„Disi na a dei fu den dei”
„Nanga na yeye fu Yehovah di ben kon a tapu mi mi ben tyari kon na ini a dei fu Masra.” — OPENBARING 1:10
1. Na ini sortu „dei” wi e libi èn fu san-ede a tori disi na so wan prisiri sani?
„DISI na a dei fu den dei. Luku, na kownu e tiri!” Den dramatisch wortu disi, di na di fu tu president fu na Watch Tower Bible and Tract Society ben taki na ini 1922, e furu wi te now ete nanga faya èn prisiri. Den e tan memre wi taki wi e libi na ini a moro span ten fu ala ten, na ten di na bijbel e kari „na dei fu Masra” (Openbaring 1:10). A de trutru „na dei fu den dei”, bika a de a ten di Yehovah nanga yepi fu Kristus Kownukondre, sa meki ala en tumsi bigi prakseri kontru èn sa santa en nen na fesi fu na heri mekisani.
2, 3. (a) Olanga na dei fu Masra e de? (b) Pe wi kan feni bodoi fu na dei disi?
2 Na dei disi ben bigin ini 1914 di den ben poti Yesus leki kownu fu Gado Kownukondre. Èn a dei disi sa tan go doro te na a kaba fu na dusunyari tiri, te Kristus e gi „na Kownukondre abra a en Gado èn Tata” (1 Korinte 15:24). Getrow kristen ben luku nanga fruwakti go na a dei fu Masra furufuru yarhondro. Now a kon kaba te fu kaba! San na „dei fu den dei” disi wani taki gi Gado pipel èn gi na heri grontapu ini algemeen?
3 A bijbelbuku di e ferteri wi morofuru fu a dei fu Masra na Openbaring. Pikinmoro ala profeititori fu na buku disi e kontru na ini a ten fu na dei fu Masra. Ma Openbaring no de soso na heimarki fu wan lo profeiti buku di e ferteri wi fu a dei dati. Yesaya, Yeremia, Ezechiël nanga Daniël — èn furu moro de ete — e ferteri wi ooktu fu dati. San den buku disi e taki, e yepi wi nofotron fu frustan den profeititori na ini Openbaring moro bun. Meki wi go luku fa spesrutu na buku Ezechiël e trowe leti na tapu na kontru fu na buku Openbaring na ini a ten fu na dei fu Masra.
Den fo rij-asiman
4. San ben pasa na a bigin fu na dei fu Masra soleki Openbaring kapitel 6 e ferteri?
4 Na ini na di fu siksi kapitel fu Openbaring na apostel Yohannes skrifi fu eksempre fu wan dramatisch visioen: „Mi ben si, èn luku! wan weti asi, èn a sma di ben sdon na tapu ben abi wan bo; èn a ben kisi wan kroon, èn a ben hari go, e wini sani èn fu klari a wini fu en” (Openbaring 6:1). Suma na a victori asiman disi? Nowan tra sma moro leki Yesus Kristus, di den ben poti leki kownu fu Gado kownukondre èn di e hari go fu wini en feianti (Psalm 45:3-6; 110:2). Na victori rij fu Yesus ben bigin na ini 1914, te na a bigin fu na dei fu Masra (Psalm 2:6). Na fosi wini fu en ben de a trowe di a ben trowe Satan nanga en ogri yeye kon na grontapu. San ben de a bakapisi gi libisma? „Elu gi na grontapu èn na se.” — Openbaring 12:7-12.
5. Sortu takru sortu meti e waka baka na rij-asiman fu na weti asi, èn sortu makti den abi?
5 Na visioen e sori morofara dri takru sortu sani: wan faya kloru asi di e agersi feti, wan blaka asi di e agersi angriten èn wan geri asi di na tyariman fu en èn e kari „dede”. Fu na di fu fo asi disi wi e leisi: „Mi ben si, èn luku! wan geri asi, èn a sma di ben sdon na tapu ben tyari na nen dede. Èn Hades ben waka krosbei na en baka. Èn den ben kisi makti tapu na di fu fo pisi fu na grontapu fu kiri nanga wan langa fet’owru èn nanga mankeri fu nyanyan èn nanga den wilde meti fu na grontapu.” — Openbaring 6:3-8; Mat. 24:3, 7, 8; Lukas 21:10, 11.
6. San na grontapu ondrofeni fu den dri asi nanga asiman fu den di e gi skreki?
6 Ini akruderi nanga a profeitori dan na libismafamiri fu sensi 1914 ben nyan pina kefarlek leki wan bakapisi fu feti, angriten nanga siki. Ma na di fu fo rij-asiman e kiri sma ooktu nanga yepi fu „den wilde meti fu na grontapu”. A sani disi ben de wan marki di ben de fu si sensi 1914? Te wi o luku wan srefi sortu profeititori di Ezechiël ben skrifi, dan disi e yepi wi fu si na pisi disi fu na profeititori na ini en yoisti presi.
7. (a) Sortu profeititori Ezechiël ben taki fu Yerusalem? (b) Fa na profeititori disi ben kontru?
7 Kande feifi yari bifo na pori fu Yerusalem na ini 607 bifo gewoon teri dan Ezechiël ben skrifi na profeititori taki den du fu na sondro getrowfasi fu den ede ben sa kisi wan takru strafu. A ben skrifi ondro na krakti fu santa yeye: „Na so ooktu a sa de te den fo ogri strafu fu mi sa de — fet’owru nanga angriten nanga ogri wilde meti nanga pestsiki di mi sa seni kon trutru tapu Yerusalem fu koti puru na grontapu sma nanga osometi (Ezechiël 14:21; 5:17). Disi ben kontru letterlek na ini a ten dati? Sondro degedege Yerusalem ben kisi fu nyan pina fu angriten èn feti di a kaba fu en ben kon krosibei. Èn angriten gewoonlek e meki siki kon (2 Kronieken 6:1-3, 6, 13, 17-21; Yeremia 52:4-7; Kragisingi 4:9, 10). Wan letterlek plaag ben de na ini a ten dati fu wilde meti? Kande seiker sani ben psa trutru fu sma di meti ben hari tyari gwe ofu kande srefi ben kiri den, fudi ooktu Yeremia ben taki disi a fesi. — Leviticus 26:22-33; Yeremia 15:2, 3.
8. Sortu rol den wilde meti ben prei te so fara na ini na dei fu Masra?
8 Èn san de fu taki fu wi ten? Ini den ontwikkelde kondre wilde meti no de moro na kefarlek problema fu fosten. Ma na ini tra kondre a de so taki te now ete wilde meti e kiri sma, spesrutu efu wi reken ooktu sneki nanga kaiman leki „den wilde meti fu grontapu”. Den sortu rampu geval disi no furu tron e kon na ini a internationaal nyunsu, ma a no e go fu pikinso nomru fu sma. Na buku Planet Earth — Flood e taki fu den furu sma na inl India nanga Pakistan di dede wan takru dede fudi takru sneki ben beti den” aladi den ben proberi fu lon komoto fu bigi watra. India Today ben ferteri fu wan dorpu ini West-Bengalen pe na schatting 60 uma ben lasi den man ini dede fudi tigri ben val den aan. Den sortu rampu disi ini a ten di e kon moro furu tron sa sori densrefi te na libisma maatschappij fadon panya èn te moro angriten kon ete.
9. Sortu tra sortu fu „meti” ben tyari pori kon èn pina kon na ini na yarhondro disi na mindri libisma?
9 Ma Ezechiël ben taki fu wan tra sortu fu meti di a ben taki: „Wan komplot de fu en profeiti na ini en mindri, leki na krasi lew di e priti a sani di a o nyan. Wan sili a e priti trutru. Den granman fu en na ini en mindri de leki wolfu di e priti sani” (Ezechiël 22:25, 27). Libisma kan handri ooktu leki meti èn fa a libismafamiri na ini den yarhondro ben mu nyan pina fu den sortu hogri meti disi! Furu ben lasi libi fu na anu fu ogriduman nanga terrorist di ben de leki meti. Iya, moro leki tapu wan fasi dede ben koti wan bun koti fu sma di „wilde meti fu a grontapu” ben kiri.
10. San wi e go frustan moro bun nanga den sani di Yohannes kari soleki feti, angriten, siki nanga wilde meti?
10 Na kari fu feti, angriten, siki nanga wilde meti na ini Yohannes visioen e yepi wi fu frustan taki den sari di Yerusalem ben musu ondrofeni na ini 607 bifo G.T. na furu okasi ben sa abi na ini wi ten wan parallel. Na dei fu Masra ben wani taki pina gi na grontapu, morofuru fudi den tiriman fu a grontapu ben weigri fu saka densrefi na ondro na fosi rij-asiman dati, na Yesus Kristus di den ben poti tapu a troon leki kownu (Psalm 2:1-3). Ma fa a de nanga a pipel fu Gado? San a dei fu Masra ben wani taki gi den.
Marki a tempel
11. Sortu wroko Yohannes ben kisi na ini Openbaring 11:1, èn gi sortu tempel disi ben de?
11 Na ini Openbaring 11:1 na apostel Yohannes ben taki: „A ben gi mi wan ken-peiri, leki wan tiki fu marki sani, aladi a ben taki: ’Opo tanapu èn marki na tempel-santa-presi fu Gado èn na altari èn den di e anbegi drape.”’ Na visioen disi fu marki sani fu a tempel ben wani taki furu gi a pipel fu Gado. Sortu tempelsantapresi Yohannes ben marki? No na letterlek dyu tempel pe Yohannes ben anbegi bifo a ben tron wan kristen. A tempel dati Yehovah ben trowe èn a ben kisi pori na ini 70 G.T. (Mattéus 23:37—24:2). Na presi fu dati a ben de Yehovah bigi yeye tempelseti. Na ini na agersi tempel disi salfu kristen e dini leki ondropriester ini na grontapu fesidyari. — Hebrewsma 9:11, 12, 24; 10:19-22; Openbaring 5:10.
12. Oten na tempel dati ben du kon èn sortu sani di ben psa na en ben feni presi na ini na fosi yarhondro?
12 A tempel dati ben du kon na ini 29 G.T. di Yesus Kristus ben kisi salfu leki heipriester (Hebrewsma 3:1; 10:5). A ben sa abi 144.000 ondropriester, èn ini a fosi yarhondro den ben teki furu fu den disi èn ben poti wan seigelmarki tapu den èn baka dati den ben dede na ini getrowfasi (Openbaring 7:4; 14:1). Ma te den fosi yarhondro kristen ben dede, den ben e sribi na ini a grebi, fudi den no ben kisi wantewante wan opobaka fu go libi na ini hemel (1 Thessalonikasma 4:15). Boiti fu dati na baka na fosi yarhondro wan bigi fadon komoto na bribi ben bigin èn salfu kristen di ben de leki priester ben abi lontu den „takruwiwiri” di ben e gro srefsrefi, den wan di ben fadon komoto a bribi (Mattéus 13:24-30). Èn na ini ala den yarhondro dati fu sensi na ten dati wan sma ben sa aksi fu dat’ede: „Ala den 144.000 ondropriester sa kisi oiti wan seigelmarki? ’Den wan di ben dede na ini getrowfasi, oiti sa kisi opobaka fu dini na ini na hemelsantapresi?’ Na marki fu na tempel na ini wan visoen e sori dati na piki fu den tu aksi disi kan piki nanga ya. Fu san-ede?
13. Fu san na marki di Yohannes ben marki na tempelsantapresi de wan garanti èn san ben psa fruku kaba ini na dei fu Masra?
13 Fudi na ini bijbel profeititori na marki fu wan sani gewoonlek e sori a tapu taki Yehovah prakseri ini na tori fu na afersi dati seiker sa kon tru finifini (2 Kownu 21:13; Yeremia 31:39; Kragisingi 2:8). Na a fasi disi na marki fu na tempelsantapresi fu Yohannes na ini wan visioen ben de wan dyaranti taki ini a ten fu a dei fu Masra ala Yehovah prakseri ini na tori fu a tempel ben sa kontru. Ini akruderi nanga disi meki wan bigin ben meki na ini 1918 leki fa sani ben sori, nanga na opobaka fu den salfuwan di ben dede kaba na ini getrowfasi, sodati den ben kan teki na pramisi presi fu den na ini na hemelsantapresi (1 Thessalonika 4:16; Openbaring 6:9-11). Ma fa a de nanga a tra pisi fu den 144.000?
14. San ben psa fosi èn ini a Fosi grontapufeti nanga salfu kristen?
14 Srefi bifo na dei fu Masra ben bigin dan salfu kristen di ben komoto fu na kristenheid di ben fadon komoto na bribi, ben bigin fu komakandra na ini wan organisatie di ben poti aparti. Den ben bow wan tumsi moi bericht fu getrowfasi fudi den ben ferteri fu na prenspari fasi fu na yari 1914, ma ini na yari dati, di na Fosi Grontapufeti ben bigin, den ben kisi benawtu fu pasa; den ben trapu den”. Disi ben doro wan heimarki na ini 1918 di den fesiman fu na Watch Tower Society ben poti go na strafu èn pikinmoro na georaniseerde prekiwroko ben kon de pi: Na ini a ten dati den ben de praktis ’leki dede’ (Openbaring 11:2-7). San na marki fu na tempel-santapresi ben wani taki gi den kristen disi?
15. San na marki ben wani taki fu na tempel fu Gado pipel di ben si ini wan visioen na ini Ezechiël ten?
15 Na ini a yari 593 bifo G.T., tina fo yari baka di Yehovah tempel ben kisi pori na ini Yerusalem, Ezechiël ben kisi wan oso fu Yehovah fu si na ini wan visioen. A ben kisi wan waka lontu finifini psa na tempel disi èn a ben e luku ala aladi ala pisi fu a tempel ben marki finifini (Ezechiël kap. 40-42). San disi ben wani taki? Yehovah ben tyari kon na krin: Na marki fu na tempel ben wani taki gi a pipel fu Ezechiël wan tesi. Efu den ben sa saka densrefi, ben sa abi beraw fu den sondu fu den èn na ala fasi ben sa doro den wet fu Yehovah, dan den o kisi fu yere san den marki fu na tempel ben de. Disi a no de fu taki ben sa gi den tranga ini na howpu fu den taki Yehovah pipel wan dei ben sa kon fri komoto fu Babylon èn sa anbegi Yehovah nyun baka na ini en letterlek tempel. — Ezechiël 43:10, 11.
16. (a) Fu san na marki fu na tempelsantapresi ini a visioen fu Yohannes de wan dyaranti gi Gadopipel na ini 1918? (b) Fa disi ben kontru?
16 Tapu na srefi sortu fasi den kristen di ben lasi ati na ini 1918, efu den ben saka densrefi èn abi beraw fu fowtu di den ben du, ben sa kon fri èn kisi Yehovah blesi èn ooktu abi wan prati dorodoro na en tempelseti. Èn so a ben psa ooktu: Soleki Openbaring 11:11 e ferteri, ’den ben opo tanapu’ ofu den ben kisi wan agersi opobaka. Net so wan sortu opobakavisioen na ini Ezechiël ben prenki wan kon bun baka fu den dyu na ini den eigi kondre (Ezechiël 37:1-14). Na disi ten ’opobaka’ sori taki a ben de wan kon bun baka fu Gado pipel komoto fu na toestand fu las’ati fu den pe den ben de pikinmoro leki den ben dede, kon na ini wan krakti toestand fu libi pe den ben abi wan prati dorodoro ini Yehovah dienst. Sowan ’opobaka’ ben feni presi na ini 1919.
Na pikin bukulolo
17. (a) Ferteri fu na visioen fu Yohannes na ini Openbaring 10:1? (b) Suma ben de na engel di Yohannes ben si na ini a ten fu sortu ten na visioen disi ben kon tru?
17 Ini Openbaring 10:1 Yohannes ben si wan „tranga engel saka komoto fu hemel, di ben weri wan wolku èn wan alenbo ben de tapsei fu en ede, èn en fesi ben de leki son, èn en futu ben de leki faya postu.” Disi ben gersi ooktu tapu visioen fu Yehovah di Ezechiël èn Yohannes srefi a fesi hen si (Ezechiël 8:2; Openbaring 4:3). Ma Yohannes ben si dya wan engel, no Yehovah. Fu dat’ede a ben mu de Yehovah bigi engelmanpikin Yesus Kristus, di ’de na prenki fu Gado di yu no kan si’ (Kolossesma 1:15). Boiti fu dati Openbaring 10:2 e ferteri fu Yesus leki a e tanapu ini wan pos: fu bigi makti nanga en „reti futu tapu a se, ma en kruktuwan tapu grontapu”. Na engel de sobun Yesus Kristus ini a tn fu na dei fu Masra. — Luku Psalm 8:4-8; Hebrewsma 2:5-9.
18. (a) San Yohannes ben mu nyan? (b) San Ezechiël di ben kisi so wan sortu visioen, ben mu nyan, èn sortu krakti dati ben abi?
18 Na ini na glori skin disi na ini wan visioen Yesus abi wan pikin bukulolo na ini en anu èn Yohannes e kisi na komando fu teki na lolo èn fu nyan en (Openbaring 10:8, 9). Na ondrofeni disi fu Yohannes pikinmoro e kruderi nanga san Ezechiël ben ondrofeni di ooktu ben ksi na komando fu nyan wan bukulolo di a ben si na ini wan visioen. Na ini Esechiël geval Yehovah srefi ben gi na profeiti na bukulolo èn Ezechiël ben si taki ’kragisingi ben skrifi na tapu èn geme nanga krei’ (Ezechiël 2:8-10). Ezechiël e ferteri: „Èn mi ben go nyan èn en a ben de na ini mi mofo leki oni so switi” (Ezechiël 3:3). San a nyan fu na bukulolo ben wani taki gi Ezecchiël?
19. (a) San na nyan di Ezechiël ben nyan na bukulolo ben agersi? (b) Den bita boskopu di Ezechiël ben mu preiki ben de gi suma?
19 Sondro fu degedege na lolo ben abi profeiti bodoi di ben skrifi ondro krakti fu santa yeye. Di Ezechiël ben nyan na bukulolo, a ben teki a wroko fu meki den bodoi disi bekenti ini wan fasi di de finifini dati a ben tron wan pisi fu en (Yeremia 15:16). Ma gi trawan na inbere fu na lolo de wan sani di no switi. Na bukulolo ben lai nanga ’Kragisingi nanga geme èn krei.’ Gi suma na bita boskopu disi ben de gi? Na ini a fosi presi Ezechiël ben kisi fu yere: „Libismapikin, go a mindri na oso fu Israël, èn yu mu taki nanga den nanga den wortu fu mi” (Ezechiël 3:4). Bakaten a ben taki en boskopu ooktu gi den heiden nâsi. — Ezechiël kap. 25-32.
20. San ben psa di Yohannes ben nyan na pikin bukulolo èn san ben de na bakapisi fu dati?
20 Na ini Yohannes geval na nyan fu na bukulolo ben abi densrefi sortu bakapisi. A e ferteri: „Mi ben teki na bukulolo komoto fu na anu fu na engel èn ben nyan den èn ini mi mofo a ben de switi lek oni; ma di mi ben nyan den, a ben bita mi bere” (Openbaring 10:10). A nyan fu na bukulolo ben de ooktu gi Yohannes wan switi ondrofeni. A ben de wan span sani fu meki Yehovah Wortu tron wan pisi fu en. Ma a boskopu ben abi wan bita pisi. Bita gi suma? Yohannes ben kisi fu yere: „Yu mu taki profeititori ete wantron ini a tori fu den pipel èn nâsi èn tongo èn furu kownu.” — Openbaring 10:11.
21. (a) San den salfu kristen ben du na ini 1919 san de akruderi nanga a nyan fu a pikin bukulolo fu na sei fu Yohannes èn sortu krakti disi ben abi? (b) San ben de na bakapisi gi na kristenheid èn gi na grontapu ini algemeen?
21 Fa ala den sani disi ben kontru na ini a ten fu a dei fu Masra? Leki fa den historia tori e sori dan getrow kristen ben teki so dorodoro na grani fu dini Yehovah na ini na ten dati na ini 1919, dati a ben tron wan pisi fu den, èn dati ben de trutru wan switi ondrofeni. Ma na blesi nanga grani fu den ben sori taki a de wan bita sani gi trawan — spesrutu gi den kerk leriman fu na kristenheid. Fu san-ede? Fudi den getrow salfu kristen disi nanga dek’ati ben meki na heri boskopu fu Yehovah bekenti gi libisma. No wawan den ben preiki na „bun nyunsu fu na kownukondre” ma den ben tyari na dede toestand na yeyefasi fu na kristenheid èn na grontapu ini algemeen kon na doro. — Mattéus 24:14; Openbaring 8:1–9:21; 16:1-21.
22. (a) Tapu sortu kefarlek fasi Yehovah ben gebroiki den salfuwan na ini a ten fu a dei fu Masra? (b) San a dei fu Masra ben wani taki gi a pipel fu Gado èn gi Satan?
22 Yehovah ben gebroiki na pikin grupu kristen disi fu tyari den laste wan fu den 144.000, di ben kisi wan seigel marki, kon makandra èn den ben teki fesi na ini a tyari kon makandra fu na bigi ipi, di de fu den sma di abi wan grontapu howpu (Openbaring 7:1-4, 9, 10). Na bigi ipi disi e prei wan prenspari rol na ini den prakseri fu Yehovah gi a grontapu disi èn dati den ben sori densrefi na tapu a grontapu toneel, ben tyari bigi prisiri kon na ini hemel èn na grontapu (Openbaring 7:11-17; Ezechiël 9:1-7). Fu dat’meki na „dei disi fu den dei” ben wani taki kaba pina gi Satan grontapu ma ben tyari furu bigi blesi gi Yehovah pipel. Meki wi go luku now fa disi sa de moro ete so omoro a dei fu Masra e go moro a fesi.
Yu kan tyari disi kon a krin?
◻ San na a dei fu Masra?
◻ Sortu pori rol den wilde meti fu grontapu e prei na ini a ten fu a dei fu Masra?
◻ Sortu ferwakti Yehovah ben gi fudi a ben meki Yohannes marki na tempelsantapresi?
◻ San na nyan fu na pikin bukulolo ben wani taki gi na salfu fika pisi na ini 1919?
◻ San na dei fu Masra wani taki te so fara gi Gado pipel èn gi na grontapu ini algemeen?
[Prenki na tapu bladzijde 4]
Na marki di Yohannes ben marki na tempel ben gi den salfuwan krakti ini na dei fu Masra