Yakob e go na Haran

YU SABI suma na den man di Yakob e taki nanga den? Baka di Yakob ben waka furu dei, a ben miti den na wan peti. Den ben e luku den skapu fu den. Yakob ben aksi: ’Pe unu komoto?’

’Na Haran’, den ben taki.

’Unu sabi Laban?’ Yakob ben aksi.

’Iya’, den ben piki. ’Luku, drape en umapikin Rakel e kon nanga den skapu fu en.’ Yu e si Rakel e kon drape?

Di Yakob ben si Rakel nanga den skapu fu en omu Laban, a ben lolo a ston puru na a peti, so taki den skapu ben man dringi. Ne a ben bosi Rakel. A ben fruteri Rakel suma na en. Nanga prisiri Rakel ben go na oso fu fruteri en papa Laban a nyunsu.

Laban ben prisiri srefisrefi taki Yakob ben kon tan nanga en. Èn di Yakob ben aksi fu trow nanga Rakel, Laban ben breiti. Ma a ben aksi Yakob fu wroko seibi yari na tapu en gron fu kisi Rakel. Yakob ben du disi, fu di a ben lobi Rakel so te. Ma yu sabi san ben pasa, di a ten fu a trow ben doro?

Laban ben gi Yakob en moro bigi umapikin Lea na presi fu Rakel. Di Yakob ben agri fu wroko seibi yari moro gi Laban, dan Laban ben gi en Rakel tu leki en wefi. Na a ten dati Gado ben gi pasi fu mansma abi moro leki wán wefi. Ma now, soleki fa Bijbel e sori, dan wan man mag abi wán wefi nomo.