Wan buriki e taki

YU YERE wan dei kaba fu wan buriki di ben man taki? ’Nôno’, yu sa taki kande. ’Meti no man taki.’ Ma Bijbel e taki fu wan buriki di ben man taki. Meki wi go luku fa dati ben du kon.

Pikinmoro den Israelsma klari fu go na a kondre Kanan. Balak, a kownu fu Moab, frede den Israèlsma. Fu dati ede a e seni kari wan man nanga triki, di nen Bileam, fu kon fluku den Israelsma. Balak e pramisi fu gi Bileam bun furu moni; fu dati ede Bileam e dyompo na tapu en buriki, èn a e teki pasi go na Balak.

Yehovah no wani Bileam fluku en pipel. Fu dati ede a e seni wan engel nanga wan langa feti-owru go tanapu na a pasi fu tapu Bileam. Bileam no man si na engel, ma en buriki man si en. Fu dati ede a buriki e tan pruberi fu wai komoto gi na engel. Te fu kaba a buriki e kanti didon na tapu a pasi. Bileam ati e bron srefisrefi, a e naki en buriki nanga wan tiki.

Dan Yehovah e meki Bileam yere en buriki e taki nanga en. ’San mi du yu, taki yu e naki mi?’ a buriki e aksi.

’Yu meki mi de leki wan lawman’, Bileam e taki. ’Efu mi ben abi wan feti-owru, mi ben o kiri yu!’

’Oiti mi du so nanga yu kaba?’ a buriki e aksi.

’Nôno’, Bileam e piki.

Dan Yehovah e meki Bileam si na engel nanga a feti-owru na tapu a pasi. Na engel e taki: ’Fu san ede yu naki yu buriki? Mi kon fu tapu a pasi fu yu, fu di yu no musu go fu fluku Israel. Efu a buriki fu yu no ben wai komoto gi mi, mi ben o kiri yu kaba, ma mi no ben o du a buriki fu yu ogri.’

Bileam e taki: ’Mi sondu. Mi no ben sabi taki yu ben tanapu na tapu a pasi.’ Na engel e meki Bileam go èn Bileam e hari go na Balak. Toku a e pruberi ete fu fluku Israel, ma na presi fu dati, Yehovah e meki a blesi Israel dri tron.