Kon fri te den e tjari Jesus Krestes kon na krin
„Prisiri . . . so taki joe sa prisiri èn breiti pasa marki ini a ten te en glori sa tjari kon na krin.” — 1 PETRUS 4:13.
1. Fa Jehovah ben meki den foetoeboi foe en kon moro goedoe?
JEHOVAH meki den Kotoigi foe en kon goedoe nanga foeroe presenti. Leki wi Gran Leriman, a gi wi wan dorodoro sabi foe en wani nanga prakseri. Nanga jepi foe en santa jeje, a kweki ini wi a man di wi man foe skèin leti moro fara sondro frede. Nanga a jepi foe santa jeje, na apostel Paulus e froeteri wi ini 1 Korentesma 1:6, 7: „A gi foe kotoigi foe Krestes ben poti steifi na oenoe mindri, so taki oenoe no mankeri no wan presenti srefisrefi, ala di oenoe e wakti nanga angri taki wi Masra Jesus Krestes kon na krin.”
2. Sortoe prisiri sani wi kan froewakti te „den sa tjari wi Masra Jesus Krestes kon na krin”?
2 „Den sa tjari wi Masra Jesus Krestes kon na krin” — san dati wani taki? A e sori tapoe a ten te den e tjari Jesus kon na krin leki wan glori Kownoe, di e doe sani foe pai den getrow bakaman foe en èn foe teki refensi tapoe den ogrisma. So leki fa 1 Petrus 4:13 e sori, a sa de wan ten foe den kresten di e kibri den soifri retifasi èn di salfoe nanga santa jeje, èn den loyaal kompe foe den foe na bigi ipi, foe „prisiri èn breiti pasa marki”, bika disi na a marki foe a kaba foe a seti foe sani foe Satan.
3. Fa wi moesoe tanapoe steifi so leki den brada foe wi na Tesalonika ben doe?
3 Omoro a ten dati e kon krosibei, omoro Satan, ini na atibron foe en, e meki a druk na wi tapoe kon moro hebi. Leki wan krasi lew, a e proeberi foe swari wi. Wi moesoe tanapoe steifi! (1 Petrus 5:8-10) Di den brada foe wi na Tesalonika foe owroeten, di ben de njoen ini a waarheid, den ben pina foe banawtoe di ben de a srefi leki denwan di foeroe foe den Kotoigi foe Jehovah ben ondrofeni ini a ten disi. Foe dati ede, den wortoe di na apostel Paulus ben skrifi gi den, wani taki foeroe gi wi. A ben skrifi: „A de regtfardiki foe a sei foe Gado foe pai banawtoe baka na denwan di e tjari banawtoe kon gi oenoe, ma gi oenoe di e pina foe banawtoe ede, froelekti makandra nanga wi te den sa tjari Masra Jesus kon na krin, komoto na hemel, nanga den tranga engel foe en, ini wan flam faja, te a e teki refensi na tapoe den di no sabi Gado èn tapoe den sma di no e gi jesi na a boen njoensoe foe wi Masra Jesus” (2 Tesalonikasma 1:6-8). Ija, froelekti sa kon!
4. Foe san ede den kerki fesiman e spotoe nanga a kroetoe di Jesus sa tjari te den e tjari Jesus kon na krin?
4 Ini a ten foe Paulus a ben de den djoe kerki fesiman di ben meki foeroe foe a banawtoe kon. Na a srefi fasi ini a ten disi, gens kontrari den Kotoigi foe Jehovah di lobi vrede, ben kon nofotron foe denwan di e taki dati den e teki presi gi Gado, spesroetoe den kerki fesiman foe a krestenhèit, ben soetoe faja gi dati. Den man disi e taki dati den sabi Gado, ma den e trowe a „wán Jehovah” foe bijbel, èn e poti na en presi wan dangra Driwánfasi (Markus 12:29). Den no e gi jesi na a boen njoensoe foe wi Masra Jesus èn den e loekoe na libisma tiri foe tjari froelekti èn e trowe a boen njoensoe foe Krestes Kownoekondre foe regtfardikifasi di e kon. Ala den relisi gensman disi moesoe kisi pori na a ten te „den sa tjari Masra Jesus kon na krin, komoto na hemel”!
A „kon” foe Jesus Krestes
5. Fa den e prenki, ini Mateus 24:29, 30, a tjari di den tjari Jesus kon na krin, na wan fasi fa sma e si sani krin na den fesi?
5 Ini Mateus 24:29, 30 Jesus e taki foe a tjari kon na krin dati, na wan fasi fa sma e si sani krin na den fesi. Te a e froeteri foe den difrenti pisi foe a marki foe en denoja èn foe a kaba foe a seti foe sani, a e taki: „Son sa kon doengroe èn moenkenki no sa gi a leti foe en èn den stari sa fadon komoto na hemel èn den krakti foe den hemel sa seki.” Na a ten dati „a marki foe a Manpikin foe libisma sa sori ensrefi na hemel”. Den nâsi foe grontapoe „sa bigin bari krei èn den sa si a Manpikin foe libisma [a Mesias Kownoe foe Gado] e kon na tapoe den wolkoe foe hemel nanga krakti èn bigi glori”. A „kon” disi, er·khoʹme·non ini Grikitongo, e sori na a kon di Jesus e kon leki a Sma di e teki refensi gi Jehovah.
6, 7. Fa a kan taki „ibri ai sa si en”, èn soema na den sma di de na ini toe?
6 A „kon” disi, na apostel Johanes e froeteri toe foe en na Openbaring 1:7, pe a e taki: „Loekoe! A e kon nanga den wolkoe.” O, den feanti dati no sa si Jesus nanga den troetroe ai, bika „den wolkoe” wani taki dati a e kon sondro foe sma ai man si en foe tjari kroetoe kon. Efoe no moro leki libisma ben sa si en hemel glori nanga den soso ai, den ben sa kon breni, neleki Saulus, di ben kon breni na a pasi foe go na Damaskus, di a glori Jesus ben sori ensrefi na en ini wan bigi leti di ben koti faja. — Tori foe den Apostel 9:3-8; 22:6-11.
7 A tori ini Openbaring e taki dati „ibri ai sa si en, den sma di ben djoekoe en toe; èn ala den lo foe grontapoe sa bigin sari foe en ede”. Disi wani taki dati den gensman na grontapoe sa kon froestan te a pori e kon, di Jesus e tjari kon na den tapoe, taki a kon nanga krakti èn bigi glori leki a Sma di e tjari strafoe kon foe Jehovah. Foe san ede den e taki foe den sma disi leki „den sma di ben djoekoe en”? Na foe di a bitafasi foe den gi den foetoeboi foe Jehovah ini a ten disi de a srefi leki di foe den froefolgoeman foe Jesus. Den sa ’bigin sari troetroe foe en ede’.
8. Sortoe warskow Jesus so boen leki Paulus e gi ini a tori foe wan pori di ben o kon wantronso?
8 Fa a dei dati foe a teki di Jehovah sa teki refensi sa kon? Ini a profeititori ini Lukas 21, Jesus e froeteri foe den rampoe sani di de leki wan marki foe en denoja sensi 1914. Dan, ini vers 34 nanga 35, Jesus e warskow: „Poti prakseri na oensrefi, taki noiti oen ati kon hebi nanga njan pasa marki èn hebi dringi èn sorgoe foe a libi, èn a dei dati kon wantronso ini wán momenti, na oenoe tapoe leki wan trapoe. Bika a sa kon na tapoe ala sma di e libi na heri grontapoe.” Ija, a dei dati di Jehovah sa teki refensi e kon wantronso, ini wán momenti! Ini 1 Tesalonikasma 5:2, 3 na apostel Paulus e taki dati disi de troe, te a e taki: „A dei foe Jehovah e kon soifri neleki wan foefoeroeman na neti. Te den e taki: ’Vrede nanga seikerfasi!’ dan wantronso pori sa kon na den tapoe ini wán momenti.” Srefi now den nâsi e taki foe vrede nanga seikerfasi èn den abi na prakseri foe tranga a Verenigde Nâsi, foe di den wani poti sroedati legre foe hori ai tapoe den kontren pe doronomo trobi noso feti de.
9. Gi soema a ’leti e skèin kon’ èn foe san ede?
9 Ini vers 4 nanga 5, na apostel e go moro fara foe taigi wi: „Ma oenoe, brada, oenoe no de na doengroe, so taki a dei dati moesoe teki oenoe abra neleki a ben sa teki foefoeroeman abra, foe di oenoe alamala na manpikin foe leti èn manpikin foe dei. Wi a no foe neti, wi a no foe doengroe.” Wi e prisiri foe de manpikin foe leti — tjariman foe leti gi tra sma di e angri foe kisi troe vrede nanga seikerfasi ini a njoen grontapoe foe Gado. Ini Psalm 97:10, 11, wi e leisi: „O, oenoe di lobi Jehovah, no wani si ogri na ai. A e kibri den sili foe den loyaal sma foe en; komoto na a anoe foe den ogrisma a e fri den. Leti srefi ben koti kon gi a regtfardikiwan èn prisiri srefi gi denwan di de opregti ini ati.”
A fasi fa sani di sa pasa, sa waka baka makandra
10. Sortoe warskow wi moesoe hori na prakseri ini a tori foe Gado en dei foe teki refensi? (Openbaring 16:15)
10 Na sortoe fasi sani di sa pasa sa waka baka makandra te a bigi banawtoe naki grontapoe? Meki wi go na Openbaring kapitel 16. Loekoe, so leki den e froeteri ini vers 13 te nanga 16, taki ogri jeje, di no krin, e tjari den nâsi foe heri grontapoe kon makandra na Harmagedon, na orlokoe foe a bigi dei foe Gado na Almaktiwan. Agen den e poti krakti na tapoe a fasi fa a dei foe aksi frantiwortoe sa kon neleki wan foefoeroeman èn wi e kisi a warskow foe tan na ai — foe tan weri wi krosi na jeje fasi di e marki wi foe kisi froeloesoe. A ten doro foe kroetoe den pipel foe grontapoe, den nâsi, nanga — wan tra sma moro. Soema na dati?
11. Fa na oema ini Openbaring 17:5 ben meki sma kon sabi en?
11 A de wan agersi oema di ben proeberi troetroe foe meki leki en na „wan prenspari sma”. Den taki foe en ini Openbaring 17:5 leki „wan kibritori: ’Babilon a Bigiwan, a mama foe den hoeroe èn foe den tegoe sani foe grontapoe’”. Ma a no de moro langa wan kibritori gi den Kotoigi foe Jehovah. A meki sma kon sabi en krinkrin leki a grontapoe makti foe falsi fasi foe anbegi, di den sekte foe krestenhèit de a prenspari pisi foe en. A lobi di a lobi teki prati na politiek afersi, a kon di a e kon „droengoe foe a broedoe foe den santawan” foe di a e froefolgoe den troe kresten èn a frantiwortoe di a abi gi a broedoe „foe ala sma di ben srakti na grontapoe”, so srefi den moro leki wán miljoen sma di den kiri ini den orlokoe foe a di foe twenti jarihondro disi wawan, de wan tegoe sani ini Jehovah ai. — Openbaring 17:2, 6; 18:24.
12. Foe san ede den sèkte foe a krestenhèit sa kisi pori?
12 A moro ogriwan foe ala den sani dati, na den sekte foe a krestenhèit di ben tjari sjen kon tapoe a nen foe a Gado, foe soema den e taki na wan hoigri fasi, taki den e teki presi gi en. Den ben leri sma filosofie foe Babilon nanga Grikikondre na presi foe leri den a soifri Wortoe foe Gado èn den ben jepi toe foe heri nâsi no hori densrefi moro na joisti markitiki, foe di den e feni a fri fasi foe libi, di no e sori respeki gi bijbel gronprakseri, boen. Den wortoe foe Jakobus 5:1, 5 e kroetoe den gridi bisnisman na den mindri, di e wroko na wan bidrigifasi: „We now, oenoe goedoeman, krei èn bari foe den pina di e kon na oenoe tapoe. Oenoe ben libi leki goedoeman na grontapoe èn ben gi oensrefi abra na a njanboen foe den lostoe foe oenoe. Èn oenoe ben meki na ati foe oenoe kon fatoe na a dei te den srakti sani.”
Poeroe Babilon a Bigiwan na pasi!
13. Fa a bigin foe a bigi banawtoe sa kon èn na tapoe sortoe tranga fanowdoe sani den e poti krakti ini Openbaring 18:4, 5?
13 A bigi banawtoe e bigin nanga a tjari di Jehovah e tjari a kroetoe strafoe kon gi Babilon a Bigiwan. Openbaring 17:15-18 e froeteri na wan fasi di sma kan si sani krin na den fesi foe a „prakseri” foe Gado — foe gebroiki „tin toetoe”, tranga krakti foe na VN „ogri meti”, di abi foeroe nâsi leki memre, foe poeroe Babilon a Bigiwan na pasi. „Èn den tin toetoe di joe ben si, èn a ogri meti, den dati no sa wani si a hoeroe na ai èn den sa meki a kon leigi èn soso skin èn den sa njan den pisi foe en skin èn sa bron en krinkrin nanga faja. Bikasi Gado poti ini den ati foe den doe en prakseri.” A no de foe froewondroe taki wan sten foe hemel ben bari wan prenspari warskow ini Openbaring 18:4, 5: „Komoto na en mindri, mi pipel, efoe oenoe no wani kisi prati nanga en ini en sondoe, èn efoe oenoe no wani kisi afoe foe en plaag. Bikasi den sondoe foe en ben hei ensrefi go te na hemel èn Gado ben tjari en ongeregteghèit kon na prakseri.” A kari e go doro: Koti ala banti di oenoe abi nanga falsi relisi, bifosi a lati toemoesi!
14. Soema sa sari foe a pori foe Babilon a Bigiwan èn foe san ede?
14 Fa grontapoe sa teki a pori foe Babilon a Bigiwan? Foe farawe, kroektoe politiekman — „kownoe foe grontapoe” — e sari foe en bikasi someni jarihondro den ben prisiri makandra ini a jeje hoeroedoe foe den. Den gridi bisnisman, „seriman di e rèis . . . , di ben kon goedoe foe en ede”, e krei èn e row foe en toe. Den disi e go tanapoe farawe foe en toe èn e taki: „O fa a sari, o fa a sari — a bigi foto, di weri fini linnen nanga purper nanga redi krosi èn di lai nanga moimoi gowtoe sani nanga diri ston nanga parel, bikasi ini wán joeroe so wan bigi goedoe pori!” Ala den pranpran foe den krosi di den gebroiki ini kerki nanga den kefarlek moi di den bigi katedraal foe grontapoe moi, sa gowe foe têgo! (Openbaring 18:9-17) Ma ala sma sa row foe Babilon a Bigiwan?
15, 16. Sortoe reide foe abi prisiri a pipel foe Gado sa abi?
15 Openbaring 18:20, 21 e piki: „Oenoe prisiri foe en, hemel, so srefi oenoe santawan nanga oenoe apostel nanga oenoe profeiti, bika gi oenoe Gado ben aksi tranga foe a kisi a kroetoe strafoe foe en!” Leki wan bigi miriston di den fringi go na ini se, „nanga wan esi-esi fringi den sa [ben] fringi Babilon a bigi foto go na ondro gowe èn a no sa de foe feni noiti moro”.
16 Fa dati na wan reide foe prisiri! Openbaring 19:1-8 e tjari disi kon na doro. Fo tron a kari, „Prèise Jah, oen pipel!”, de foe jere komoto na hemel. Den fosi dri Haleloeja disi e prèise Jehovah bikasi a ben tjari wan regtfardiki kroetoe kon gi a takroe-nen hoeroe-oema, Babilon a Bigiwan. A grontapoe makti foe falsi fasi foe anbegi no de moro! Wan sten di komoto na a kownoestoeroe foe Gado, e taki: „Prèise wi Gado, oenoe alamala di de en srafoe, di e frede en, den pikinwan èn den bigiwan.” Fa disi sa de wan bigi grani gi wi foe abi prati na a singi dati!
A trow foe a Pikin Skapoe
17. Te joe e agersi Openbaring 11:17 nanga 19:6, dan ini a tori foe sortoe toe sani Jehovah e bigin tiri leki Kownoe?
17 A di foe fo Haleloeja e meki wi kon sabi wan tra tori: „Prèise Jah, oen pipel bika Jehovah wi Gado, na Almaktiwan, bigin foe tiri leki kownoe.” Ma a no so wan sortoe refrein den ben singi ini Openbaring 11:17? Drape wi e leisi: „Wi taki joe tangi, Jehovah Gado, na Almaktiwan, . . . bikasi joe ben teki joe bigi krakti èn bigin tiri leki kownoe.” Ija. Ma a kontekst foe Openbaring 11:17 e sori na a opo di Jehovah opo a Mesias Kownoekondre ini 1914 „foe tjari ala nâsi nanga wan isri tiki” (Openbaring 12:5). Openbaring 19:6 de ini a kontekst foe a pori foe Babilon a Bigiwan. Nanga a poeroe foe fasi foe anbegi di de leki wan hoeroe-oema, a Gadofasi foe Jehovah sa tan regtfardiki foe têgo. Na anbegi foe en leki A Moro Hei Soeverein èn Kownoe sa de a wan di sa tan now èn foe têgo!
18. A poeroe di den e poeroe Babilon a Bigiwan na pasi e opo a pasi gi sortoe prisiri meki bekènti?
18 Foe dati ede, a prisiri njoensoe kan meki bekènti: „Meki wi prisiri èn meki wi breiti pasa marki, èn meki wi gi [Jah] glori, bikasi a trow foe a Pikin Skapoe doro èn en wefi sreka ensrefi. Ija, den ben gi en a grani foe weri krosi foe brenki èn krin fini linnen, bikasi a fini linnen e prenki den regtfardiki doe foe den santawan” (Openbaring 19:7, 8). Oten den salfoewan di de na grontapoe ete sa kisi na opobaka foe den foe go na hemel, no taki finifini. Ma a kontekst djaso e gi wi a djaranti, taki a teki di den sa teki prati na a trow foe a Pikin Skapoe, Jesus Krestes, sa de wan prisiri ten èn moro foeroe ete foe di densrefi ben sa de kotoigi foe a lagi di den sa lagi a takroe-nen hoeroe-oema, Babilon a Bigiwan.
A grontapoe foe Satan e kisi pori
19. Foe sortoe tra sani den e taki ini Openbaring 19:11-21?
19 A weti asi di den ben taki foe en kaba ini Openbaring 6:2 de foe si now baka. Wi e leisi ini Openbaring 19:11: „Èn a sma di sidon na [a weti asi] tapoe, nen Getrow èn Troe èn a e kroetoe èn e feti regtfardikifasi.” So boen, a „Kownoe foe den kownoe èn Masra foe den masra” e hari go foe naki den nâsi èn foe masi „a winpersbaki foe na atibron foe a refensi foe Gado na Almaktiwan”. Foe soso „den kownoe foe grontapoe nanga den legre” e kon makandra foe go feti a feti foe HarMagedon. A Tjariman foe a weti asi e tjari en fektori na wan kaba. Noti e tan abra foe Satan grontapoe organisâsi. — Openbaring 19:12-21.
20. San e pasa nanga Didibri srefi?
20 Ma san e pasa nanga Satan Didibri srefi? Ini Openbaring 20:1-6, den e prenki Krestes Jesus leki „wan engel di e komoto na hemel, di abi a sroto foe a peti di no abi gron, nanga wan bigi keti na en anoe”. A e kisi a draak, a fosi Sneki, di de Didibri nanga Satan, e tai en, e fringi en na ini a peti di no abi gron, e sroto èn e poti wan lakstampoe na en tapoe. Foe di Satan no sa de na pasi moro èn no sa man foe kori den nâsi moro, a glori Milenium Tiri foe a Pikin Skapoe nanga en trowmisi e bigin. Watra-ai foe di sma e sari, no sa de moro! A dede di wi e dede foe Adam ede no sa de moro! No wan low, no wan babari, no wan skin-ati! „Den fosi sani pasa gowe.” — Openbaring 21:4.
21. Ala di wi e wakti fajafaja foe den tjari Jesus Krestes kon na krin, dan san moesoe de wi faste bosroiti?
21 Ala di wi e wakti fajafaja te den sa tjari wi Masra Jesus Krestes kon na krin, meki wi sori faja foe froeteri trawan foe Gado en lobi pramisi foe wan Kownoekondre. Froeloesoe de krosibei! Meki wi go na fesi, ala ten na fesi nomonomo, leki pikin di kisi a leti foe a Soeverein Masra Jehovah!
Wan sjatoe loekoe
◻ San e sori taki a ten te den sa tjari Jesus Krestes kon na krin, de krosibei?
◻ Fa a dei foe Jehovah foe teki refensi sa doro?
◻ Fa „sma di lobi Jehovah” moesoe si a disiten situwâsi foe grontapoe?
◻ San sa de a fasi fa sani di sa pasa sa waka baka makandra te a bigi banawtoe e kon?
[Prenki na tapoe bladzijde 19]
Jesus ’e kon nanga den wolkoe’, sondro foe sma ai man si en, foe tjari kroetoe kon
[Prenki na tapoe bladzijde 21]
Heri esi falsi relisi, Satan en takroe seti foe sani, nanga Satan srefi sa kisi pori