Gi den Filipisma

3 A lasti sani mi brada, na taki unu musu tan prisiri fu Masra ede. Mi no abi trobi fu skrifi unu den srefi sani baka, fu di disi kan yepi unu fu wai pasi gi ogri.

2 Luku bun nanga den dagu. Luku bun nanga den sma di e du ogri. Luku bun nanga den sma di wani taki unu musu besnèi.* 3 Na wi na den wan di besnèi trutru, fu di Gado en yeye e yepi wi fu du a wroko fu en. Wi e meki bigi fu den sani di Krestes Yesus du èn wi no e fertrow tapu den sani di libisma e fertrow, 4 aladi mi, moro leki iniwan sma, ben kan fertrow tapu den sani di libisma e fertrow.

Efu tra sma de di denki taki den kan fertrow tapu den sani di libisma e fertrow, dan mi kan du dati moro srefi. 5 Mi besnèi tapu a di fu aiti dei. Mi na wan sma fu Israel fu a lo fu Benyamin, wan Hebrewsma. Mi p’pa nanga m’ma ben de Hebrewsma tu. Mi ben de wan Fariseiman di ben e hori ensrefi finfini na a wet. 6 Mi ben de nomonomo fu du ogri nanga a gemeente èn mi ben e du finfini san a wet e taki. Dati meki sma no ben man feni fowtu na mi tapu. 7 Ma fu Krestes ede mi kon si den sani di ben e tyari wini kon gi mi, leki noti.* 8 Iya, mi e si ala sani leki noti trutru, fu di den sani di mi kon sabi fu Krestes Yesus, mi Masra, warti moro ala sani. Fu en ede mi drai baka gi ala den sani dati. Mi e si den leki wan ipi doti, so taki Krestes kan feni mi bun. 9 Na so mi kan de wán nanga en. Mi no tron wan ret’ati sma fu di mi e hori a wet, ma mi tron wan ret’ati sma fu di mi e bribi na ini Krestes. Iya, Gado e si mi leki wan ret’ati sma fu di mi abi bribi. 10 Mi wani kon sabi suma na Krestes èn mi wani kon sabi a krakti fu a sma di gi en libi baka. Mi wani pina leki fa en pina èn dede leki fa en dede, 11 fu si efu mi man de wan fu den foswan di o opo baka.

12 A no taki mi kisi kba san mi e ferwakti of taki mi no abi sondu moro. Ma mi e du muiti fu si efu mi srefi kan grabu a sani hori gi san Krestes Yesus ben teki mi.* 13 Brada, mi no e waka nanga a denki taki mi grabu en hori kba. Ma wán sani de seiker: Mi fergiti den sani di de na mi baka èn mi e meki tranga muiti fu lon go miti den sani di de na mi fesi. 14 Dati meki mi e lon nanga a marki fu kisi a pai fu Gado. Dati na a libi na ini hemel di Gado o gi den sma di a meki Yesus Krestes kari. 15 Fu dati ede, meki wi alamala di kon lepi kba abi a denki disi. Ma efu sonwan fu unu e denki tra fasi, dan Gado o sori unu san na a yoisti denki di un musu abi. 16 Ma awinsi fa a no fa, efu wi go na fesi kba, dan meki wi tan go na fesi na a srefi fasi.

17 Brada, un alamala musu teki na eksempre fu mi. Tan luku den sma di e sori taki den e teki na eksempre di wi gi unu. 18 Bika yu abi furu sma di e tyari densrefi leki feanti fu a pinapostu* fu Krestes. Mi ben taki fu den omeni leisi kba, ma now mi e krei te mi e taki fu den. 19 Den o dede te fu kba. Den bere na den gado. Den e meki bigi fu sani di den ben musu syen fu den. Na soso grontapu sani den e prakseri. 20 Ma a presi pe wi o tan de na hemel. Wi e wakti fayafaya tapu wan ferlusuman di o kmoto fu drape, dati na Masra Yesus Krestes. 21 A o gebroiki a bigi krakti fu en fu poti ala sani na en ondro èn fu kenki a swaki skin fu wi fu kon de leki a moi skin fu en di abi bigi glori.