Yob
8 Dan a Suwasma Bildad taki:
2 „O langa yu o tan taki den sani disi?
Den sani di yu e taki de leki wan tranga winti nomo.
3 Yu denki taki Gado o krutu sani na wan fasi di no bun?
Na Almaktiwan no o du san reti?
4 Efu den pkin fu yu sondu teige en,
dan a strafu den gi na ogri di den du.
5 Ma efu yu suku Gado
èn yu begi na Almaktiwan fu sori sar’ati gi yu,
6 efu yu ati krin èn yu du san reti,
dan a o luku yu.*
A o poti yu baka na a presi di yu abi reti na tapu.
7 Kande yu ben pkin fosi,
ma bakaten a ben o meki yu kon bigi.
8 Go aksi den bigisma fu yu
èn poti prakseri na den sani di den afo fu den kon sabi.
9 Bika wi, na esde wi gebore. Wi no sabi noti.
A libi fu wi na grontapu de leki wan skaduw.
11 Papirus-grasi man gro sondro wan swampu?
Warimbo man kon bigi sondro watra?
12 Den o kon drei fosi ala den tra sortu grasi,
awinsi den kisi bromki kba èn sma no hari den puru ete.
13 Na so a libi de gi* ala den sma di fergiti Gado.
A howpu fu wan ogri sma* o lasi gwe.
14 Ala den sani di a ben e fertrow na tapu na fu soso.
Den de leki wan oso di meki fu anansititei.
15 A o anga na en oso, ma na oso o broko fadon.
A o wani grabu en hori, ma a no o tan tnapu.
16 Biginbigin a de leki wan bon di e kisi nofo watra nanga son.
Na ini a dyari den taki fu en e panya go na ala sei.
18 Ma te wan sma rutu en puru fu en presi,*
a presi dati o strei taki a no sabi en. A o taki: ’Noiti mi no si yu.’
19 Na so a o dede gwe
èn trawan o bigin gro na a doti pe a ben de.