Yesaya
35 A sabana nanga den presi di kon drei o bari fu prisiri.
Iya, a drei sabana o breiti srefsrefi èn a o lai bromki.*
2 Fu tru, a o gi furu bromki.
A o breiti srefsrefi èn a o bari fu prisiri.
A o kisi a glori fu Libanon
èn a o moi leki Karmel nanga Saron.
Den o si a glori fu Yehovah, iya, den o si a moi fu wi Gado.
3 Meki den swaki anu kon tranga
èn meki den kindi di e beifi kon steifi.
4 Taigi den wan di e frede:
„Abi dek’ati. No frede.
Luku, un eigi Gado o kon fu puru atibron tapu den feanti fu unu.
Iya, Gado o kon fu pai den fu den ogri di den du.
A o kon fu ferlusu unu.”
5 Na a ten dati den ai fu den breniwan o si
èn den yesi fu den dofuwan o yere.
6 Na a ten dati lan sma o dyompo leki dia.
A tongo fu den babaw-wan o bari fu prisiri.
Na ini den sabana watra o kuku kon na tapu
èn liba o lon na den drei sabana.
7 A drei gron o tron leki wan swampu
èn a gron di no abi watra o tron leki wan watra-olo.
Na a presi pe den sabanadagu ben e tan,
grun grasi, warimbo-grasi nanga papirus-grasi* o gro.
8 Wan bigi pasi o de drape.
Den o kari en a Santa Pasi.
Den sma di no krin no o waka na tapu a pasi dati.
A de soso gi den sma di abi a reti fu waka na tapu.
Nowan sma di e du dondon sani o waka na tapu.
9 Nowan lew o de drape
èn nowan ogri busmeti o kon na tapu a pasi.
Iya, nowan fu den o de drape.
Na soso den sma di bai kon fri o waka drape.
10 Den sma di Yehovah bai kon fri o drai kon baka na Sion.
Den o bari fu prisiri èn den o breiti fu ala ten.
Na soso prisiri den o prisiri
èn den no o sabi moro san na geme nanga sari.