ben o kiri furu sma fu di mi ati bron srefsrefi. Kow taki dati mi ben o kiri libisma nanga meti. 20 Dan neleki fa a de seiker taki mi de na libi, na so a de seiker taki srefi Noa, Danièl nanga Yob no ben o man ferlusu nowan fu den manpkin noso umapkin fu den, awinsi den ben de na ini a kondre’, na so a Moro Hei Masra Yehovah taki. ’Den w’wan ben o kisi ferlusu fu di den na ret’ati sma.’”

21 „Disi na san a Moro Hei Masra Yehovah taki: ’Na dati o psa tu te mi o gi den sma fu Yerusalem den fo hebi strafu disi: Mi o seni sma fu kiri den nanga fet’owru, mi o meki den dede fu angri, mi o seni ogri meti gi den èn mi o meki den kisi takru siki. Na so mi o kiri den libisma nanga den meti na ini a foto. 22 Ma wan tu sma fu a foto o tan na libi èn den o tyari den gwe. Den o tyari den manpkin nanga den umapkin fu den gwe tu. Te den o kon na unu, unu o si den ogri di den e du èn na ogri fasi fa den e tyari densrefi. Dan unu o ferstan fu san ede mi meki ala den rampu disi miti Yerusalem.’”

23 „’Unu o ferstan fu san ede den kisi strafu te unu o si den ogri di den e du èn na ogri fasi fa den e tyari densrefi. Unu sa musu fu sabi taki a no fu soso mi du ala den sani disi nanga den’, na so a Moro Hei Masra Yehovah taki.”