Fu san ede den lasi den tanpe

LUKU san e pasa now! Den e poti Adam nanga Eva na dorosei fu a moi dyari fu Eden. Yu sabi fu san ede?

Fu di den ben du wan tumusi ogri sani. Dati meki Yehovah e strafu den. Yu sabi san den ben du?

Den ben du wan sani san Gado ben taigi den fu no du. Gado ben taigi den, taki den ben kan nyan fu den froktu fu den bon fu a dyari. Ma fu wán bon Gado ben taigi den fu no nyan, noso den ben o dede. Gado ben hori a bon dati gi ensrefi. Èn wi sabi taki a de wan fowtu sani fu teki wan sani di de fu wan tra sma, a no so? We, san ben pasa?

Wan dei di Eva ben de en wawan na ini a dyari, wan sneki ben taki nanga en. Go prakseri dati pikinso! A sneki ben taigi Eva fu nyan fu a bon di Gado ben taigi den fu no nyan. Now, Yehovah no ben meki sneki so, taki den ben man taki. Dati meki a ben musu de wan tra sma di ben e meki a sneki taki. Suma ben de dati?

A no ben de Adam. Sobun, a ben musu de wan fu den sma di Yehovah ben meki langa ten bifo a ben meki grontapu. Den sma dati na den engel èn wi no man si den. Wan fu den engel disi ben kon kisi bigimemre srefisrefi. A ben wani so te fu de wan tiriman leki Gado. A ben wani taki sma gi yesi na en na presi fu gi yesi na Yehovah. Na en ben de na engel di ben meki a sneki taki.

Na engel disi ben man fu kori Eva. Di a ben fruteri Eva, taki Eva ben sa kon neleki Gado efu a ben nyan fu a froktu, dan Eva ben bribi dati. Fu dati ede Eva ben nyan. Adam ben nyan tu. Adam nanga Eva no ben gi yesi na Gado. Dati meki den ben lasi den tanpe, a moi dyari.

Ma wan dei Gado sa sorgu taki heri grontapu sa kon moi baka neleki a dyari fu Eden. Bakaten wi sa leri fa yu kan yepi nanga a wroko dati. Ma meki wi go luku fosi san ben pasa nanga Adam nanga Eva.