San na dei fu Masra wani taki gi yu?
„Go poti na yu ondro a mindri fu yu feianti”. — PSALM 110:2.
1-3. (a) Fu san-ede na bigin fu na dei fu Masra ben de wan ten fu strei, èn san na wantu wini di a ben kisi? (b) Fa Yesus ’sa klari en wini’?
NA ini 1914 den ben poti Yesus leki Kownu fu Gado kownukondre èn a dei fu Masra ben bigin. Wantewante a nyun Kownu ben kisi fu du nanga wan hebi gens fu Satan Didibri nanga en wroko sani dya na grontapu (Psalm 2:1-6). Den fruku yari fu na dei fu Masra ben de sobun wan ten fu strei te Yesus ben go ’fu poti na en ondro na mindri fu en feianti’. — Psalm 110:2.
2 Den wini fu na nyun Kownu ben gi fruwondru. Baka 1914 Satan ben proberi fu „nyan” na Kownukondre di ben gebore pas, ma na presi fu dati a ben lasi wan syen lasi èn den ben iti en puru fu hemel (Openbaring 12:1-12). Bakadati a ben ’go feti’ nanga den wan di ben de salfuwan, ma a no ben man fu tapu taki den ben ’opo tanapu’ na ini 1919 ofu taki den ben kisi „na pikin bukulolo” fu na anu fu Yesus Kristus (Openbaring 10:8-11; 11:11, 12; 12:17). Èn ooktu a no ben man pori na tyari kon makandra fu den laste memre fu den 144.000 èn ooktu fu na bigi ipi (fu ala nâsi) di e du ’santa dienst dei nanga neti na ini Yehovah tempel’. — Openbaring 7:1-3, 9-15.
3 Iya, sensi 1914 Yesus ben hari go ’e wini sani’. Ma ete wan frak sani mu psa ete. Yesus musu ’klari en wini ete’. A mu go abra ete fu puru ala pisi fu Satan groptapu seti fu sani (Openbaring 6:1, 2; 19:11-21). San na kefarlek bigi prenspari du disi sa wani taki gi ibriwan fu wi?
Syen na publiki gi Babylon na Bigiwan
4. Fa Openbaring e skrifi fu falsi fasi fu anbegi?
4 Na pori fu Satan grontapu e bigin nanga na pori fu falsi anbegi. Openbaring e ferteri fu na heri grontapu makti fu falsi anbegi — makandra nanga na kristenheid — leki wan huru uma, Babylon a Bigiwan, di e libi nanga den kownu fu grontapu èn di e meki libisma kon drungu nanga na win fu en hurudu. Ensrefi drungu ooktu — tapu wan takru skreki fasi — èn fudi a e dringi brudu, na brudu fu Gado dienstknegti (Openbaring 17:1-6). Openbaring e taki tu fu kaba fu a tegu huru-uma disi fu hondrohondro yari, èn wi kan frustan bun san disi sa wani taki te wi luku san ben pasa nanga wan tra huru-uma di ben de na ini na di fu seibi yarhondro bifo unu gewone teri.
5, 6. Fu san-ede den e kari na ontrow Yerusalem wan huru uma èn sortu krutu di kon fu Yehovah disi ben tyari kon tapu en?
5 Na huru uma dati ben de na foto Yerusalem. A ben de leki na centrum fu Yehovah anbegi na grontapu ma Gado ben taigi en: „nanga na brudu di yu ben trowe, meki den ben feni fowtu na yu” (Ezechiël 22:4). Den ben fruwakti ooktu taki na yeye fasi a mu de soifri, ma a du hurudu fudi a ben tai ensrefi nanga den nâsi. „O fa mi ati e bron nanga yu”, Yehovah ben taigi en, „fudi yu e du ala den sani disi, na wroko fu wan uma, wan huru uma di wani makti sani!” — Ezechiël 16:30; 23:1-21; Yakobus 4:4.
6 Luku morofara sortu krutu Yehovah e leisi gi na huru disi. „Luku, mi e tyari ala den sma [den nâsi] di lobi yu so tranga, gi suma yu ben de so switi komakandra èn ala den sma di yu ben lobi, èn den mu puru yu krosi na yu skin èn teki den glori sani fu yu èn libi yu nanga soso skin na baka. Èn den mu bron yu oso nana faya” (Ezechiël 16:37, 41; 23:25-30). Na historia e ferteri san ben psa. Den Babylon sma ben kon na ini 607 bifo G.T. èn ben puru den krosi fu Yerusalem èn libi en nanga soso skin. Den ben teki den sma fu en èn en gudu go na Babylon. Na foto ben pori èn den ben bron na tempel èn na kondre ben libi na baka leigi sondro sma di e libi na ini. — 2 Kronieken 36:17-21.
7. San sa de a kaba fu Babylon a bigi wan?
7 Sowan srefi sortu sani sa miti Babylon na Bigiwan. Na Openbaring e warskow: „Den [disi ten „kownu” ofu tiriman nanga suma Babylon a Bigiwan ben du yeye hurudu] sa abi ogri-ati fu na huru èn sa meki a kon leigi, èn den . . . sa nyan den pisi fu en meti èn den sa bron en krinkrin nanga faya” (Openbaring 17:2, 16). Fu na eksempre fu na owru Yerusalem wi sabi san disi wani taki. Falsi fasi fu anbegi sa pori gwe nanga anu fu nationaal rigeri, ’di ben lobi en fosi’. Den sa teki en gudu pusu fu en èn a sa bron en pori trutru. Disi na bun kaba gi wan tegu organisatie!
Den hemel kon dungru
8. Sortu ten na bigi benawtu sa de gi libisma?
8 Nanga na pori fu Babylon na Bigiwan dan na „bigi benawtu” di Yesus ben taki a fesi fu en ben sa bigin (Mattéus 24:21; Openbaring 7:14). Fu a ten dati Openbaring e taki: „Wan bigi gronseki ben kon now èn son ben kon blaka leki wan saka fu wiwiri, èn na heri munkenki ben tron leki brudu èn den stari fu hemel ben fadon kon na grontapu” (Openbaring 6:12, 13). Na bigi gronseki disi na a „bigi gronseki ini na gron fu Israël” di Ezechiël ben taki na fesi fu en (Ezechiël 38:18, 19; Yoël 3:14-16). A de na pori te fu kaba fu na goddelowsu seti fu sani disi. Wan sani sa psa na ini a ten dati nanga na letterlek son, munkenki nanga stari?
9, 10. San ben sa psa nanga Egypte leki fa Ezechiël taki, èn fa na profeitori disi ben kontru?
9 Di Ezechiël ben gi warskow fu na fadon di ben o kon fu na bigi zuidsei-buurman fu Israël, dati wani taki Egypte, a ben taki: „’Èn te yu [Farao] kon dede leki wan faya, dan mi wani tapu na hemel èn puru en stari èn fu na sei fu son, nanga wolku mi sa tapu en, èn a munkenki srefi no sa skijn en leti. Ala faya di e gi leti na hemel — fu yu ede mi sa dungru den, èn mi wani tyari dungru kon abra yu kondre’, na so den wortu fu na Soeverein Masra Yehovah de.” — Ezechiël 32:7, 8.
10 Di Farao nanga en legre ben tyari kon fadon, dan na letterlek hemel no ben kon dungru. Ma wel na ten di ben o kon gi Egypte ben e luku dungru. Soleki na bijbel-leriman C.F. Keil ben taki, „na dungru di ben kon [a fadon fu Farao] de wan agersitori tapu wan fu den omstandigheid pe howpu no ben de kwetkweti moro.” Egypte fu alaten ben saka komoto fa presi fu wan onafhankelek grontapumwkti èn na wan grontapumakti baka a trawan ben e basi en! Na ini wi ten a moro bigi pisi fu na kondre fu na owru kownukondre fu Farao wan Arabier nâsi e tiri.
11. (a) San a e agersi san ben psa nanga Egypte? (b) Fa den fruwakti gi Satan grontapu abi sa de trutru dungru pikapika nanga na kon fu na bigi benawtu?
11 Ma Keil ben si ini na profeititori fu Ezechiël wan betekenis morofara. A ben skrifi: „Na trowe na gron fu a grontapumakti disi [Egypte] na wan marki èn prei na fesi fu na feti fu na fadon fu ibri goddelowsu grontapumakti tapu a dei fu na laste krutu.” Disi te yu luku en bun ben de tru. Soleki Openbaring e meki wisi, dan den fruwakti gi na goddelowsu libismafamiri sa de wan di blakapikapika nanga na bigi benawtu leki fa a ben de na a ten dati gi Eypte. A sa de soleki a son na deiten no e gi leti èn na hemel fu neti no ben abi nowan enkri waran leti fu na munkenki èn sondro switi èn brenki stari. Den sma di e weigri fu gi grani na Yehovah kownu, sa lasi gwe te na asiman tapu a weti asi e klari a wini fu en sondro srefi fu kisi wan fatsunlek beri (Openbaring 19:11, 17-21; Ezechiël 39:4, 17-19). A no wan wondru taki den goddelowsu sma e „taigi den bergi nanga den stonbergi: ’Fadon tapu wi èn kibri wi gi na fesi fu na sma di sdon tapu na troon èn gi na atibron fu na Lam, bika na bigi dei fu den atibron kon, èn suma kan tan tanapu dan?’” — Openbaring 6:16, 17; Mattéus 24:30.
Feti di e de alaten!
12. Fa Satan ben sori ini a ten fu a dei fu Masra en ogri-ati gi Yesus Kristus?
12 Ma fa a de nanga kristen na ini a ten disi? We, na feti di de alaten a mindri Satan nanga na asiman tapu na weti asi abi bun bigi krakti tapu den. Fudi Satan no ben man fu val Yesus persoonlek aan, meki a ben tyari ala krakti fu en atibron kon teige den wan di tan abra fu den salfu wan èn — na ini ten a baka — teige na bigi ipi tra skapu di kon moksi densrefi na den. Soleki Yesus ben warskow dan fu ’en nen ede, den tron sani fu ogri-ati gi ala nâsi’ (Mattéus 24:9). Satan ben gebroiki ini na strei teige den ibri wapen di a ben abi ini en makti, makandra nanga tranga fasi fu na gewoon pipel, straf’oso, skinati nanga kiri. — 2 Timóteus 3:12.
13. Fa Satan ben gebroiki bedrigifasi ini en feti teige Gado pipel?
13 Satan ben gebroiki ooktu tapu bekwaamfasi bedrigifasi (Efesesma 6:11). Fudi a ben meki gebroiki fu na „bedrigi krakti fu gudu” meki a ben kori son sma go sofara fu du en safrisafri ofu srefi fu tapu nanga a santa dienst fu den (Mattéus 13:22; 1 Timóteus 6:10). Trawan a ben kori go na ini doti libi èn hurulibi (1 Korinte 5:1, 2). Furu sma de ondro hebi druk fu den „sorgu fu a libi ede” èn Satan e meki gebroiki fu disi fusi a e pruberi ’fu hebi na ati fu den’ (Lukas 21:34). Ini tra geval a ben gebroiki strei fu sma persoonlekheid ofu opruru firi fu puru a prakseri tapu den „moro prenspari sani.” — Filipisma 1:10; 1 Korinte 1:11, 12; Yakobus 4:1-3.
14, 15. Fa wi kan wini na ini a strei fu wi teige Satan?
14 Fu dat’ede meki kristen sma ben musu kweki na ini a dei fu Masra horidoro. Sonwan e libi a strei, san ben de alaten baka wan pikin wini gi Satan (1 Petrus 5:8). Ma morofuru ben poti prakseri na a pramisi fu Yesus: „A sma di horidoro te na a kaba, en sa kisi ferlusu” (Mattéus 13). Nanga na yepi fu Yehovah den ben wini a strei èn prisiri en ati. — Odo 27:11; 1 Yohannes 2:13, 14.
15 Seiker a de so dati nowan sma fu wi wani gi Satan na satisfaksi fu meki wi stop! Meki wi waka fu dat’ede baka na rai fu Paulus èn wapen un srefi nanga waarheid, regtvaardikifasi èn bribi, aladi wi e preiki fayafaya na bun nyunsu èn ooktu e studeri fu tranga wi bribi. Meki sondro fu wi stop tan begi èn de nanga ai. Tapu a fasi dati wi no sa ’kisi nowan enkri fowtu tapu na dei fu wi Masra Yesus Kristus’ (1 Korinte 1:8; (Efese 6:10-18; 1 Thessalonika 5:17; 1 Petrus 4:7). Na presi fu dati na dei fu Masra sa tyari bigi blesi kon gi yu.
Tumsi moi dienstgrani
16. Fu san-ede Yohannes ben kisi a komando fu no skrifi san den seibi dondru ben taki, èn san disi ben wani taki gi salfu kristen na ini 1919?
16 Na ini Openbaring 10:3, 4 Yohannes e taki a ben yere fa „den seibi dondru” ben opo den sten. A ben wani skrifi san a ben yere, ma a e ferteri: „Mi ben yere wan sten fu hemel taki: ’Poti wan seigel tapu den sani di den seibi dondru ben taki èn no skrifi den.’” A de krin taki a no ben de na ten ete fu dati taki den sortu bodoi disi ben tyari kon na doro. Na presi fu dati Yohannes ben kisi fu yere fu teki na pikin bukulolo èn nyan en. Den seibi dondru gersi taki den e agersi den prakseri fu Yehovah (Psalm 29:3; Yohannes 12:28, 29; Openbaring 4:5). Na ini 1919, di salfu kristenna agersi fasi ben nyan na pikin bukulolo, na ten no ben doro dati den kisi wan inzicht dorodoro na ini den prakseri fu Yehovah. (Teki gersi nanga Daniël 12:8, 9.) Ma sondro fu frede den ben o du wroko nanga san den ben frustan èn ben sori taki den de warti fu kisi moro yeye leti.
17. San na wantu fu den nyun inzicht di Yehovah ben gi en pipel na ini den yari 1919?
17 Dan den ben kisi na ini a waka fu den yari wan proressief moro krin inzicht fu a wani fu Yehovah. Na so fu eksempre den ben go frustan taki den skapu fu Yesus agersitori srefi bifo Armageddon kaba ben sa prati fu den bokoboko (Mattéus 25:31-46). Den ben si taki na gebortu fu na Kownukondre na ini 1914 ben de wan kontru fu Openbaring 12. Den ben kisi wan moro dipi frustan fu na prensparifasi fu Yehovah nen, èn den ben leri suma trutru de a bigi ipi fu Openbaring 7. Fa na kon na krin safrisafri fu den sani disi ben gi fertrow na a pipel fu Gado! — Odo 4:18; 2 Petrus 1:19.
18. Ini a du fu sortu aparti dienstgrani Gado pipel abi wan prati na ini a ten fu na dei fu Masra èn sortu frustan fu sani disi ben bow na ini wi ati?
18 Na asrefi ten Yehovah ben fertrow en grontapu dienstkneti fu gi den aparti dienstgrani. Na ini wan kefarlek bigi visioen di ben meki indruk Yohannes ben si engel ben meki tego bun nyunsu bekenti gi. libisma, e barwroko gi na fadon fu Babylon a bigiwan èn fu luku bun fu no kisi na marki fu na meti (Openbaring 14:14-16). Aladi sondro degedege engel ben e luku a tapu taki den dienstgrani di fu Gado ben du, toku a ben de libisma, Yehovah Kotoigi na grontapu, di ben ferteri den boskopu disi na den libisma. Yohannes ben si ooktu fa Yesus e tyari „na koti fu nyanyan fu a grontapu” komakandra (Openbaring 14:14-16). Ma a ben tyari na nyanyan disi di koti kon makandra nanga yepi fu na wroko fu en onderdaan na grontapu di ben preiki na Kownukondre èn ben meki disipel (Mattéus 24:14; 28:19, 20). Fa a de wan grani fu abi wan prati nanga den engel èn nanga Yesus Kristus srefi ini a du fu den sortu prenspari dienstgrani disi! Te wi e du disi dan wi e firi wisrefi trutru ini wánfasi nanga Yehovah bigi hemel organisatie fu getrow yeye meki-sani di wi no kan si.
Kibri fu na sei fu Gado
19. (a) San sa de na heimarki fu Satan feianti fasi teige Gado pipel? (b) Suma sa wini ini na lasti strei?
19 Omoro na kaba fu en grontapu e kon krosibei, moro Satan sa tyari druk kon tapu kristensma. Na heimarki fu en feiantifasi Ezechiël 38 nanga 39 e skrifi fu en, pe na profeitifasi den e kari en Gog fu Magog. Leki fa na profeititori disi di santa yeye ben meki den skrifi dan Satan sa du wan lasti bigi aanval ini wan muiti fu pori a pipel fu Gado wan dei èn fu alaten. A sa doro a marki dati? Openbaring e piki: „Den tin tutu [den disi ten „kownu” ofu tiriman] . . . sa strei teige a Lam èn a Lam sa wini den, bika en na Masra fu den Masra èn Kownu fu den kownu. Ooktu den wan di den kari èn den wan di den teki èn den getrowwan nanga en sa du disi” (Openbaring 17:12, 14). Getrow kristen seiker sa wini te den tan getrow na den bigi Kownu di e wini. Den srudati makti fu Gog sa wai puru krinkrin. — Ezechiël 39:3, 4, 17-19; Openbaring 19:17-21.
20. Sortu blesi na dei fu Masra o tyari gi getrow kristen te a bigi benawtu doro?
20 Na dei fu Masra wani taki sobun ferlusu gi a pipel fu Gado. Den sma fu den salfuwan di de ete na grontapu te na bigi benawtu doro, sa de seiker fu na hemel posisi fu den, èn sa de nanga na faste bosroiti fu tan getrow te na dede (Openbaring 7:1-3; 2 Timóteus 4:6-8). Na bigi ipi sa tan ooktu na libi èn Yesus „sa tyari den go na a fonten fu watra fu libi. Èn Gado sa figi puru ala watra-ai na den ai” (Openbaring 7:14-17). Fa disi sa de wan tumsi moi paiman gi getrow horidoro!
21. San sa psa na grontapu baka na bigi benawtu ini a dei fu Masra?
21 Now na dei fu Masra e go na ini wan tumsi moi ten: na dusunyari tiri fu Kristus Yesus (Openbaring 20:6, 11-15). Na liba fu watr a fu libi, di Openbaring èn Ezechiël taki na fesi fu en, sa lon komoto fu a troon fu Yehovah go na den libisma, èn den sma di e dringi fu en, safrisafri sa tyari kon kisi libisma volmaaktifasi (Ezechiël 47:1-12; Openbaring 22:1, 2). Hades sa kon leigi, èn milyardmilyard sma di dede ooktu sa abi na okasi fu dringi fu na liba disi. — Yohannes 5:28, 29.
22. Sortu tumsi prenspari sani di o psa e wakti libisma na a kaba fu na dusunyari tiri fu Kristus?
22 Na a kaba fu na dusunyari tiri den libisma sa tyari kon kisi volmaaktifasi. Fa a sa de wan ten di fiti fu tyari Satan kon baka fu na laste tron tapu na grontapu toneel. Agen a sa proberi fu kori libisma èn son sma srefi sa go waka na en baka dan. Den sma disi nanga furu betekenis den e kari . . . Gog nanga Mago, fudi den sa sori na srefi goddelowsu yeye leki ’na ipi fu Gog’ na ini Ezechiël profeititori ben sori. Ma na opruru yeye fu den di fu tego sa puru a pasi te den sa trowe den go na ini na agersi se fu faya, makandra nanga Satan srefi nanga en ogri yeye (Openbaring 20:7-10; Ezechiël 39:11). Trutru wan blesi tamara e wakti den sma di ini na ten fu na lasti tesi disi tan getrow, èn dan na libismaras di tyari kon de volmaakti sa tron wan nanga Yehovah regtvaardiki universele organisatie. Yehovah Gado srefi sa de „ala sani gi ibriwan sma”! — 1 Korinte 10:24, 28; Openbaring 20:5.
23. Sortu rai fu Paulus e ferdini seiker wi prakseri te wi e luku a ten pe wi e libi na ini?
23 Sortu bigi blesi di wi no kan tyari kon na wi fesi e wakti wi efu wi horidoro. Prakseri dati na dei fu Masra kon now krosibei kaba. Nownow kaba tumsi moi sani e psa. Fa den wortu fu Paulus fiti fu dat’ede: „Meki wi no stop fu du san de tumsi bun. bika na a yoisti ten wi sa koti efu wi no kon weri” (Galasia 6:9). Iya, meki wi „no stop fu du san de tumsi bun”, ini a dei fu Masra. Efu wi horidoro, dan a dei disi sa tyari gi ibriwan fu wi tego wini.
Yu kan tyari disi kon a krin?
◻ San na a fosi pisi fu na pori fu Satan grontapu?
◻ Fa Yesus sa klari a wini fu en tapu en feianti?
◻ Fa Satan ben strei na ini a ten fu a dei fu Masra teige Yehovah Kotoigi?
◻ Sortu aparti blesi Gado pipel ben kisi sensi 1919?
◻ San yusrefi ben teki leki bosroiti, te yu luku taki wi de sofara ini a lon fu a ten?
[Prenki na tapu bladzijde 7]
San miti na owru Yerusalem e meki wi si san sa miti Babylon na Bigiwan dyonsro