A buriki fu Bileam e taki

Den Israelsma ben de na ini a sabana bijna 40 yari kaba. Den wini furu tranga foto. Now a ten ben doro fu go na ini a Pramisi Kondre. Den seti den kampu na ini a lagipresi fu Moab, na a owstusei fu Yordan-liba. Balak, a kownu fu Moab, ben frede taki a ben o lasi a kondre fu en. Dati meki a kari wan man di ben nen Bileam kon na Moab èn a aksi en fu fluku den Israelsma.

Ma Yehovah taigi Bileam: ’Yu no musu fluku den Israelsma.’ Dati meki Bileam no ben wani go. Ma Kownu Balak seni kari en ete wan leisi èn a pramisi en taki a ben o gi en ala san a wani. Toku Bileam no ben wani go. Bakaten Gado taki: ’Yu kan go, ma yu musu taki soso san mi taigi yu.’

Bileam teki en buriki, dan a hari go na Moab di ben de na zuidsei. A ben abi na prakseri fu fluku den Israelsma, aladi Yehovah ben taigi en fu no du dati. Na engel fu Yehovah go tanapu na tapu a pasi dri leisi. Bileam no ben man si na engel, ma a buriki fu en ben man si en. A fosi leisi a buriki komoto na a pasi, dan a go na ini wan gron. A di fu tu leisi a buriki pusu ensrefi go na wan skotu, dan a kwinsi Bileam futu na a skotu. A di fu dri leisi a buriki go didon na tapu a gron na mindrisei fu a pasi. Ala dri leisi Bileam naki a buriki nanga wan tiki.

Baka a di fu dri leisi, Yehovah meki a buriki taki. A buriki aksi Bileam: ’San mi du yu so, di yu e naki mi?’ Bileam taki: ’Yu e gi mi syen. Efu mi ben abi wan feti-owru mi ben o kiri yu.’ A buriki taki: ’Mi tyari yu na tapu mi baka someni yari kaba. Oiti mi du a sani disi nanga yu?’

Ne Yehovah meki Bileam si na engel. Na engel taki: ’Yehovah warskow yu fu no fluku den Israelsma.’ Bileam taki: ’Mi no du bun. Mi o drai go baka na oso.’ Ma na engel taigi en: ’Yu kan go na Moab, ma yu musu taki soso san Yehovah o taigi yu.’

Bileam leri wan sani? Nôno. Baka dati, Bileam pruberi fu fluku den Israelsma dri leisi. Ma ala leisi Yehovah meki a fluku tron wan blesi. Te fu kaba den Israelsma go feti nanga Moab, dan den kiri Bileam. A no ben o moro bun efu Bileam ben arki Yehovah?