7 A kon di Krestes kon (Parusia)

A Griki wortu parusia vertaal leki „kon”. Disi wani taki „de na yu sei”, noso „de”. A skrifi 24 leisi na ini den Kresten Griki Buku fu Bijbel èn nofo tron a skrifi te den e taki fu a ten te Krestes kon nanga en Mesias Kownukondre.—Mt 24:3.

Furu Bijbel vertaal a wortu disi na difrenti fasi. Aladi den e vertaal parusia leki „de” na ini son tekst, furu tron den vertaal en leki „e kon”. Fu dati ede sma e taki dati Krestes Yesus o kon fu a di fu tu leisi. Te sma e vertaal a wortu parusia leki „e kon”, dan moro furu a abi fu du nanga te wan sma doro èn a no e sori san pasa baka te a sma doro kaba. Sabiman di e skrifi wortubuku e taki dati a wortu parusia, kan vertaal nanga „doro” èn nanga „de”, ma den e bribi tu taki a „de di wan sma de” na a moro prenspari sani di a wortu disi wani taki.

Tra buku di skrifi na ini Grikitongo e yepi tu fu frustan san a Griki wortu disi wani taki. Ma Bijbel srefi e yepi wi moro bun fu frustan san a wortu wani taki. Fu eksempre, na Filipisma 2:12, Paulus e taki dati den Kresten na ini Filipi no e gi yesi wawan te a „de” [parusiai] nanga den, ma den e gi yesi moro te a „no de” [apusiai] nanga den. Sosrefi, na ini 2 Korentesma 10:10, 11, Paulus taki dati son sma e taki fu en: „A e skrifi ala sortu kefalek brifi, ma te a de [parusia] dya a no gersi wan kefalek sma, èn na soso sani a e taki.” Baka dati Paulus taki: „Ma meki den sma dati hori na prakseri taki te wi kon [parontes] na unu, wi o du san wi skrifi na ini den brifi di wi no ben de [apontes] nanga unu.” (Luku sosrefi Fp 1:24-27.) Sobun, a abi fu du nanga ’de’ èn ’no de’. A no abi fu du nanga te a ben o kon noso te a ben o gowe.

A parusia fu Yesus a no te a o kon fu wan syatu pisi ten nomo, dan a e gowe esi-esi baka. Ma a ben o de wan pisi ten soleki fa a taki na ini Mateyus 24:37-39 nanga Lukas 17:26-30. Dyaso a e taki dati „a ten fu Noa” ben de leki „te a Manpikin fu libisma kon” (Lukas e taki „a ten fu a Manpikin fu libisma”). Sobun, Yesus no teki a ten fu en gersi nanga a Frudu nomo di ben o kon na a kaba fu a ten fu Noa. A ben sori tu taki a „kon” di a ben o kon èn a „ten” fu en ben o kon na wan kaba na wan srefi sortu fasi tu. Fu di „a ten fu Noa” ben teki furu yari langa, wi kan bribi taki „a ten fu a Manpikin fu libisma” ben o teki furu yari langa tu. A o kon na wan kaba te den wan di no ben teki na okasi fu kisi frulusu, kisi pori.

Sobun, a parusia fu Yesus no e taki fu a ten di a o kon, ma fu a ten te a de leki kownu.