Fu a frulusu komoto na Egepte teleki a fosi kownu fu Israel

Moses ben tyari den Israelsma komoto na a katibo na Egepte go na a Sinaibergi, pe Gado ben gi den den wet fu en. Bakaten, Moses ben seni 12 man go luku a kondre Kanan na wan kibri fasi. Ma tin fu den ben kon baka nanga wan takru nyunsu. Den ben meki taki a pipel ben wani fu drai go baka na Egepte. Fu di den ben mankeri bribi, meki Gado ben strafu den Israelsma. A ben meki den waka lontu 40 yari langa na ini a sabana.

Te fu kaba, dan Yehovah ben teki Yosua fu tyari den Israelsma go na a kondre Kanan. Fu yepi den teki a kondre abra, dan Yehovah ben meki wondru pasa. A ben meki Yordanliba tapu fu lon, den skotu fu Yerikow fadon broko, èn a son tan tanapu wan heri dei. Baka siksi yari, den ben wini a kondre puru na a anu fu den Kanansma.

Fu bigin nanga Yosua, dan krutuman ben tiri Israel 356 yari langa. Wi e leri fu furu fu den, soleki Barak, Gideon, Yefta, Simson, nanga Samuel. Wi e leisi sosrefi fu den uma leki Rakab, Debora, Yael, Rut, Naomi nanga Delaila. Ala nanga ala, Pisi 3 e taki fu 396 yari historia.