Yakob en bigi osofamiri

LUKU a bigi osofamiri disi pikinso. Disi na den 12 manpikin fu Yakob. A ben abi umapikin tu. Yu sabi den nen fu ala den pikin? Kon wi go leri wan tu fu den nen.

Lea ben meki Ruben, Simeon, Leifi nanga Yuda. Di Rakel ben si taki a no ben e kisi pikin, a ben sari tumusi. Fu dati ede a ben gi en umafutuboi Bilha na Yakob. Bilha ben kisi tu manpikin, di ben nen Dan nanga Naftali. Ne Lea ben gi sosrefi en umafutuboi Silpa na Yakob. Silpa ben kisi Gad nanga Aser. Te fu kaba, Lea ben kisi ete tu manpikin, Isaskar nanga Seibulon.

Now fosi Rakel ben man fu kisi wan pikin. A ben kari en Yosef. Bakaten wi sa leri moro furu fu Yosef, bika a ben tron wan tumusi prenspari sma. Disi ben de den 11 manpikin fu Yakob, di a ben kon abi na a ten di a ben e libi na Rakel papa, Laban.

Yakob ben abi umapikin tu, ma Bijbel e kari a nen fu soso wán fu den. A nen fu en ben de Dina.

Te fu kaba, Yakob ben teki a bosroiti fu gowe libi Laban èn go baka na Kanan. A ben tyari en bigi osofamiri nanga en bigi ipi skapu nanga kaw kon makandra. Ne a ben bigin waka a langa pasi fu en.

Baka di Yakob nanga en osofamiri ben de wan pisi ten kaba na Kanan, dan Rakel ben kisi ete wan manpikin. Disi ben pasa di den ben de na pasi e go na wan tra presi. Rakel ben abi wan tranga ten. A ben dede na a ten di a ben e meki a pikin. Ma noti ben pasa nanga a beibi. Yakob ben kari a beibi Benyamin.

Wi wani hori den nen fu den 12 manpikin fu Yakob na ede, bika a heri nâsi Israel komoto fu den. Den 12 lo fu Israel ben tyari a nen fu 10 fu den manpikin fu Yakob nanga den 2 manpikin fu Yosef. Isak ben libi furu yari ete, baka di ala den manpikin disi mama ben meki den. Isak ben musu fu prisiri fu si someni granpikin. Ma meki wi go luku now san ben pasa nanga en granpikin Dina.