PISI 8
Den Israelsma e go na ini Kanan
Den Israelsma e teki Kanan abra, nanga yepi fu Yosua di de den fesiman. Yehovah e gi den krutuman a makti fu frulusu en pipel fu a pina di den e pina
HONDROHONDRO yari bifo den Israelsma go na ini Kanan, Yehovah ben pramisi Abraham taki den bakapikin fu en ben o kisi a kondre dati. Now, nanga yepi fu Yosua, di de a fesiman, den Israelsma de fu teki a Pramisi Kondre abra.
Gado ben krutu den Kanansma èn fu dati ede den ben musu kisi pori. Den ben pori a kondre fu di den ben libi wan morsu sekslibi èn den ben kiri bun furu sma fu soso. Fu dati ede, te den Israelsma ben teki wan foto abra, dan den ben musu pori en krinkrin.
Ma bifo den go na ini a kondre, Yosua seni tu man go luku a kondre na wan kibri fasi. Den man disi ben tan na ini a foto Yerikow, na wan uma di nen Rakab. Na uma disi teki den man na ini en oso èn a kibri den aladi a ben sabi taki den ben de Israelsma. Rakab ben abi bribi na ini a Gado fu den Israelsma, fu di a ben yere san Yehovah ben du fu frulusu en pipel. Rakab ben meki den man sweri taki den no ben o kiri en nanga en famiri.
Bakaten, di den Israelsma go na ini Kanan èn den go feti teige Yerikow, dan na wan wondru fasi Yehovah meki den skotu fu Yerikow broko fadon. A legre fu Yosua lon go na inisei èn den pori a foto, ma den no kiri Rakab nanga en famiri. Baka dati, na ini wan pisi ten fu siksi yari, Yosua teki bigi pisi fu a Pramisi Kondre abra. Bakaten, den prati a kondre gi den lo fu Israel.
Na a kaba fu Yosua en wroko leki fesiman, a kari a pipel kon makandra. A ben memre den na a fasi fa Yehovah ben handri nanga den afo fu den èn a gi den a deki-ati fu tan dini Yehovah. Ma baka di Yosua nanga den man di ben e wroko makandra nanga en, dede, dan den Israelsma drai baka gi Yehovah èn den go dini falsi gado. Sowan 300 yari, a pipel no tan gi yesi na den wet fu Yehovah. Na a ten dati, Yehovah ben gi pasi taki den feanti fu Israel, soleki den Filisteasma, pina den. Ma di den Israelsma bari kari Yehovah fu yepi den, a poti krutuman fu frulusu den. Ala nanga ala a ben poti 12 krutuman.
A buku Krutuman e taki fu a pisi ten fu den krutuman, di ben bigin nanga Otniyel èn di ben kaba nanga Simson, a moro tranga man di ben libi. A prenspari tru tori di e kon na krin ibri leisi baka na ini a span tori di skrifi na ini a Bijbel buku Krutuman, na disi: Te sma e gi yesi na Yehovah, dan dati e tyari blesi kon, èn te sma e trangayesi en, dan dati e tyari rampu kon.
—Den tori disi teki puru fu Yosua; Krutuman; Lefitikus 18:24, 25.