Loekoe boen nanga falsi leriman!
„Falsi leriman sa de toe na mindri foe oenoe.” — 2 PETRUS 2:1.
1. Sortoe sani Judas ben abi na prakseri foe skrifi, èn foe san ede a ben go abra tapoe wan tra tori?
DATI na wan sani di e skreki sma! Falsi leriman na ini a fosi jarihondro kresten gemeente! (Mateus 7:15; Tori foe den Apostel 20:29, 30) Jesus en afoe-brada Judas ben sabi taki a sani disi ben e pasa. A ben taki dati a ben abi na prakseri foe skrifi kompe bribiman „foe a froeloesoe di wi abi makandra”, ma a ben froeklari: „Mi ben feni en fanowdoe foe skrifi oenoe foe froemane oenoe foe feti wan tranga feti gi a bribi.” Foe san ede Judas ben go abra tapoe wan tra tori? Foe di, na so a ben taki, „wan toe man kon na inisei [foe den gemeente] . . . di e kenki a no-froedini boen-atifasi foe wi Gado, kon tron wan reide foe tjari densrefi na wan loesoe fasi foe libi”. — Judas 3, 4.
2. Foe san ede 2 Petrus kapitel 2 nanga Judas e kroederi so nanga makandra?
2 Soleki fa a sori, dan Judas ben skrifi sjatoe baka di Petrus ben skrifi en di foe toe brifi. Tweifri no de taki Judas ben sabi a brifi disi. Seiker, na ini a krakti brifi di ensrefi ben skrifi foe froemane sma, a ben taki foe wan lo prakseri di ben kroederi nanga di foe Petrus brifi. Foe dati ede, te wi e ondrosoekoe 2 Petrus kapitel 2, dan wi sa si fa a e kroederi nanga a brifi foe Judas.
Den bakapisi foe falsi leri
3. San ben pasa na ini a ten di pasa èn di Petrus ben taki dati a ben o pasa baka?
3 Baka di Petrus gi den brada foe en tranga foe poti prakseri na tapoe profeititori, a e taki: „Ma falsi profeiti ben kon toe [na ini Israèl foe owroeten], neleki fa falsi leriman sa de toe na mindri foe oenoe” (2 Petrus 1:14–2:1). Gado en pipel na ini owroeten ben kisi troe profeititori, ma den ben moesoe kakafoetoe toe gi den pori leri foe falsi profeiti (Jeremia 6:13, 14; 28:1-3, 15). „Na den profeiti foe Jerusalem”, na so Jeremia ben skrifi, „mi si ogri sani: a doe di den e doe soetadoe èn a waka di den e waka na ini leitori.” — Jeremia 23:14.
4. Foe san ede falsi leriman e froedini en foe kisi pori?
4 Petrus, di e froeteri san falsi leriman ben o doe na ini a kresten gemeente, e taki: „Na kibrifasi, den disi sa tjari sekte kon di e pori sma, èn srefi na a eiginari [Jesus Krestes] di ben bai den, den e sori taki den no wani sabi en, èn na so fasi den tjari wan esi-esi pori kon na tapoe densrefi” (2 Petrus 2:1; Judas 4). Te foe kaba, a bakapisi foe den sortoe sekte disi di ben de na ini a fosi jarihondro, na a krestenhèit soleki fa wi sabi en na ini a ten disi. Petrus e sori foe san ede falsi leriman e froedini en srefisrefi foe kisi pori: „Foeroe sma sa waka baka a loesoe fasi fa den e libi, èn na foe den sani disi ede meki sma no sa taki boen foe a pasi foe waarheid.” — 2 Petrus 2:2.
5. Gi sortoe sani den falsi leriman ben de frantiwortoe?
5 Prakseri foe a sani disi! Leki wan bakapisi foe a krakti di falsi leriman abi na tapoe sma, foeroe sma na ini den gemeente ben o kisi foe doe nanga wan loesoe fasi foe libi. A Griki wortoe di vertaal nanga „loesoe fasi foe libi” e sori tapoe a dwengi di sma no man dwengi den firi foe den, a e sori tapoe wan jajo libi, wan sjen fasi fa wan sma e tjari ensrefi. Petrus ben taki na fesi kaba dati kresten ben „lowe foe a pori di de na grontapoe foe a lostoe ede” (2 Petrus 1:4). Ma son sma ben o go libi wan pori libi baka, èn foenamkoe falsi leriman na ini den gemeente ben o de frantiwortoe foe dati! Na so fasi a pasi foe waarheid ben o kisi wan takroe nen. Fa dati de wan sari sani! Seiker, disi na wan sani di ala Kotoigi foe Jehovah na ini a ten disi moesoe hori boen na prakseri. Noiti wi no moesoe frigiti taki, nanga a fasi fa wi e tjari wisrefi, wi kan prèise Jehovah Gado nanga a pipel foe en noso wi kan tjari sjen kon na den tapoe. — Odo 27:11; Romesma 2:24.
Meki sma kon sabi falsi leri
6. Sortoe reide falsi leriman abi, èn fa den e doe moeiti foe kisi san den wani?
6 A ben sa de wan koni sani foe go loekoe fa falsi leriman e meki sma kon sabi den pori prakseri foe den. Petrus e taki fosi dati den e doe disi na wan kibri fasi, noso na wan fasi di no de krin foe si, na wan triki fasi. A e taki moro fara: „Nanga gridifasi den sa soekoe foe kisi oenoe nanga leitori.” Den falsi leriman e doe disi foe den eigi lostoe foe den ede, soleki fa disi e kon na krin na ini a vertaling foe The Jerusalem Bible: „Den sa proeberi fajafaja foe bai oenoe gi densrefi nanga bedrigi taki.” A James Moffatt vertaling e taki a srefi sani dja: „Na ini den lostoe foe den den sa wroko na oen tapoe nanga koni takitaki” (2 Petrus 2:1, 3). Den sani di den falsi leriman e taki, kan gersi wan switi sani gi wan sma di no de na ai na jejefasi, ma nanga koni den e taki den wortoe foe den spesroetoe „foe bai” sma, foe kori den meki den doe sani soso foe a boen foe den eigi lostoe foe den bedrigiman.
7. Sortoe filosofia ben kon tron wan pôpi sani na ini a fosi jarihondro?
7 Wi no abi foe tweifri taki a grontapoe fasi fa sma ben e denki na ini a ten dati, ben abi krakti na tapoe den fosi jarihondro falsi leriman. Na a ten di Petrus ben skrifi a brifi foe en, wan filosofia di den ben kari Gnostisisme ben e tron wan pôpi sani. Gnostis-sma ben bribi taki ala sani takroe èn soso a sani di abi foe doe nanga a jeje, boen. So boen, son wan foe den ben taki dati a no abi bisi san wan sma e doe nanga en skin. Baka wan pisi ten, na so den ben taki, wan sma no ben o abi a skin disi moro. Foe dati ede, na so den ben bosroiti, sondoe na skin sei — so srefi na seks sei — no de prenspari. Soleki fa a sori, dan den sortoe prakseri disi ben bigin abi krakti na tapoe wan toe foe den sma di ben kari densrefi kresten.
8, 9. (a) Sortoe kroektoe prakseri ben abi krakti na tapoe son kresten foe fositen? (b) San son sma ben doe na ini a gemeente, soleki fa Judas e froeteri?
8 Wan bijbel sabiman ben taki dati „sma ben de na ini a Kerki di ben pori a leri foe a genade” noso „no-froedini boen-atifasi” (Efeisesma 1:5-7). Soleki fa a e taki, dan son sma ben taki so wan sani so: „Joe e taki dati a [no-froedini boen-atifasi] foe Gado bigi nofo foe tapoe ibri sondoe? . . . Dan meki wi tan doe sondoe, bika a [no-froedini boen-atifasi] foe Gado kan figi ibri sondoe poeroe. Te joe loekoe en boen, dan o moro wi e sondoe, o moro okasi sa de foe meki a [no-froedini boen-atifasi] foe Gado wroko.” Oiti joe jere so wan kroeka prakseri leki a wan disi?
9 Na apostel Paulus ben poti prakseri na tapoe a fowtoe prakseri di sma ben abi foe a sari-atifasi foe Gado, di a ben aksi: „Wi sa tan na ini sondoe, so taki a no-froedini boen-atifasi kan de pasa marki?” A ben aksi toe: „Wi sa doe wan sondoe foe di wi no de na ondro a wet, ma na ondro a no-froedini boen-atifasi?” Na tapoe ibri aksi Paulus ben gi wan krakti piki: „Meki dati no pasa noiti!” (Romesma 6:1, 2, 15) Soleki fa Judas e taki, dan a de krin taki son sma ben „kenki a no-froedini boen-atifasi foe wi Gado, kon tron wan reide foe tjari densrefi na wan loesoe fasi foe libi”. Ma Petrus e taki dati gi den sortoe sma dati „a pori di den sa kisi no e sribi”. — Judas 4; 2 Petrus 2:3.
Eksempre di de leki wan warskow
10, 11. Sortoe dri eksempre di de leki wan warskow, Petrus e gi wi?
10 Foe poti krakti na tapoe a tori taki Gado sa doe wan sani nanga sma di e doe ogri foe espresi, meki Petrus e kon nanga dri eksempre foe bijbel di de leki wan warskow. Fosi, a e skrifi: „Gado no ben meki noti tapoe en foe strafoe den engel di ben sondoe.” Den disi, na so Judas e taki, „no ben hori a posisi foe den di den ben abi biginbigin, ma di ben gowe libi den eigi reti tanpresi” na ini hemel. Den ben kon na grontapoe bifo a Froedoe èn den ben teki libisma skin so taki den ben kan abi seks nanga den oemapikin foe libisma. Foe di den engel ben tjari densrefi na wan kroektoe fasi di ben de teige a natoeroe, meki a strafoe di den ben kisi, ben de taki den ben trowe den go na ini „Tartarus”, noso soleki fa a tori foe Judas e taki, den „ben kibri den nanga têgo banti na ondro blaka doengroe gi a kroetoe foe a bigi dei”. — 2 Petrus 2:4; Judas 6; Genesis 6:1-3.
11 Baka dati, Petrus e taki foe den sma foe a ten foe Noa (Genesis 7:17-24). A e taki dati na ini a ten foe Noa Gado „no ben meki noti tapoe en foe strafoe wan owroeten grontapoe . . . di a ben tjari wan froedoe kon na tapoe wan grontapoe foe godelowsoe sma”. Te foe kaba, Petrus e skrifi taki Gado ben poti „wan eksempre gi godelowsoe sma foe sani di ben sa moesoe pasa ete”, foe di „a ben pori den foto foe Sodom nanga Gomora kon tron asisi”. Judas e taki moro fara dati den sma dati „ben doe soetadoe pasa marki . . . èn ben go baka skin foe gebroiki dati na wan fasi di de teige a natoeroe” (2 Petrus 2:5, 6; Judas 7). No wawan a ben de so, taki mansma ben abi seks hoeroedoe nanga oemasma, ma den ben abi lostoe gi a skin foe tra mansma, kande srefi gi a skin foe meti sondro froestan. — Genesis 19:4, 5; Lefitikus 18:22-25.
12. Fa wan sma e kisi en paiman te a e libi na wan regtfardiki fasi, soleki fa Petrus e froeteri?
12 Ma tokoe, na a srefi ten dati, Petrus e taki dati Jehovah na wan sma di e pai den wan di e dini en na wan getrow fasi. Foe eksempre, a e froeteri fa Gado ben „gi Noa, wan preikiman foe regtfardikifasi kibri, makandra nanga seibi trawan”, di A ben tjari a Froedoe kon. A e froeteri toe foe a froeloesoe di Jehovah ben gi a „regtfardiki Lot” na ini a ten foe Sodom, èn a e bosroiti nanga den wortoe: „Jehovah sabi fa foe froeloesoe sma di gi densrefi na ini a dini foe en, komoto na tesi, ma a e kibri den onregtfardikisma gi a kroetoedei foe kan koti den poeroe.” — 2 Petrus 2:5, 7-9.
Sani di e froedini strafoe
13. Soema den kibri spesroetoe foe kisi kroetoe, èn soleki fa a sori, dan na sortoe dren den e gi densrefi abra?
13 Petrus e taki foe den sma di Gado poti aparti spesroetoe foe den kisi a kroetoe foe en, namkoe, „den wan di e go na baka skin nanga a lostoe foe doti en èn di e wisiwasi tirimakti”. Pikinmoro wi kan firi na atibron foe Petrus, te a e taki: „Den de asranti èn abi tranga-ede èn den no e beifi gi den gloriwan, ma den e taki na wan skempi fasi.” Judas e skrifi taki „den man disi . . . e gi densrefi abra na dren, e doti a skin . . . èn den e pori a nen foe den santawan” (2 Petrus 2:10; Judas 8). Den dren foe den kan de doti seks prakseri toe di e meki den doe moro moeiti foe satisferi den seks lostoe foe den na wan hoeroedoe fasi. Ma na sortoe fasi den e „wisiwasi tirimakti” èn den e taki „na wan skempi fasi foe den santawan”?
14. Na sortoe fasi falsi leriman „e wisiwasi tirimakti” èn e taki „na wan skempi fasi foe den gloriwan”?
14 Den e doe disi foe di den e wisiwasi a makti di ben poti nanga jepi foe Gado. Kresten owroeman e handri ini a presi foe a glori Gado Jehovah nanga en Manpikin èn, leki wan bakapisi foe dati, den kisi wan seiker glori na den tapoe. A troe taki den e meki fowtoe, soleki fa Petrus srefi ben doe, ma bijbel e gi memre foe a gemeente tranga foe saka densrefi na ondro den gloriwan disi (Hebrewsma 13:17). Den fowtoe di den e meki no de wan reide foe taki foe den na wan skempi fasi. Petrus e taki dati den engel „no e taki no wan skempi wortoe foe kragi teige [den falsi leriman]”, ala di den ben o froedini dati troetroe. „Ma den sma disi,” na so Petrus e go doro, „neleki meti di no abi froestan èn di gebore nomo foe sma fanga den èn kiri den, na ini den sani di den no sabi èn e taki na wan skempi fasi, sa kisi wan pori na ini den eigi porifasi foe den srefi.” — 2 Petrus 2:10-13.
„Ala di den e hori fesa . . . nanga oenoe”
15. San na den fasi di falsi leriman e gebroiki, èn pe den e doe moeiti foe kori sma?
15 Ala di den kroeka man disi „e si wan goedoe libi na deiten leki wan prisiri sani” èn den na „flaka nanga fowtoe”, den abi bedrigifasi toe. Den e handri na wan „kibri fasi” foe di den e gebroiki „leitori”, soleki fa Petrus ben taki na fesi (2 Petrus 2:1, 3, 13). So boen, kande den no e kroetoe den moeiti langalanga di den owroeman e doe foe hori den moreel markitiki foe Gado hei noso e feti na wan krin fasi na baka den eigi seks lostoe. Nôno, Petrus e taki dati „sondro foe dwengi densrefi den e gi densrefi abra nanga prisiri na den bedrigi leri foe den, ala di den e hori fesa makandra nanga oenoe”. Èn Judas e skrifi: „Den sma disi na den klipston di kibri na ondro watra na tapoe den lobi fesa foe oenoe” (Judas 12). Ija, neleki fa srapoe klipston na ondro watra kan priti na ondrosei foe wan boto opo, èn e meki taki seiriman di no de na ai, e soengoe, na so falsi leriman ben e pori sma di no ben de na ai, gi soema den ben doe neleki den ben abi lobi na tapoe „lobi fesa”.
16. (a) San ben de „lobi fesa”, èn na ini sortoe situwâsi hoeroedoe man e doe den sani foe den kande, na ini a ten disi? (b) Na tapoe soema den falsi leriman e poti den prakseri foe den, so boen san den sortoe sma dati moesoe doe?
16 Soleki fa a sori, dan den „lobi fesa” disi ben de prisiri okasi te den fosi jarihondro kresten ben kon makandra foe njan èn foe abi demakandra. Son leisi Jehovah Kotoigi e kon makandra toe foe abi prisiri, kande na wan trow-oso, te den e go koiri, noso wan neti foe prisiri demakandra. Fa kroeka sma ben kan gebroiki den sortoe okasi disi foe kori trawan? Petrus e skrifi: „Den abi ai di foeroe nanga soetadoe . . . , èn den e kori den sili di no e tanapoe kánkan.” Den e poti den „ati [foe den] di den oefen foe abi bigi-ai”, na tapoe den sma di no e tanapoe kánkan na jejefasi èn di no ben meki a waarheid kon tron wan troetroe pisi foe densrefi. So boen, meki a sani di ben pasa na ini a ten foe Petrus, de wan warskow gi wi na fesi, èn loekoe boen! Kakafoetoe gi iniwan morsoe sani di wan sma e aksi noso e doe, èn no meki a switifasi noso a moi skin foe wan sma di e aksi joe foe doe wan hoeroedoe sani, kori joe! — 2 Petrus 2:14.
„A pasi foe Bileam”
17. San ben de a „pasi foe Bileam”, èn fa dati ben abi krakti na tapoe 24.000 Israèlsma?
17 Den „froefroektoe” sma disi ben sabi waarheid wan pisi ten kaba. Kande a gersi leki den de aktief ete ini a gemeente. Ma Petrus e taki: „Foe di den gowe libi a reti pasi, meki sma kori den. Den waka a pasi foe Bileam, a manpikin foe Beor, di ben lobi a paiman foe ogridoe” (2 Petrus 2:14, 15). A pasi foe profeiti Bileam ben de foe gi rai di ben o kori sma foe doe hoeroedoe, so taki a ben kan kisi wini foe dati. A ben taigi kownoe Balak foe Moab taki Gado ben o floekoe Israèl efoe a ben kan kori a pipel foe doe hoeroedoe. A bakapisi ben de, taki den oema foe Moab ben kori wan lo sma foe a pipel foe Gado, èn 24.000 foe den ben dede foe di den ben doe hoeroedoe. — Numeri 25:1-9; 31:15, 16; Openbaring 2:14.
18. Sortoe fasti bosroiti Bileam ben abi, èn san a bakapisi di a kisi e sori san e wakti falsi leriman?
18 Petrus e taki dati di a boeriki foe Bileam ben taki nanga en, dan dati ben tapoe pasi gi en, ma tokoe Bileam „ben lobi a paiman foe ogridoe” someni taki srefi di dati ben pasa, a no ben tapoe nanga a „law pasi” foe en (2 Petrus 2:15, 16). Dati ben de wan godelowsoe sani troetroe! Heloe foe iniwan sma di de leki Bileam èn di e proeberi foe pori a pipel foe Gado foe di a e kori den foe doe hoeroedoe! Bileam ben dede foe a takroedoe foe en ede, wan sani di e sori san sa pasa nanga ala den sma di e waka a pasi foe en. — Numeri 31:8.
A didibrifasi fa den e kori sma
19, 20. (a) Nanga sortoe sani den e agersi sma di gersi Bileam, èn foe san ede? (b) Soema den e kori, èn fa? (c) Foe san ede wi kan taki dati a fasi fa den e kori sma, na wan didibri sani, èn fa wi kan kibri wisrefi èn tra sma so taki den no kisi wi?
19 Te Petrus e taki foe den sma di gersi Bileam, dan a e skrifi: „Den disi na fonten [noso, peti] sondro watra èn dampoe [noso wolkoe] di wan krasi winti e wai kon.” Wan drei peti wani taki dede kande gi wan sma di abi dreiwatra èn di e waka na ini wan woestijn. A no de foe froewondroe taki „a deki blaka foe doengroe kibri” gi den sma di gersi den sani disi! „Bika den e taki bigi wortoe di no e tjari wini kon,” na so Petrus e go doro, „èn nanga jepi foe a lostoe foe a skin èn nanga a loesoe fasi foe libi di den gwenti, den e kori den sma di didjonsro komoto na den sma di e tjari densrefi na wan sondoe fasi.” Den e kori den sma di no abi ondrofeni, foe di den „e pramisi den fri”, na so Petrus e taki, ala di „densrefi de srafoe foe porifasi”. — 2 Petrus 2:17-19; Galasiasma 5:13.
20 Den sortoe pori leriman dati e kori sma na wan didibri fasi. Foe eksempre, kande den e taki: ’Gado sabi taki wi swaki èn taki wi abi tranga lostoe. So boen, efoe wi e gi wisrefi abra na prisiri èn e satisferi den seks lostoe foe wi, dan Gado sa abi sari-ati. Efoe wi e bekènti den sondoe foe wi, dan a sa gi wi pardon neleki fa a ben doe di wi ben kon na ini waarheid biginbigin.’ Memre taki Didibri ben gebroiki wan srefi sortoe fasi di a ben taki nanga Eva, èn a ben pramisi Eva taki a ben kan sondoe sondro foe kisi strafoe. Ini a tori foe Eva, a ben taki dati sondoe teige Gado ben o gi Eva moro koni nanga fri (Genesis 3:4, 5). Efoe a e pasa taki wi e kisi foe doe nanga so wan pori sma di de na ini a gemeente, dan wi abi wan froeplekti foe soekoe kibri gi wisrefi èn gi trawan, foe di wi e taigi den sma di abi frantiwortoe na ini a kresten gemeente, foe a sma dati. — Lefitikus 5:1.
Soifri sabi e gi wi kibri
21-23. (a) San na den bakapisi te wi no e gebroiki soifri sabi? (b) Sortoe tra problema di Petrus e taki foe en, wi sa go loekoe now?
21 Petrus e bosroiti a pisi disi foe en brifi, foe di a e taki foe den bakapisi di e kon te wi no e gebroiki a sabi di a ben taki kaba na fesi dati a de prenspari gi „libi èn a gi di wi gi wisrefi ini a dini foe Gado” (2 Petrus 1:2, 3, 8). A e skrifi: „Seiker, efoe den e kisi foe doe baka nanga den srefi sani disi, baka di den komoto na den doti sani foe grontapoe nanga jepi foe wan soifri sabi foe a Masra èn Froeloesoeman Jesus Krestes, èn den srefi sani disi e teki den abra agen, dan a lasti situwâsi kon moro ogri gi den baka ten leki a fosiwan” (2 Petrus 2:20). Dati na wan sari sani troetroe! Den sma dati na ini a ten foe Petrus ben trowe a diri howpoe foe libi na hemel sondro foe man dede, gi wan sjatoe pisi ten foe seks prisiri.
22 Dati meki Petrus e taki: „A ben o de moro betre gi den efoe den no ben sabi soifri san na a pasi foe regtfardikifasi, dan leki baka di den kon sabi en soifri, den drai baka gi a santa komando di ben gi abra na den. A wortoe foe a troe odo pasa nanga den: ’A dagoe drai go baka na en eigi pio, èn na agoe di ben wasi kaba, go lolo baka na ini tokotoko.’” — 2 Petrus 2:21, 22; Odo 26:11.
23 A sori leki wan tra problema di ben bigin abi krakti na tapoe den kresten foe fositen, ben gersi wan problema di abi krakti na tapoe son kresten na ini a ten disi. Na a ten dati, a sori leki son wan ben kragi foe a gersi di a ben gersi leki a pramisi denoja foe Krestes no ben e kon. Kon meki wi ondrosoekoe fa Petrus e taki foe a tori disi.
Joe e memre disi ete?
◻ Foe sortoe dri eksempre di de leki wan warskow, Petrus e taki?
◻ Fa falsi leriman „e wisiwasi tirimakti”?
◻ San na a pasi foe Bileam, èn fa den sma di e waka a pasi disi kan proeberi foe kori trawan?
◻ San na den bakapisi te wan sma no e gebroiki soifri sabi?
[Prenki na tapoe bladzijde 16, 17]
Bileam de leki wan eksempre foe warskow wi