Gado e bigin fu meki sani

ALA bun sani di wi abi, e kon fu Gado. Na en ben meki son fu gi wi leti na dei, èn munkenki nanga stari, so taki wi kan abi leti na neti. Èn Gado ben meki grontapu gi wi fu libi na tapu.

Ma son, munkenki, stari nanga grontapu no ben de den fosi sani di Gado ben meki. Yu sabi san a ben meki fosi? Gado ben meki sma leki ensrefi. Wi no man si den sma disi, neleki fa wi no man si Gado. Na ini Bijbel den e kari den sma disi engel. Gado ben meki den engel fu libi nanga en na hemel.

A fosi engel di Gado ben meki, ben de wan apartiwan. A ben de Gado fosi Manpikin, di ben wroko makandra nanga en Tata. A ben yepi Gado fu meki ala tra sani. A ben yepi Gado fu meki son, munkenki, stari nanga wi grontapu.

Fa grontapu ben tan na a ten dati? Na a bigin nowan sma ben man libi na tapu. Watra ben tapu en krinkrin. Ma Gado ben wani fu sma libi na grontapu. Fu dati ede a ben bigin fu sreka sani gi wi. San a ben du?

We, na a fosi presi grontapu ben abi leti fanowdu. Fu dati ede Gado ben meki a leti fu son skèin kon na grontapu na so wan fasi, taki neti nanga dei ben kon de. Baka dati, Gado ben meki a gron pusu kon na tapusei fu a watra.

Biginbigin noti no ben de na tapu a gron. A ben de soleki fa yu e si dya na tapu a prenki. Bromki, noso bon, noso meti no ben de. Fisi srefi no ben de na ini se. Gado ben musu du furu sani ete fu meki grontapu tron wan moi libipe.